NĀ ʻŌLELO AKAMAI A SOLOMONA 2 - Ka Baibala Hemolele

MOKUNA II.

¹ ¶ E kuʻu keiki, inā e lawe ʻoe i kaʻu mau ʻōlelo, A e waiho pū me ʻoe i koʻu kānāwai;

² E hāliu mai kou pepeiao i ka naʻauao, A e huli kou naʻau i ka ʻike;

³ Inā paha e hea aku ʻoe i ka ʻike, A e ō aku kou leo i ka naʻauao;

⁴ Inā e ʻimi aku ʻoe iā ia me he kālā lā, A e huli hoʻi iā ia me he waiwai huna lā;

⁵ A laila, e ʻike ʻoe i ka makaʻu iā Iēhova, A e loaʻa iā ʻoe ka ʻike i ke Akua.

⁶ No ka mea, na Iēhova e hāʻawi mai i ka naʻauao; Mai kona waha mai ka ʻike a me ka noʻiau.

⁷ Hoʻāno ʻē ʻo ia i ke ola no ka poʻe pono; He pākū ia no ka poʻe hele pololei;

⁸ E mālama i nā ala o ka mea hoʻopono, E kiaʻi hoʻi i ka ʻaoʻao o kona poʻe haipule.

⁹ A laila, e ʻike ʻoe i ka pono a me ka hoʻopono, A me ka pololei a me nā ʻaoʻao maikaʻi a pau.

¹⁰ No ka mea, e komo ka naʻauao i loko o kou naʻau, E ʻono hoʻi ka ʻike i kou ʻuhane.

¹¹ Na ke akamai ʻoe e mālama aku, ʻO ka noʻiau hoʻi ke kiaʻi iā ʻoe,

¹² E hoʻopakele iā ʻoe mai ka ʻaoʻao hewa aku, Mai ke kanaka hoʻi i wahaheʻe ka ʻōlelo;

¹³ Haʻalele lākou i ka ʻaoʻao pololei, I hele ai hoʻi ma nā ala o ka pouli.

¹⁴ ʻOliʻoli lākou ke hana hewa, Hauʻoli hoʻi lākou i ka ʻino o ka mea ʻaiā.

¹⁵ ʻO lākou ke hoʻokekeʻe i ko lākou hele ʻana, Kekeʻe wale hoʻi ma ko lākou ʻaoʻao;

¹⁶ I hoʻopakele ʻia ʻoe i ka wahine ʻē, I ka wahine malihini i hoʻomalimali ka ʻōlelo.

¹⁷ ʻO ia kai haʻalele i ke alakaʻi o kona wā ʻōpiopio, A hoʻopoina hoʻi i ka berita o kona Akua.

¹⁸ No ka mea, e hina ana kona hale i lalo i ka make, A ʻo kona mau ala hoʻi ma kahi o ka poʻe make.

¹⁹ ʻO ka poʻe a pau e komo aku i ona lā, ʻaʻole e hoʻi hou mai, ʻAʻole hoʻi e hiki aku lākou i ke ala o ke ola.

²⁰ I hele ʻoe ma ke ala o ka poʻe pono, I mālama hoʻi ʻoe i ka ʻaoʻao o ka poʻe pololei.

²¹ No ka mea, e noho paʻa ka poʻe maikaʻi ma ka ʻāina, A e mau nō ma laila ka poʻe pololei.

²² Akā, e ʻoki ʻia ana ka poʻe hewa mai loko aku o ka ʻāina, A e uhuki ʻia hoʻi ka poʻe lawehala ma laila aku.