NĀ ʻŌLELO AKAMAI A SOLOMONA 19 - Ka Baibala Hemolele

MOKUNA XIX.

¹ ¶ Maikaʻi ka mea ʻilihune i hele ma kona pololei, Ma mua o ka mea lehelehe wahaheʻe, a lapuwale hoʻi.

² ʻO ka ʻuhane i nele i ka ʻike, he pono ʻole ia; ʻO ka mea i wikiwiki nā wāwae, hele hewa nō ia.

³ ʻO ka lapuwale o ke kanaka, ʻo ia kai hoʻokāpae i kona ʻaoʻao; A ukiuki aku kona naʻau iā Iēhova.

⁴ ʻO ka waiwai ka mea e hoʻonui ai i nā makamaka; Ua hoʻokaʻawale ʻia hoʻi ka mea ʻilihune mai kona hoa noho aku.

⁵ ʻO ka mea hōʻike wahaheʻe, ʻaʻole e ʻole kona hoʻopaʻi ʻia mai; ʻO ka mea ʻōlelo wahaheʻe hoʻi, ʻaʻole ia e pakele.

⁶ Nui ka poʻe hoʻopili aku i ke aliʻi; He hoalauna hoʻi kēlā mea kēia mea no ke kanaka hāʻawi wale.

⁷ Pau loa ka poʻe hoahānau o ka mea nele i ke aloha ʻole iā ia; Haʻalele loa hoʻi kona mau hoalauna iā ia; Hahai ʻo ia me nā ʻōlelo, ʻaʻole lākou.

⁸ ʻO ka mea loaʻa iā ia ka naʻauao ʻo ia ke aloha i kona ʻuhane; ʻO ka mea hoʻopaʻa i ka ʻike, e loaʻa iā ia ka pono.

⁹ ʻO ka mea hōʻike wahaheʻe, ʻaʻole e ʻole kona ʻāhewa ʻia mai, ʻO ka mea ʻōlelo hoʻopunipuni, e make ʻo ia.

¹⁰ ʻAʻole i kūpono ka hanohano i ka mea lapuwale; ʻAʻole loa hoʻi i ke kauā, ke noho ma luna o nā aliʻi.

¹¹ ʻO ko ke kanaka naʻauao, ʻo ia ke hoʻopaneʻe aku i ka huhū; ʻO kona nani hoʻi, ʻo ia ke kala ʻana i ka hala.

¹² He uō ʻana me he liona lā ka huhū o ke aliʻi; E like hoʻi me ka hau ma ka weuweu kona lokomaikaʻi.

¹³ He mea pōʻino i ka makua kāne ke keiki lapuwale; He kulu mau ʻana ka hoʻopaʻapaʻa o ka wahine.

¹⁴ ʻO ka hale a me ka waiwai, ʻo ia ka hoʻoilina no nā mākua mai; Na Iēhova mai hoʻi ka wahine manaʻo pono.

¹⁵ ʻO ka palaualelo ka mea e pohō ai i loko o ka hiamoe nui; A ʻo ka ʻuhane hoʻomoloā, e pōloli nō ia.

¹⁶ ʻO ka mea mālama i ke kānāwai, ʻo ia kai mālama i kona ʻuhane; ʻO ka mea mālama ʻole i kona ʻaoʻao, e make nō ia.

¹⁷ ʻO ka mea manawaleʻa aku i ka ʻilihune, hāʻawi aku ʻo ia na Iēhova; A ʻo kāna mea i hāʻawi ai, na kēlā nō e hoʻihoʻi mai iā ia.

¹⁸ E haua i kāu keiki ʻoi lana ka manaʻo nona, Mai menemene kou ʻuhane no kona uē ʻana.

¹⁹ ʻO ka mea huhū nui, e hoʻouku ʻia ʻo ia; Inā paha e hoʻokuʻu aku ʻoe iā ia, pono e hana hou nō.

²⁰ E hoʻolohe i ka ʻōlelo aʻo, e hāliu hoʻi i ke aʻo ʻia mai, I naʻauao ʻoe i kou hopena.

²¹ Nui nā manaʻo ma loko o ka naʻau o ke kanaka, Akā, ʻo ka manaʻo o Iēhova, ʻo ia ke kūpaʻa.

²² ʻO ka nani o ke kanaka, ʻo ia kona lokomaikaʻi; Maikaʻi hoʻi ke kanaka ʻilihune ma mua o ka mea wahaheʻe.

²³ ʻO ka makaʻu iā Iēhova, ʻo ia ke ola; E noho ʻoluʻolu ʻo ia, ʻaʻole e ʻike mai ka hewa iā ia.

²⁴ Hoʻokomo ka mea palaualelo i kona lima i loko o ka ʻumeke, ʻAʻole ʻo ia e hoʻihoʻi hou aku ia i kona waha.

²⁵ E pepehi i ka mea hoʻowahāwahā, a e aʻo ka mea mālama ʻole; E aʻo aku hoʻi i ka mea noʻonoʻo, a e ʻike ʻo ia i ka naʻauao.

²⁶ ʻO ka mea hao i kona makua kāne, a hoʻokuke aku i kona makuahine, ʻO ia ke keiki hōʻino, a me ka hoʻohilahila.

²⁷ Ua oki, e kuʻu keiki, mai hoʻolohe i ke aʻo ʻana, E hoʻoʻauana ai mai ka ʻōlelo aku o ka ʻike.

²⁸ I ʻaiā ka mea hōʻike, hoʻowahāwahā ʻo ia i ka pololei; ʻO ka waha o ka poʻe hewa, moni nō ia i ka ʻino.

²⁹ Ua mākaukau ka hoʻopaʻi ʻia no ka poʻe haʻakei, ʻO ka haua hoʻi no ke kua o ka poʻe lapuwale.