NĀ ʻŌLELO AKAMAI A SOLOMONA 18 - Ka Baibala Hemolele

MOKUNA XVIII.

¹ ¶ No ka makemake wale e ʻimi ai ke kanaka manaʻo kūʻē, A pale aku nō i nā manaʻo pono a pau.

² ʻAʻole i hāliu mai ka mea lapuwale i ka ʻike, Akā, ma ka hōʻike ʻana i kona naʻau.

³ A hiki mai ka hewa, hiki mai nō hoʻi ka hoʻowahāwahā; A ʻo ka hilahila pū kekahi me ka hoʻomāʻewaʻewa.

⁴ He wai hohonu nā ʻōlelo o ko ke kanaka waha; He pūnāwai e hū ana, ke kumu o ka naʻauao.

⁵ ʻO ka hōʻoluʻolu aku i ka mea hewa, ʻaʻole ia he maikaʻi; ʻAʻole hoʻi ka ʻōpeʻa aku i ka mea pono ma ka hoʻokolokolo ʻana.

⁶ ʻO nā lehelehe o ka mea lapuwale, aia nō ma ka hoʻopaʻapaʻa; Ua maopopo kona waha e pono ke hahau ʻia.

⁷ ʻO ka waha o ka mea lapuwale, ʻo ia kona mea e make ai; A ʻo kona mau lehelehe hoʻi, ʻo ia ke pahele o kona ʻuhane.

⁸ ʻO nā ʻōlelo ʻahiʻahi, ua like me nā ʻōlelo pāʻani, A komo nō naʻe i loko loa o ka ʻōpū.

⁹ ʻO ka mea hoʻomoloā ma kāna hana ʻana, He kaikaina ʻo ia o ka mea hoʻomāunauna wale.

¹⁰ He pā kaua ikaika ka inoa ʻo Iēhova; Ma laila e holo ai ka mea pono a maluhia ihola.

¹¹ ʻO ka waiwai o ka mea waiwai, ʻo ia kona kūlanakauhale paʻa i ka pā, Ua like hoʻi me ka pā kiʻekiʻe i kona manaʻo.

¹² Ma mua o ka make, ua haʻaheo ka naʻau o ke kanaka, Ma mua hoʻi o ka hoʻokiʻekiʻe ʻia mai, he akahai.

¹³ ʻO ka mea hoʻopuka i kona manaʻo ma mua o kona lohe ʻana, He lapuwale ia, a he mea ia nona e hilahila ai.

¹⁴ ʻO ka ʻuhane o ke kanaka, hoʻomanawanui nō ia i ka nāwaliwali; Akā, ʻo ka ʻuhane e ʻeha ana, ʻo wai lā e hiki ai ke hoʻomanawanui?

¹⁵ ʻO ka naʻau o ka mea naʻauao e loaʻa iā ia ka ʻike; ʻO ka pepeiao hoʻi o ka poʻe akamai, e ʻimi nō i ka naʻauao.

¹⁶ ʻO ko ke kanaka makana, he mea ia e hoʻokaʻawale ai i wahi nona; A e kaʻi aku hoʻi iā ia i mua o nā kānaka koʻikoʻi.

¹⁷ Ua pono ka mea i hoʻopiʻi ʻia i kāna ʻōlelo mua ʻana; Akā, hele mai kona hoa noho a ʻimi aʻe i kona ʻano.

¹⁸ ʻO ka hailona ʻana ka mea e pau ai ka hoʻopaʻapaʻa; He mea hoʻi e ʻuao ai i waena o ka ikaika.

¹⁹ ʻAʻole ikaika ke kūlanakauhale paʻa i ka pā e like me ka hoahānau i hoʻonāukiuki ʻia; A ʻo ko lāua hoʻopaʻapaʻa ʻana, ua like me nā kaola hao o ka hale aliʻi.

²⁰ Ma nā hua o ko ke kanaka waha, e māʻona ai kona ʻōpū; A ma ka waiwai o kona mau lehelehe e piha ai ʻo ia.

²¹ Ma ke elelo ka make a me ke ola; ʻO ka mea makemake ma laila, e ʻai ʻo ia i kona hua.

²² ʻO ka mea loaʻa iā ia ka wahine, loaʻa nō ka mea maikaʻi, Ua loaʻa hoʻi iā ia ka lokomaikaʻi no Iēhova mai.

²³ He noi ko ke kanaka ʻilihune; A ʻo ka mea waiwai, ua ʻōlelo kalakala ʻo ia.

²⁴ ʻO ke kanaka i nui nā hoalauna, e pōʻino ʻo ia ma laila; Akā, ʻo kekahi hoaaloha ua ʻoi aku kona pipili ʻana ma mua o ko ka hoahānau.