NĀ ʻŌLELO AKAMAI A SOLOMONA 17 - Ka Baibala Hemolele

MOKUNA XVII.

¹ ¶ Maikaʻi kahi huna ʻai maloʻo me ke aloha pū kekahi, Ma mua o ka hale i piha i nā mōhai ke pili me ka hakakā.

² ʻO ke kauā noʻonoʻo, e noho ʻo ia ma luna o ke keiki e hana hilahila ana; A ma waena o nā hoahānau e loaʻa iā ia kekahi hoʻoilina.

³ He ipu hoʻoheheʻe, no ke kālā ia; no ke gula hoʻi he kapuahi ʻuʻuku; Akā, na Iēhova e hoʻāʻo mai i nā naʻau.

⁴ ʻO ka mea hewa lā hoʻolohe ʻo ia i nā lehelehe wahaheʻe; ʻO ka mea wahaheʻe hoʻi, hāliu kona pepeiao i ke elelo ʻino.

⁵ ʻO ka mea hoʻomāʻewaʻewa i ka mea nele, Ua hoʻowahāwahā ʻo ia i ka Mea nāna ia i hana; ʻO ka mea hoʻi i ʻoliʻoli i ka pōʻino, ʻAʻole ia e pakele i ka hoʻopaʻi ʻana.

⁶ ʻO ka lei o ka poʻe ʻelemākule, ʻo ia nā keiki a nā keiki; ʻO ka nani hoʻi o nā keiki, ʻo ia nā mākua kāne o lākou.

⁷ ʻAʻole i kūpono i ka mea naʻaupō ka lehelehe pololei; ʻAʻole loa hoʻi i ke aliʻi ka lehelehe wahaheʻe.

⁸ He pōhaku waiwai ʻiʻo ka makana i ka maka o ka mea nāna ia; Ma nā wahi a pau e loaʻa ana he mea ia e pono ai.

⁹ ʻO ka mea hūnā i ka hewa, ʻo ia ke ʻimi i ke aloha; ʻO ka mea hoʻolaha hou aʻe, hoʻokaʻawale ʻo ia i nā makamaka.

¹⁰ Komo ke aʻo ʻia mai i loko o ka mea naʻauao, Ma mua o nā hahau ʻana he haneri i loko o ka mea lapuwale.

¹¹ Ma ke kipi wale nō e ʻimi ai ke kanaka ʻino; No laila, hoʻouna ʻia ka ilāmuku i ona lā.

¹² E aho ke hālāwai ka bea keiki make me ke kanaka, ʻAʻole ka mea naʻaupō i loko o kona lapuwale.

¹³ ʻO ka mea hana ʻino aku na ka mea hana pono mai, ʻAʻole e kaʻawale ka ʻino mai kona hale aku.

¹⁴ E like me ka hoʻokahe ʻana o ka wai, Pēlā ka hoʻomaka ʻana o ka hakakā; No laila, e oki ʻē i ka hakakā ma mua o kona māhuahua ʻana.

¹⁵ ʻO ka mea hoʻāpono aku i ka mea hewa, A ʻo ka mea hoʻāhewa aku i ka mea pono, He mau mea hoʻopailua lāua iā Iēhova.

¹⁶ No ke aha lā kēia, he kumu kūʻai ma ka lima o ka mea lapuwale, E kūʻai aku ai i ke akamai, ʻaʻohe ona manaʻo ma laila?

¹⁷ I nā manawa a pau e aloha ana ka makamaka, A no ka lā pōpilikia i hānau ai ka hoahānau.

¹⁸ ʻO ke kanaka naʻauao ʻole, paʻi ʻo ia i ka lima, Lilo ia i mea pānaʻi i mua o kona makamaka.

¹⁹ ʻO ka mea makemake i ke kipi, ʻo ia kai makemake i ka hakakā; ʻO ka mea hoʻokiʻekiʻe aʻe i kona ʻīpuka, ʻimi ʻo ia i ka make.

²⁰ ʻO ka mea naʻau kekeʻe, ʻaʻole i loaʻa iā ia ka maikaʻi, ʻO ka mea elelo hoʻopunipuni, e hāʻule ʻo ia i ka ʻino.

²¹ ʻO ka mea i hānau mai nāna ke keiki lapuwale, he kaumaha kona; ʻAʻole e ʻoliʻoli ka makua kāne o ke keiki naʻaupō.

²² ʻO ka naʻau ʻoliʻoli, he lāʻau lapaʻau ia e hōʻoluʻolu ana; ʻO ka ʻuhane i hanapēpē ʻia, hoʻomaloʻo ia i nā iwi.

²³ Kāʻili aʻe ka mea hewa i ka waiwai kīpē, I kona hoʻohaunaele ʻana i ka ʻaoʻao pono.

²⁴ I mua i ke alo o ka mea noʻonoʻo ma laila ka naʻauao; Aia hoʻi nā maka o ka mea lapuwale, ma nā wēlau o ka honua.

²⁵ ʻO ke keiki lapuwale, he kaumaha ia no kona makua kāne, He mea ʻawahia hoʻi i ka mea nāna ia i hānau mai.

²⁶ ʻO ka hoʻopaʻi hewa i ka mea pono, ʻaʻole ia he maikaʻi, ʻAʻole hoʻi ke papaʻi aku i nā aliʻi no ka pololei.

²⁷ ʻO ka mea ʻike nui, akahele ʻo ia i ka ʻōlelo; He ʻuhane noho mālie ko ke kanaka naʻauao.

²⁸ ʻO ka mea naʻaupō hoʻi, i kona mumule ʻana, ua kuhi ʻia ʻo ia he naʻauao; ʻO ka mea pani i kona mau lehelehe hoʻi, he kanaka ʻike nō ia.