NĀ ʻŌLELO AKAMAI A SOLOMONA 16 - Ka Baibala Hemolele

MOKUNA XVI.

¹ ¶ ʻO ka mākaukau o ko ke kanaka naʻau, A me ka pane ʻana o ke elelo, no Iēhova mai ia.

² ʻO nā ʻaoʻao a pau o ke kanaka ua maʻemaʻe i kona maka iho; Akā, kaupaona ʻo Iēhova i nā ʻuhane.

³ E hoʻoili aku i kāu mau hana ma luna o Iēhova, A e hoʻokūpaʻa ʻia kou mau manaʻo.

⁴ Hana ihola ʻo Iēhova i nā mea a pau nona iho; I ka mea hewa hoʻi kekahi no ka lā e pōʻino ai.

⁵ He hoʻopailua iā Iēhova nā naʻau kiʻekiʻe a pau; Inā e kuʻikahi lima i kahi lima, ʻaʻole naʻe e ʻole kona hoʻopaʻi ʻia.

⁶ Ma ka lokomaikaʻi a me ka ʻoiaʻiʻo ua kala ʻia ka hewa; Ma ka makaʻu iā Iēhova ka haʻalele ʻana i ka hewa.

⁷ I ka manaʻo ʻoluʻolu ʻana o Iēhova i ka ʻaoʻao o ke kanaka, Noho launa nō kona poʻe ʻenemi iā ia.

⁸ Maikaʻi kahi mea iki me ka pono hoʻi kekahi, Ma mua o ka waiwai nui ke pono ʻole.

⁹ Noʻonoʻo ihola ko ke kanaka naʻau i kona ʻaoʻao iho; Akā, na Iēhova e alakaʻi i kona mau kapuaʻi.

¹⁰ Aia ka ʻōlelo kūpono ma nā lehelehe o ke aliʻi; Ma ka hoʻoponopono ʻana ʻaʻole i hewa kona waha.

¹¹ ʻO ke kaupaona a me nā mea anapaona pololei, na Iēhova nō ia; ʻO kāna hana no nā mea anapaona a pau i loko o ka ʻeke.

¹² He mea hoʻopailua no nā aliʻi ke hana hewa; No ka mea, ma ka pono i paʻa ai ka noho aliʻi.

¹³ ʻO ka makemake o nā aliʻi, ʻo ia nā lehelehe pono, A ʻo ka mea ʻōlelo pololei, ʻo ia kai aloha ʻia.

¹⁴ ʻO ka huhū o ke aliʻi, ʻo nā ʻelele ia no ka make; ʻO ke kanaka akamai, ʻo ia ke hoʻomaʻalili aku.

¹⁵ Ma ka maka ʻoluʻolu o ke aliʻi ke ola, ʻO kona lokomaikaʻi hoʻi ua like me ke ao i ke kuāua hope.

¹⁶ ʻO ka loaʻa ʻana o ke akamai, ua maikaʻi ia ma mua o ke gula! ʻO ka loaʻa ʻana o ka naʻauao, e pono ke koho ʻia ma mua o ke kālā.

¹⁷ ʻO ke alanui o ka poʻe pololei, hele aʻela ia mai ka hewa aku; ʻO ka mea mālama i kona ʻuhane, ʻo ia ke kiaʻi i kona ʻaoʻao.

¹⁸ Ma mua o ka hina ʻana, ka haʻaheo, A ma mua o ka hāʻule ʻana ka naʻau kiʻekiʻe.

¹⁹ E aho ka naʻau haʻahaʻa i waena o ka poʻe akahai, Ma mua o ka hoʻopuʻunaue ʻana i ka waiwai pio me ka poʻe haʻaheo.

²⁰ ʻO ka mea huli pono i kekahi mea e loaʻa iā ia ka maikaʻi; ʻO ka mea paulele iā Iēhova e pōmaikaʻi ana ʻo ia.

²¹ ʻO ka mea naʻau akamai, e kapa ʻia he naʻauao; Ma ka ʻoluʻolu o nā lehelehe e māhuahua ai ka ʻike.

²² He pūnāwai ola ka naʻauao i ka mea nona ia; ʻO ke aʻo ʻia mai o ka poʻe lapuwale, he lapuwale nō ia.

²³ ʻO ka mea naʻauao, aʻo nō ʻo ia i kona waha iho; Hoʻoponopono hoʻi ʻo ia i kona mau lehelehe.

²⁴ He mea ʻono nā ʻōlelo ʻoluʻolu, He ʻono i ka ʻuhane, a he ola i ka iwi.

²⁵ Pololei kekahi ʻaoʻao i ko ke kanaka manaʻo; Akā, ʻo kona hope, ʻo ia nā ʻaoʻao o ka make.

²⁶ ʻO ka mea hana, hana ʻo ia nāna iho; ʻO kona waha kai koi mai iā ia.

²⁷ ʻO ke kanaka ʻaiā, huaʻi ʻo ia i ka ʻino; A ma kona mau lehelehe he ahi e ʻaʻā ana.

²⁸ ʻO ke kanaka hoʻopaʻapaʻa, hōʻeuʻeu ʻo ia i ka hakakā; A ʻo ka mea holoholo ʻōlelo, hoʻokaʻawale nō ia i nā makamaka.

²⁹ ʻO ke kanaka huhū, hoʻowalewale ʻo ia i kona hoalauna, Alakaʻi hoʻi iā ia ma ka ʻaoʻao maikaʻi ʻole.

³⁰ Hoʻopili ʻo ia i kona mau maka e noʻonoʻo ʻino ana; Naunau ʻo ia i kona lehelehe a hoʻomaopopo i ka hewa.

³¹ He lei nani ke poʻo hina, Ke loaʻa ia ma ka ʻaoʻao o ka pono.

³² Maikaʻi ke ahonui ma mua o ka ikaika; A ʻo ka mea hoʻomalu i kona ʻuhane ma mua o ka mea hoʻopio i ke kūlanakauhale.

³³ Ma ka pūʻolo i hoʻolei ʻia ai ka hailona, Na Iēhova naʻe ka hoʻoponopono ʻana.