NĀ ʻŌLELO AKAMAI A SOLOMONA 15 - Ka Baibala Hemolele

MOKUNA XV.

¹ ¶ ʻO ka ʻōlelo akahai, ʻo ia ke pale aʻe i ka huhū; ʻO ka ʻōlelo huhū hoʻi, ʻo ia ke hoʻāla aʻe i ka inaina.

² ʻO ke elelo o ka poʻe akamai, hōʻike pololei aku ia i ka ʻike; ʻO ka waha hoʻi o ka poʻe lapuwale, hū aʻela ia i ka lapuwale.

³ Ma nā wahi a pau nā maka o Iēhova, E haka pono ana i nā mea hewa a me nā mea maikaʻi.

⁴ ʻO ke elelo akahai ʻo ia ka lāʻau o ke ola; ʻO ka ʻawahia i loko o ia mea, ʻo ia ka nahae ʻana o ka ʻuhane.

⁵ Hoʻowahāwahā ka mea lapuwale i ke aʻo ʻia mai e kona makua, ʻO ka mea hoʻolohe i ke aʻo ʻia mai, ʻo ia ka mea naʻauao.

⁶ ʻO ka hale o ka mea pono, he waiwai nui; Ma nā mea i hoʻāhu ʻia e ka mea hewa, he pōʻino.

⁷ ʻO nā lehelehe o ka poʻe akamai hoʻolaha nō i ka ʻike; ʻO ka naʻau o ka poʻe lapuwale, ʻaʻole pēlā.

⁸ ʻO ka mōhai o ka poʻe hewa, he hoʻopailua ia iā Iēhova; ʻO ka pule a ka poʻe pololei, ʻo ia kona makemake.

⁹ He hoʻopailua iā Iēhova ka ʻaoʻao o ka mea hewa; ʻO ka mea hahai ma hope o ka pono, ʻo ia kāna mea i aloha ai.

¹⁰ ʻO ka hoʻopaʻi ʻia mai, he mea kaumaha ia i ka mea haʻalele i ka ʻaoʻao; ʻO ka mea hoʻowahāwahā hoʻi i ke aʻo ʻia mai, e make ʻo ia.

¹¹ ʻO ka lua a me ka make, aia nō i mua o Iēhova; Pēlā ʻiʻo nō ka naʻau o nā keiki a nā kānaka!

¹² ʻAʻole i aloha aku ka mea hoʻowahāwahā i ka mea i aʻo mai iā ia; ʻAʻole hoʻi ʻo ia e hele i ka poʻe naʻauao.

¹³ Inā ʻoliʻoli ka naʻau, ʻoluʻolu nō hoʻi ka maka; A i kaumaha ka naʻau, nahae nō ka ʻuhane.

¹⁴ ʻO ka naʻau o ka mea naʻauao, ʻimi ʻo ia i ka ʻike; ʻO ka waha o ka poʻe naʻaupō, pāʻina nō ia i ka lapuwale.

¹⁵ Pōʻino nō nā lā a pau o ka poʻe pōpilikia; ʻO ka mea naʻau ʻoluʻolu, he ʻahaʻaina mau nō kāna.

¹⁶ Maikaʻi kahi mea iki me ka makaʻu iā Iēhova, Ma mua o ka waiwai nui ke pili pū me ka hakakā.

¹⁷ Maikaʻi kahi lau nahele ke ʻai me ke aloha pū kekahi, Ma mua o ka bipi momona, inā he inaina hoʻi kekahi.

¹⁸ ʻO ke kanaka huhū, ʻo ia ke hoʻāla aʻe i ka hakakā; ʻO ka mea akahele i ka huhū, hoʻomālielie ʻo ia i ka hakakā.

¹⁹ ʻO ka ʻaoʻao o ka mea palaualelo, ua like ia me kahi paʻapū i nā kākalaioa; ʻO ka ʻaoʻao hoʻi o ka poʻe pololei ua hoʻoponopono ʻia.

²⁰ ʻO ke keiki akamai, hoʻohauʻoli ʻo ia i kona makua kāne; ʻO ke kanaka lapuwale, hoʻowahāwahā ʻo ia i kona makuahine.

²¹ ʻO ka hana lapuwale, he ʻoliʻoli ia i ka naʻaupō; ʻO ke kanaka naʻauao hoʻi, ʻo ia kai hele pololei.

²² Hili hewa nā manaʻo, ke ʻole ke kūkākūkā ʻana; A i ka nui o ka poʻe kūkākūkā, e paʻa nō.

²³ He ʻoliʻoli ko ke kanaka ma ka pane ʻana o kona waha; ʻO ka hua ʻōlelo hoʻi i ka wā kūpono, ua maikaʻi ia.

²⁴ ʻO ke ala o ke ola, ma laila e piʻi ai ka poʻe naʻauao, I pakele aʻe i ka malu make ma lalo.

²⁵ ʻO ka hale o ka poʻe haʻaheo, na Iēhova ia e hoʻohiolo; Hoʻokūpaʻa ʻo ia i ka mokuna ʻāina o ka wahine kāne make.

²⁶ He hoʻopailua iā Iēhova nā manaʻo o ka mea hewa; He ʻoluʻolu naʻe ka ʻōlelo a ka poʻe maʻemaʻe.

²⁷ ʻO ka mea makeʻe waiwai, hana ʻino loa ʻo ia i ko kona hale; A ʻo ka mea hoʻowahāwahā i nā makana, e ola ia.

²⁸ ʻO ka naʻau o ka mea pono, noʻonoʻo ia i kāna mea e ʻōlelo aku ai; ʻO ka waha o ka poʻe hewa, hū aʻela ia i ka ʻino.

²⁹ Ua lōʻihi ʻē aku ʻo Iēhova mai ka poʻe hewa aku; Hoʻolohe hoʻi ʻo ia i ka pule a ka poʻe pono.

³⁰ ʻO ka mālamalama o nā maka, he mea ia e ʻoliʻoli ai ka naʻau; A ʻo ka lohe i ka mea maikaʻi, ʻo ia ka mea e momona ai nā iwi.

³¹ ʻO ka pepeiao e lohe ana i ke aʻo ʻia mai no ke ola, Noho mau ia i waena o ka poʻe naʻauao.

³² ʻO ka mea hōʻole i ke aʻo ʻia mai, ʻo ia kai hoʻowahāwahā i kona ʻuhane iho; ʻO ka mea hoʻolohe i ke aʻo ʻia mai e loaʻa iā ia ka naʻauao.

³³ ʻO ka makaʻu iā Iēhova, ʻo ia ka ʻike ʻana i ka naʻauao; ʻO ka naʻau haʻahaʻa ma mua ia o ka mahalo ʻia mai.