NĀ ʻŌLELO AKAMAI A SOLOMONA 14 - Ka Baibala Hemolele

MOKUNA XIV.

¹ ¶ ʻO ka wahine naʻauao, ʻo ia ke kūkulu i kona hale; Wāwahi ihola ka mea naʻaupō me kona mau lima.

² ʻO ka mea hele ma kona pololei, ʻo ia kai makaʻu iā Iēhova; ʻO ka mea i hoʻokekeʻe i kona ʻaoʻao, ʻo ia kai hoʻowahāwahā iā ia.

³ Ma ka waha o ka mea naʻaupō, he lāʻau hahau ka haʻaheo; ʻO nā lehelehe o ka poʻe naʻauao, ʻo ia ke mālama aku iā lākou.

⁴ I ʻole nā bipi, kaʻawale ka hale waihona ʻai, A ua nui hoʻi ka waiwai ma ka ikaika o ka bipi.

⁵ ʻO ka mea hōʻike ʻoiaʻiʻo, ʻaʻole ʻo ia e wahaheʻe; E haʻi wahaheʻe mai nō ka mea hōʻike hoʻopunipuni.

⁶ ʻImi aʻela ka mea hoʻowahāwahā i ke akamai, ʻaʻole loaʻa; He hikiwawe nō ka ʻike i ka mea naʻauao.

⁷ E huli aʻe ʻoe mai ke alo aku o ke kanaka lapuwale, Ke hoʻomaopopo ʻole ʻoe i nā lehelehe ʻike.

⁸ ʻO ke akamai o ka mea ʻike, ʻo ia ka hoʻomaopopo ʻana i kona ʻaoʻao; ʻO ka lapuwale o ka poʻe naʻaupō, ʻo ia ka hoʻopunipuni.

⁹ ʻAkaʻaka ka poʻe lapuwale i ka hewa; Me ka poʻe hoʻopololei ka hoʻomaikaʻi ʻia.

¹⁰ Ua ʻike ka naʻau i ke kaumaha o kona ʻuhane iho; ʻAʻohe hoʻi i mea mai ka malihini i kona ʻoliʻoli.

¹¹ ʻO ka hale o ka poʻe hewa, e hoʻohiolo ʻia; ʻO ka halelewa o ka poʻe pololei, e paʻa mau nō ia.

¹² ʻO kekahi ʻaoʻao, he pololei ia i kānaka; ʻO kona hope hoʻi, ʻo ia ka ʻaoʻao o ka make.

¹³ I ka ʻakaʻaka ʻana, he ʻehaʻeha ko ka naʻau; ʻO ka hope hoʻi o ia leʻaleʻa, ʻo ia ke kaumaha.

¹⁴ E hoʻopiha ʻia auaneʻi ka naʻau o ka mea hoʻi hope i kona ʻaoʻao iho; A ʻo ke kanaka maikaʻi hoʻi i kona hua iho.

¹⁵ Manaʻoʻiʻo nō ka mea noʻonoʻo ʻole i nā ʻōlelo a pau; Akā, ʻo ka mea maʻalea, nānā pono ʻo ia i kona hele ʻana.

¹⁶ ʻO ka mea naʻauao, makaʻu nō ia, a haʻalele i ka hewa; ʻO ka mea lapuwale hoʻi, he haʻaheo kona a me ka makaʻu ʻole.

¹⁷ ʻO ka hikiwawe o ka huhū, ʻo ia ka hana lapuwale; ʻO ke kanaka ʻimi i nā manaʻo hewa, ua inaina ʻo ia.

¹⁸ E ili mai ka lapuwale no ka poʻe noʻonoʻo ʻole; E kau hoʻi ka ʻike me he lei lā ma luna o ka poʻe naʻauao.

¹⁹ Kūlou aʻe ka poʻe hewa i mua i ke alo o ka poʻe maikaʻi; ʻO ka poʻe ʻaiā hoʻi ma ka ʻīpuka o ka mea pono.

²⁰ Ua inaina ʻia ka mea ʻilihune e kona hoa noho; ʻO ka mea waiwai, lehulehu kona poʻe makamaka.

²¹ ʻO ka mea hoʻowahāwahā i kona hoa noho, ua hewa ʻo ia; ʻO ka mea lokomaikaʻi aku i ka mea i nele, pōmaikaʻi ʻo ia.

²² ʻAʻole anei he lalau wale ko ka poʻe ʻimi hewa? He aloha a he ʻoiaʻiʻo na ka poʻe ʻimi maikaʻi.

²³ Ma ka hana a pau he waiwai nō; Akā, ʻo ke kamaʻilio wale o nā lehelehe, pili i ka ʻilihune wale nō.

²⁴ ʻO ka lei o ka poʻe akamai, ʻo ia ko lākou waiwai; ʻO ka lapuwale o ka poʻe naʻaupō, he lapuwale wale iho nō ia.

²⁵ Hoʻopakele i nā ʻuhane ka mea hōʻike ʻoiaʻiʻo; ʻO ka mea hōʻike wahaheʻe, hoʻopunipuni nō ia.

²⁶ Ma ka makaʻu iā Iēhova, ma laila ka paulele nui; He puʻuhonua hoʻi ia na kāna poʻe keiki.

²⁷ ʻO ka makaʻu iā Iēhova, he pūnāwai ola ia, He mea ia e haʻalele ai i nā pahele o ka make.

²⁸ Ma ka lehulehu o nā kānaka ka hanohano o ke aliʻi, A i ʻole nā kānaka ua make ke aliʻi.

²⁹ ʻO ka mea ʻuʻumi i ka huhū, ʻo ia kai noʻonoʻo nui; ʻO ka mea hikiwawe i ka huhū, ʻo ia ke hōʻike i ka lapuwale.

³⁰ ʻO ke ola no ke kino, ʻo ia ka naʻau ʻoluʻolu, ʻO ka lili, ʻo ia ka popopo o nā iwi.

³¹ ʻO ka mea hoʻokaumaha i ka mea nele, ʻo ia kai hoʻowahāwahā i ka Mea nāna ia i hana; ʻO ka mea mālama aku iā ia, ʻo ia ke aloha i ka mea ʻilihune.

³² Hoʻokuke ʻia ka mea hewa i loko o kona hewa; Lana hoʻi ka manaʻo o ka mea pono i kona make ʻana.

³³ Noho nō ka naʻauao ma ka naʻau o ka mea noʻonoʻo; Ua ʻikea hoʻi ko loko o ka poʻe lapuwale.

³⁴ Hoʻokiʻekiʻe aʻela ka pono i ka lāhui kanaka; ʻO ka hewa hoʻi ka mea e hoʻowahāwahā ʻia ai nā kānaka.

³⁵ ʻO ka makemake o ke aliʻi, aia i ke kauā naʻauao; ʻO kona huhū aia i ka mea e hilahila ai.