NĀ ʻŌLELO AKAMAI A SOLOMONA 13 - Ka Baibala Hemolele

MOKUNA XIII.

¹ ¶ ʻO ke keiki akamai, aia nō ia ma ke aʻo ʻia e kona makua kāne; ʻO ka mea hoʻowahāwahā, ʻaʻole ia e hoʻolohe i ke aʻo ʻia mai.

² Ma ka hua o ka waha e ʻai ai ke kanaka i ka maikaʻi; E ʻai ka ʻuhane o ka poʻe ʻaiā i ka pōʻino.

³ ʻO ka mea mālama i kona waha, mālama nō ia i kona ʻuhane; ʻO ka mea hoʻohāmama i ka waha, e loaʻa iā ia ka make.

⁴ Makemake wale ka ʻuhane o ka mea hiamoe, ʻaʻole i loaʻa; ʻO ka ʻuhane o ka poʻe hana mau, e māʻona nō ia.

⁵ Ua inaina mai ka mea pono i ka ʻōlelo wahaheʻe; ʻO ka mea hewa lā, he hoʻopailua ia a me ka hilahila.

⁶ Na ka pono e kiaʻi i ka mea hele pololei; Na ka hewa hoʻi e hoʻohiolo i ka mea lawehala.

⁷ Hoʻowaiwai kekahi iā ia iho, ʻaʻole naʻe he wahi mea iā ia; Hoʻonele hoʻi kekahi iā ia iho, a nui nō naʻe kona waiwai.

⁸ ʻO ka pānaʻi ʻana o ko ke kanaka ola, ʻo kona waiwai nō ia; ʻO ka mea ʻilihune, ʻaʻole ia e hoʻolohe i ke aʻo ʻia mai.

⁹ ʻO ka mālamalama o ka poʻe pono, he mea hoʻohauʻoli ia; ʻO ke kukui o ka poʻe hewa, e pio auaneʻi ia.

¹⁰ Ma ka haʻaheo wale nō ka hakakā; Ma ka poʻe kūkākūkā pono ka naʻauao.

¹¹ E hele liʻiliʻi ka waiwai i haʻāpuka wale ʻia; ʻO ka mea hōʻiliʻili ma ka hana, e māhuahua nō.

¹² ʻO ka manaʻolana i hoʻopaneʻe ʻia, ʻo ia ka mea e maʻule ai ka naʻau; A hiki mai ka mea i makemake ʻia, ʻo ia ka lāʻau o ke ola.

¹³ ʻO ka mea hoʻowahāwahā i ka ʻōlelo, e make nō ia; ʻO ka mea makaʻu aku i ke kānāwai, e uku ʻia ʻo ia.

¹⁴ ʻO ke aʻo ʻana o ke kanaka naʻauao, he pūnāwai ola ia, He mea hoʻi e pakele ai i nā pahele o ka make.

¹⁵ Ma ka noʻonoʻo pono i loaʻa ai ka lokomaikaʻi ʻia mai; ʻO ka ʻaoʻao o ka poʻe ʻaiā, he pilikia ia.

¹⁶ E hana nō nā mea noʻonoʻo a pau ma ka ʻike; ʻO ka naʻaupō hoʻi kai hōʻike aku i ka lapuwale.

¹⁷ ʻO ke kūkini hewa, hāʻule ʻo ia i ka lalau, ʻO ka ʻelele ʻoiaʻiʻo hoʻi, ʻo ia ka mea e pono ai.

¹⁸ He ʻilihune a he hilahila i ka mea haʻalele i ke aʻo ʻia mai; ʻO ka mea mālama i ke aʻo ʻia mai, e hoʻomaikaʻi ʻia mai ʻo ia.

¹⁹ ʻO ka makemake i loaʻa mai, he ʻono nō ia i ka ʻuhane; He mea hoʻowahāwahā i ka poʻe lapuwale, ka haʻalele i ka hewa.

²⁰ ʻO ka mea hele pū me ka poʻe akamai, akamai nō ia; ʻO ka hoalauna o ka poʻe lapuwale, e māhuahua ka hewa.

²¹ Hahai ka pōʻino i ka poʻe hewa; E uku ʻia ka poʻe pono i ka pōmaikaʻi.

²² E hoʻoili mai ko ka mea maikaʻi no kāna poʻe mamo; Ua waiho ʻia hoʻi na ka poʻe pono ka waiwai o ka mea hewa.

²³ ʻO ka ʻai nui, aia ma ka mahi ʻai o ka poʻe ʻilihune; Lilo wale hoʻi kekahi no ka noʻonoʻo ʻole.

²⁴ ʻO ka mea hoʻokaʻaʻokoʻa i ka lāʻau hahau, ʻo ia ke aloha ʻole i kāna keiki; ʻO ka mea aloha iā ia, ʻimi nō ia i ke aʻo ʻia mai nona.

²⁵ E ʻai nō ka mea pono, a māʻona kona ʻuhane, ʻO ka ʻōpū o ka mea hewa, e nele ia i ka ʻai ʻole.