NĀ ʻŌLELO AKAMAI A SOLOMONA 12 - Ka Baibala Hemolele

MOKUNA XII.

¹ ¶ ʻO ka mea makemake i ke aʻo ʻia mai, ʻo ia kai makemake i ka ʻike; ʻO ka mea hoʻowahāwahā i ke aʻo ʻia mai, he holoholona ia.

² ʻO ka mea maikaʻi, e loaʻa iā ia ka lokomaikaʻi no Iēhova mai; A e hoʻohewa mai ʻo ia i ke kanaka hoʻopunipuni.

³ ʻAʻole ma ka hewa e kūpaʻa ai ke kanaka; ʻO ka hoʻokumu ʻana o ka poʻe pono, ʻaʻole ia e neʻeneʻe aʻe.

⁴ ʻO ka wahine noho pono he pāpale aliʻi ʻo ia i kāna kāne; Akā, me he mea popopo lā i kona mau iwi ka wahine e hoʻohilahila aku.

⁵ ʻO ka manaʻo ʻana o ka poʻe pono, aia ma ka hoʻopono; ʻO ke kūkā ʻana o ka poʻe hewa, aia ma ka hoʻopunipuni.

⁶ ʻO ka ʻōlelo a ka poʻe hewa, he hoʻohālua ia i ke koko; Akā, ʻo ka waha o ka poʻe pololei, ʻo ia kā lākou e hoʻopakele aku.

⁷ Ua hoʻoauhulihia ka poʻe hewa, a nalowale; E kū mau ana hoʻi ka hale o ka poʻe pono.

⁸ E hoʻomaikaʻi ʻia ke kanaka e like me kona akamai; Akā, ʻo ka mea naʻau loko ʻino, e hoʻowahāwahā ʻia ʻo ia.

⁹ ʻO ka mea i hoʻowahāwahā ʻia, a he kauā nāna, ʻOi aku ʻo ia i ka mea hoʻohanohano iā ia iho, a nele i ka ʻai ʻole.

¹⁰ Manaʻo nō ke kanaka pono i ke ola o kona holoholona; Akā, ʻo ke aloha o ka poʻe hewa, he loko ʻino nō ia.

¹¹ ʻO ka mea i mahi i kona ʻāina, e māʻona nō i ka ʻai; Akā, ʻo ka hoʻopili mea ʻai me ka poʻe palaualelo, he lapuwale ia.

¹² He leʻaleʻa i ka mea hewa ka punihei ʻino ʻana; ʻO ke kumu o ka poʻe pono e hua mai nō ia.

¹³ Ma ka ʻino o nā lehelehe i punihei ʻia ai ka mea hewa; E puka mai nō hoʻi ka mea pono no loko aʻe o ka pilikia.

¹⁴ Ma ka hua o ka waha, e māʻona ai ke kanaka i ka maikaʻi; ʻO ka uku o ko ke kanaka lima e hāʻawi ʻia iā ia.

¹⁵ ʻO ka ʻaoʻao o ka mea naʻaupō, ua pololei ia i kona manaʻo iho; Akā, ʻo ka mea hoʻolohe i ke aʻo ʻia mai, ua naʻauao ʻo ia.

¹⁶ ʻO ka huhū o ka naʻaupō e ʻike koke ʻia; Hoʻonalowale ka mea maʻalea i ka mea e hilahila ai.

¹⁷ ʻO ka mea haʻi aku i ka ʻoiaʻiʻo, hōʻike ʻo ia i ka pono; A ʻo ka hōʻike wahaheʻe hoʻi, hōʻike ʻo ia i ka hoʻopunipuni.

¹⁸ ʻŌlelo kekahi e like me ka hou ʻana o ka pahi kaua; A ʻo ke elelo o ka poʻe naʻauao, ma ka hoʻōla ia.

¹⁹ ʻO nā lehelehe ʻoiaʻiʻo, e mau ana nō ia; ʻO ke elelo wahaheʻe e pau koke nō ia.

²⁰ He hoʻopunipuni ma ka naʻau o ka poʻe manaʻo ʻino; A no ka poʻe kūkākūkā i ka maluhia, he ʻoliʻoli.

²¹ ʻAʻole e loʻohia mai ka mea pono e ka pōʻino; Akā, piha nō ka poʻe hewa i nā mea e ʻino ai.

²² He mea hoʻopailua iā Iēhova nā lehelehe hoʻopunipuni; ʻO ka poʻe hana ma ka ʻoiaʻiʻo, ʻo ia kona ʻoliʻoli.

²³ ʻO ke kanaka noʻeau, e waiho ana iā ia ka ʻike; ʻO ka naʻau o nā naʻaupō, hōʻike wale nō ia i ka lapuwale.

²⁴ ʻO ka lima o ka poʻe hana mau e lilo ʻo ia i haku; ʻO ka mea hoʻomoloā, ma lalo nō ia o ka hoʻokupu.

²⁵ ʻO ke kaumaha i loko o ka naʻau o ke kanaka, he mea e kūlou iho ai; Akā, ma ka ʻōlelo maikaʻi ia e hōʻoluʻolu ʻia ai.

²⁶ Ua maikaʻi ka mea pono ma mua o kona hoa noho; ʻO ka ʻaoʻao o ka poʻe hewa, e hoʻowalewale ʻo ia iā lākou.

²⁷ ʻAʻole e hopu ka moloā i kāna mea ʻai; Akā, ʻo ka waiwai o ke kanaka maikaʻi, he gula ia.

²⁸ Ma ke ala pono ke ola, Ma ko laila kuamoʻo nō hoʻi, ʻaʻole e make.