NĀ ʻŌLELO AKAMAI A SOLOMONA 11 - Ka Baibala Hemolele

MOKUNA XI.

¹ ¶ ʻO ke kaupaona hoʻopunipuni, he hoʻopailua ia iā Iēhova; ʻO ke kaupaona kūpono, ʻo ia kona makemake.

² A hiki mai ka haʻaheo, a laila hiki mai ka hilahila; Me ka poʻe naʻau haʻahaʻa hoʻi ka naʻauao.

³ ʻO ka pono o ka mea pololei ʻo ia kona alakaʻi; Ma ka wahaheʻe hoʻi e make ai ka poʻe hoʻopunipuni.

⁴ ʻO ka waiwai, ʻaʻohe mea ia e pono ai i ka lā e inaina mai ai; Akā, ʻo ka pono ʻo ia ke hoʻopakele aʻe i ka make.

⁵ ʻO ka pono o ka poʻe pololei, ʻo ia ke kuhikuhi o kona ala; E hāʻule hoʻi ka mea hewa i kona hewa iho.

⁶ Ma ka pono e pakele ai ka poʻe pololei; Ma ke kolohe hoʻi e hei ʻia ai ka poʻe ʻaiā.

⁷ I ka make ʻana o ke kanaka hewa, pau kona manaʻolana; E pohō nō hoʻi ka manaʻo o ka poʻe hewa.

⁸ Lawe ʻia aku ka mea pono mai ka pōpilikia aku, A hiki mai ka mea hewa ma kona hakahaka.

⁹ Ma ka waha o ka ʻaiā e make ai kona hoa; Ma ka ʻike ʻoiaʻiʻo hoʻi e pakele ai ka poʻe pono.

¹⁰ I ka lanakila ʻana o ka poʻe pono e hauʻoli ke kūlanakauhale; I ke pio ʻana o ka poʻe hewa he ʻoliʻoli nō.

¹¹ Ma ka hoʻomaikaʻi ʻia mai o ka poʻe pololei, E hoʻokiʻekiʻe ʻia ke kūlanakauhale; Ma ka waha o ka poʻe hewa, ua hoʻohiolo ʻia.

¹² ʻO ka mea hāʻiliʻili aku i kona hoa noho, he naʻaupō ia; A ʻo ke kanaka naʻauao, noho hāmau ʻo ia;

¹³ ʻO ka mea holoholo ʻōlelo, haʻi wale aku ia i nā mea huna; ʻO ka mea manaʻo ʻoiaʻiʻo, e hūnā ana nō ʻo ia.

¹⁴ Ma kahi e ʻahaʻōlelo ʻole ai, e hāʻule nā kānaka; Ma ka lehulehu o ka poʻe kūkākūkā he maluhia.

¹⁵ E hihia nō ka mea paʻi lima me ka malihini; A ʻo ka mea hōʻole i ke paʻi lima ʻana, ua pakele ia.

¹⁶ ʻO ka wahine lokomaikaʻi, e loaʻa ʻiʻo nō ka mahalo ʻia mai; E loaʻa nō hoʻi ka waiwai i ka poʻe hana ikaika.

¹⁷ ʻO ka mea minamina i kona ʻuhane iho, he kanaka lokomaikaʻi ʻo ia; ʻO ka mea hōʻino i kona kino, he aloha ʻole kona.

¹⁸ ʻO ka mea hewa, he hana ʻīnea kāna; ʻO ka mea lūlū i ka pono, he uku ʻoiaʻiʻo kona.

¹⁹ E like me ka pili ʻana o ka pono i ke ola, Pēlā e pili ai ka make i ka mea hana hewa.

²⁰ He mea hoʻopailua iā Iēhova ka poʻe naʻau hoʻopunipuni; Akā, ʻo ka poʻe i pololei ka ʻaoʻao, ʻo ia kona makemake.

²¹ Inā e kuʻikahi lima i kekahi lima, ʻaʻole naʻe e hoʻopakele ʻia ka mea hewa; ʻO ka mamo hoʻi o ka poʻe pono, e hoʻopakele ʻia ʻo ia.

²² Me he apo gula lā ma ka ihu o ka puaʻa, Pēlā ka wahine i maikaʻi ka maka a nele i ka noʻonoʻo ʻole.

²³ ʻO ka makemake o ka mea pono, he hope maikaʻi kona; ʻO ka manaʻolana hoʻi o ka poʻe hewa, he inaina ʻia mai ka hope.

²⁴ Hoʻoheleleʻi kekahi, a nui hou aʻe nō naʻe; ʻAuʻa hoʻi kekahi i ka mea kū ʻole i ka pono, a ʻo ka nele ka hope.

²⁵ ʻO ka mea e hoʻomanawaleʻa aku, e momona ia; A ʻo ka mea e hoʻomāʻūʻū aku, e hoʻomāʻūʻū ʻia mai ʻo ia.

²⁶ ʻO ka mea ʻauʻa i ka ʻai, e hōʻino nā kānaka iā ia; E kau ana hoʻi ka hoʻomaikaʻi ʻia mai ma ke poʻo o ka mea kūʻai aku.

²⁷ ʻO ka mea ʻimi i ka maikaʻi, ʻimi nō ia i ke aloha ʻia mai; ʻO ka mea ʻimi i ka hewa, e hiki mai nō ia i ona lā.

²⁸ ʻO ka mea paulele i kona waiwai, e hāʻule ʻo ia; Akā, me he lālā lāʻau lā e ulu ai ka poʻe pono.

²⁹ ʻO ka mea hoʻonāukiuki i ko kona hale, e ili mai nona ka makani; E hoʻokauā aku auaneʻi ka naʻaupō na ka mea naʻauao.

³⁰ ʻO ka hua no ka pono, ʻo ia ka lāʻau o ke ola; ʻO ka mea hoʻohuli i nā ʻuhane, ʻo ia ke akamai.

³¹ Aia hoʻi, e hoʻouku ʻia ka mea pono ma ka honua; Pēlā nō a ʻoi aku ka mea hewa a me ka ʻino!