NĀ ʻŌLELO AKAMAI A SOLOMONA 10 - Ka Baibala Hemolele

MOKUNA X.

¹ ¶ Nā ʻōlelo akamai a Solomona. ʻO ke keiki akamai, hoʻohauʻoli mai ʻo ia i kona makua kāne; A ʻo ke keiki lapuwale, hoʻouluhua mai ʻo ia i kona makuahine.

² ʻO ka waiwai i loaʻa hewa mai, ʻaʻole he mea ia e pōmaikaʻi ai; Akā, ʻo ka pono, ʻo ia kai hoʻopakele i ka make.

³ ʻAʻole e waiho mai ʻo Iēhova i ka ʻuhane o ka mea pono a pōloli; Akā, hōʻole nō ia i ka makemake o ka poʻe hewa.

⁴ ʻO ka lima hoʻopalaleha, he mea ia e ʻilihune ai; Akā, ʻo ka lima hoʻoikaika mau i ka hana, ʻo ia ka mea e waiwai ai.

⁵ ʻO ka mea hoʻoʻiliʻili i ke kau, he keiki naʻauao ia; ʻO ka mea hiamoe i ka wā e ʻohi ai, he keiki hoʻohilahila ia.

⁶ ʻO nā mea e pōmaikaʻi ai, aia ma luna o ke poʻo o ka mea pono; Akā, ma ka waha o ka poʻe hewa i hūnā ʻia ai ka ʻino.

⁷ ʻO ka hoʻomanaʻo ʻana i ka mea hoʻopono, he mea hauʻoli ia; A ʻo ka inoa o ka poʻe hewa, e palakahuki ia.

⁸ ʻO ka mea i akamai ka naʻau, e hoʻopaʻa ʻo ia i nā kauoha; Akā, ʻo ka mea i lapuwale nā lehelehe, e hina ʻo ia.

⁹ ʻO ka mea hele ma ka pololei, hele paʻa pono nō ia; A ʻo ka mea hoʻokekeʻe i kona ʻaoʻao, e ʻike ʻia ʻo ia.

¹⁰ ʻO ka mea i ʻimo ka maka, hōʻeha mai ʻo ia; ʻO ka mea i lapuwale nā lehelehe, e hina ʻo ia.

¹¹ He pūnāwai hoʻōla ka waha o ka mea hoʻopono; Ma ka waha o ka poʻe hewa i hūnā ʻia ai ka ʻino.

¹² Hoʻokonokono ka inaina i ka hakakā; Akā, uhi mai nō ke aloha i nā hewa a pau.

¹³ Ma nā lehelehe o ka mea naʻauao i loaʻa ai ke akamai; Akā, ʻo ka lāʻau hahau, no ke kua ia o ka mea manaʻo ʻole.

¹⁴ Hoʻopaʻa ka poʻe akamai i ka ʻike; A ʻo ka waha o ka mea lapuwale, kokoke ia i ka make.

¹⁵ ʻO ka waiwai o ka mea waiwai, ʻo ia kona kūlanakauhale paʻa; ʻO ka pōʻino o ka poʻe ʻilihune, ʻo ko lākou nele nō ia.

¹⁶ ʻO ka hana a ka mea pono, pili nō ia i ke ola; ʻO ka hua o ka mea hewa, pili nō ia i ka make.

¹⁷ Ma ka ʻaoʻao o ke ola ka mea i mālama i ke aʻo ʻana mai; ʻO ka mea i pale aʻe i ke aʻo ʻana, ua hana lapuwale ʻo ia.

¹⁸ ʻO ka mea hūnā i ka huhū me nā lehelehe wahaheʻe, A ʻahiʻahi wale aku, ʻo ia ka lapuwale.

¹⁹ I ka nui o nā hua ʻōlelo, ʻaʻole loa e ʻole ka hewa; ʻO ka mea hāmau i kona mau lehelehe, e naʻauao nō ia.

²⁰ ʻO ke elelo o ka mea pono, he kālā maikaʻi ia; ʻO ka naʻau o ka poʻe hewa, he wahi mea iki wale nō ia.

²¹ ʻO nā lehelehe o ka mea pono, hānai nō i nā mea he nui; ʻO ka poʻe lapuwale, no ka noʻonoʻo ʻole e make ana lākou.

²² ʻO ka hoʻomaikaʻi o Iēhova, ʻo ia ka mea e waiwai ai, ʻAʻole hoʻi mea e ʻeha ai ka manaʻo ma laila.

²³ Ua ʻakaʻaka ka mea lapuwale, ke hana kolohe; ʻO ke akamai, na ke kanaka ʻike nō ia.

²⁴ ʻO ka weliweli o ka mea hewa, e hoʻokō ʻia auaneʻi ia ma luna ona; ʻO ka manaʻolana o ka mea pono, e hōʻoiaʻiʻo ʻia mai ia nona.

²⁵ E like me ka holo ʻana aku o ka puahiohio, pēlā ka mea hewa, ʻaʻole ia; Akā, ʻo ka mea pono, ua ʻonipaʻa ia a mau loa nō.

²⁶ E like me ka vīnega i nā niho, A me ka uahi i nā maka, Pēlā ka mea moloā i ka poʻe nāna ia e hoʻounauna aku.

²⁷ ʻO ka makaʻu iā Iēhova, ʻo ia ka mea e nui ai nā lā; ʻO nā makahiki o ka poʻe hewa, e hoʻopōkole ʻia.

²⁸ ʻO ka manaʻolana o ka poʻe pono, he hauʻoli ia; ʻO ka manaʻolana o ka poʻe hewa, e pio nō ia.

²⁹ ʻO ka ʻaoʻao o Iēhova, ʻo ka mea ia i ikaika ai ka mea pono; ʻO ka make hoʻi ia i ka poʻe hana hewa.

³⁰ E mau ana ka mea pono, ʻaʻole ia e naue aʻe; ʻO ka poʻe hewa, ʻaʻole no lākou ka honua.

³¹ ʻO nā waha o ka mea pono, hōʻike mai ia i ka naʻauao; A ʻo ke elelo hōʻinoʻino, e ʻoki ʻia aʻe.

³² ʻO nā lehelehe o ka mea pono, ua hōʻikeʻike i ka mea ʻoluʻolu; A ʻo ka waha o ka poʻe hewa i ka ʻinoʻino.