NĀ ʻŌLELO AKAMAI A SOLOMONA 1 - Ka Baibala Hemolele

MOKUNA I.

¹ ¶ ʻO nā ʻōlelo akamai a Solomona ke keiki a Dāvida ke aliʻi o kā ʻIseraʻela:

² He mea ia e ʻike ai i ka noʻiau a me ke aʻo ʻia mai, E hoʻomaopopo i nā ʻōlelo e naʻauao ai;

³ E loaʻa ai ka ʻike e akamai ai, Ma ka pono a me ka hoʻopono, a me ka pololei;

⁴ E hāʻawi i ka maʻalea i ka poʻe naʻaupō, A me ka ʻike, a me ka noʻonoʻo i ke kanaka uʻi.

⁵ E hoʻolohe ka mea naʻauao, a māhuahua ka ʻike, E loaʻa nō i ka mea i aʻo ʻia ai ka ʻike e naʻauao ai;

⁶ E ʻike i ka ʻōlelo akamai a me ka hoʻākāka ʻana o ia mea, I nā ʻōlelo a ka poʻe naʻauao, a me kā lākou ʻōlelo pōhihi.

⁷ ¶ ʻO ka makaʻu iā Iēhova, ʻo ia ka hoʻomaka ʻana o ka ʻike; A ʻo ka naʻauao, a me ke aʻo ʻia mai, ua hoʻowahāwahā ʻia e ka poʻe lapuwale.

⁸ ¶ E kuʻu keiki, e hoʻolohe mai i ke aʻo ʻana a kou makua kāne, ʻAʻole hoʻi e haʻalele i ke kānāwai o kou makuahine;

⁹ No ka mea, he mea nani ia no kou poʻo, He mau lei hoʻi no kou ʻāʻī.

¹⁰ E kuʻu keiki, inā e hoʻowalewale mai ka poʻe hewa iā ʻoe, Mai ʻae aku ʻoe.

¹¹ Inā lākou e ʻōlelo mai, “Ē, e hele pū kākou, E hoʻohālua no ke koko, E hoʻohālua wale i ka mea hala ʻole;

¹² “E moni ola iā lākou me he malu make, E moni ʻokoʻa hoʻi e like me ka poʻe e hāʻule ana i ka lua:

¹³ “E loaʻa iā kākou ka waiwai maikaʻi he nui, E hoʻopiha i ko kākou mau hale me ka waiwai pio;

¹⁴ “E hailona pū ʻoe me mākou i kou kuleana, I hoʻokahi hīpuʻu na kākou a pau”;

¹⁵ E kuʻu keiki ē, mai hele pū ʻoe me lākou ma ke ala; E haʻalele kou wāwae i ko lākou mau kuamoʻo;

¹⁶ No ka mea, holo kikī ko lākou wāwae i ka hewa, Wikiwiki hoʻi lākou i ka hoʻokahe koko.

¹⁷ Makehewa nō ke kau ʻana i ka hei, Ma ke alo o nā mea ʻēheu a pau.

¹⁸ Moe malu lākou no ko lākou koko; Makaʻala hoʻi no nā ʻuhane o lākou.

¹⁹ Pēlā ka ʻaoʻao o ka poʻe makeʻe waiwai a pau, E kāʻili ana i ke ola o ka mea nona ia.

²⁰ ¶ Hea aʻela ka naʻauao ma waho; Pane mai kona leo ma ke alanui;

²¹ Ma ka wēlau o nā ala ʻo ia e kāhea mai ai; Ma nā kahua o nā puka kūlanakauhale kāna ʻōlelo ʻana, ʻĪ maila:

²² “Pehea ka lōʻihi, e ka poʻe ʻike ʻole, E makemake ai ʻoukou i ka naʻaupō? A ʻoukou hoʻi, e ka poʻe hoʻowahāwahā, E makemake ai i ka hoʻowahāwahā ʻana? A ʻo ʻoukou, e ka poʻe naʻaupō, e inaina aku ai i ka naʻauao?

²³ “E huli mai ʻoukou i kaʻu aʻo ʻana; Aia hoʻi e ninini aku au i koʻu ʻuhane ma luna o ʻoukou, E hōʻike aku hoʻi iā ʻoukou i kaʻu mau ʻōlelo.

²⁴ “I koʻu wā i hea aku ai, hōʻole mai ʻoukou; Kīkoʻo akula au i koʻu lima, ʻaʻohe mea i manaʻo mai;

²⁵ “Haʻalele ʻoukou i koʻu mau manaʻo a pau, ʻAʻole hoʻi ʻoukou i makemake i kaʻu aʻo ʻana;

²⁶ “No laila, i ko ʻoukou pōpilikia e ʻakaʻaka au, E hoʻowahāwahā au i ka hiki ʻana o ko ʻoukou makaʻu;

²⁷ “A hiki mai ko ʻoukou makaʻu me he mea ʻino lā, A hoʻokokoke mai ko ʻoukou pōpilikia me he puahiohio lā, A loʻohia ʻoukou e ka pilihua a me ke kaumaha;

²⁸ “A laila, e hea mai lākou iaʻu, ʻaʻole au e pane aku; E ʻimi koke lākou iaʻu ʻaʻole e loaʻa mai;

²⁹ “No ka mea, hoʻowahāwahā lākou i ka ʻike, A ʻo ka makaʻu iā Iēhova, ʻaʻole lākou i koho mai;

³⁰ “ʻAʻole o lākou makemake i kaʻu aʻo ʻana; Manaʻo ʻino hoʻi i kaʻu mau ʻōlelo a pau.

³¹ “No laila, e ʻai lākou i ka hua o ko lākou ʻaoʻao iho, A ma ko ka manaʻo ʻana o lākou e māʻona ai.

³² “No ka mea, ʻo ka haʻalele ʻana aku o ka poʻe naʻaupō, ʻo ia ko lākou pepehi ʻia mai, A ʻo ka noho nanea ʻana o ka poʻe lapuwale, ʻo ko lākou make ia.

³³ “Akā, ʻo ka mea hoʻolohe mai iaʻu, e noho ʻoluʻolu nō ia, E noho nō ia me ka makaʻu ʻole i ka pōʻino.”