ʻOBADIA 1 - Ka Baibala Hemolele

1 Ka wānana no ka luku ʻana o kā ʻEdoma, no kona hoʻokiʻekiʻe a no kona inaina i nā mamo a Iakoba kona hoahānau. 17 No ka pōmaikaʻi i ka manawa ma hope.

MOKUNA I.

¹ ¶ Ka wānana a ʻObadia. Pēnēia kā Iēhova ka Haku i ʻōlelo mai ai no ʻEdoma; Ua lohe kākou i ka lohe ʻana mai Iēhova mai, Ua hoʻouna ʻia aku ka ʻelele i waena o nā lāhui kanaka; “E kū ʻoukou i luna, a e ala kūʻē kākou iā ia i ke kaua.

² “Aia hoʻi, ua hoʻolilo au iā ʻoe i mea ʻuʻuku i waena o nā lāhui kanaka; Ua lilo ʻoe i mea hoʻowahāwahā loa ʻia.

³ “Ua hoʻopunipuni ka haʻaheo o kou naʻau iā ʻoe, E ka mea e noho ana ma nā ana o ka pōhaku, He wahi kiʻekiʻe kou noho ʻana; E ʻōlelo ana ma kou naʻau, ‘Na wai lā au e lawe iho i lalo i ka honua?’

⁴ “Inā e hoʻokiʻekiʻe ʻoe iā ʻoe iho e like me ka ʻaeto, Inā e hoʻonoho i kou pūnana i waena o nā hōkū, Ma laila mai e lawe iho ai au iā ʻoe i lalo,” wahi a Iēhova.

⁵ “Inā i hele mai nā ʻaihue i ou lā, inā he poʻe pōā i ka pō, (Nani kou luku ʻia!) ʻAʻole anei lākou e ʻaihue, a pau ko lākou makemake? Inā i hele mai nā ʻohi waina i ou lā, ʻaʻole anei lākou e waiho aku i ke koena?

⁶ “Nani ka ʻimi ʻia ʻo kā ʻEsau! I huli ʻia hoʻi kona mau wahi huna!

⁷ “ʻO nā kānaka a pau o kāu berita, ua hoʻouna aku lākou iā ʻoe a i ka palena; ʻO nā kānaka e kuʻikahi ana me ʻoe, ua wahaheʻe lākou iā ʻoe, a ua lanakila lākou ma luna ou; ʻO ka poʻe e ʻai ana i kāu berena, ua waiho lākou i ka hei ma lalo iho ou; ʻAʻohe naʻauao i loko ona.

⁸ “ʻAʻole anei au e luku aku i ka poʻe ʻike, mai ʻEdoma aku ia lā,” wahi a Iēhova, A me ka naʻauao mai ka mauna o ʻEsau aku?

⁹ “A e weliweli kou poʻe kānaka ikaika, e Temana, I ʻoki ʻia aku kēlā kanaka kēia kanaka, mai ka mauna o ʻEsau aku.

¹⁰ ¶ “No ka luku ʻana a no ka hana ʻino i kou hoahānau iā Iakoba, e uhi mai ka hilahila iā ʻoe, A e luku loa ʻia aku ʻoe.

¹¹ “I ka lā i kū ai ʻoe ma kēlā ʻaoʻao, I ka lā i lawe pio aku ai nā malihini i kona ikaika, A komo ko nā ʻāina ʻē i loko o kona mau puka pā, A hailona lākou no Ierusalema, Ua like hoʻi ʻoe me kekahi o lākou.

¹² “ʻAʻole naʻe i pono kou nānā ʻana i ka lā o kou hoahānau, I ka lā o kona malihini ʻana; ʻAʻole hoʻi he pono kou hauʻoli ʻana ma luna o nā mamo a Iuda, I ka lā i luku ʻia ai lākou; ʻAʻole pono kāu ʻōlelo hoʻokiʻekiʻe ʻana i ka wā i pilikia ai lākou.

¹³ “ʻAʻole pono kou komo ʻana i loko o ka puka o koʻu poʻe kānaka, i ka lā o ko lākou make; ʻAʻohe pono kou nānā ʻana i ko lākou pōʻino i ka lā i make ai lākou, A me kou kau ʻana i kou lima ma luna o kona waiwai i ka lā o kona luku ʻia ʻana.

¹⁴ “ʻAʻohe pono kou kū ʻana ma ka huina alanui e ʻoki aku i kona poʻe i pakele; ʻAʻohe pono kou hāʻawi lilo ʻana i kona poʻe i koe, i ka lā pilikia.

¹⁵ ¶ “No ka mea, ua kokoke mai ka lā o Iēhova ma luna o nā lāhui kanaka a pau; Like me kāu i hana aku ai, pēlā e hana ʻia mai ai ʻoe; ʻO kāu hoʻopaʻi ʻana, e hoʻihoʻi ʻia mai ia ma luna o kou poʻo.

¹⁶ “No ka mea, like me ʻoukou i inu ai ma luna o koʻu mauna hoʻāno, Pēlā e inu mau ai nā lāhui kanaka a pau; A e inu lākou, a e moni iho, A e like auaneʻi lākou me nā mea ʻole.

¹⁷ “Akā, ma ka mauna ʻo Ziona he mea e pakele ai, a he mea laʻa; A e loaʻa i ko ka hale o Iakoba ko lākou noho ʻana.

¹⁸ “A lilo ko ka hale o Iakoba i ahi, A ʻo ko ka hale o Iosepa i lapalapa; A ʻo ko ka hale o ʻEsau i ʻōpala, A e hoʻaʻā i waena o lākou, a e hoʻopau iā lākou; ʻAʻohe mea e koe ana o ko ka hale o ʻEsau”; No ka mea, ʻo Iēhova kai ʻōlelo mai.

¹⁹ A e loaʻa i ko ke Kūkulu Hema ka mauna o ʻEsau, A i ko ka pāpū ko Pilisetia; A e lilo nō lākou ka ʻāina ʻo ʻEperaima, a me ka ʻāina ʻo Samaria; A e lilo ʻo Gileada no Beniamina.

²⁰ A ʻo ka poʻe pio o kēia poʻe kaua o nā mamo a ʻIseraʻela, E lilo nō lākou ko Kanaʻana a hiki i Zarepata; A ʻo ka poʻe pio no Ierusalema ma Separada, E lilo nō lākou nā kūlanakauhale o ke Kūkulu Hema.

²¹ A e piʻi mai nā mea hoʻōla ma ka mauna ʻo Ziona, E hoʻopaʻi i ka mauna o ʻEsau; A e lilo ke aupuni no Iēhova.