KA BUKE ʻAHĀ A MOSE, I KAPA ʻIA NĀ HELU 9 - Ka Baibala Hemolele

1 No ka mālama ʻana i ka Mōliaola. 6 Nā mea maʻemaʻe ʻole. 9 Ka malama e ʻai ʻia ai ka Mōliaola. 15 Ke kia ao ka mea alakaʻi iā lākou i ko lākou hele ʻana.

MOKUNA IX.

¹ ¶ ʻŌlelo maila ʻo Iēhova iā Mose ma ka wao nahele ʻo Sinai, i ka malama mua o ka lua o ka makahiki, ma hope o ko lākou puka ʻana mai loko mai o ka ʻāina ʻo ʻAigupita, ʻī maila,

² “E mālama nā mamo a ʻIseraʻela i ka Mōliaola i kona manawa i kauoha ʻia ai.

³ “I ka lā ʻumikumamāhā o kēia malama, i ke ahiahi, e mālama ʻoukou ia i kona manawa i kauoha ʻia ai; e like me nā kānāwai a pau nona, a e like hoʻi me nā ʻoihana a pau nāna, kā ʻoukou e mālama ai ia.”

⁴ ʻŌlelo akula hoʻi ʻo Mose i nā mamo a ʻIseraʻela, e mālama lākou i ka Mōliaola.

⁵ A mālama nō lākou i ka Mōliaola i ka lā ʻumikumamāhā o ka malama mua, i ke ahiahi, ma ka wao nahele ʻo Sinai; e like me nā mea a pau a Iēhova i kauoha mai ai iā Mose, pēlā nā mamo a ʻIseraʻela i hana ai.

⁶ A ʻo kekahi mau kānaka, ua haumia lākou i ke kupapaʻu o ke kanaka, a pono ʻole iā lākou ke mālama i ka Mōliaola ia lā; a hele mai lākou i mua o Mose, a i mua o ʻAʻarona ia lā.

⁷ ʻĪ maila ua mau kānaka lā iā ia, “Ua haumia mākou i ke kupapaʻu o ke kanaka; no ke aha lā i keʻakeʻa ʻia ai mākou, i ʻole e kaumaha aku ai mākou i mōhai na Iēhova i kona manawa i kauoha ʻia ai me nā mamo a ʻIseraʻela?”

⁸ ʻĪ akula ʻo Mose iā lākou, “E kū mālie ʻoukou, a lohe au i ka mea a Iēhova e kauoha mai ai no ʻoukou.”

⁹ ¶ ʻŌlelo maila ʻo Iēhova iā Mose, ʻī maila,

¹⁰ “E ʻōlelo aku ʻoe i nā mamo a ʻIseraʻela, i ka ʻī ʻana, ‘Inā he haumia ko kekahi kanaka o ʻoukou a ʻo kā ʻoukou poʻe mamo paha, i ke kupapaʻu, a ua mamao aku paha ia i ka hele ʻana, e mālama nō hoʻi ia i ka Mōliaola no Iēhova.

¹¹ ‘I ka lā ʻumikumamāhā, ʻo ka lua o ka malama, i ke ahiahi, e mālama lākou ia mea, e ʻai hoʻi lākou ia me ka berena hū ʻole, a me nā lau mulea.

¹² ‘ʻAʻole lākou e waiho i kauwahi o ia mea, a ao, ʻaʻole hoʻi e uhaʻi i kekahi iwi ona: ma nā kānāwai a pau no ka Mōliaola kā lākou e mālama ai ia.

¹³ ‘Akā, ʻo ke kanaka haumia ʻole, ʻaʻole hoʻi i hala i ka hele ʻana, a ua mālama ʻole i ka Mōliaola, e hōʻoki ʻia aku ʻo ia mai kona poʻe kānaka aku; no ka mea, ʻaʻole ia i lawe mai i ka mōhai na Iēhova i kona manawa i kauoha ʻia ai; e lawe ia kanaka i kona hewa iho.

¹⁴ ‘Inā hoʻi e noho ana kekahi malihini me ʻoukou, a ua makemake ia e mālama i ka Mōliaola no Iēhova; e like me ke kānāwai no ka Mōliaola, a e like hoʻi me kona ʻoihana, pēlā nō ia e hana ai; i hoʻokahi nō kānāwai iā ʻoukou no ka malihini, a no ka mea i hānau ma ka ʻāina.’”

¹⁵ ¶ I ka lā i kūkulu ʻia ai ka halelewa, uhi ihola ke ao ma luna o ka halelewa, ma ke keʻena o ke Kānāwai; a ahiahi, ua ʻikea ka mea me he ahi lā ma luna o ka halelewa a hiki i kakahiaka.

¹⁶ A pēlā mau nō; uhi maila ke ao iā ia, a i ka pō, ua ʻikea ka mea me he ahi lā.

¹⁷ A i ka manawa i piʻi ai ke ao mai luna aʻe o ka halelewa, ma ia hope iho, haele akula nā mamo a ʻIseraʻela; a ma kahi i kū mālie ai ke ao, ma laila nā mamo a ʻIseraʻela i hoʻomoana ai.

¹⁸ Ma ke kauoha a Iēhova i hele ai nā mamo a ʻIseraʻela, a ma ke kauoha a Iēhova i hoʻomoana ai lākou; i nā lā a pau i kū mālie ai ke ao ma luna o ka halelewa, noho ihola lākou ma nā hale lole o lākou.

¹⁹ Aia kū liʻuliʻu ihola ke ao ma luna o ka halelewa a nui nā lā, a laila mālama nā mamo a ʻIseraʻela i ka ʻoihana a Iēhova, ʻaʻole nō i hele aku.

²⁰ A i ka wā i kū mālie ai ke ao ma luna o ka halelewa a ʻuʻuku nā lā; e like me ke kauoha ʻana a Iēhova i noho ai lākou ma ko lākou mau hale lole, a e like me ke kauoha ʻana mai a Iēhova i haele ai lākou.

²¹ A i ka wā i noho ai ke ao mai ke ahiahi a hiki i kakahiaka, a piʻi aʻela ke ao i kakahiaka, a laila, haele lākou; inā ma ke ao paha; ma ka pō paha i piʻi aʻe ke ao, haele nō lākou.

²² Inā hoʻi i noho ke ao ma luna o ka halelewa i nā lā ʻelua, i ka malama paha, a i ka makahiki paha, e kau ana ma laila, noho ihola nā mamo a ʻIseraʻela i loko o ko lākou mau hale lole, ʻaʻole lākou i hele; aia i ka wā i piʻi aʻe ia, hele lākou.

²³ Ma ke kauoha a Iēhova i noho ai lākou, i loko o ko lākou mau hale lole, a ma ke kauoha ʻana a Iēhova i haele ai lākou; mālama nō lākou i ka ʻoihana a Iēhova ma ke kauoha a Iēhova, i ka lima o Mose.