KA BUKE ʻAHĀ A MOSE, I KAPA ʻIA NĀ HELU 8 - Ka Baibala Hemolele

1 No ke kuni ʻana i nā ipukukui. 5 Ka hoʻolaʻa ʻana i nā Levi. 23 Nā makahiki a lākou e lawelawe ai na Iēhova.

MOKUNA VIII.

¹ ¶ ʻŌlelo maila ʻo Iēhova iā Mose, ʻī maila,

² “E ʻōlelo aku ʻoe iā ʻAʻarona, a e ʻī aku iā ia, penei, ‘I ka manawa e kuni ai ʻoe i nā kukui, e hoʻomālamalama nā ipu ʻehiku i mua o ka ipukukui.’”

³ Pēlā nō ʻo ʻAʻarona i hana ai; kuni ihola ia i kona mau kukui i mua o ka ipukukui, e like me kā Iēhova i kauoha mai ai iā Mose.

⁴ A ʻo kēia hana o ka ipukukui, he gula i wili ʻia, mai kona kumu a hiki i kona mau pua, he hana i wili ʻia: ma muli o ke kumu hoʻolike a Iēhova i hōʻike ai iā Mose, pēlā nō ia i hana ai i ka ipukukui.

⁵ ¶ ʻŌlelo maila ʻo Iēhova iā Mose, ʻī maila,

⁶ “E lawe ʻoe i nā Levi mai waena mai o nā mamo a ʻIseraʻela, a e huikala iā lākou.

⁷ “Penei kāu hana ʻana iā lākou, e huikala ai iā lākou: E kāpīpī i ka wai huikala ma luna o lākou, a e āmū lākou i ko lākou kino a pau, a e holoi lākou i ko lākou mau ʻaʻahu, a e huikala iā lākou iho.

⁸ “A laila, e lawe lākou i ka bipi keiki kāne, me kāna mōhai ʻai, he palaoa i kāwili pū ʻia me ka ʻaila; a me kekahi bipi keiki kāne hou ʻē aʻe i mōhai hala.

⁹ “A e kaʻi mai ʻoe i nā Levi i mua o ka halelewa o ke anaina; a e hoʻākoakoa mai hoʻi ʻoe i ke anaina kanaka a pau o nā mamo a ʻIseraʻela.

¹⁰ “A e kaʻi mai ʻoe i nā Levi i mua o Iēhova; a e kau aku nā mamo a ʻIseraʻela i ko lākou mau lima ma luna o nā Levi;

¹¹ a e hoʻāli aku ʻo ʻAʻarona i nā Levi i ʻō a i ʻaneʻi, i mua o Iēhova, i mōhai hoʻāli o nā mamo a ʻIseraʻela, i lilo ai lākou i poʻe e lawe i ka hana a Iēhova.

¹² “A e kau aku nā Levi i ko lākou mau lima ma luna o nā poʻo o nā bipi kāne; a e kaumaha ʻoe i kekahi i mōhai hala, a i kekahi i mōhai kuni na Iēhova, i mea hoʻokalahala no nā Levi.

¹³ “A e hoʻonoho ʻoe i nā Levi i mua o ʻAʻarona, a i mua o kāna mau keiki, a e mōhai aku iā lākou i mōhai na Iēhova.

¹⁴ ¶ “Pēlā ʻoe e hoʻokaʻawale ai i nā Levi mai waena mai o nā mamo a ʻIseraʻela; a e lilo nā Levi noʻu.

¹⁵ “A ma hope iho, e komo nā Levi e hana ma ka halelewa anaina; a e huikala ʻoe iā lākou, a e mōhai ʻoe iā lākou i mōhai.

¹⁶ “No ka mea, ua lilo loa lākou noʻu mai waena mai o nā mamo a ʻIseraʻela, i pānaʻi no ka poʻe hānau mua, no nā hānau mua a pau o nā mamo a ʻIseraʻela, ua lawe au iā lākou noʻu.

¹⁷ “No ka mea, noʻu nō nā hiapo a pau o nā mamo a ʻIseraʻela, ʻo kā ke kanaka, a me kā ka holoholona; i ka lā aʻu i luku ai nā hānau mua a pau ma ʻAigupita, hoʻolaʻa ihola au iā lākou nei noʻu.

¹⁸ “A ua lawe au i nā Levi i pānaʻi no nā hānau mua a pau o nā mamo a ʻIseraʻela.

¹⁹ “A ua hāʻawi aku au i nā Levi i haʻawina no ʻAʻarona a no kāna mau keiki, mai waena o nā mamo a ʻIseraʻela, e hana i ka hana a ka poʻe mamo a ʻIseraʻela ma ka halelewa anaina, a e hoʻokalahala no nā mamo a ʻIseraʻela, i ʻole e luku ʻia nā mamo a ʻIseraʻela, i ka wā e hele mai ai nā mamo a ʻIseraʻela a kokoke i ke keʻena kapu.”

²⁰ ¶ A ʻo Mose me ʻAʻarona a me ke anaina a pau o nā mamo a ʻIseraʻela, hana akula lākou i nā Levi e like me nā mea a pau a Iēhova i kauoha mai ai iā Mose no nā Levi; pēlā nō i hana aku ai nā mamo a ʻIseraʻela iā lākou.

²¹ A ua huikala ʻia nā Levi, a holoi ihola lākou i ko lākou ʻaʻahu; a hoʻāli aku ʻo ʻAʻarona iā lākou i mōhai hoʻāli i mua o Iēhova, a hoʻokalahala akula ʻo ʻAʻarona no lākou, i mea e huikala ai iā lākou.

²² A ma hope iho, komo akula nā Levi i loko e hana i kā lākou hana ma ka halelewa o ke anaina, i mua o ʻAʻarona a i mua o kāna mau keiki; e like me kā Iēhova i kauoha mai ai iā Mose no nā Levi, pēlā nō lākou i hana aku ai iā lākou.

²³ ¶ ʻŌlelo maila ʻo Iēhova iā Mose, ʻī maila,

²⁴ “Eia ka mea no nā Levi: mai ka iwakālua a me kumamālima o nā makahiki a keu aku, e hele lākou i loko e hana i ka hana o ka halelewa o ke anaina;

²⁵ a mai ka makahiki he kanalima aku, e hoʻi lākou mai ka hana aku, ʻaʻole lākou e hana hou aku.

²⁶ “Akā, e mālama lākou me ko lākou poʻe hoahānau ma ka halelewa anaina, e kiaʻi ana i ka ʻoihana, ʻaʻole naʻe lākou e hana. Pēlā nō ʻoe e hana aku ai i nā Levi no kā lākou ʻoihana.”