KA BUKE ʻAHĀ A MOSE, I KAPA ʻIA NĀ HELU 7 - Ka Baibala Hemolele

1 Nā ʻālana a nā luna o kā ʻIseraʻela i ka hoʻolaʻa ʻana o ka luakini. 10-88 Ka hāʻawi pākahi ʻana o nā luna he 12 i kā lākou mau ʻālana i kēlā lā i kēia lā he 12. 89 Ka ʻōlelo ʻana a Iēhova ma luna o ka noho aloha.

MOKUNA VII.

¹ ¶ Eia hoʻi, i ka lā a Mose i hoʻopau ai i ke kūkulu ʻana i ka halelewa, a pau ia i ka poni ʻia a me ka hoʻolaʻa ʻia, ʻo ia a me nā mea paʻahana a pau ona, ʻo ke kuahu a me kona mau ipu a pau, a poni iho ʻo ia ia mau mea, a hoʻolaʻa hoʻi.

² A laila kaumaha akula nā luna o kā ʻIseraʻela, nā luna o ka hale o ko lākou poʻe kūpuna, ʻo lākou nā luna ʻohana, nā mea i kū ma luna o ka poʻe i helu ʻia.

³ Lawe maila lākou i kā lākou mau mōhai i mua o Iēhova, i ʻeono mau kaʻa i uhi ʻia, a me nā bipi kauō he ʻumikumamālua; hoʻokahi kaʻa a nā luna ʻelua, a me ka bipi i pākahi ʻia mai e kēlā mea kēia mea; a lawe maila lākou ia mau mea i mua o ka halelewa.

⁴ ʻŌlelo maila ʻo Iēhova iā Mose, ʻī maila,

⁵ “E lawe ʻoe ia mau mea na lākou mai, i lilo ia e hana i ka hana o ka halelewa o ke anaina; a e hāʻawi aku ʻoe ia mau mea no nā Levi, i kēlā kanaka kēia kanaka e like me kāna e hana ai.”

⁶ A lawe aʻela ʻo Mose i nā kaʻa a me nā bipi, a hāʻawi akula no nā Levi.

⁷ Hāʻawi akula ia i nā kaʻa ʻelua a me nā bipi ʻehā no nā mamo a Geresona, e like me kā lākou mea e hana ai;

⁸ ʻehā nā kaʻa me nā bipi ʻewalu kāna i hāʻawi aku ai no nā mamo a Merari, e like me kā lākou mea e hana ai, ma lalo o ka lima o ʻItamara ke keiki a ʻAʻarona ke kahuna.

⁹ ʻAʻole ia i hāʻawi aku no nā mamo a Kohata; no ka mea, ʻo ka ʻoihana o ke keʻena kapu i pili iā lākou, he mea ia e amo ai ma luna o ko lākou mau poʻohiwi.

¹⁰ Kaumaha akula nā luna i ka mōhai hoʻolaʻa i ke kuahu, i ka lā i poni ʻia ai ia, a mōhai akula nā luna i kā lākou mōhai i mua o ke kuahu.

¹¹ ʻŌlelo maila ʻo Iēhova iā Mose, “E kaumaha lākou i kā lākou mōhai, ʻo kēlā luna kēia luna i kona lā iho, no ka hoʻolaʻa ʻana i ke kuahu.”

¹² ¶ A ʻo ka mea nāna i kaumaha aku i kāna mōhai i ka lā mua, ʻo ia ʻo Nahesona ke keiki a ʻAminadaba, no ka ʻohana a Iuda.

¹³ A ʻo kāna mōhai, hoʻokahi ia pā kālā, he haneri ia me kanakolu nā sekela ma ke kaupaona ʻana; hoʻokahi bola kālā, he kanahiku nā sekela, ma ka sekela o ke keʻena kapu, a ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

¹⁴ hoʻokahi puna, he ʻumi sekela gula, ua piha i ka mea ʻala;

¹⁵ hoʻokahi bipi keiki kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

¹⁶ hoʻokahi keiki kao i mōhai hala;

¹⁷ a no ka mōhai hoʻomalu: ʻelua bipi, ʻelima hipa kāne, ʻelima kao kāne, ʻelima hoʻi keiki hipa o ka makahiki mua. ʻO ia ka mōhai a Nahesona ke keiki a ʻAminadaba.

¹⁸ ¶ I ka lua o ka lā, mōhai akula ʻo Netaneʻela ke keiki a Zuara, ka luna o kā ʻIsakara.

¹⁹ Kaumaha akula ia i kāna mōhai, hoʻokahi ia pā kālā, he haneri a me kanakolu nā sekela ma ke kaupaona ʻana, hoʻokahi bola kālā, he kanahiku sekela ma ka sekela o ke keʻena kapu; ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

²⁰ hoʻokahi puna gula, he ʻumi nā sekela, ua piha i ka mea ʻala;

²¹ hoʻokahi keiki bipi kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

²² hoʻokahi keiki kao i mōhai hala;

²³ a no ka mōhai hoʻomalu: i ʻelua mau bipi, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a Netaneʻela ke keiki a Zuara.

²⁴ ¶ I ke kolu o ka lā, kaumaha akula ʻo ʻEliaba ke keiki a Helona, ka luna o nā mamo a Zebuluna.

²⁵ ʻO kāna mōhai, hoʻokahi ia pā kālā, he haneri a me kanakolu sekela ma ke kaupaona ʻana, hoʻokahi bola kālā, he kanahiku sekela, ma ka sekela o ke keʻena kapu; ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

²⁶ hoʻokahi puna gula, he ʻumi sekela, ua piha i ka mea ʻala;

²⁷ hoʻokahi keiki bipi kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

²⁸ hoʻokahi keiki kao i mōhai hala;

²⁹ a no ka mōhai hoʻomalu: ʻelua bipi kāne, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a ʻEliaba ke keiki a Helona.

³⁰ ¶ I ka hā o ka lā, kaumaha akula ʻo ʻElizura ke keiki a Sedeura, ka luna o nā mamo a Reubena.

³¹ ʻO kāna mōhai, hoʻokahi pā kālā, he haneri me ke kanakolu nā sekela o ke kaupaona ʻana, hoʻokahi bola, he kanahiku nā sekela, ma ka sekela o ke keʻena kapu; ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

³² hoʻokahi puna gula, he ʻumi nā sekela, ua piha i ka mea ʻala;

³³ hoʻokahi keiki bipi kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

³⁴ hoʻokahi keiki kao i mōhai hala;

³⁵ a no ka mōhai hoʻomalu: ʻelua bipi kāne, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a ʻElizura ke keiki a Sedeura.

³⁶ ¶ I ka lima o ka lā, kaumaha akula ʻo Selumiʻela ke keiki a Zurisadai, ka luna o nā mamo a Simeona.

³⁷ ʻO kāna mōhai, hoʻokahi ia pā kālā, he haneri me kanakolu sekela o ke kaupaona ʻana, hoʻokahi bola kālā, he kanahiku nā sekela, ma ka sekela o ke keʻena kapu; ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

³⁸ hoʻokahi puna gula, he ʻumi nā sekela, ua piha i ka mea ʻala;

³⁹ hoʻokahi keiki bipi kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

⁴⁰ hoʻokahi kao keiki i mōhai hala;

⁴¹ a no ka mōhai hoʻomalu: ʻelua bipi kāne, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a Selumiʻela ke keiki a Zerusadai.

⁴² ¶ I ke ono o ka lā, kaumaha akula ʻo ʻEliasapa ke keiki a Deuʻela, ka luna o nā mamo a Gada.

⁴³ ʻO kāna mōhai, hoʻokahi ia ipu kālā, he haneri me ke kanakolu nā sekela ma ke kaupaona ʻana, hoʻokahi bola kālā, he kanahiku nā sekela, ma ka sekela o ke keʻena kapu; ua piha ia mau mea a ʻelua i ka palaoa i kāwili ʻia me ka ʻaila, i mōhai ʻai;

⁴⁴ hoʻokahi puna gula, he ʻumi nā sekela, ua piha i nā mea ʻala;

⁴⁵ hoʻokahi keiki bipi kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

⁴⁶ hoʻokahi keiki kao i mōhai hala;

⁴⁷ a no ka mōhai hoʻomalu: ʻelua bipi kāne, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a ʻEliasapa ke keiki a Deuʻela.

⁴⁸ ¶ I ka hiku o ka lā, kaumaha akula ʻo ʻElisama, ke keiki a ʻAmihuda, ka luna o nā mamo a ʻEperaima.

⁴⁹ ʻO kāna mōhai, hoʻokahi pā kālā, hoʻokahi ia haneri a me ke kanakolu nā sekela ma ke kaupaona ʻana, hoʻokahi bola kālā, he kanahiku nā sekela ma ka sekela o ke keʻena kapu; ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

⁵⁰ hoʻokahi puna gula, he ʻumi nā sekela, ua piha i ka mea ʻala;

⁵¹ hoʻokahi bipi keiki kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

⁵² hoʻokahi keiki kao i mōhai hala;

⁵³ a no ka mōhai hoʻomalu: ʻelua bipi kāne, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a ʻElisama ke keiki a ʻAmihuda.

⁵⁴ ¶ I ka walu o ka lā, kaumaha akula ʻo Gamaliʻela ke keiki a Pedazura, ka luna o nā mamo a Manase.

⁵⁵ ʻO kāna mōhai, hoʻokahi pā kālā, hoʻokahi haneri a me kanakolu nā sekela o ke kaupaona ʻana, hoʻokahi bola kālā, he kanahiku nā sekela, ma ka sekela o ke keʻena kapu, ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

⁵⁶ hoʻokahi puna gula, he ʻumi nā sekela, ua piha i ka mea ʻala;

⁵⁷ hoʻokahi bipi keiki kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

⁵⁸ hoʻokahi keiki kao i mōhai hala;

⁵⁹ a no ka mōhai hoʻomalu: ʻelua bipi kāne, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a Gamaliʻela ke keiki a Pedazura.

⁶⁰ ¶ I ka iwa o ka lā, kaumaha akula ʻo ʻAbidana ke keiki a Gideoni, ka luna o nā mamo a Beniamina.

⁶¹ ʻO kāna mōhai, hoʻokahi pā kālā, hoʻokahi haneri a me ke kanakolu nā sekela o ke kaupaona ʻana, hoʻokahi bola, he kanahiku nā sekela ma ka sekela o ke keʻena kapu; ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

⁶² hoʻokahi puna gula, he ʻumi nā sekela, ua piha i ka mea ʻala;

⁶³ hoʻokahi keiki bipi kāne, hoʻokahi hipa kāne, hoʻokahi hipa keiki o ka makahiki mua, i mōhai kuni;

⁶⁴ hoʻokahi keiki kao i mōhai hala;

⁶⁵ a no ka mōhai hoʻomalu: ʻelua bipi kāne, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a ʻAbidana ke keiki a Gideoni.

⁶⁶ ¶ I ka ʻumi o ka lā, kaumaha akula ʻo ʻAhiezera ke keiki a ʻAmisadai, ka luna o nā mamo a Dana.

⁶⁷ ʻO kāna mōhai, hoʻokahi ia pā kālā, hoʻokahi haneri a me ke kanakolu nā sekela o ke kaupaona ʻana, hoʻokahi bola kālā, he kanahiku nā sekela, ma ka sekela o ke keʻena kapu; ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

⁶⁸ hoʻokahi puna gula, he ʻumi sekela, ua piha i ka mea ʻala;

⁶⁹ hoʻokahi bipi keiki kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

⁷⁰ hoʻokahi keiki kao i mōhai hala;

⁷¹ a no ka mōhai hoʻomalu: ʻelua bipi kāne, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a ʻAhiezera ke keiki a ʻAmisadai.

⁷² ¶ I ka ʻumikumamākahi o ka lā, i kaumaha aku ai ʻo Pagiʻela, ke keiki a ʻOkerana, ka luna o nā mamo a ʻAsera.

⁷³ ʻO kāna mōhai, hoʻokahi ia pā kālā, hoʻokahi haneri a me ke kanakolu nā sekela o ke kaupaona ʻana, hoʻokahi bola kālā, he kanahiku sekela, ma ka sekela o ke keʻena kapu; ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

⁷⁴ hoʻokahi puna gula, he ʻumi nā sekela, ua piha i ka mea ʻala;

⁷⁵ hoʻokahi keiki bipi kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

⁷⁶ hoʻokahi keiki kao i mōhai hala;

⁷⁷ a no ka mōhai hoʻomalu: ʻelua bipi kāne, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a Pagiʻela ke keiki a ʻOkerana.

⁷⁸ ¶ I ka ʻumikumamālua o ka lā, kaumaha akula ʻo ʻAhira ke keiki a ʻEnana, ka luna o nā mamo a Napetali.

⁷⁹ ʻO kāna mōhai, hoʻokahi ia pā kālā, hoʻokahi haneri a me kanakolu nā sekela o ke kaupaona ʻana, hoʻokahi bola kālā, he kanahiku nā sekela, ma ka sekela o ke keʻena kapu; ua piha ia mau mea a ʻelua i ka palaoa i kāwili pū ʻia me ka ʻaila, i mōhai ʻai;

⁸⁰ hoʻokahi puna gula, he ʻumi sekela, ua piha i ka mea ʻala;

⁸¹ hoʻokahi keiki bipi kāne, hoʻokahi hipa kāne, hoʻokahi keiki hipa o ka makahiki mua, i mōhai kuni;

⁸² hoʻokahi keiki kao i mōhai hala;

⁸³ a no ka mōhai hoʻomalu: ʻelua bipi kāne, ʻelima hipa kāne, ʻelima kao kāne, ʻelima keiki hipa o ka makahiki mua. ʻO ia ka mōhai a ʻAhira ke keiki a ʻEnana.

⁸⁴ ¶ ʻO ia ka hoʻolaʻa ʻana o ke kuahu, i ka lā i pōni ʻia ai ʻo ia e nā luna o kā ʻIseraʻela; he ʻumikumamālua nā pā kālā, he ʻumikumamālua nā bola kālā, he ʻumikumamālua puna gula.

⁸⁵ Hoʻokahi haneri a me ke kanakolu nā sekela ke kaupaona ʻana o kēlā ipu kālā o kēia ipu kālā, he kanahiku nā sekela o kēlā bola kēia bola; ʻo nā ipu kālā a pau, he ʻelua tausani ʻehā haneri nā sekela, ma ka sekela o ke keʻena kapu.

⁸⁶ ʻO nā puna gula he ʻumikumamālua i piha i ka mea ʻala, he pāʻumi nā sekela, ma ka sekela o ke keʻena kapu; ʻo ke gula a pau o nā puna, he haneri a me ka iwakālua nā sekela.

⁸⁷ ʻO nā bipi kāne a pau no ka mōhai kuni, he ʻumikumamālua nā bipi kāne, ʻo nā hipa kāne he ʻumikumamālua, ʻo nā keiki hipa o ka makahiki mua, he ʻumikumamālua, me kā lākou mōhai ʻai; a ʻo nā keiki kao no ka mōhai hala, he ʻumikumamālua.

⁸⁸ A ʻo nā bipi kāne a pau no ka mōhai hoʻomalu, he iwakāluakumamāhā nā bipi kāne, he kanaono nā hipa kāne, he kanaono nā kao kāne, he kanaono nā keiki hipa o ka makahiki mua. ʻO ia ka hoʻolaʻa ʻana o ke kuahu ma hope o kona poni ʻia ʻana.

⁸⁹ ¶ A i ko Mose komo ʻana i loko o ka halelewa o ke anaina e ʻōlelo aku iā ia, a laila lohe aʻela ia i ka leo e ʻōlelo mai ana iā ia mai luna mai o ka noho aloha, ʻo ka mea ma luna o ka pahu Kānāwai, ma waena o nā keruba ʻelua; a ʻī maila ʻo ia iā ia.