KA BUKE ʻAHĀ A MOSE, I KAPA ʻIA NĀ HELU 6 - Ka Baibala Hemolele

1 No ko kā Nazarite hoʻohiki ʻana. 9 Ke kānāwai nona. 14 Kāna mōhai. 22 Ka hoʻomaikaʻi ʻana a nā kāhuna i kānaka.

MOKUNA VI.

¹ ¶ ʻŌlelo maila ʻo Iēhova iā Mose, ʻī maila,

² “E ʻōlelo aku ʻoe i nā mamo a ʻIseraʻela, e ʻī aku iā lākou, ‘ʻO ke kanaka, ʻo ka wahine paha ke hoʻolaʻa iā ia iho no ka hoʻohiki i ka hoʻohiki ʻana a kā Nazarite, a e hoʻokaʻawale iā ia iho no Iēhova;

³ e hoʻokaʻawale iā ia iho i ka waina, a me ka mea ʻona, ʻaʻole ia e inu i ka vīnega o ka waina, ʻaʻole hoʻi i ka vīnega o ka mea ʻona, ʻaʻole hoʻi ia e inu i ka wai i kohu i nā hua waina, ʻaʻole hoʻi ia e ʻai i nā hua waina maka, ʻaʻole hoʻi i nā hua waina maloʻo.

⁴ ‘I nā lā a pau o kona kaʻawale ʻana no Iēhova, ʻaʻole ia e ʻai i kekahi mea no ke kumu waina, ʻaʻole i nā ʻanoʻano, ʻaʻole hoʻi i ka ʻili.

⁵ ‘I nā lā a pau o kona hoʻohiki ʻana e noho kaʻawale, ʻaʻole e pili mai ka pahi āmū ma kona poʻo; a pau nā lā i hoʻokaʻawale ʻia ai ʻo ia no Iēhova, e noho laʻa ia, a e ulu loa nā lauoho o kona poʻo.

⁶ ¶ ‘I nā lā a pau o kona noho kaʻawale ʻana no Iēhova, ʻaʻole ia e hele a pili aku i ke kupapaʻu.

⁷ ‘ʻAʻole ia e hoʻohaumia iā ia iho no kona makua kāne, ʻaʻole hoʻi no kona makuahine, ʻaʻole hoʻi no kona hoahānau kāne, ʻaʻole hoʻi no kona hoahānau wahine, ke make lākou; no ka mea, aia nō ma luna ona ke kapu no kona Akua.

⁸ ‘I nā lā a pau o kona kaʻawale ʻana, ua laʻa ia no Iēhova.

⁹ ¶ ‘A inā e make koke kekahi kanaka e pili ana me ia, a haumia ke poʻo o kona laʻa ʻana; a laila e āmū ia i kona poʻo i ka lā o kona huikala ʻana, i ka hiku o ka lā e āmū ai ia.

¹⁰ ‘A i ka walu o ka lā, e lawe mai ʻo ia i ʻelua manu kuhukukū, a i ʻelua manu nūnū ʻōpiopio paha i ke kahuna, ma ka puka o ka halelewa o ke anaina;

¹¹ a e kaumaha aku ke kahuna i kekahi i mōhai hala, a i kekahi i mōhai kuni, a e hoʻokalahala aku ia nona; no ka mea āna i hewa ai i ke kupapaʻu, a e hoʻolaʻa aku ia i kona poʻo ia lā.

¹² ‘A e hoʻolaʻa aku ia no Iēhova i nā lā o kona kaʻawale ʻana, a e lawe mai ia i keiki hipa o ka makahiki mua i mōhai hala; akā e hāʻule wale iho nā lā ma mua; no ka mea, ua haumia kona kaʻawale ʻana.

¹³ ¶ ‘Eia hoʻi ke kānāwai no ka Nazarite; aia pau nā lā o kona kaʻawale ʻana, e hele mai ia ma ka puka o ka halelewa o ke anaina.

¹⁴ ‘A e kaumaha aku ia i kāna mōhai na Iēhova, i hoʻokahi keiki hipa o ka makahiki mua, i mōhai kuni; a i hoʻokahi keiki hipa wahine kīnā ʻole o ka makahiki mua, i mōhai hala; a i hoʻokahi hipa kāne kīnā ʻole i mōhai hoʻomalu;

¹⁵ a me ka hīnaʻi berena hū ʻole, me nā paʻi palaoa i kāwili pū ʻia me ka ʻaila, a me nā wepa palaoa hū ʻole i kāhinu ʻia i ka ʻaila, a me kā lākou mōhai ʻai, a me kā lākou mōhai inu.

¹⁶ ‘A e lawe mai ke kahuna ia mau mea i mua o Iēhova, a e kaumaha aku i kāna mōhai hala a me kāna mōhai kuni;

¹⁷ e kaumaha aku hoʻi ia i ka hipa kāne i mōhai hoʻomalu no Iēhova, me ka hīnaʻi berena hū ʻole; e kaumaha hoʻi ke kahuna i kāna mōhai ʻai a me kāna mōhai inu.

¹⁸ ‘A e āmū kā Nazarite i kona poʻo i hoʻolaʻa ʻia ma ka puka o ka halelewa o ke anaina; a e lawe ia i ka lauoho o kona poʻo i hoʻolaʻa ʻia, a e waiho i loko o ke ahi ma lalo o nā mōhai hoʻomalu.

¹⁹ ‘A e lawe ke kahuna i ka ʻūhā mua o ka hipa kāne i hoʻolapalapa ʻia, me kekahi paʻi palaoa hū ʻole mai loko mai o ka hīnaʻi, a me kekahi wepa hū ʻole, a e kau aku ia mau mea ma nā lima o kā Nazarite, ma hope iho o kona āmū ʻana i ka mea laʻa.

²⁰ ‘A e hoʻāli ke kahuna ia mau mea i mōhai hoʻāli i mua o Iēhova; ʻo ia ka mea laʻa na ke kahuna, me ka umauma hoʻāli a me ka ʻūhā mua i kaʻikaʻi ʻia. A ma hope e pono nō kā Nazarite ke inu i ka waina.’

²¹ ¶ “ʻO ia ke kānāwai no kā Nazarite hoʻohiki, a no kāna mōhai na Iēhova no kona hoʻokaʻawale ʻana; he ʻokoʻa ka mea a kona lima i loaʻa ai: e like me ka hoʻohiki ʻana āna i hoʻohiki ai, pēlā nō ʻo ia e hana ai ma ke kānāwai o kona kaʻawale ʻana.”

²² ¶ ʻŌlelo maila ʻo Iēhova iā Mose, ʻī maila,

²³ “E ʻōlelo aku ʻoe iā ʻAʻarona a me kāna mau keiki, e ʻī aku, ‘Penei ʻoukou e hoʻomaikaʻi aku ai i nā mamo a ʻIseraʻela, i ka ʻī ʻana aku iā lākou,

²⁴ ¶ “Na Iēhova ʻoe e hoʻomaikaʻi mai, a e mālama mai;

²⁵ ¶ “Na Iēhova e kau mai i ka mālamalama o kona maka ma luna iho ou, A e lokomaikaʻi mai iā ʻoe.

²⁶ ¶ “Na Iēhova e maliu mai iā ʻoe, A e hāʻawi mai i malu nou.”’

²⁷ “A e kau aku lākou i koʻu inoa ma luna iho o nā mamo a ʻIseraʻela, a e hoʻopōmaikaʻi aku au iā lākou.”