KA BUKE ʻAHĀ A MOSE, I KAPA ʻIA NĀ HELU 4 - Ka Baibala Hemolele

1 No ka helu ʻana i nā ʻohana a Kohata, a Geresona a me kā Merari. 46 Ka huina a lākou a pau.

MOKUNA IV.

¹ ¶ ʻŌlelo maila ʻo Iēhova iā Mose a me ʻAʻarona, ʻī maila,

² “E helu ʻolua i nā mamo a Kohata no waena mai o nā mamo a Levi, ma muli o ko lākou mau ʻohana, ma ko ka hale o ko lākou poʻe kūpuna;

³ mai ke kanakolu o ka makahiki a keu aku, a hiki i ke kanalima o ka makahiki, i nā mea a pau e komo ana i loko o ka poʻe nāna e hana i ka ʻoihana ma ka halelewa o ke anaina.

⁴ “Eia nō ka ʻoihana a nā mamo a Kohata i loko o ka halelewa o ke anaina, no nā mea hoʻāno loa;

⁵ i ka wā e hele aku ai ka poʻe hoʻomoana, e haele mai ʻo ʻAʻarona me kāna mau keiki kāne, a e hoʻokuʻu i lalo lākou i ka pale uhi, a e hoʻouhi iho i ka pahu Kānāwai ia mea;

⁶ a e kau iho ma luna o laila i ka uhi ʻili tahasa, a e hohola ma luna i lole paʻapū i ka uliuli, a e hoʻokomo i kona mau ʻauamo.

⁷ “A e hohola lākou i ka lole uliuli ma luna o ka papa no ka berena hōʻike, a e kau ma luna o laila i nā ipu me nā puna a me nā bola, a me nā kīʻaha no ka mōhai inu; a ma luna iho ka berena hoʻomau ʻia.

⁸ “A e hohola iho lākou ma luna o ia mau mea i ka lole ʻulaʻula, a e hoʻouhi aʻe ia mea i uhi ʻili tahasa, a e hoʻokomo i kona mau ʻauamo.

⁹ “A e lawe lākou i lole uliuli, a e hoʻouhi i ke kumu kukui mālamalama, a me nā ipukukui ona, a me nā ʻūpā koli ona, a me nā ipu ʻūpā koli, a me kona mau ipu ʻaila a pau, nā mea a lākou e lawelawe ai no ia mea.

¹⁰ “E hahao hoʻi lākou ia me nā ipu ona a pau ma loko o ka wahī ʻili tahasa, a e kau aku ma luna o ka ʻauamo.

¹¹ “A ma luna o ke kuahu gula e hohola ai lākou i lole uliuli, a e hoʻouhi lākou ia i uhi ʻili tahasa, a e hoʻokomo i kona mau ʻauamo.

¹² “E lawe hoʻi lākou i nā ipu a pau o ka ʻoihana a lākou e lawelawe ai i loko o ke keʻena kapu, a e waiho i loko o ka lole uliuli, a e uhi iho ia mau mea i uhi ʻili tahasa, a e kau aku ma luna o ka lāʻau.

¹³ “E lawe hoʻi lākou i ka lehu mai ke kuahu aku, a e hohola lākou i ka lole mākuʻe ma luna iho.

¹⁴ “A e kau aku lākou ma luna ona i kona mau ipu a pau a lākou e lawelawe ai a puni, i nā ipu ahi, i nā ʻō no ka ʻiʻo, i nā mea kope, a me nā bola, a me nā ipu a pau no ke kuahu; a e hohola lākou ma luna i uhi ʻili tahasa, a e hoʻokomo i kāna mau ʻauamo.

¹⁵ “A pau aʻela ka uhi ʻana o ʻAʻarona a me kāna mau keiki kāne i ke keʻena kapu, i nā ipu a pau o ke keʻena kapu, no ka neʻeneʻe ʻana aku o ka poʻe hoʻomoana; a ma hope iho, e hele mai nā mamo a Kohata e halihali; akā, ʻaʻole lākou e hoʻopā aku i kekahi mea i laʻa, o make lākou. ʻO kēia mau mea ka ukana a ka poʻe mamo a Kohata ma ka halelewa o ke anaina.

¹⁶ “Ua pili hoʻi i ka ʻoihana a ʻEleazara ke keiki a ʻAʻarona ke kahuna, ka ʻaila no ka mālamalama, me ka mea ʻala ʻoluʻolu, ka mōhai ʻai i kēlā lā i kēia lā, a me ka ʻaila poni; ke kiaʻi ʻana i ka halelewa a pau, a me nā mea a pau o loko, i loko hoʻi o ke keʻena kapu, a i loko o nā ipu ona a pau.”

¹⁷ ¶ ʻŌlelo maila ʻo Iēhova iā Mose a me ʻAʻarona, ʻī maila,

¹⁸ “Mai hōʻoki aku ʻolua i ka ʻohana o nā hale o kā Kohata mai waena aku o nā Levi.

¹⁹ “ʻO kēia kā ʻolua e hana aku ai no lākou, i ola ai lākou, ʻaʻole hoʻi e make, i ko lākou hele ʻana mai a kokoke i nā mea hoʻāno loa; na ʻAʻarona me kāna mau keiki kāne e komo aʻe, a e hāʻawi aku i kēlā kanaka i kēia kanaka a pau i kāna hana, a me kāna ukana.

²⁰ “ʻAʻole naʻe lākou e komo i loko e nānā i ka uhi ʻana i nā mea hoʻāno, o make lākou.”

²¹ ¶ ʻŌlelo maila ʻo Iēhova iā Mose, ʻī maila,

²² “E helu hoʻi ʻoe i nā mamo a Geresona, ma nā hale a pau o ko lākou poʻe mākua kāne, ma nā ʻohana a lākou.

²³ “Mai nā makahiki he kanakolu a keu aku, a hiki i ke kanalima o nā makahiki kāu e helu aku ai iā lākou; i ka poʻe a pau e komo aʻe e lawelawe, a e hana i ka hana i loko o ka halelewa anaina.

²⁴ “Eia ka hana a nā ʻohana a kā Geresona e hana ai a e halihali ai:

²⁵ e hali lākou i nā pākū o ka halelewa, a me ka halelewa o ke anaina, a me kona uhi, a me ka uhi ʻili tahasa ma luna iho ona, a me ka pale no ka puka o ka halelewa o ke anaina,

²⁶ a me nā pākū o ka pā, a me ka pākū no ka puka o ka pā, ma ka halelewa a ma ke kuahu a puni, a me ko lākou mau kaula, a me nā ipu a lākou i lawehana ai, a me nā mea a pau i hana ʻia no ia mau mea; pēlā nō lākou e hana ai.

²⁷ “Ma ke kauoha a ʻAʻarona a me kāna mau keiki ka hana a pau a nā mamo a Geresona, no kā lākou mau ukana a pau, a me kā lākou hana a pau; a e hāʻawi aku ʻoukou i kā lākou ukana a pau na lākou e mālama.

²⁸ “ʻO ia ka hana a nā ʻohana mamo a Geresona ma ka halelewa o ke anaina; a ʻo kā lākou hana, ma lalo ia o ka lima o ʻItamara ke keiki a ʻAʻarona ke kahuna.

²⁹ ¶ “A no nā mamo a Merari, e helu ʻoe iā lākou ma muli o kā lākou mau ʻohana, ma ka hale o ko lākou poʻe mākua kāne.

³⁰ “Mai ke kanakolu o nā makahiki a keu aku, a hiki i ke kanalima o ka makahiki kāu e helu ai iā lākou, ʻo kēlā mea kēia mea e komo aku e lawelawe, a e hana i ka hana o ka halelewa anaina.

³¹ “Eia hoʻi ka mālama ʻana o kā lākou ukana, e like me kā lākou hana a pau ma ka halelewa o ke anaina: ʻo nā papa o ka halelewa, a me kona mau kaola, a me kona mau kia, a me kona mau kumu,

³² a me nā pou no ka pā a puni, a me ko lākou mau kumu, a me nā mākia o ia mau mea, a me ko lākou mau kaula, me nā ipu o lākou a pau, a me kā lākou mau hana a pau; ma ka inoa kā ʻoukou e helu ai i nā mea i mālama ʻia ai no kā lākou ukana.

³³ “ʻO ia ka hana a nā ʻohana mamo a Merari, no kā lākou hana a pau ma ka halelewa o ke anaina, ma lalo o ka lima o ʻItamara ke keiki a ʻAʻarona ke kahuna.”

³⁴ ¶ Helu akula ʻo Mose me ʻAʻarona, a me nā luna o ke anaina kanaka, i nā mamo a Kohata ma muli o kā lākou mau ʻohana, a ma ko ka hale o ko lākou poʻe kūpuna;

³⁵ mai ke kanakolu o nā makahiki a keu aku, a hiki i ke kanalima, i nā mea a pau i komo i loko o ka ʻoihana, no ka hana ma ka halelewa o ke anaina;

³⁶ a ʻo nā mea o lākou i helu ʻia ma ko lākou mau ʻohana, he ʻelua tausani me nā haneri ʻehiku a me ke kanalima.

³⁷ ʻO ia ka poʻe i helu ʻia no nā ʻohana a Kohata, ʻo nā mea a pau e pono ke hana i ka hana ma ka halelewa o ke anaina kanaka, ʻo nā mea a Mose lāua ʻo ʻAʻarona i helu ai, e like me ke kauoha a Iēhova, ma ka lima o Mose.

³⁸ ¶ A ʻo ka poʻe mamo a Geresona i helu ʻia, ma kā lākou mau ʻohana a pau, a ma ko ka hale o ko lākou poʻe kūpuna,

³⁹ mai ke kanakolu o nā makahiki a keu aku, a hiki i ke kanalima o nā makahiki; ʻo nā mea a pau e komo ma loko o ka ʻoihana, no ka hana ma ka halelewa o ke anaina;

⁴⁰ ʻo nā mea o lākou i helu ʻia, ma ko lākou mau ʻohana a pau, ma ko ka hale o ko lākou poʻe kūpuna, he ʻelua tausani ʻeono haneri a me ke kanakolu.

⁴¹ ʻO ia nā mea i helu ʻia o nā ʻohana mamo a Geresona, ʻo nā mea a pau e pono ke hana i ka hana ma ka halelewa o ke anaina, nā mea a Mose lāua ʻo ʻAʻarona i helu ai, ma muli o ke kauoha ʻana a Iēhova.

⁴² ¶ A ʻo ka poʻe i helu ʻia o nā ʻohana mamo a Merari, ma ko lākou mau ʻohana, ma ko ka hale o ko lākou poʻe kūpuna,

⁴³ mai ke kanakolu o nā makahiki a keu aku, a hiki i ke kanalima o nā makahiki, ʻo nā mea a pau e komo ma loko o ka ʻoihana, no ka hana ma ka halelewa o ke anaina;

⁴⁴ ʻo nā mea o lākou i helu ʻia ma muli o ko lākou mau ʻohana, he ʻekolu tausani me nā haneri ʻelua.

⁴⁵ ʻO ia nā mea i helu ʻia o nā ʻohana mamo a Merari, ka poʻe a Mose lāua ʻo ʻAʻarona i helu ai, ma muli o ka ʻōlelo a Iēhova ma ka lima o Mose.

⁴⁶ ¶ ʻO ka poʻe a pau o nā Levi i helu ʻia, ka poʻe a Mose me ʻAʻarona a me nā luna o kā ʻIseraʻela i helu ai, ma ko lākou mau ʻohana, a ma ko ka hale o ko lākou poʻe kūpuna;

⁴⁷ mai ke kanakolu o nā makahiki a keu aku, a hiki i ke kanalima o nā makahiki, ʻo nā mea a pau i hele mai e hana i ka ʻoihana lawelawe, a me ka ʻoihana o ka hali ukana ma ka halelewa o ke anaina;

⁴⁸ ʻo nā mea o lākou i helu ʻia, he ʻawalu tausani ʻelima haneri a me ke kanawalu.

⁴⁹ E like me kā Iēhova i kauoha ai, ua helu ʻia lākou ma ka lima o Mose, ʻo kēlā kanaka kēia kanaka ma kāna hana, a ma kāna ukana; pēlā i helu ʻia ai lākou e ia, e like me kā Iēhova i kauoha mai ai iā Mose.