KA BUKE ʻAHĀ A MOSE, I KAPA ʻIA NĀ HELU 33 - Ka Baibala Hemolele

1 ʻO nā hele ʻana he kanahākumamālua o nā mamo a ʻIseraʻela.

MOKUNA XXXIII.

¹ ¶ Eia nā hele ʻana o nā mamo a ʻIseraʻela, ʻo ka poʻe i puka aʻe mai ka ʻāina ʻo ʻAigupita mai, me ko lākou poʻe kaua, ma lalo o ka lima o Mose lāua ʻo ʻAʻarona.

² Kākau ihola ʻo Mose i ko lākou mau puka ʻana aku e like me nā hele ʻana o lākou ma ke kauoha a Iēhova: eia hoʻi nā hele ʻana o lākou, e like me ko lākou mau puka ʻana.

³ A puka akula lākou mai Ramese aku i ka malama mua, i ka lā ʻumikumamālima o ka malama mua: i ka lā ma hope iho o ka Mōliaola, puka akula nā mamo a ʻIseraʻela me ka lima kākāuha i mua o nā maka o ko ʻAigupita a pau.

⁴ A kanu ihola ko ʻAigupita i nā hiapo a pau a Iēhova i luku ai i waena o lākou; hoʻopaʻi aku nō hoʻi ʻo Iēhova i nā hewa ma luna o ko lākou mau akua.

⁵ ¶ Hele akula nā mamo a ʻIseraʻela mai Ramese aku, hoʻomoana ihola ma Sukota.

⁶ Puka akula lākou mai Sukota aku, a hoʻomoana ma ʻEtama, ma ke kaʻe o ka wao nahele.

⁷ A hele lākou mai ʻEtama aku, a huli aʻela ma Pi Hahirota, kahi e kū pono ana i mua o Baʻala Zepona; a hoʻomoana ihola i mua o Migedola.

⁸ A hele lākou mai ke alo aku o Pi Hahirota, a hele lākou i waena o ke kai i loko o ka wao nahele, a hele i ʻekolu lā o ka hele ʻana i loko o ka wao nahele ʻo ʻEtama, a hoʻomoana ihola ma Mara.

⁹ A hele akula lākou mai Mara aku a hiki i ʻElima; a ma ʻElima he ʻumikumamālua nā pūnāwai, a me nā lāʻau pāma he kanahiku; a hoʻomoana ihola lākou i laila.

¹⁰ Hele lākou mai ʻElima aku, a hoʻomoana ihola ma ke Kai ʻUla.

¹¹ A hele lākou mai ke Kai ʻUla aʻe, a hoʻomoana ma ka wao nahele ʻo Sina.

¹² A mai ka wao nahele aku o Sina lākou i hele ai, a hoʻomoana ihola ma Dopeka.

¹³ Hele hoʻi lākou mai Dopeka aku, a hoʻomoana ihola ma ʻAlusa.

¹⁴ Hele lākou mai ʻAlusa aku, a hoʻomoana ma Repidima, he wahi wai ʻole ia e inu ai nā kānaka.

¹⁵ Mai Repidima aku lākou i hele ai, a hoʻomoana ihola ma ka wao nahele ʻo Sinai.

¹⁶ Hele aku hoʻi lākou mai ka wao nahele ʻo Sinai aku, a hoʻomoana ihola ma Kiberota Hataʻava.

¹⁷ ¶ Hele lākou mai Kiberota Hataʻava aku, a hoʻomoana ihola ma Hazerota.

¹⁸ Mai Hazerota aku lākou i hele ai, a hoʻomoana ihola ma Ritema.

¹⁹ Hele lākou mai Ritema aku, a hoʻomoana ihola ma Rimona Pereza.

²⁰ Hele lākou mai Rimona Pereza aku, a hoʻomoana ma Libena.

²¹ A mai Libena aku lākou i hele ai, a hoʻomoana ihola ma Risa.

²² A mai Risa aku lākou i hele ai, a hoʻomoana ihola ma Kehelata.

²³ Hele lākou mai Kehelata aku, a hoʻomoana ma ka Mauna Sapera.

²⁴ Mai ka mauna Sapera aku lākou i hele ai, a hoʻomoana ihola ma Harada.

²⁵ Hele hoʻi lākou mai Harada aku, a hoʻomoana ihola ma Makehelota.

²⁶ Mai Makehelota aku lākou i hele ai, a hoʻomoana ihola ma Tahata.

²⁷ Hele hoʻi lākou mai Tahata aku, a hoʻomoana ihola ma Tara.

²⁸ Mai Tara aku lākou i hele ai, a hoʻomoana ihola ma Miteka.

²⁹ Mai Miteka aku lākou, a hoʻomoana ma Hasemona.

³⁰ Mai Hasemona aku lākou, a hoʻomoana ma Moserota.

³¹ Mai Moserota aku lākou, a hoʻomoana ma Bene-Iakena.

³² Mai Bene-Iakena aku lākou, a hoʻomoana ihola ma Hora Gidegada.

³³ Mai Hora Gidegada aku lākou, a hoʻomoana ihola ma Iotabata.

³⁴ Mai Iotabata aku lākou, a hoʻomoana ihola ma ʻEberona.

³⁵ Mai ʻEberona aku lākou i hele, a hoʻomoana ihola ma ʻEziona Gebera.

³⁶ Hele akula hoʻi lākou mai ʻEziona Gebera aku, a hoʻomoana ihola ma ka wao nahele ʻo Zina, ʻo ia ʻo Kadesa.

³⁷ Hele hoʻi lākou mai Kadesa aku, a hoʻomoana ihola ma ka mauna Hora, ma ka palena o ka ʻāina ʻo ʻEdoma.

³⁸ ¶ A piʻi akula ʻo ʻAʻarona ke kahuna i ka mauna ʻo Hora, ma ke kauoha a Iēhova, a make ihola ia i laila, i ke kanahā o ka makahiki, ma hope mai o ka puka ʻana o nā mamo a ʻIseraʻela mai ka ʻāina ʻo ʻAigupita mai, i ka lā mua o ka malama ʻelima.

³⁹ Hoʻokahi haneri me ka iwakāluakumamākolu nā makahiki o ʻAʻarona, i kona wā i make ai ma Mauna Hora.

⁴⁰ ¶ A ʻo ke aliʻi ʻo ʻArada kā Kanaʻana, ka mea i noho ma ke Kūkulu Hema o ka ʻāina ʻo Kanaʻana, lohe aʻela ia i ka hele ʻana mai o nā mamo a ʻIseraʻela.

⁴¹ ¶ A hele lākou mai ka mauna Hora aku, a hoʻomoana ihola ma Zalemona.

⁴² Hele aku hoʻi lākou mai Zalemona aku, a hoʻomoana ihola ma Punona.

⁴³ Mai Punona aku lākou i hele ai, a hoʻomoana ihola ma ʻObota.

⁴⁴ Hele akula hoʻi lākou mai ʻObota aku, a hoʻomoana ihola ma ʻIie ʻAbarima.

⁴⁵ Hele aku hoʻi lākou mai ʻIie ʻAbarima aku, a hoʻomoana ihola ma Dibona Gada,

⁴⁶ A hele aku lākou mai Dibona Gada aku, a hoʻomoana ma ʻAlemona Dibelataima.

⁴⁷ A hele hoʻi lākou mai ʻAlemona Dibelataima aku, a hoʻomoana ma nā mauna o ʻAbarima i mua o Nebo.

⁴⁸ Hele hoʻi lākou mai nā mauna ʻo ʻAbarima aku, a hoʻomoana ihola ma nā pāpū o Moaba, ma Ioredane o Ieriko.

⁴⁹ A hoʻomoana ihola lākou ma Ioredane, mai Bete Iesimota a hiki i ʻAbela Sitima, ma nā pāpū o Moaba.

⁵⁰ ¶ ʻŌlelo maila ʻo Iēhova iā Mose ma nā pāpū o Moaba, ma Ioredane o Ieriko, ʻī maila,

⁵¹ “E ʻōlelo aku ʻoe i nā mamo a ʻIseraʻela, e ʻī aku iā lākou, ‘A hiki aku ʻoukou ma kēlā ʻaoʻao o Ioredane, ma ka ʻāina ʻo Kanaʻana;

⁵² a laila, e hoʻokuke aku ʻoukou i nā kānaka a pau o ka ʻāina mai ko ʻoukou alo aku, e hoʻolei aku hoʻi i nā kiʻi kākau ʻia a pau o lākou, a e hoʻolei hoʻi i nā kiʻi i hoʻoheʻeheʻe ʻia a pau o lākou, a e wāwahi loa i nā heiau a pau o lākou.

⁵³ ‘E hoʻohemo aku ʻoukou i ko ka ʻāina, a e noho iho ʻoukou i laila; no ka mea, ua hāʻawi aku au i ka ʻāina no ʻoukou e komo ai i laila.

⁵⁴ ‘A e puʻunaue ʻoukou i ka ʻāina i noho ana i waena o nā ʻohana o ʻoukou ma ka hailona; no ka poʻe nui e hoʻonui ʻoukou i kona ʻāina, a no ka poʻe ʻuʻuku e hōʻuʻuku iho i kona ʻāina; ʻo ko kēlā kanaka, ʻo ko kēia kanaka ma kahi i hailona ʻia ai kona; ma nā ʻohana o ko ʻoukou poʻe kūpuna, ʻoukou e noho ai.

⁵⁵ ‘A i ʻole ʻoukou e hoʻokuke aku i nā kānaka o ka ʻāina mai ko ʻoukou alo aku; a laila, ʻo ka poʻe a ʻoukou e waiho ai, e lilo lākou i mea ʻoiʻoi ma ko ʻoukou mau maka, a i kui ma nā ʻaoʻao o ʻoukou, a e hoʻopōpilikia mai lākou iā ʻoukou ma ka ʻāina a ʻoukou e noho ai.

⁵⁶ ‘Eia hoʻi kekahi, e hana aku nō au iā ʻoukou, e like me kaʻu i manaʻo ai e hana aku iā lākou.’”