KA BUKE ʻAHĀ A MOSE, I KAPA ʻIA NĀ HELU 32 - Ka Baibala Hemolele

1 Ka noi ʻana o nā ʻohana a Reubena lāua ʻo Gada i kuleana ma ka hikina o Ioredane. 6 Ka pāpā ʻana o Mose iā lākou. 16 Hoʻākāka lākou iā ia i ke kumu o ko lākou manaʻo, a ua ʻae mai nō ʻo Mose. 34 Kūkulu hou lākou i nā kūlanakauhale.

MOKUNA XXXII.

¹ ¶ He nui loa nā holoholona a nā mamo a Reubena, a me nā mamo a Gada; a i ka manawa i ʻike ai lākou i ka ʻāina ʻo Iazera a me ka ʻāina ʻo Gileada, aia hoʻi, he wahi pono ia no nā holoholona;

² hele maila nā mamo a Gada a me nā mamo a Reubena, a ʻōlelo maila iā Mose, a iā ʻEleazara ke kahuna, a i nā luna o ke anaina kanaka, ʻī maila,

³ “ʻO ʻAtarota, ʻo Dibona, ʻo Iazera, ʻo Nimera, ʻo Hesebona, ʻo ʻEleale, ʻo Sebama, ʻo Nebo, a ʻo Beona,

⁴ ʻo ka ʻāina a Iēhova i luku ai i mua o ke anaina kanaka o kā ʻIseraʻela, he ʻāina ia no nā holoholona; a he holoholona iā mākou ʻo kāu poʻe kauā.

⁵ ʻĪ maila lākou, “No kēia mea, a i loaʻa iā mākou ke aloha i mua o kou maka, e ʻae mai ʻoe e hāʻawi ʻia mai kēia ʻāina i wahi e noho ai no kāu mau kauā, ʻaʻole nō e kaʻi aku iā mākou ma kēlā ʻaoʻao o Ioredane.”

⁶ ¶ Nīnau akula ʻo Mose i nā mamo a Gada, a i nā mamo a Reubena, “E hele nō anei ko ʻoukou poʻe hoahānau i ke kaua, a e noho nō ʻoukou ma neʻi?

⁷ “No ke aha lā hoʻi e hoʻonāwaliwali ai ʻoukou i nā naʻau o nā mamo a ʻIseraʻela, i hele ʻole ai lākou i ka ʻāina a Iēhova i hāʻawi mai ai no lākou?

⁸ “Pēlā nō i hana ai ko ʻoukou poʻe mākua, iaʻu i hoʻouna aku ai iā lākou mai Kadesa Banea aku e mākaʻikaʻi i ka ʻāina.

⁹ “No ka mea, i ka manawa i piʻi aku ai lākou ma ke awāwa ʻo ʻEsekola, a ʻike akula i ka ʻāina, hoʻonāwaliwali lākou i ka naʻau o nā mamo a ʻIseraʻela, i hele ʻole aku ai lākou i ka ʻāina a Iēhova i hāʻawi mai ai no lākou.

¹⁰ “A ua hoʻā ʻia ka inaina o Iēhova ia lā, a hoʻohiki ihola ia, i ka ʻī ʻana mai,

¹¹ ‘He ʻoiaʻiʻo, ʻaʻole kekahi o nā kānaka i hele mai nei mai ʻAigupita mai, nā mea o nā makahiki he iwakālua a keu aku, e ʻike aku i ka ʻāina aʻu i hoʻohiki ai no ʻAberahama, no ʻIsaʻaka a no Iakoba; no ka mea, ʻaʻole lākou i hahai pono ma muli oʻu;

¹² ʻo Kaleba wale nō ʻo ke keiki a Iepune kā Kenezi, lāua ʻo Iosua ke keiki a Nuna; no ka mea, ua hahai pono nō lāua iā Iēhova.’

¹³ “A hoʻā ʻia ka inaina o Iēhova i kā ʻIseraʻela, a hōʻauana aʻela ʻo ia iā lākou ma ka wao nahele i nā makahiki he kanahā, a pau loa aʻela ka hanauna a pau i hana hewa i mua o Iēhova.

¹⁴ “Aia hoʻi, ua kū aʻe nei ʻoukou i pani no ka hakahaka o ko ʻoukou poʻe mākua, he hanauna kanaka hewa, e hoʻomāhuahua aku i ka inaina nui o Iēhova i kā ʻIseraʻela.

¹⁵ “No ka mea, a i huli aku ʻoukou mai muli ona aku, e haʻalele hou mai auaneʻi ʻo ia iā lākou i loko o ka wao nahele, a e make kēia poʻe kānaka a pau iā ʻoukou.”

¹⁶ ¶ Hele mai lākou a kokoke i ona lā, ʻī maila, “E hana nō mākou i nā pā hipa no ko mākou holoholona, a me nā kūlanakauhale no nā keiki a mākou;

¹⁷ akā, e hele mākaukau nō mākou i ke kaua i mua o nā mamo a ʻIseraʻela, a alakaʻi mākou iā lākou i ko lākou wahi; a e noho nā keiki a mākou i nā kūlanakauhale i paʻa i ka pā, no nā kānaka o ka ʻāina.

¹⁸ “ʻAʻole nō mākou e hoʻi hou i nā hale o mākou, a loaʻa i kēlā kanaka i kēia kanaka o nā mamo a ʻIseraʻela kona ʻāina hoʻoili.

¹⁹ “No ka mea, ʻaʻole mākou e ʻai ʻāina me lākou ma kēlā ʻaoʻao o Ioredane; a ma ʻō aku; no ka mea, ua loaʻa iā mākou ko mākou ʻāina hoʻoili ma kēia ʻaoʻao o Ioredane ma ka hikina.”

²⁰ ¶ ʻĪ akula ʻo Mose iā lākou, “Inā paha ʻoukou e hana ia mea, a e hele me ka mākaukau i ke kaua i mua o Iēhova,

²¹ a e hele ʻoukou a pau me ka mākaukau ma kēlā ʻaoʻao o Ioredane i mua o Iēhova, a pau kona poʻe ʻenemi i ka hoʻokuke ʻia aku e ia mai kona alo aku,

²² a pio ka ʻāina i mua o Iēhova; a ma hope iho e hoʻi hou auaneʻi ʻoukou, me ka hala ʻole i mua o Iēhova, i mua hoʻi o kā ʻIseraʻela; a e lilo kēia ʻāina no ʻoukou i mua o Iēhova.

²³ “Akā, i hana ʻole ʻoukou pēlā, aia hoʻi, ua hana hewa aku ʻoukou iā Iēhova; a e ʻike pono ʻoukou e pili auaneʻi ko ʻoukou hewa iā ʻoukou iho.

²⁴ “E hana ʻoukou i nā kūlanakauhale no nā keiki a ʻoukou, a me nā pā no nā hipa a ʻoukou; a e hana ʻoukou i ka mea a ko ʻoukou waha i ʻōlelo mai ai.”

²⁵ ʻŌlelo maila nā mamo a Gada, a me nā mamo a Reubena, ʻī maila, “E hana nō nā kauā āu e like me kuʻu haku i ʻōlelo mai nei.

²⁶ “ʻO kā mākou poʻe kamaliʻi, ʻo nā wāhine a mākou, ʻo ko mākou holoholona ʻuʻuku, a me ko mākou holoholona nui a pau, e waiho ʻia i laila ma loko o nā kūlanakauhale o Gileada;

²⁷ akā, ʻo kāu poʻe kauā, ʻo kēlā mea kēia mea e hele mākaukau i mua o Iēhova i ke kaua, e like me ka ʻōlelo ʻana mai a kuʻu haku.”

²⁸ ¶ A kauoha akula ʻo Mose no lākou iā ʻEleazara ke kahuna, a me Iosua ke keiki a Nuna, a me nā lunakahiko o nā ʻohana mamo a ʻIseraʻela.

²⁹ ʻĪ akula ʻo Mose iā lākou, “Inā e hele pū aku me ʻoukou nā mamo a Gada, a me nā mamo a Reubena ma kēlā ʻaoʻao o Ioredane, ʻo kēlā kanaka ʻo kēia kanaka me ka mākaukau i ke kaua i mua o Iēhova, a e hoʻopio ʻia ka ʻāina i mua o ʻoukou; a laila e hāʻawi ʻoukou i ka ʻāina ʻo Gileada i kuleana no lākou.

³⁰ “A i ʻole lākou e hele mākaukau aku me ʻoukou ma kēlā ʻaoʻao, a laila e loaʻa iā lākou ko lākou kuleana i waena o ʻoukou ma ka ʻāina ʻo Kanaʻana.”

³¹ ʻŌlelo maila nā mamo a Gada a me nā mamo a Reubena, ʻī maila, “E like me kā Iēhova i ʻōlelo mai ai i kāu poʻe kauā, pēlā nō mākou e hana aku ai.

³² “E hele mākaukau aku nō mākou i mua o Iēhova i loko o ka ʻāina ʻo Kanaʻana, i lilo ai no mākou ka ʻāina o ko mākou kuleana ma kēia ʻaoʻao o Ioredane.”

³³ ¶ A hāʻawi akula ʻo Mose no lākou, no nā mamo a Gada a me nā mamo a Reubena, a me ka ʻohana hapa a Manase a ke keiki a Iosepa, i ke aupuni o Sihona ke aliʻi o kā ʻAmora, a me ke aupuni o ʻOga ke aliʻi o Basana, i ka ʻāina me nā kūlanakauhale ona, ma nā palena, nā kūlanakauhale o ia ʻāina a puni.

³⁴ A kūkulu akula nā mamo a Gada iā Dibona, me ʻAtarota, me ʻAroera,

³⁵ me ʻAterota, me Sopana, me Iazera, a me Iogebeha,

³⁶ me Bete Nimera a me Bete Harana, nā kūlanakauhale i puni i ka pā, a me nā pā hipa.

³⁷ A kūkulu akula nā mamo a Reubena iā Hesebona, me ʻEleale, a me Kiriataima,

³⁸ a me Nebo, me Baʻala Meona, (ua hoʻololi ʻia ko lākou mau inoa,) a me Sibema; a ma muli o nā inoa, kapa aku lākou i nā inoa o nā kūlanakauhale a lākou i kūkulu ai.

³⁹ A hele akula nā keiki a Makira ke keiki a Manase i Gileada, a lawe pio ihola ia wahi, a hoʻokuke akula i kā ʻAmora e noho ana i loko o laila.

⁴⁰ A hāʻawi akula ʻo Mose i Gileada iā Makira ke keiki a Manase, a noho ihola ia i laila.

⁴¹ Hele akula hoʻi ʻo Iaira ke keiki a Manase, a lawe pio akula i nā kauhale o ia wahi, a kapa akula i ko lākou inoa, ʻo Havota Iaira.

⁴² A hele akula ʻo Noba a lawe pio akula iā Kenata, a me nā kauhale ona, a kapa aku ia wahi, ʻo Noba, ma muli o kona inoa iho.