KA BUKE ʻAHĀ A MOSE, I KAPA ʻIA NĀ HELU 31 - Ka Baibala Hemolele

1 No ke kaua me ka Midiana. 7 Pepehi kā ʻIseraʻela i nā kāne a pau me nā aliʻi, a lawe pio i nā wāhine a me nā kamaliʻi, a me ko lākou waiwai. 13 Ka huhū o Mose me nā luna kaua, no ka hoʻōla ʻana i nā wāhine a me nā keiki kāne. 19 Ka huikala ʻana o ka poʻe kaua, 25 a me ka māhele ʻana i ka waiwai pio.

MOKUNA XXXI.

¹ ¶ ʻŌlelo maila ʻo Iēhova iā Mose, ʻī maila,

² “E hoʻopaʻi i ka hana ʻino ʻia mai o nā mamo a ʻIseraʻela ma luna o kā Midiana; a ma hope e hui ʻia aku ʻoe me ou poʻe kānaka.”

³ ʻŌlelo akula ʻo Mose i nā kānaka, ʻī akula, “E hoʻomākaukau i kekahi poʻe o ʻoukou no ke kaua, a e kuʻu aku iā lākou e hele kūʻē i kā Midiana, a e hoʻopaʻi aku i ko Iēhova ma luna o kā Midiana.

⁴ “I hoʻokahi tausani no kēlā ʻohana, kēia ʻohana ma nā ʻohana a pau a ʻIseraʻela, kā ʻoukou e hoʻouna aku ai i ke kaua.”

⁵ A ua hāʻawi ʻia mai no loko mai o nā tausani o kā ʻIseraʻela, he tausani hoʻokahi no kēlā ʻohana no kēia ʻohana, he ʻumikumamālua nā tausani i mākaukau no ke kaua.

⁶ Hoʻouna akula ʻo Mose iā lākou i ke kaua, i hoʻokahi tausani o ka ʻohana hoʻokahi, iā lākou a me Pinehasa ke keiki a ʻEleazara ke kahuna, me nā mea hoʻāno, a me nā pū e puhi aku ai ma kona lima, i ke kaua.

⁷ A kaua akula lākou i kā Midiana, e like me kā Iēhova i kauoha mai ai iā Mose; a pepehi ihola lākou i nā kāne a pau.

⁸ Pepehi ihola hoʻi lākou i nā aliʻi o Midiana, he ʻokoʻa kēlā poʻe o lākou i pepehi ʻia, ʻo ʻEvi, ʻo Rekema, ʻo Zura, ʻo Hura, a me Reba, nā aliʻi ʻelima o Midiana; pepehi ihola hoʻi lākou iā Balaʻama ke keiki a Beora me ka pahi kaua.

⁹ Lawe pio akula nā mamo a ʻIseraʻela i nā wāhine a me kā lākou poʻe keiki liʻiliʻi, a hao aʻela lākou i nā bipi o lākou a pau, me nā holoholona a pau o lākou, a me ko lākou waiwai a pau.

¹⁰ Puhi akula lākou i nā kūlanakauhale a pau kahi a lākou i noho ai, a me nā pā holoholona a pau o lākou, i ke ahi.

¹¹ Lālau aʻela lākou i ka waiwai pio a pau, a me ka mea a pau i hao ʻia, ʻo nā kānaka a me nā holoholona.

¹² Lawe maila lākou i nā pio a me ka waiwai pio, a me nā holoholona, i o Mose lā lāua ʻo ʻEleazara ke kahuna, a i ke anaina kanaka o nā mamo a ʻIseraʻela, i kahi hoʻomoana ma nā pāpū o Moaba ma Ioredane o Ieriko.

¹³ ¶ Hele akula ʻo Mose me ʻEleazara ke kahuna, a me nā luna a pau o ke anaina kanaka e hālāwai me lākou ma waho o kahi hoʻomoana.

¹⁴ Huhū akula ʻo Mose i nā luna kaua, i nā luna tausani a me nā luna haneri, i hele mai, mai ke kaua mai.

¹⁵ ʻĪ akula ʻo Mose iā lākou, “Ua hoʻōla mai nō anei ʻoukou i nā wāhine a pau?

¹⁶ “Aia hoʻi, ʻo kēia ka poʻe i hoʻowalewale i nā mamo a ʻIseraʻela, ma muli o ka manaʻo o Balaʻama, e lawehala iā Iēhova ma ka mea a Peora, a hiki mai nō ke ahulau i waena o ke anaina kanaka o Iēhova.

¹⁷ “No ia hoʻi, e pepehi ʻoukou i nā kāne a pau i waena o nā kamaliʻi, a e pepehi i nā wāhine a pau i ʻike i ke kāne ma ka moe me ia.

¹⁸ “Akā, ʻo ka poʻe kaikamāhine a pau i ʻike ʻole i ke kāne ma ka moe me ia, ʻo ia kā ʻoukou e hoʻōla ai.

¹⁹ “A e noho ʻoukou ma waho o kahi hoʻomoana i nā lā ʻehiku; ʻo ka mea i pepehi i kekahi kanaka, a ʻo ka mea i hoʻopā aku i ke kupapaʻu, e huikala ʻoukou iā ʻoukou iho a me ko ʻoukou poʻe pio, i ke kolu o ka lā, a i ka hiku o ka lā.

²⁰ “E huikala hoʻi ʻoukou i nā ʻaʻahu a pau, a me nā mea ʻili a pau, a me nā mea hulu kao a pau, a me nā mea lāʻau a pau.”

²¹ ¶ ʻŌlelo akula hoʻi ʻo ʻEleazara ke kahuna i nā koa i hele aku i ke kaua, “Eia ka ʻoihana o ke kānāwai a Iēhova i kauoha mai ai iā Mose:

²² ʻo ke gula wale nō, ʻo ke kālā, ʻo ke keleawe, ʻo ka hao, ʻo ka piuta, a me ke kēpau,

²³ ʻo kēlā mea kēia mea e pono ma ke ahi, ʻo ia kā ʻoukou e hoʻohele ma waena o ke ahi, a e huikala ʻia ʻo ia; a e hoʻomaʻemaʻe ʻia nō naʻe ia i ka wai huikala; a ʻo nā mea a pau e pono ʻole ma ke ahi, ʻo ia kā ʻoukou e hoʻohele ma waena o ka wai;

²⁴ a i ka hiku o ka lā, e holoi ʻoukou i ko ʻoukou mau ʻaʻahu, a e maʻemaʻe ʻoukou; a ma hope iho e hele mai auaneʻi ʻoukou ma loko o kahi hoʻomoana.”

²⁵ ¶ ʻŌlelo maila ʻo Iēhova iā Mose, ʻī maila,

²⁶ “E helu i ka waiwai pio o ka poʻe i lawe pio, o kānaka a me nā holoholona, ʻo ʻoe a me ʻEleazara ke kahuna, a me nā lunakahiko o ke anaina kanaka.

²⁷ “A e puʻunaue i ka waiwai pio i nā puʻu ʻelua; no ka poʻe i lawe i ke kaua ma luna o lākou iho, ka poʻe i hele aku i ke kaua kekahi, a no ke anaina kanaka a pau kekahi.

²⁸ “A e ʻauhau ʻoe no Iēhova i nā kānaka kaua, i ka poʻe i hele aku i ke kaua: i hoʻokahi kino no loko mai o nā haneri ʻelima, o nā kānaka, ʻo nā bipi, ʻo nā hoki, a ʻo nā hipa.

²⁹ “E lawe ia no loko mai o kā lākou hapalua, a e hāʻawi aku na ʻEleazara ke kahuna, i mōhai kaʻikaʻi no Iēhova.

³⁰ “A no loko mai o ka hapalua no nā mamo a ʻIseraʻela, kāu e lawe aku ai i hoʻokahi hapa kanalima o nā kānaka, ʻo nā bipi, ʻo nā hoki, ʻo nā hipa, a ʻo nā holoholona a pau, a e hāʻawi aku ia mau mea na nā Levi, na ka poʻe e mālama ana i ka ukana o ka halelewa no Iēhova.”

³¹ A hana akula ʻo Mose lāua ʻo ʻEleazara ke kahuna, e like me kā Iēhova i kauoha mai ai iā Mose.

³² ¶ A ʻo ka waiwai pio, ʻo ke koena o ka waiwai pio a nā kānaka kaua i lawe pio ai, he ʻaono haneri me kanahikukumamālima nā tausani hipa,

³³ a he kanahikukumamālua nā tausani bipi,

³⁴ a he kanaonokumamākahi nā tausani hoki,

³⁵ a he kanakolukumamālua nā tausani wāhine a pau i ʻike ʻole i ke kāne ma ka moe ʻana me ia.

³⁶ A ʻo ka hapalua, ka puʻu a ka poʻe i hele aku i ke kaua, ma ka helu ʻana, he ʻakolu haneri me kanakolukumamāhiku nā tausani hipa, a me nā haneri keu ʻelima;

³⁷ a ʻo nā hipa ʻauhau na Iēhova, he ʻaono haneri me kanahikukumamālima.

³⁸ A he kanakolukumamāono nā tausani bipi; a ʻo ka ʻauhau na Iēhova no loko mai o ia poʻe, he kanahikukumamālua.

³⁹ A ʻo nā hoki, he kanakolu nā tausani, a me nā haneri keu ʻelima; a ʻo ka ʻauhau na Iēhova no loko mai o ia poʻe, he kanaonokumamākahi.

⁴⁰ A ʻo nā wāhine, he ʻumikumamāono nā tausani; a he kanakolukumamālua o lākou ke ʻauhau no Iēhova.

⁴¹ A hāʻawi akula ʻo Mose i ka ʻauhau, i ka mea mōhai kaʻikaʻi a Iēhova, na ʻEleazara ke kahuna, e like me kā Iēhova i kauoha mai ai iā Mose.

⁴² ¶ A ʻo ka hapalua a nā mamo a ʻIseraʻela, ka mea a Mose i puʻunaue ai mai nā kānaka kaua mai,

⁴³ (ʻo kā ke anaina kanaka hapalua, he ʻakolu haneri me ke kanakolukumamāhiku nā tausani hipa, a me nā haneri keu ʻelima,

⁴⁴ a he kanakolukumamāono nā tausani bipi,

⁴⁵ a he kanakolu tausani nā hoki me nā haneri keu ʻelima,

⁴⁶ a he ʻumikumamāono tausani nā wāhine)

⁴⁷ a lawe akula ʻo Mose i hoʻokahi hapa kanalima, no loko mai o ka hapalua a nā mamo a ʻIseraʻela, i nā kānaka a me nā holoholona, a hāʻawi aku iā lākou na ka poʻe Levi, ka poʻe i mālama i ka ukana o ka halelewa o Iēhova; e like me kā Iēhova i kauoha mai iā Mose.

⁴⁸ ¶ Hele maila nā luna o nā tausani o ke kaua, a kokoke i o Mose lā, ʻo nā luna tausani a me nā luna haneri;

⁴⁹ ʻī akula lākou iā Mose, “Ua helu iho nei kāu poʻe kauā i nā kānaka kaua ma lalo iho o mākou, ʻaʻole hoʻi i nalowale kekahi kanaka o mākou.

⁵⁰ “No laila mākou i lawe mai nei i ʻālana no Iēhova, i ka mea a kēlā kanaka a kēia kanaka i loaʻa ai: ʻo nā mea gula, nā kūpeʻe, nā apo, nā komo lima, nā apo pepeiao, nā lei ʻāʻī, i mea hoʻokalahala iā mākou iho i mua o Iēhova.”

⁵¹ A lawe akula ʻo Mose a me ʻEleazara i ke gula, i nā mea i hana ʻia a pau, mai o lākou aku.

⁵² ʻO ke gula a pau o ka mōhai, ka mea a nā luna tausani a me nā luna haneri i kaumaha aku ai no Iēhova, he ʻumikumamāono tausani ʻehiku haneri a me kanalima nā sekela.

⁵³ (No ka mea, ua lawe nā kānaka kaua i ka waiwai pio, ʻo kēlā kanaka kēia kanaka nona iho.)

⁵⁴ Lawe akula ʻo Mose lāua ʻo ʻEleazara ke kahuna i ke gula o nā luna tausani a me nā luna haneri, a halihali akula ia mea i loko o ka halelewa o ke anaina, i mea hoʻomanaʻo no nā mamo a ʻIseraʻela i mua o Iēhova.