KA BUKE ʻAHĀ A MOSE, I KAPA ʻIA NĀ HELU 30 - Ka Baibala Hemolele

1 No nā hoʻohiki ʻana. ʻAʻole e haʻihaʻi ʻia ka ʻōlelo hoʻohiki. 3 Kā ke kaikamahine hoʻohiki. 6 Kā ka wahine mea kāne. 9 Kā ka wahine kāne make, a me kā ka wahine kāne hemo.

MOKUNA XXX.

¹ ¶ ʻŌlelo akula ʻo Mose i nā luna ʻohana no nā mamo a ʻIseraʻela, ʻī akula, “Eia ka mea a Iēhova i kauoha mai ai.

² “Inā e hoʻohiki ke kanaka i ka hoʻohiki ʻana iā Iēhova, a e hoʻohiki paha ia i ka hoʻohiki ʻana e hoʻopaʻa iā ia iho i ka mea paʻa; ʻaʻole nō e uhaʻi ia i kāna ʻōlelo, e hana nō ia e like me ka mea paʻa e puka aʻe ana mai loko aku o kona waha.

³ “Inā e hoʻohiki ka wahine i ka hoʻohiki ʻana iā Iēhova, a e hoʻopaʻa iā ia iho i ka mea paʻa, i loko nō ia o ka hale o kona makua kāne, i kona wā ʻōpiopio;

⁴ a lohe kona makua kāne i kona hoʻohiki ʻana, a me kāna mea paʻa, i ka mea āna i hoʻopaʻa ai iā ia iho, a noho mālie kona makua kāne iā ia; a laila, e kūpaʻa kona mau hoʻohiki ʻana a pau, a ʻo nā mea paʻa a pau āna i hoʻopaʻa ai iā ia iho, e kūpaʻa nō.

⁵ “Akā, inā hōʻole aku kona makua kāne iā ia, i ka lā āna i lohe ai; ʻaʻole nō e kūpaʻa kekahi hoʻohiki āna, a me kekahi mea paʻa āna i hoʻopaʻa ai iā ia iho; a e kala aʻe nō ʻo Iēhova iā ia; no ka mea, ua hōʻole mai kona makua kāne iā ia.

⁶ ¶ “Inā hoʻi he kāne kāna i ka wā āna i hoʻohiki ai, a i ʻōlelo ai paha i kekahi mea mai loko mai o kona mau lehelehe, ma ka mea āna i hoʻopaʻa ai iā ia iho;

⁷ a lohe aʻela kāna kāne, a noho mālie iā ia i ka lā āna i lohe ai, a laila e kūpaʻa kāna mau hoʻohiki, a me kāna mau mea paʻa āna i hoʻopaʻa ai iā ia iho.

⁸ “Akā, inā hōʻole aku kāna kāne iā ia i ka lā āna i lohe ai, a laila e hoʻolilo auaneʻi ʻo ia i kāna hoʻohiki ʻana, āna i hoʻohiki ai, a me ka mea āna i ʻōlelo wale ai ma kona lehelehe, i ka mea āna i hoʻopaʻa ai iā ia iho, i mea ʻole; a e kala mai nō ʻo Iēhova iā ia.

⁹ ¶ “Akā, ʻo nā hoʻohiki a pau a ka wahine kāne make, a me kā ka wahine kāne hemo paha, ma nā mea a lāua i hoʻopaʻa ai iā lāua iho, e kūpaʻa nō ia mau mea iā ia.

¹⁰ “Inā paha ma loko o ka hale o kāna kāne ʻo ia i hoʻohiki ai, a i hoʻopaʻa iā ia iho i ka mea paʻa ma ka hoʻohiki ʻana;

¹¹ a lohe aʻela kāna kāne, a noho mālie nō iā ia, ʻaʻole hoʻi ia i hōʻole aku iā ia, a laila nō e kūpaʻa kāna mau hoʻohiki a pau, a ʻo nā mea paʻa a pau āna i hoʻopaʻa ai iā ia iho e kūpaʻa nō.

¹² “Akā, inā i hoʻolilo kāna kāne ia mau mea i mea ʻole loa, i ka lā āna i lohe ai; ʻaʻole nō e kūpaʻa ka mea i puka mai mai loko mai o kona mau lehelehe no kāna hoʻohiki ʻana, a no kona hoʻopaʻa ʻana iā ia iho; na kāna kāne i hōʻole ia mau mea; a e kala mai nō ʻo Iēhova iā ia.

¹³ ¶ “ʻO nā hoʻohiki a pau, a me nā ʻōlelo hoʻopaʻa a pau e hōʻehaʻeha ai i kona naʻau iho, e pono nō i kāna kāne ke hoʻokūpaʻa aku ia, a e pono hoʻi i kāna kāne ke hōʻole aku ia.

¹⁴ “Akā, inā e noho mālie loa kāna kāne iā ia i kēlā lā i kēia lā, a laila, ua hoʻokūpaʻa aku nō ia i kāna mau hoʻohiki ʻana a pau, a me kona mau mea paʻa a pau ma luna ona; ua hōʻoiaʻiʻo nō ʻo ia ia mau mea; no ka mea, ua noho mālie ihola ʻo ia iā ia i ka lā āna i lohe ai.

¹⁵ “Akā, inā e hōʻole iki kāna kāne ia mau mea, ma hope o kona lohe ʻana, a laila nāna nō e lawe i ka hala o kāna wahine.”

¹⁶ ¶ ʻO ia nā kānāwai a Iēhova i kauoha mai ai iā Mose, i waena o ke kāne a me kāna wahine, i waena hoʻi o ka makua kāne a me kāna kaikamahine, i kona wā ʻōpiopio, ma ka hale o kona makua kāne.