KA BUKE ʻAHĀ A MOSE, I KAPA ʻIA NĀ HELU 3 - Ka Baibala Hemolele

1 No nā keiki a ʻAʻarona. 5 Ua hoʻokaʻawale ʻia nā Levi i poʻe kōkua i nā kāhuna. 14 Ua helu ʻia nā Levi. 40 Ka hoʻōla pānaʻi ʻana i nā hiapo kāne.

MOKUNA III.

¹ ¶ Eia hoʻi nā hanauna o ʻAʻarona lāua ʻo Mose, i ka lā a Iēhova i ʻōlelo mai ai iā Mose ma ka mauna ʻo Sinai.

² Eia hoʻi nā inoa o nā keiki a ʻAʻarona: ʻo Nadaba ka hiapo, ʻo ʻAbihu, ʻo ʻEleazara, a ʻo ʻItamara.

³ ʻO ia nā inoa o nā keiki a ʻAʻarona, nā kāhuna i poni ʻia, āna i hoʻolaʻa ai e lawelawe ma ka ʻoihana kahuna.

⁴ A make ihola ʻo Nadaba lāua ʻo ʻAbihu i mua o Iēhova, iā lāua i kaumaha aku ai i ke ahi ʻē i mua o Iēhova ma ka wao nahele ʻo Sinai, ʻaʻole hoʻi a lāua keiki; a lawelawe akula ʻo Eleazara lāua ʻo ʻItamara ma ka ʻoihana kahuna i mua o nā maka o ʻAʻarona ʻo ko lāua makua kāne.

⁵ ¶ ʻŌlelo maila ʻo Iēhova iā Mose, ʻī maila,

⁶ “E hoʻoneʻeneʻe mai i ka ʻohana a Levi a kokoke, a e hoʻonoho iā lākou i mua o ʻAʻarona ke kahuna, i lawelawe lākou nāna.

⁷ “Na lākou e mālama i kāna ʻoihana, a me kā ke anaina kanaka a pau ma ke alo o ka halelewa o ke anaina, e lawelawe i nā mea o ka halelewa.

⁸ “Na lākou e mālama i nā mea hana a pau o ka halelewa o ke anaina, a me ka hana a nā mamo a ʻIseraʻela, e hana ai i ka ʻoihana o ka halelewa.

⁹ “E hāʻawi aʻe ʻoe i nā Levi no ʻAʻarona a no kāna mau keiki: ua hāʻawi ʻia lākou a lilo loa nona, no loko o kā ʻIseraʻela.

¹⁰ “E kauoha aku ʻoe iā ʻAʻarona a me kāna mau keiki, a e lawelawe lākou ma kā ke kahuna ʻoihana; a ʻo ke kanaka ʻē ke hele mai a kokoke, e make ia.”

¹¹ ¶ ʻŌlelo maila ʻo Iēhova iā Mose, ʻī maila,

¹² “ʻO wau nei hoʻi, ua hoʻokaʻawale aʻe nei au i nā Levi mai waena mai o nā mamo a ʻIseraʻela, i pānaʻi no nā hiapo a pau i hānau mua o nā mamo a ʻIseraʻela; no ia mea, noʻu nō nā Levi;

¹³ no ka mea, noʻu nō nā makahiapo a pau; i ka lā aʻu i luku ai i nā makahiapo a pau ma ka ʻāina ʻo ʻAigupita, hoʻolaʻa ihola hoʻi au noʻu i nā makahiapo ma kā ʻIseraʻela, i kā nā kānaka a me kā nā holoholona; noʻu nō lākou; ʻo wau nō Iēhova.”

¹⁴ ¶ ʻŌlelo maila ʻo Iēhova iā Mose ma ka wao nahele ʻo Sinai, ʻī maila,

¹⁵ “E helu ʻoe i nā mamo o Levi ma muli o ko ka hale a ko lākou poʻe kūpuna, ma ko lākou mau ʻohana; ʻo nā kāne a pau mai ka malama hoʻokahi a keu aku kāu e helu aku ai.”

¹⁶ A helu ihola ʻo Mose iā lākou ma muli o ka ʻōlelo a Iēhova, e like me ia i kauoha ʻia mai ai.

¹⁷ Eia hoʻi nā keiki a Levi ma ko lākou mau inoa: ʻo Geresona, ʻo Kohata, a ʻo Merari.

¹⁸ A eia nā inoa o nā keiki a Geresona, ma kā lāua mau ʻohana: ʻo Libeni a ʻo Simei.

¹⁹ Eia hoʻi nā keiki a Kohata ma kā lākou mau ʻohana: ʻo ʻAmerama, ʻo ʻIzehara, ʻo Heberona a ʻo ʻUziʻela.

²⁰ A ʻo nā keiki a Merari, ma kā lāua mau ʻohana: ʻo Maheli a ʻo Musi; ʻo ia nā ʻohana o nā Levi, ma ko ka hale o ko lākou poʻe kūpuna.

²¹ ¶ Na Geresona ka ʻohana o nā Libeni a me nā Simei; ʻo ia nā ʻohana o nā keiki a Geresona.

²² ʻO ko lākou poʻe i helu ʻia ma ka helu ʻana i nā kāne a pau, mai ka malama hoʻokahi a keu aku, ʻo ka poʻe o lākou i helu ʻia, he ʻehiku tausani a me nā haneri keu ʻelima.

²³ A e hoʻomoana nā ʻohana o kā Geresona ma hope o ka halelewa ma ka ʻaoʻao komohana.

²⁴ A ʻo ka luna ʻohana o ke kupuna o kā Geresona, ʻo ia ʻo ʻEliasapa ke keiki a Laʻela.

²⁵ ʻO ka mea a nā mamo a Geresona e mālama ai ma ka halelewa o ke anaina, ʻo ia ʻo ka halelewa ma loko, ka hale lole a me ka mea uhi ma luna, a me ka pākū no ka puka o ka halelewa o ke anaina,

²⁶ a me nā pākū o ka pā, a me ka pale no ka puka o ka pā, ka mea e pili ana ma ka halelewa a ma ke kuahu a puni, a me kona mau kaula no nā ʻoihana a pau ona.

²⁷ ¶ Na Kohata ka ʻohana o kā ʻAmerama, me ka ʻohana o kā ʻIzehara, a me ka ʻohana o kā Heberona, a me ka ʻohana o kā ʻUziʻela; ʻo ia nā ʻohana o kā Kohata.

²⁸ I ka helu ʻana i nā kāne a pau mai ka malama hoʻokahi a keu aku, he ʻewalu tausani a me nā haneri keu ʻeono, e mālama ana i nā mea o kahi hoʻāno.

²⁹ E hoʻomoana nā ʻohana a nā keiki a Kohata ma ka ʻaoʻao hema o ka halelewa.

³⁰ A ʻo ka luna o ka ʻohana kupuna o nā ʻohana o kā Kohata, ʻo ia ʻo ʻElizapana ke keiki a ʻUziʻela.

³¹ ʻO kā lākou mea e mālama ai, ʻo ia ka pahu, ka papa ʻaina, ka ipukukui, nā kuahu, a me nā ipu o ke keʻena kapu, nā mea a lākou e lawelawe ai, a me ka pale a me kāna ʻoihana a pau.

³² A ʻo ʻEleazara ke keiki a ʻAʻarona ke kahuna, ʻo ia ka luna ma luna o ka luna o nā Levi, a e nānā aku ia ma luna o ka poʻe mālama i ka ʻoihana o ke keʻena kapu.

³³ ¶ Na Merari ka ʻohana o kā Maheli a me ka ʻohana o kā Musi; ʻo ia nā ʻohana na Merari.

³⁴ ʻO nā mea o lākou i helu ʻia, ma ka helu ʻana i nā kāne a pau, mai ka malama hoʻokahi a keu aku, ʻeono ia tausani a me nā haneri keu ʻelua.

³⁵ A ʻo ka luna o ko ka hale o ka makua nāna nā ʻohana o Merari, ʻo ia ʻo Zuriʻela ke keiki a ʻAbihaila; e hoʻomoana lākou ma ka ʻaoʻao ʻākau o ka halelewa.

³⁶ A ʻo ka ʻoihana mālama a nā keiki a Merari, ʻo ia nā papa o ka halelewa, me kona mau kaola, a me kona mau pou, a me kona mau kumu, a me kona mau ipu, a me ka ʻoihana a pau i laila,

³⁷ a me nā pou o ka pā a puni, a me ko lākou mau kumu, a me ko lākou mau mākia, a me ko lākou mau kaula.

³⁸ ¶ Akā, ʻo ka poʻe hoʻomoana ma ke alo o ka halelewa, ma ka ʻaoʻao hikina, i mua o ka halelewa anaina ma ka hikina, ʻo ia ʻo Mose a me ʻAʻarona a me kāna mau keiki, i mea e mālama ai i ke keʻena kapu, no ka ʻoihana a nā mamo a ʻIseraʻela; a ʻo ke kanaka ʻē ke hele mai a kokoke, e make nō ia.

³⁹ ʻO nā Levi a pau i helu ʻia, a Mose lāua ʻo ʻAʻarona i helu ai ma muli o ke kauoha ʻana mai a Iēhova, ma nā ʻohana o lākou; ʻo nā kāne a pau mai ka malama hoʻokahi a keu aku, he iwakāluakumamālua tausani.

⁴⁰ ¶ ʻŌlelo maila ʻo Iēhova iā Mose, “E helu ʻoe i nā makahiapo kāne a pau o nā mamo a ʻIseraʻela, ʻo ka malama hoʻokahi a keu aku, a e helu hoʻi i nā inoa o lākou.

⁴¹ “E lawe ʻoe i nā Levi noʻu, (ʻo wau nō Iēhova,) i pānaʻi no nā hiapo a pau i waena o nā mamo a ʻIseraʻela; a i nā holoholona o kā Levi i pānaʻi no nā holoholona hiapo o nā mamo a ʻIseraʻela.”

⁴² A helu akula ʻo Mose i nā makahiapo a pau i waena o nā mamo a ʻIseraʻela, e like me kā Iēhova i kauoha mai ai iā ia.

⁴³ ʻO nā makahiapo kāne a pau, ma ka helu ʻana i nā inoa, ʻo ka poʻe o lākou i helu ʻia mai ka malama hoʻokahi a keu aku, he iwakāluakumamālua tausani, me nā haneri ʻelua a me ke kanahikukumamākolu.

⁴⁴ ¶ ʻŌlelo maila ʻo Iēhova iā Mose, ʻī maila,

⁴⁵ “E lawe ʻoe i nā Levi i pānaʻi no nā makahiapo a pau i waena o nā mamo a ʻIseraʻela, a me nā holoholona o nā Levi i pānaʻi no ko lākou poʻe holoholona, a noʻu nō nā Levi; ʻo wau nō Iēhova.

⁴⁶ “A no ka poʻe e pānaʻi ʻia he ʻelua haneri me kanahikukumamākolu o nā hiapo o nā mamo a ʻIseraʻela, kai ʻoi ma mua o nā Levi,

⁴⁷ e ʻauhau aku ʻoe i nā sekela ʻelima no ke poʻo hoʻokahi; ma ka sekela o ke keʻena kapu kāu e ʻauhau aku ai; (he iwakālua gera, hoʻokahi ia sekela);

⁴⁸ a e hāʻawi aku ʻoe i ke kālā a ka poʻe keu o lākou i pānaʻi ʻia ai, iā ʻAʻarona a me kāna mau keiki kāne.”

⁴⁹ Lawe aʻela ʻo Mose i ke kālā pānaʻi a ka poʻe i koe o nā mea i pānaʻi ʻia e nā Levi.

⁵⁰ Lawe aʻela ʻo ia i ke kālā a nā hiapo o nā mamo a ʻIseraʻela; hoʻokahi tausani, ʻekolu haneri me kanaonokumamālima nā sekela, ma ka sekela o ke keʻena kapu.

⁵¹ A hāʻawi akula ʻo Mose i ke kālā a ka poʻe i pānaʻi ʻia, iā ʻAʻarona a me kāna mau keiki kāne, e like me ka ʻōlelo a Iēhova, me ka mea a Iēhova i kauoha mai ai iā Mose.