KA BUKE ʻAHĀ A MOSE, I KAPA ʻIA NĀ HELU 28 - Ka Baibala Hemolele

1 Nā kānāwai no nā mōhai kuni i kēlā lā i kēia lā. 11 No ka mahina hou. 16 No ka Mōliaola, a me ka ʻAhaʻaina Berena Hū ʻOle. 26 No ka ʻAhaʻaina Penetekota.

MOKUNA XXVIII.

¹ ¶ ʻŌlelo maila ʻo Iēhova iā Mose, ʻī maila,

² “E kauoha aku ʻoe i nā mamo a ʻIseraʻela, e ʻī aku iā lākou, ‘ʻO kuʻu mōhai, ʻo kuʻu berena mea mōhai i kuni ʻia i ke ahi, i mea ʻoluʻolu iaʻu, ʻo kā ʻoukou ia e mālama ai e kaumaha mai iaʻu i kona manawa pono.’

³ “A e ʻī aku ʻoe iā lākou, ‘Eia ka mōhai a ʻoukou e kaumaha ai iā Iēhova, ʻelua keiki hipa kīnā ʻole o ka makahiki mua, i kēlā lā i kēia lā, i mōhai kuni mau.

⁴ ‘E kaumaha ʻoe i kekahi keiki hipa i kakahiaka, a ʻo kekahi keiki hipa kāu e kaumaha ai i ke ahiahi.

⁵ ‘A he hapaʻumi o ka ʻepa palaoa i mōhai ʻai, i kāwili pū ʻia me ka hapahā o ka hina ʻaila i kuʻi ʻia.

⁶ ‘He mōhai kuni mau ia, i kauoha ʻia aku ma ka mauna ʻo Sinai, i mōhai ʻala ʻoluʻolu i kuni ʻia i ke ahi no Iēhova.

⁷ ‘A ʻo ka mōhai inu o ia mea, he hapahā o ka hina no kekahi keiki hipa; ma kahi hoʻāno kāu e ninini iho ai i ka waina no Iēhova i mōhai inu.

⁸ ‘A e kaumaha iho ʻoe i kēlā keiki hipa i ke ahiahi; e like me ka mōhai ʻai o kakahiaka, a me ka mōhai inu o laila, kāu e kaumaha iho ai, he mōhai i kuni ʻia i ke ahi, i mea ʻala ʻoluʻolu no Iēhova.

⁹ ¶ ‘A i ka lā Sābati, ʻelua keiki hipa kīnā ʻole o ka makahiki mua, a me ʻelua hapaʻumi o ke ana palaoa i mōhai ʻai, i kāwili pū ʻia me ka ʻaila, a me kona mōhai inu;

¹⁰ ʻo ia ka mōhai kuni no kēlā Sābati kēia Sābati, he ʻokoʻa ka mōhai kuni mau me kona mōhai inu.

¹¹ ¶ ‘A i nā lā mua o ko ʻoukou mau malama, e kaumaha iho ʻoukou i mōhai kuni iā Iēhova: i ʻelua bipi kāne hou, i hoʻokahi hipa kāne, i ʻehiku hipa keiki kīnā ʻole o ka makahiki mua;

¹² i ʻekolu hapaʻumi o ke ana palaoa i mōhai ʻai, i kāwili pū ʻia me ka ʻaila, no ka bipi kāne hoʻokahi; a ʻelua hapaʻumi o ka ʻepa palaoa, i mōhai ʻai, i kāwili pū ʻia me ka ʻaila, no ka hipa kāne hoʻokahi;

¹³ a hoʻokahi hapaʻumi o ka ʻepa palaoa i kāwili pū ʻia me ka ʻaila i mōhai ʻai, no ke keiki hipa hoʻokahi, i mōhai kuni mea ʻala ʻoluʻolu, he mōhai i hana ʻia ma ke ahi na Iēhova.

¹⁴ ‘A ʻo kā lākou mōhai inu, hoʻokahi hapalua o ka hina waina ma ka bipi kāne hoʻokahi, a he hapakolu o ka hina ma ka hipa kāne, a he hapahā o ka hina ma ke keiki hipa; ʻo ia ka mōhai kuni o kēlā malama kēia malama ma nā malama a pau o ka makahiki.

¹⁵ ‘A hoʻokahi keiki kao i mōhai lawehala iā Iēhova e kaumaha ʻia aku ai, he ʻokoʻa ka mōhai kuni mau a me kāna mōhai inu.

¹⁶ ¶ ‘I ka lā ʻumikumamāhā o ka malama mua ka Mōliaola no Iēhova.

¹⁷ ‘A i ka lā ʻumikumamālima o ia malama, ka ʻahaʻaina; he ʻehiku nā lā e ʻai ʻia ai ka berena hū ʻole.

¹⁸ ‘I ka lā maka mua, he hōʻuluʻulu hoʻāno; mai hana ʻoukou i kekahi hana luhi.

¹⁹ ‘Akā, e kaumaha aku ʻoukou i mōhai i hana ʻia ma ke ahi, i mōhai kuni no Iēhova: i ʻelua bipi kāne ʻōpio, i hoʻokahi hipa kāne, i ʻehiku hoʻi keiki hipa o ka makahiki mua; he mau mea kīnā ʻole iā ʻoukou.

²⁰ ‘A ʻo kā lākou mōhai ʻai, he palaoa i kāwili pū ʻia me ka ʻaila: ʻekolu hapaʻumi kā ʻoukou e mōhai ai no ka bipi kāne, a ʻelua hapaʻumi no ka hipa kāne;

²¹ hoʻokahi hapaʻumi kāu e mōhai aku ai no ke keiki hipa hoʻokahi, ma nā keiki hipa a ʻehiku;

²² a hoʻokahi kao kāne i mōhai lawehala, e hoʻokalahala no ʻoukou.

²³ ‘ʻO kēia mau mea kā ʻoukou e mōhai aku ai, he ʻokoʻa ka mōhai kuni i kakahiaka; ʻo ia nō ka mōhai kuni mau.

²⁴ ‘Pēlā ʻoukou e kaumaha aku ai i kēlā lā i kēia lā, i nā lā ʻehiku, i ka ʻiʻo o ka mōhai i mea ʻala ʻoluʻolu iā Iēhova; e kaumaha ʻia ʻo ia, he ʻokoʻa ka mōhai kuni mau, a me kona mōhai inu.

²⁵ ‘A i ka hiku o ka lā, he hōʻuluʻulu hoʻāno no ʻoukou; mai hana ʻoukou i kekahi hana maoli.

²⁶ ¶ ‘A i ka lā o nā hua mua, iā ʻoukou e lawe mai ai i ka mōhai ʻai hou na Iēhova, i ka pau ʻana o ko ʻoukou mau Hebedoma, he hōʻuluʻulu hoʻāno no ʻoukou; mai hana ʻoukou i kekahi hana luhi.

²⁷ ‘Akā, e kaumaha ʻoukou i ka mōhai kuni i mea ʻala ʻoluʻolu iā Iēhova: i ʻelua bipi kāne hou, i hoʻokahi hipa kāne, i ʻehiku keiki hipa o ka makahiki mua;

²⁸ a me kā lākou mōhai ʻai, ʻo ka palaoa i kāwili pū ʻia me ka ʻaila, i ʻekolu hapaʻumi me ka bipi kāne hoʻokahi, i ʻelua hapaʻumi hoʻi me ka hipa kāne hoʻokahi;

²⁹ i hoʻokahi hoʻi hapaʻumi ma ke keiki hipa hoʻokahi, a pēlā ma nā hipa keiki a ʻehiku;

³⁰ i hoʻokahi hoʻi kao kāne, e hoʻokalahala no ʻoukou.

³¹ ‘ʻO kā ʻoukou ia e kaumaha aku ai, he ʻokoʻa ka mōhai kuni mau, a me kāna mōhai ʻai a me kā lākou mōhai inu; he mau mea kīnā ʻole kēia no ʻoukou.