KA BUKE ʻAHĀ A MOSE, I KAPA ʻIA NĀ HELU 27 - Ka Baibala Hemolele

1 Nonoi nā kaikamāhine a Zelopehada i ka ʻāina e ili mai ana no ko lākou makua kāne i make. 6 Ke kānāwai no ka ʻāina hoʻoili. 12 Kauoha ʻia ʻo Mose e make; a ua hoʻonoho ʻia ʻo Iosua i luna o kā ʻIseraʻela ma hope.

MOKUNA XXVII.

¹ ¶ A laila hele mai nā kaikamāhine a Zelopehada, ke keiki a Hepera, ke keiki a Gileada, ke keiki a Makira, ke keiki a Manase, no nā ʻohana a Manase ke keiki a Iosepa; eia hoʻi nā inoa o kāna mau kaikamāhine: ʻo Mahela, ʻo Noa, ʻo Hogela, ʻo Mileka a me Tireza.

² Kū nō lākou i mua o Mose, i mua hoʻi o ʻEleazara ke kahuna, a i mua o nā luna, a i mua hoʻi o ke anaina kanaka a pau, ma ka puka o ka halelewa anaina, ʻī maila,

³ “Ua make ko mākou makua kāne ma ka wao nahele, ʻaʻole nō ia me ka poʻe i hoʻākoakoa pū e kūʻē iā Iēhova me Kora mā; akā, make nō ia i loko o kona hewa iho nō, ʻaʻole hoʻi āna keiki kāne.

⁴ “No ke aha lā e lawe ʻia aku ai ka inoa o ko mākou makua kāne mai waena aku o kona ʻohana, no kona nele i ke keiki kāne? E hāʻawi mai nō mākou i wahi e noho ai i waena o nā hoahānau o ko mākou makua kāne.”

⁵ A lawe akula ʻo Mose i ko lākou mea i mua o Iēhova.

⁶ ¶ ʻŌlelo maila ʻo Iēhova iā Mose, ʻī maila,

⁷ “Ke ʻōlelo pono mai nei nō nā kaikamāhine a Zelopehada; e hāʻawi ʻiʻo aku nō ʻoe i ʻāina hoʻoili i waena o nā hoahānau o ko lākou makua kāne; a e hoʻolilo ʻoe i ka ʻāina hoʻoili o ko lākou makua kāne no lākou.

⁸ “A e ʻōlelo aku ʻoe i nā mamo a ʻIseraʻela, e ʻī aku, ‘Inā make kekahi kanaka, ʻaʻole āna keiki kāne, a laila e hoʻolilo ʻoe i kona ʻāina i hoʻoili no kāna kaikamahine.

⁹ ‘Inā ʻaʻole hoʻi he kaikamahine nāna, e hāʻawi aku ʻoukou i kona ʻāina hoʻoili no kona mau hoahānau.

¹⁰ ‘A i ʻole ona hoahānau, a laila e hāʻawi aku ʻoukou i kona ʻāina hoʻoili no nā hoahānau o kona makua kāne.

¹¹ ‘A i ʻole nā hoahānau o kona makua kāne, a laila e hāʻawi aku ʻoukou i kona ʻāina hoʻoili no kona hoahānau e kokoke mai ana ma kona ʻohana, a e lilo ia nona.’” A e lilo ia i kānāwai hoʻopono no nā mamo a ʻIseraʻela, e like me kā ke Akua i kauoha mai ai iā Mose.

¹² ¶ ʻŌlelo maila ʻo Iēhova iā Mose, “E piʻi aku ʻoe i kēia kuahiwi ʻo ʻAbarima, e nānā i ka ʻāina aʻu i hāʻawi aku ai no nā mamo a ʻIseraʻela.

¹³ “A pau kou nānā ʻana, ʻo ʻoe hoʻi kekahi e hui pū ʻia aku me kou poʻe kānaka, e like me kou kaikuaʻana ʻo ʻAʻarona i hui pū ʻia aku ai.

¹⁴ “No ka mea, ua kūʻē mai ʻolua i kaʻu ʻōlelo ma ka wao nahele ʻo Zina, kahi i hakakā ai ke anaina kanaka; ʻaʻole ʻolua i hoʻāno mai iaʻu ma ka wai i mua o ko lākou mau maka”; ʻo ia ka wai o Meriba ma Kadesa ma ka wao nahele ʻo Zina.

¹⁵ ¶ ʻŌlelo akula ʻo Mose iā Iēhova, ʻī akula,

¹⁶ “Na Iēhova, na ke Akua o nā ʻuhane o kānaka a pau e hoʻonoho i kekahi kanaka ma luna o ke anaina kanaka,

¹⁷ “Nāna e hele aku i mua o lākou, nāna hoʻi e hele hou mai i mua o lākou; nāna lākou e kaʻi aku, nāna hoʻi lākou e kaʻi mai; i like ʻole ai ke anaina kanaka o Iēhova me nā hipa kahu ʻole.”

¹⁸ ʻĪ maila ʻo Iēhova iā Mose, “E lawe ʻoe iā Iosua ke keiki a Nuna, he kanaka i loko ona ka ʻUhane, a e kau ʻoe i kou lima ma luna ona;

¹⁹ a e hoʻonoho iā ia i mua o ʻEleazara ke kahuna, i mua hoʻi o ke anaina kanaka a pau; a e kauoha ʻoe iā ia i mua o lākou.

²⁰ “E kau aku ʻoe i kekahi o kou hanohano ma luna iho ona, i hoʻolohe mai ai ke anaina kanaka a pau o nā mamo a ʻIseraʻela.

²¹ “A e kū mai ia i mua o ʻEleazara ke kahuna, nāna e nīnau mai nona ma ka ʻōlelo a ka ʻUrima i mua o Iēhova; ma kāna ʻōlelo e hele aku ai lākou, a ma kāna ʻōlelo hoʻi lākou e hoʻi mai ai, ʻo ia a me nā mamo a pau a ʻIseraʻela me ia, ʻo ke anaina kanaka a pau.”

²² Hana ihola ʻo Mose, e like me kā Iēhova i kauoha mai ai iā ia; lawe akula ʻo ia iā Iosua, hoʻonoho ihola iā ia i mua o ʻEleazara ke kahuna, i mua hoʻi o ke anaina kanaka a pau.

²³ Kau akula ia i kona mau lima ma luna iho ona, a kauoha akula iā ia, e like me kā Iēhova i kauoha mai ai ma ka lima o Mose.