KA BUKE ʻAHĀ A MOSE, I KAPA ʻIA NĀ HELU 25 - Ka Baibala Hemolele

1 Lilo kekahi poʻe ʻIseraʻela i ka moekolohe a me ka hoʻomana kiʻi me nā wāhine o Midiana. 6 Ka make o Zimeri lāua ʻo Kozebi. 10 Ka ʻōlelo hoʻomaikaʻi a ke Akua iā Pinehasa. 16 Ke kauoha e kaua aku i ko Midiana.

MOKUNA XXV.

¹ ¶ Noho ihola kā ʻIseraʻela ma Sitima; a hoʻomaka ihola nā kānaka e moekolohe me nā kaikamāhine a kā Moaba.

² Koi maila lākou i nā kānaka e hele aku i nā ʻahaʻaina hoʻomana a nā akua o lākou; ʻai ihola nā kānaka, a kūlou ihola i nā akua o lākou.

³ Hui pū akula kā ʻIseraʻela me Baʻala Peora: a ua hoʻā ʻia maila ka inaina o Iēhova i kā ʻIseraʻela.

⁴ ʻŌlelo maila ʻo Iēhova iā Mose, “E lawe i nā luna a pau o kānaka, e kau aku iā lākou i mua o Iēhova ma ka lā, i hoʻohuli ʻia aku ai ka inaina nui o Iēhova mai kā ʻIseraʻela aku.”

⁵ ʻŌlelo akula ʻo Mose i nā luna kānāwai o kā ʻIseraʻela, “E pepehi ʻoukou a pau i nā kānaka o ʻoukou i hui pū ʻia aku me Baʻala Peora.

⁶ ¶ Aia hoʻi, hele mai kekahi mamo a ʻIseraʻela, a lawe maila i kekahi wahine no Midiana i nā hoahānau ona, i mua o nā maka o Mose, a i mua o nā maka o ke anaina kanaka a pau o nā mamo a ʻIseraʻela, e uē ana lākou ma ka puka o ka halelewa o ke anaina.

⁷ A ʻike akula ʻo Pinehasa ke keiki a ʻEleazara ke keiki a ʻAʻarona ke kahuna, kū aʻela ia ma waena o ke anaina kanaka, a lawe aʻela ia i ka ihe ma kona lima;

⁸ hahai akula ia ma muli o ua kanaka lā o kā ʻIseraʻela ma loko o ka halelewa, a hou ihola iā lāua a ʻelua, i ke kanaka o kā ʻIseraʻela a me ka wahine ma kona ʻōpū. Pēlā nō i pale ʻia ai ke ahulau mai nā mamo a ʻIseraʻela aku.

⁹ A ʻo ka poʻe i make i ke ahulau, he iwakāluakumamāhā tausani lākou.

¹⁰ ¶ ʻŌlelo maila ʻo Iēhova iā Mose, ʻī maila,

¹¹ “ʻO Pinehasa ke keiki a ʻEleazara, ke keiki a ʻAʻarona ke kahuna, ua hoʻohuli aʻe ia i kuʻu inaina mai nā mamo a ʻIseraʻela aku, no kona lili ʻana noʻu i waena o lākou; i hoʻopau ʻole ai au i nā mamo a ʻIseraʻela i kuʻu lili ʻana.

¹² “No laila, e ʻī aku ʻoe, ‘Aia hoʻi, ke hāʻawi aku nei au i kuʻu berita nona e malu ai;

¹³ nona nō ia, a no kāna poʻe mamo ma hope ona, ʻo ka berita o ka ʻoihana kahuna mau loa; no ka mea, ua lili ʻo ia no kona Akua, a ua hoʻokalahala ʻo ia no nā mamo a ʻIseraʻela.’”

¹⁴ ¶ ʻO ka inoa o ke kanaka ʻIseraʻela i pepehi ʻia, i pepehi pū ʻia me ka wahine o Midiana, ʻo ia ʻo Zimeri ke keiki a Salu, he luna o ka ʻohana kupuna no kā Simeona.

¹⁵ A ʻo ka inoa o ka wahine no Midiana i pepehi ʻia, ʻo ia ʻo Kosebi, ke kaikamahine a Zura, he luna ia o kekahi poʻe kānaka, no ka ʻohana aliʻi ma Midiana.

¹⁶ ¶ ʻŌlelo maila ʻo Iēhova iā Mose, ʻī maila,

¹⁷ “E kaua aku ʻoe i ko Midiana, a e pepehi iā lākou;

¹⁸ no ka mea, ke hoʻopilikia mai nei lākou iā ʻoukou, me ka hoʻowalewale ʻana a lākou i hoʻowalewale mai ai iā ʻoukou ma ka mea o Peora, a ma ka mea o Kosebi ke kaikamahine a kekahi aliʻi o Midiana, ko lākou kaikuahine, ʻo ka mea i pepehi ʻia i ka lā o ke ahulau no Peora.