KA BUKE ʻAHĀ A MOSE, I KAPA ʻIA NĀ HELU 24 - Ka Baibala Hemolele

1 Ka hoʻomaikaʻi hou ʻana o Balaʻama i kā ʻIseraʻela. 10 Huhū loa ihola ʻo Balaka a hoʻokuʻu aku nō iā Balaʻama. 15 Ka wānana a Balaʻama no kā ʻIseraʻela.

MOKUNA XXIV.

¹ ¶ A ʻike ihola ʻo Balaʻama, ua leʻaleʻa ʻo Iēhova i ka hoʻomaikaʻi aku i kā ʻIseraʻela, ʻaʻole ia i hele hou aku e like ma mua e ʻimi i nā kilokilo ʻana; akā, hāliu aʻela ia i kona maka ma ka wao nahele.

² ʻAlawa aʻela nā maka o Balaʻama i luna, ʻike aʻela i kā ʻIseraʻela e hoʻomoana ana ma ko lākou mau ʻohana; a kau maila ka ʻUhane o ke Akua ma luna ona.

³ Hāpai aʻela ia i kāna ʻōlelo nane, ʻī akula, “ʻO ka wānana a Balaʻama a ke keiki a Beora, ʻO ka wānana a ke kanaka i hoʻokaʻakaʻa ʻia kona mau maka,

⁴ “Ka wānana a ka mea i lohe i nā ʻōlelo a ke Akua, A ka mea i ʻike i ka Mea Mana ma ka hihiʻo, E moe ana i lalo, a e kaʻakaʻa ana kona mau maka;

⁵ “Nani ka maikaʻi o nā hale lole ou, e Iakoba! ʻO kou mau halelewa hoʻi, e ʻIseraʻela!

⁶ “E like me nā awāwa ko lākou pālahalaha ʻana, E like hoʻi me nā mahina ʻai ma kapa muliwai, Me nā lāʻau ʻaloe hoʻi a Iēhova i kanu ai, A me nā lāʻau kedera ma kapa o nā wai.

⁷ “E kahe ana ka wai mai loko aʻe o kona mau bākeke, A ma nā wai he nui kona hua kanu. E kiʻekiʻe aʻe hoʻi kona aliʻi ma luna o ʻAgaga, A e hoʻokiʻekiʻe ʻia aʻe kona aupuni.

⁸ “Na ke Akua ia i kaʻi mai nei, mai ʻAigupita mai; Iā ia hoʻi ka ikaika me he reʻema lā; E ʻai iho ʻo ia i nā lāhui kanaka i kona poʻe ʻenemi, A e uhaʻi ia i ko lākou mau iwi, E hou ʻia hoʻi lākou i kāna mau pua.

⁹ ‘Ua kukuli iho ia, ua moe iho me he liona kāne lā; A me ka liona wahine; na wai lā ia e hoʻāla aʻe?’ “E pōmaikaʻi ka mea hoʻomaikaʻi iā ʻoe, A e pōʻino ka mea hōʻino aku iā ʻoe.”

¹⁰ ¶ Ua hoʻā ʻia ka inaina o Balaka iā Balaʻama, a paʻi pū nā lima ona; ʻī maila ʻo Balaka iā Balaʻama, “Ua kiʻi aku nō wau iā ʻoe no ka hōʻino aku i kuʻu poʻe ʻenemi; aia hoʻi, eia ke kolu o kou hoʻomaikaʻi wale ʻana aku!

¹¹ “No laila, e holo aku ʻoe i kou wahi; i manaʻo ihola au e hoʻohanohano loa aku iā ʻoe; akā hoʻi, ʻo Iēhova kai keʻakeʻa mai iā ʻoe i loaʻa ʻole ai ka hanohano.”

¹² ʻŌlelo maila ʻo Balaʻama iā Balaka, “ʻAʻole anei au i ʻōlelo aku i ka poʻe ʻelele āu i hoʻouna ai i oʻu lā, i ka ʻī ʻana aku,

¹³ ‘Inā e hāʻawi mai ʻo Balaka i ke kālā a me ke gula a piha kona hale, inā ʻaʻole e hiki iaʻu ke hoʻohala i ka ʻōlelo a Iēhova, e hana i ka maikaʻi, ʻaʻole hoʻi i ka hewa ma kuʻu manaʻo iho: ʻo kā Iēhova e ʻōlelo mai ai, ʻo ia kaʻu e haʻi aku ai’?

¹⁴ “ʻĀnō hoʻi, ke hoʻi aku nei au i koʻu poʻe kānaka; ʻeā, e haʻi ʻē aku nō au iā ʻoe i ka mea a kēia poʻe kānaka e hana mai ai i kou poʻe kānaka i nā lā ma hope.”

¹⁵ Hāpai aʻela ia i kāna ʻōlelo nane, ʻī akula, “ʻO ka wānana a Balaʻama ke keiki a Beora, Ka wānana a ke kanaka i hoʻokaʻakaʻa ʻia aʻe kona maka;

¹⁶ “Ka wānana a ka mea i lohe i ka ʻōlelo a ke Akua, A ka mea ʻike i ka mea ʻikea o ka Mea Kiʻekiʻe, A ka mea nānā i ka mea ʻikea o ka Mea Mana Loa, E moe iho ana, a e kaʻakaʻa ana kona mau maka.

¹⁷ “E ʻike auaneʻi au iā ia, ʻaʻole hoʻi ʻānō; E nānā auaneʻi au iā ia, ʻaʻole hoʻi e kokoke; E puka mai auaneʻi he Hōkū mai o Iakoba mai; E kū mai ana nō hoʻi he Koʻokoʻo mai o ʻIseraʻela mai, A e luku aku nō ia i nā kihi o Moaba, A e pepehi iho ia i nā keiki hoʻohaunaele a pau.

¹⁸ “E lilo ʻo ʻEdoma i wahi e noho ai; A e lilo ʻo Seira i wahi e noho ai no kona poʻe ʻenemi, A e hana ikaika nō ʻo kā ʻIseraʻela.

¹⁹ “Na Iakoba e puka mai auaneʻi ka mea e aliʻi ana, A e luku iho ʻo ia i ke koena o ke kūlanakauhale.”

²⁰ Nānā akula hoʻi ʻo ia i kā ʻAmeleka, haʻi maila ia i kāna ʻōlelo nane, ʻī maila, “ʻO ʻAmeleka, ke poʻokela o nā lāhui kanaka, Akā ʻo kona hope, e make mau loa nō ʻo ia.”

²¹ Nānā akula hoʻi ia i kā Keni, hāpai aʻela ia i kāna ʻōlelo nane, ʻī maila, “Ua paʻa kou wahi i noho ai, Ua kau aku ʻoe i kou pūnana ma luna o ka pōhaku;

²² “Akā, e lawe ʻia aku ka Keni, āhea lā E lawe pio aku ʻo ʻAsuria iā ʻoe?”

²³ Haʻi akula ia i kāna ʻōlelo nane, ʻī akula, “Auē! ʻO wai lā uaneʻi ke ola i ka wā e hana mai ai ke Akua i kēia?

²⁴ “Mai kauwahi mai o Kitima mai, nā moku, A e hoʻopilikia lākou i ko ʻAsuria a e hoʻopilikia hoʻi i kā ‘Ebera, A e luku loa ʻia aku ʻo ia.”

²⁵ Kū aʻela ʻo Balaʻama, hele akula ia, a hoʻi akula i kona wahi; a hele akula hoʻi ʻo Balaka i kona ʻaoʻao.