KA BUKE ʻAHĀ A MOSE, I KAPA ʻIA NĀ HELU 23 - Ka Baibala Hemolele

1 Hana nō ʻo Balaka i nā kuahu ʻehiku, a mōhai ihola ma luna. 4 Hālāwai mai ke Akua me Balaʻama, a hoʻomaikaʻi maila ʻo ia i kā ʻIseraʻela. 13 Ka mōhai hou ʻana a Balaka, a me ka hoʻomaikaʻi hou ʻana o Balaʻama. 27 Ke kolu o ka mōhai ʻana a Balaka.

MOKUNA XXIII.

¹ ¶ ʻĪ akula ʻo Balaʻama iā Balaka, “E hana ʻoe noʻu ma ʻaneʻi i mau kuahu ʻehiku; e hoʻomākaukau hoʻi ʻoe noʻu i nā bipi kāne ʻehiku a me nā hipa kāne ʻehiku.”

² Hana ihola ʻo Balaka e like me kā Balaʻama i ʻōlelo aku ai; a mōhai akula ʻo Balaka lāua ʻo Balaʻama ma kēlā kuahu ma kēia kuahu i ka bipi kāne hoʻokahi a me ka hipa kāne hoʻokahi.

³ ʻĪ akula ʻo Balaʻama iā Balaka, “E kū iho ʻoe ma kāu mōhai kuni, a e hele aku wau; malia paha e hele mai nō ʻo Iēhova e hālāwai me aʻu; a ʻo ka mea āna e hōʻike mai ai iaʻu, ʻo ia kaʻu e haʻi aku ai iā ʻoe.” A hele akula ia i kahi kiʻekiʻe.

⁴ A hālāwai maila ke Akua me Balaʻama; ʻī akula hoʻi ʻo ia iā ia, “Ua hoʻomākaukau nō wau i nā kuahu ʻehiku, ua mōhai aku hoʻi au i ka bipi kāne a me ka hipa kāne ma luna o kēlā kuahu o kēia kuahu.”

⁵ Waiho maila ʻo Iēhova i wahi ʻōlelo ma ka waha o Balaʻama, ʻī maila, “Ō hoʻi ʻoe i o Balaka lā, a penei kāu e ʻōlelo aku ai.”

⁶ A hoʻi hou aʻela ia i ona lā; aia hoʻi, e kū ana ʻo ia ma kāna mōhai kuni, ʻo ia a me nā luna a pau o Moaba.

⁷ Hāpai aʻela ia i kāna ʻōlelo nane, ʻī akula, “Na Balaka ke aliʻi o Moaba au i lawe mai nei Mai ʻArama mai, mai nā mauna o ka hikina. ‘E hele mai, e hōʻino noʻu i kā Iakoba, E hele mai, e hoʻohewa aku i kā ʻIseraʻela!

⁸ “Pehea lā au e hōʻino ai i kā ke Akua i hōʻino ʻole ai? Pehea lā hoʻi au e hoʻohewa ai i kā Iēhova i hoʻohewa ʻole ai?

⁹ “No ka mea, ma luna o nā pali kaʻu e ʻike aku nei iā ia; Ma luna hoʻi o nā puʻu aʻu e nānā aku nei iā ia; Aia hoʻi, e noho kaʻawale ia poʻe kānaka, ʻAʻole hoʻi e hui ʻia aku me nā lāhui kanaka.

¹⁰ “ʻO wai lā e hiki ke helu i nā huna lepo o Iakoba, A me ka lehulehu o ka hapahā o kā ʻIseraʻela? E ake au e make i ka make ʻana o ka mea pono, I like hoʻi kuʻu hope me kona!”

¹¹ ¶ ʻĪ maila ʻo Balaka iā Balaʻama, “He aha kēia āu i hana mai ai iaʻu? Kiʻi akula nō wau iā ʻoe e ʻōlelo hōʻino i kuʻu poʻe ʻenemi; aia hoʻi, ua hoʻomaikaʻi wale aku ʻoe iā lākou!”

¹² ʻŌlelo akula kēlā, ʻī akula, “ʻAʻole anei au e hoʻomanaʻo e ʻōlelo aku i ka mea a Iēhova i waiho mai ai i loko o kuʻu waha?”

¹³ ¶ ʻĪ maila ʻo Balaka iā ia, “Ke noi aku nei au iā ʻoe, e hele pū kāua ma kahi ʻē, ma laila e ʻike aku ai ʻoe iā lākou; e ʻike ʻoe i kēlā ʻaoʻao wale nō, ʻaʻole nō e ʻike iā lākou a pau; a ma laila ʻoe e hōʻino ai iā lākou noʻu.”

¹⁴ Kaʻi akula kēlā iā ia i kahi pāpū ʻo Zopima, ma luna pono o Pisega; hana ihola ia i nā kuahu ʻehiku, a mōhai akula i ka bipi kāne a me ka hipa kāne ma kēlā kuahu a ma kēia kuahu.

¹⁵ ʻĪ akula ia iā Balaka, “E kū ʻoe ma ʻaneʻi ma kāu mōhai kuni, a hālāwai aku wau me Iēhova ma ʻō.”

¹⁶ Hālāwai maila ʻo Iēhova me Balaʻama, waiho maila i ʻōlelo ma kona waha, ʻī maila, “E hoʻi hou aku ʻoe i o Balaka lā, e ʻī aku ʻoe penei.”

¹⁷ A hiki akula ia i ona lā, aia hoʻi, kū ihola ia ma kāna mōhai kuni, a me ia pū nā luna o Moaba; nīnau maila ʻo Balaka iā ia, “He aha kā Iēhova i ʻōlelo mai ai?”

¹⁸ Haʻi akula ia i kāna ʻōlelo nane, ʻī akula, “E kū aʻe ʻoe i luna, e Balaka, e hoʻolohe mai! E maliu mai ʻoe iaʻu, e ke keiki a Zipora!

¹⁹ “ʻAʻole ke Akua he kanaka, i hoʻopunipuni mai ai ia, ʻAʻole hoʻi ia he keiki a ke kanaka i mihi ia. Ua ʻī mai nō ia, ʻaʻole anei ia e hana mai nō hoʻi? Ua ʻōlelo mai nō ʻo ia, ʻaʻole anei ia e hoʻokō?

²⁰ “Aia hoʻi, ua loaʻa iaʻu ka ʻōlelo hoʻomaikaʻi aku; Ua hoʻomaikaʻi nō ʻo ia, ʻaʻole e hiki iaʻu ke hoʻololi aʻe.

²¹ “ʻAʻole ia i ʻike i ka hewa i loko o kā Iakoba, ʻAʻole hoʻi ʻo ia i ʻike i ke kekeʻe i loko o kā ʻIseraʻela. Me ia nō ʻo Iēhova ʻo kona Akua, I waena hoʻi o lākou ka hoʻōho aliʻi.

²² “Na ke Akua lākou i lawe mai, mai ʻAigupita mai; Iā ia nō ka ikaika me he reʻema lā.

²³ “He ʻoiaʻiʻo, ʻaʻole nō he kilokilo aku i kā Iakoba, ʻAʻole hoʻi he ʻanāʻanā aku i kā ʻIseraʻela. Ma ia hope e ʻōlelo ʻia mai no kā Iakoba, a no kā ʻIseraʻela, Kupaianaha ka hana ʻana a ke Akua!

²⁴ “Aia hoʻi, e ala aʻe kēia poʻe kānaka me he liona wahine lā, E kū aʻe hoʻi ia e like me ka liona kāne; ʻAʻole ia e moe hou, a ʻai iho ia i ke pio, A e inu hoʻi i ke koko o ka mea i pepehi ʻia.”

²⁵ ʻĪ maila ʻo Balaka iā ia, “Mai hōʻino iki aku iā lākou, ʻaʻole hoʻi e hoʻomaikaʻi iki aku!”

²⁶ ʻŌlelo akula ʻo Balaʻama iā Balaka, ʻī akula, “ʻAʻole anei au i ʻī aku iā ʻoe, ‘ʻO ka mea a pau a Iēhova i ʻōlelo mai ai iaʻu, ʻo ia kaʻu e hana ai’?”

²⁷ ¶ ʻĪ maila ʻo Balaka iā Balaʻama, “Ke noi aku nei au iā ʻoe, e hele mai, a e kaʻi aku au iā ʻoe i kahi ʻē; malia paha e ʻoluʻolu ke Akua i hōʻino aku ai ʻoe iā lākou ma laila.”

²⁸ Kaʻi akula ʻo Balaka iā Balaʻama ma luna pono o Peora, e nānā aku ana i Iesimona.

²⁹ ʻĪ akula ʻo Balaʻama iā Balaka, “E hana ʻoe noʻu i ʻehiku mau kuahu ma ʻaneʻi, a e hoʻomākaukau noʻu ma ʻaneʻi i ʻehiku mau bipi kāne a me nā hipa kāne i ʻehiku.”

³⁰ Hana ihola ʻo Balaka e like me kā Balaʻama i ʻōlelo ai, a mōhai akula i ka bipi kāne a me ka hipa kāne ma luna o kēlā kuahu ʻo kēia kuahu.