KA BUKE ʻAHĀ A MOSE, I KAPA ʻIA NĀ HELU 22 - Ka Baibala Hemolele

1 Hoʻouna akula ʻo Balaka e kiʻi iā Balaʻama. 8 Ua pāpā ʻia mai ʻo Balaʻama e Iēhova. 15 A kiʻi hou ʻia ʻo ia, hele nō. 24 Kūʻē mai ka ʻānela o ke Akua iā ia. 28 ʻŌlelo mai kona hoki iā Balaʻama. 36 Hālāwai lā ʻo Balaka me Balaʻama.

MOKUNA XXII.

¹ ¶ Hele akula nā mamo a ʻIseraʻela, a hoʻomoana ihola ma nā pāpū ʻo Moaba, ma kēia ʻaoʻao o Ioredane e kū pono ana i Ieriko.

² ¶ A ʻike akula ʻo Balaka ke keiki a Zipora i ka mea a pau a kā ʻIseraʻela i hana aku ai i kā ʻAmora.

³ Makaʻu loa ihola ʻo Moaba i ua poʻe kānaka lā; no ka mea, he lehulehu lākou; a ua pilikia ʻo Moaba no nā mamo a ʻIseraʻela.

⁴ ʻŌlelo akula ʻo Moaba i nā lunakahiko o Midiana, “E pau auaneʻi nā mea a pau o kākou i ka palu ʻia e kēia poʻe kānaka, e like me ka palu ʻana o ka bipi i ka weuweu o ke kula.” A ʻo Balaka ke keiki a Zipora ke aliʻi o kā Moaba ia manawa.

⁵ No ia mea, hoʻouna akula ia i mau ʻelele i o Balaʻama lā ke keiki a Beora i Petora ma ka muliwai o ka ʻāina o nā keiki o kona poʻe kānaka, e kiʻi iā ia, ʻī akula, “Eia hoʻi, he poʻe kānaka i hele mai nei mai ʻAigupita mai; aia hoʻi, ke uhi paʻapū nei lākou i ka ʻāina, a e noho kūpono ana lākou i oʻu nei!

⁶ “No laila lā, ke noi aku nei au iā ʻoe, e hele mai ʻoe e ʻōlelo hōʻino aku noʻu i kēia poʻe kānaka; no ka mea, ua ʻoi aku ko lākou ikaika i koʻu; malia e loaʻa paha iaʻu ka ikaika e hahau aku ai mākou iā lākou, a e kipaku au iā lākou ma waho o ka ʻāina; no ka mea, ua ʻike nō wau, ʻo kāu e hoʻomaikaʻi aku ai, ʻo ia ke hoʻopomaikaʻi ʻia; a ʻo kāu e ʻōlelo hōʻino aku ai, ʻo ia ke hoʻopōʻino ʻia.”

⁷ ¶ Hele akula nā lunakahiko o Moaba me nā lunakahiko o Midiana, me ka uku no ka ʻanāʻanā ʻana; a hiki akula lākou i o Balaʻama lā, a haʻi akula iā ia i ka ʻōlelo a Balaka.

⁸ ʻĪ maila ʻo ia iā lākou, “E moe ʻoukou ma ʻaneʻi i kēia pō, a e haʻi aku au iā ʻoukou e like me kā Iēhova e ʻōlelo mai ai iaʻu.” A noho ihola nā luna o Moaba me Balaʻama.

⁹ Hele maila ke Akua i o Balaʻama lā, nīnau maila, “ʻO wai kēia poʻe kānaka me ʻoe?”

¹⁰ ʻĪ akula ʻo Balaʻama i ke Akua, “ʻO Balaka ke keiki a Zipora, ke aliʻi o Moaba, ua hoʻouna mai i oʻu nei, i ka ʻī ʻana,

¹¹ ‘Aia hoʻi he poʻe kānaka i hele mai nei mai ʻAigupita mai, uhi paʻapū lākou i ka ʻāina: e hele mai hoʻi ʻoe e ʻōlelo hōʻino aku iā lākou noʻu; malia paha e lanakila au i ke kaua ʻana aku iā lākou, a e kipaku aku iā lākou.’”

¹² ʻŌlelo maila ke Akua iā Balaʻama, “Mai hele aku ʻoe me lākou; mai ʻōlelo hōʻino aku i ua poʻe kānaka lā; no ka mea, ua hoʻomaikaʻi ʻia lākou.”

¹³ Ala aʻela ʻo Balaʻama i kakahiaka, ʻī akula i nā luna o Balaka, “E hoʻi ʻoukou i ko ʻoukou ʻāina; no ka mea, ʻaʻole i ʻae mai ʻo Iēhova iaʻu e hele me ʻoukou.”

¹⁴ Kū aʻela nā luna o Moaba, a hoʻi akula i o Balaka lā, ʻī akula, “Ua hōʻole mai ʻo Balaʻama ʻaʻole e hele mai me mākou.”

¹⁵ ¶ Hoʻouna hou akula ʻo Balaka i nā luna, he nui aku, a he ʻoi hoʻi ko lākou koʻikoʻi i ko kēlā poʻe.

¹⁶ Hele akula lākou i o Balaʻama lā, ʻī aku iā ia, “Penei kā Balaka kā ke keiki a Zipora e ʻōlelo mai nei, ‘Ke noi aku nei au iā ʻoe, i keʻakeʻa ʻole kekahi mea iā ʻoe i ka hele ʻana mai i oʻu nei;

¹⁷ no ka mea, e hoʻohanohano loa aku au iā ʻoe, a e hana aku au i nā mea a pau āu e ʻōlelo mai ai iaʻu; ke noi aku nei au iā ʻoe, e hele mai hoʻi, e ʻōlelo hōʻino aku noʻu i kēia poʻe kānaka.’”

¹⁸ ʻŌlelo maila ʻo Balaʻama, ʻī maila i nā kauā a Balaka, “Inā e hāʻawi mai ʻo Balaka iaʻu i ke kālā a me ke gula a piha kona hale, ʻaʻole e hiki iaʻu ke hoʻohala i ka ʻōlelo a Iēhova a koʻu Akua, i ka hoʻēmi iho, i ka ʻoi aku paha.

¹⁹ “No ia mea, ke noi aku nei au iā ʻoukou, e noho hoʻi ʻoukou i ʻaneʻi i kēia pō, i ʻike au i ka mea a Iēhova e ʻōlelo hou mai ai iaʻu.”

²⁰ Hele maila ke Akua i o Balaʻama lā ia pō iho, ʻī maila iā ia, “Inā paha e hele mai ua mau kānaka lā e hea mai iā ʻoe, e ala aʻe ʻoe e hele pū me lākou; akā, ʻo ka ʻōlelo aʻu e haʻi aku ai iā ʻoe, ʻo ia kāu e hana ai.”

²¹ ¶ Ala aʻela ʻo Balaʻama i kakahiaka, hoʻēʻe akula i ka noho ma luna o kona hoki, a hele pū akula me nā luna o Moaba.

²² Ua hoʻā ʻia ka inaina o ke Akua, no kona hele ʻana; a kū maila ka ʻānela o Iēhova ma ke alanui, i mea kūʻē mai iā ia. E holo ana ia ma luna o kona hoki, ʻelua āna mau kauā me ia.

²³ ʻIke akula ka hoki i ka ʻānela o Iēhova e kū ana ma ke ala, a me kāna pahi kaua i unuhi ʻia ma kona lima; huli aʻela ka hoki ma waho o ke ala, a hele akula ma ke kula; a hahau ihola ʻo Balaʻama i ka hoki, e hoʻohuli hou iā ia ma ke ala.

²⁴ Akā, kū aʻela ka ʻānela o Iēhova ma ke ala o nā pā waina, he pā pōhaku ma kēlā ʻaoʻao, a he pā pōhaku ma kēia ʻaoʻao.

²⁵ A ʻike akula ka hoki i ka ʻānela o Iēhova, pipika aʻela ia ma ka pā pōhaku, a pēpē ihola ka wāwae o Balaʻama i ka pā pōhaku; a hahau hou ihola kēlā iā ia.

²⁶ A hele hou akula ka ʻānela o Iēhova, a kū ihola ma kahi hāiki, ʻaʻole wahi e huli aʻe ma ka ʻākau, ʻaʻole hoʻi ma ka hema.

²⁷ A ʻike akula ka hoki i ka ʻānela o Iēhova, hina ihola ia ma lalo o Balaʻama; huhū ihola ʻo Balaʻama, a hahau ihola ia i ka hoki me ke koʻokoʻo.

²⁸ Wehe aʻela ʻo Iēhova i ka waha o ka hoki, a ʻī maila ia iā Balaʻama, “He aha kaʻu i hana aku ai iā ʻoe, i pākolu ai kāu hahau ʻana mai iaʻu?”

²⁹ ʻĪ akula ʻo Balaʻama i ka hoki, “No ka mea, ua hana ʻino mai ʻoe iaʻu; inā he pahi kaua ma koʻu lima, inā ua make ʻoe iaʻu!”

³⁰ Nīnau maila ka hoki iā Balaʻama, “ʻAʻole anei wau ʻo kou hoki, ka mea āu i holoholo ai, mai ka manawa i lilo ai au nou, a hiki i nēia lā? Pēlā nō anei kaʻu i hana aku ai iā ʻoe ma mua?” ʻĪ akula kēlā, “ʻAʻole.”

³¹ ¶ A laila hoʻokaʻakaʻa aʻela ʻo Iēhova i nā maka o Balaʻama, a ʻike akula ia i ka ʻānela o Iēhova e kū ana ma ke alanui me ka pahi kaua i unuhi ʻia ma kona lima; kūlou ihola ia, a moe ihola i lalo ke alo.

³² ʻĪ maila ka ʻānela o Iēhova iā ia, “No ke aha lā ʻoe i hahau ai i kou hoki, ʻekolu hahau ʻana? Aia hoʻi, i hele mai nei au e kūʻē iā ʻoe; no ka mea, ua kekeʻe kou ʻaoʻao i mua oʻu.

³³ “A ʻike maila ka hoki iaʻu, a huli aʻela mai oʻu aku lā, ʻekolu huli ʻana; he ʻoiaʻiʻo, inā ʻaʻole ia i huli aʻe, mai oʻu aku nei, inā ua make ʻoe iaʻu, a ola kēlā.”

³⁴ ʻĪ akula ʻo Balaʻama i ka ʻānela o Iēhova, “Ua hewa wau; ʻaʻole au i ʻike ua kūʻē mai ʻoe iaʻu ma ke alanui; ʻānō hoʻi, a i hewa ia mea iā ʻoe, e hoʻi hou aku nō wau.”

³⁵ ʻĪ maila ka ʻānela o Iēhova iā Balaʻama, “E hele pū ʻoe me ia mau kānaka; akā, ʻo ka ʻōlelo aʻu e haʻi aku ai iā ʻoe, ʻo ia wale nō kāu e ʻōlelo aku ai.” A hele akula ʻo Balaʻama me nā luna o Balaka.

³⁶ ¶ A lohe aʻela ʻo Balaka, ua hiki mai ʻo Balaʻama, hele aku kēlā e hālāwai me ia ma kekahi kūlanakauhale ʻo Moaba ma ka palena ʻo ʻArenona, ʻo ia nō ka palena mamao loa.

³⁷ ʻĪ maila ʻo Balaka iā Balaʻama, “ʻAʻole anei au i hoʻouna ikaika aku i ou lā, e kiʻi iā ʻoe? He aha hoʻi kāu i hele ʻole mai ai i oʻu nei? ʻAʻole anei e hiki iaʻu ke hoʻohanohano iā ʻoe?”

³⁸ ʻĪ akula ʻo Balaʻama iā Balaka, “Eia hoʻi, ua hiki mai nei au i ou lā; iaʻu nō anei kekahi pono iki ke haʻi aku iā ʻoe i kekahi mea? ʻO ka ʻōlelo a ke Akua e waiho mai ai i loko o koʻu waha, ʻo ia kaʻu e ʻōlelo aku ai.”

³⁹ Hele pū aʻela ʻo Balaʻama me Balaka, a hiki aʻela lāua i Kiriata Huzota.

⁴⁰ Mōhai akula ʻo Balaka i nā bipi a me nā hipa, a hoʻouna akula i o Balaʻama lā, a i nā luna me ia.

⁴¹ ¶ A kakahiaka aʻela, kono akula ʻo Balaka iā Balaʻama, a kaʻi akula iā ia i kahi kiʻekiʻe o Baʻala, i ʻike aku ai ʻo ia ma ia wahi i ka poʻe kānaka a pau.