KA BUKE ʻAHĀ A MOSE, I KAPA ʻIA NĀ HELU 21 - Ka Baibala Hemolele

1 Kaua mai ke aliʻi o ʻArada; ua pau ua aliʻi lā a me kona aupuni i ka luku ʻia aku. 4 ʻŌhumu kā ʻIseraʻela, a ua hoʻouna ʻia mai nā nahesa wela. 8 Ka nahesa keleawe a Mose. 21 Ke kaua me Sihona a me ʻOga, a lanakila kā ʻIseraʻela.

MOKUNA XXI.

¹ ¶ A lohe aʻela ke aliʻi o ʻArada kā Kanaʻana, e noho ana ma ke Kūkulu Hema, e hele mai ana kā ʻIseraʻela ma ke ala e hiki ai i nā wahi ona, a laila, kaua maila ia i kā ʻIseraʻela, a lawe pio akula i kekahi poʻe o lākou.

² Hoʻohiki akula kā ʻIseraʻela iā Iēhova, ʻī akula, “Inā paha e hāʻawi mai ʻoe i kēia poʻe kānaka i loko o koʻu lima, a laila e luku loa aku nō au i nā kūlanakauhale o lākou.”

³ Hoʻolohe maila ʻo Iēhova i ka leo o kā ʻIseraʻela, a hoʻolilo maila i ka poʻe Kanaʻana; a luku loa akula lākou iā lākou lā, a me nā kūlanakauhale o lākou; a kapa akula ia i ka inoa o ia wahi ʻo Horema.

⁴ ¶ Hele akula lākou mai ke kuahiwi ʻo Hora aku, ma ke alanui o ke Kai ʻUla, e puni i ka ʻāina ʻo ʻEdoma; a ua pau ke aho o nā kānaka no ke alanui.

⁵ ʻŌlelo ʻino akula nā kānaka i ke Akua, a iā Mose, “No ke aha lā ʻolua i kaʻi mai nei iā mākou mai loko mai o ʻAigupita e make ma ka wao nahele? No ka mea, ʻaʻohe berena, ʻaʻole hoʻi he wai; a ke hoʻopailua nei ko mākou naʻau i kēia ʻai māmā.”

⁶ Hoʻouna maila ʻo Iēhova i nā nahesa wela i waena o nā kānaka, a nahu maila lākou i nā kānaka; a he nui nā kānaka o kā ʻIseraʻela i make.

⁷ No ia mea, hele maila nā kānaka i o Mose lā, ʻī maila, “Ua hana hewa mākou; no ka mea, ua ʻōlelo ʻino aku mākou iā Iēhova a iā ʻoe; e pule aku ʻoe iā Iēhova, e lawe aku ia i nā nahesa mai o mākou aku nei.” A pule akula ʻo Mose no nā kānaka.

⁸ ʻŌlelo maila ʻo Iēhova iā Mose, “E hana ʻoe nāu i nahesa wela, a e kau aku ia ma luna o ka lāʻau, a ʻo kēlā mea kēia mea i nahu ʻia, i ka wā e nānā aku ai ʻo ia ia mea, e ola nō ia.”

⁹ A hana ihola ʻo Mose i nahesa keleawe, a kau akula ia ma luna o ka lāʻau; a ʻo ke kanaka i nahu ʻia i ka nahesa wela, i ka wā i nānā aku ai ʻo ia i ka nahesa keleawe, ua ola ia.

¹⁰ ¶ A hele akula nā mamo a ʻIseraʻela, a hoʻomoana ihola ma ʻObota.

¹¹ A hele lākou mai ʻObota aku, a hoʻomoana ihola ma ʻIie ‘Abarima, i ka wao nahele ma ke alo o Moaba, ma ka hikina o ka lā.

¹² Mai laila aku lākou i hele ai, a hoʻomoana ihola ma ke kahawai ʻo Zareda.

¹³ Mai laila aku lākou i hele ai, a hoʻomoana ihola ma kēlā ʻaoʻao o ʻArenona, ma ka wao nahele e hele mai ana mai loko mai o nā palena o kā ʻAmora; no ka mea, ʻo ʻArenona ʻo ia ka palena ʻo Moaba, ma waena o Moaba a me kā ʻAmora.

¹⁴ No laila, ua ʻōlelo ʻia ma loko o ka Buke o nā Kaua a Iēhova, “Ma Vaheba ma Supa, A ma nā kahawai ʻo ʻArenona,

¹⁵ A ma ke kahe ʻana o nā kahawai, Ka mea hele ma ka noho ʻana o ʻAra, A moe iho ma ka palena ʻo Moaba.”

¹⁶ Mai laila aku lākou a Beʻera; ʻo ia ka pūnāwai kahi a Iēhova i ʻōlelo mai ai iā Mose, “E hoʻākoakoa i nā kānaka, a e hāʻawi aku nō wau i wai no lākou.”

¹⁷ ¶ A laila mele akula kā ʻIseraʻela i kēia mele, “E huahuaʻi mai, e ka pūnāwai! E mele aku ʻoukou iā ia!

¹⁸ “ʻO nā luna kai kōhi iho i ka pūnāwai, ʻO nā aliʻi o nā kānaka i ʻeli iho ia, Ma muli o ka luna kānāwai, me nā koʻokoʻo o lākou.” A mai ka wao nahele aku lākou a Matana;

¹⁹ A mai Matana aku a Nahaliʻela; a mai Nahaliʻela aku a Bamota;

²⁰ a mai Bamota aku lākou a i ke awāwa ma ke kula ʻo Moaba, ma lalo o ka puʻu ʻo Pisega, ma ka ʻaoʻao e huli ana i ka wao nahele.

²¹ ¶ Hoʻouna akula kā ʻIseraʻela i nā ʻelele i o Sihona lā ke aliʻi o kā ʻAmora, ʻī akula,

²² “E ʻae mai ʻoe e hele aku wau ma waena o kou ʻāina; ʻaʻole mākou e kipa ma nā mahina ʻai, ʻaʻole hoʻi ma nā pā waina; ʻaʻole mākou e inu i ka wai o ka pūnāwai; e hele aku nō mākou ma ke Alanui o ke Aliʻi, a hala akula mākou mai kou mau palena aku.”

²³ ʻAʻole nō i ʻae mai ʻo Sihona e hele aku kā ʻIseraʻela ma waena o kona mau palena; akā, hoʻākoakoa aʻela ʻo Sihona i kona poʻe kānaka a pau, a hele akula i loko o ka wao nahele e kūʻē i kā ʻIseraʻela; a hele maila ia i Iahaza, a kaua maila i kā ʻIseraʻela.

²⁴ Luku akula kā ʻIseraʻela iā ia i ka pahi kaua, a komo akula i kona ʻāina mai ʻArenona a Iaboka, a hiki i nā mamo a ʻAmona; no ka mea, ua paʻa ka palena o nā mamo a ʻAmona.

²⁵ Lawe pio aʻela kā ʻIseraʻela i kēia mau kūlanakauhale a pau; a noho ihola kā ʻIseraʻela ma nā kūlanakauhale a pau o kā ʻAmora, i Hesebona, a i nā kauhale a pau o ia wahi.

²⁶ No ka mea, ʻo Hesebona ke kūlanakauhale o Sihona ke aliʻi o kā ʻAmora, nāna i kaua aku ma mua i ke aliʻi o Moaba, a lawe aʻela i kona ʻāina a pau mai kona lima aku, a hiki i ʻArenona.

²⁷ No ia mea, ʻī maila nā haku mele, “E hele ʻoukou i loko o Hesebona, e hana hou ʻia; Ke kūlanakauhale o Sihona e hoʻokumu ʻia.

²⁸ “No ka mea, mai Hesebona i hele aku ai ke ahi, He lapalapa ahi ma ke kūlanakauhale o Sihona aku; Ua hoʻopau ʻo ia iā ʻAra o Moaba, A me nā haku o nā wahi kiʻekiʻe o ʻArenona.

²⁹ “Auē ʻoe, e Moaba! Ua make nō ʻoe! E nā kānaka o Kemosa! Ua hāʻawi aku ia i kāna mau keiki kāne i pakele, A me kāna mau kaikamāhine i poʻe pio, No ke aliʻi o kā ʻAmora, no Sihona.

³⁰ “Ua pana pua aku mākou iā lākou; Ua luku ʻia ʻo Hesebona a hiki i Dibona. Ua hoʻoneoneo mākou a hiki aku i Nopa, A hiki hoʻi i Medeba.”

³¹ A noho ihola kā ʻIseraʻela ma ka ʻāina o kā ʻAmora.

³² A hoʻouna akula ʻo Mose e mākaʻikaʻi iā Iaʻazera, a komo lākou i nā kūlanakauhale o ia wahi, a hoʻokuke akula i kā ʻAmora ma laila.

³³ ¶ Hāliu aʻela lākou, a piʻi akula ma ke alanui o Basana; a hele maila ʻo ʻOga ke aliʻi o Basana e kūʻē mai iā lākou, ʻo ia a me kona poʻe kānaka a pau, i ke kaua ma ʻEderei.

³⁴ ʻŌlelo maila ʻo Iēhova iā Mose, “Mai makaʻu ʻoe iā ia; no ka mea, ua hāʻawi aku nō wau iā ia i loko o kou lima, me kona kānaka a pau, a me kona ʻāina; a e hana aku ʻoe iā ia me kāu i hana aku ai iā Sihona ke aliʻi o kā ʻAmora i noho ma Hesebona.”

³⁵ A luku akula lākou iā ia, me kāna mau keiki kāne, a me kona poʻe kānaka a pau, ʻaʻole i koe kekahi e ola ana nona; a komo akula lākou i kona ʻāina.