KA BUKE ʻAHĀ A MOSE, I KAPA ʻIA NĀ HELU 20 - Ka Baibala Hemolele

1 Hiki aku lākou i Zina, kahi i make ai ʻo Miriama. 7 Hahau ʻo Mose i ka pōhaku, ʻaʻole ia i ʻōlelo aku, e like me kāna i kauoha ʻia mai ai; no laila ua hewa ia i ke Akua. 22 Make ʻo ʻAʻarona ma ke kuahiwi ʻo Hora.

MOKUNA XX.

¹ ¶ A laila hele maila ka poʻe mamo a ʻIseraʻela, ʻo ke anaina kanaka a pau i ka wao nahele ʻo Zina, i ka malama mua; a noho ihola nā kānaka ma Kadesa; ma laila i make ai ʻo Miriama, a ua kanu ʻia ihola ia ma ia wahi.

² ¶ ʻAʻohe wai i laila no ke anaina kanaka; a hoʻākoakoa aʻela lākou iā lākou iho, a kūʻē iā Mose lāua me ʻAʻarona.

³ Hakakā aʻela nā kānaka me Mose, ʻōlelo aʻela lākou penei, “E aho ko mākou make, i ka manawa i make ai nā hoahānau o mākou i mua o Iēhova!

⁴ “No ke aha hoʻi ʻolua i alakaʻi mai nei i ke anaina kanaka o Iēhova i loko o kēia wao nahele i make ai mākou me nā holoholona a mākou?

⁵ “No ke aha lā ʻolua i hoʻohele mai nei iā mākou mai ʻAigupita mai, e hoʻokomo ai iā mākou i loko o kēia wahi ʻino? ʻAʻole kēia he wahi no nā ʻanoʻano, ʻaʻohe fiku, ʻaʻole kumu waina, ʻaʻole pomeraite, ʻaʻole hoʻi wai e inu ai.”

⁶ Hele akula ʻo Mose lāua ʻo ʻAʻarona mai ke alo o ke anaina kanaka aku a ka puka o ka halelewa o ke anaina, a moe ihola lāua i lalo ke alo; a ʻikea maila ka nani o Iēhova iā lāua.

⁷ ʻŌlelo maila ʻo Iēhova iā Mose, ʻī maila,

⁸ “E lawe ʻoe i ke koʻokoʻo, a e hoʻākoakoa ʻoe i ke anaina kanaka, ʻo ʻoe a me ʻAʻarona kou kaikuaʻana, a e ʻōlelo aku ʻolua i ka pōhaku i mua o nā maka o lākou; a e hāʻawi mai ia i kona wai, a e lawe mai ʻoe i ka wai no lākou mai loko mai o ka pōhaku; a pēlā nō ʻoe e hoʻoinu ai i ke anaina kanaka, a me kā lākou poʻe holoholona.”

⁹ Lawe akula ʻo Mose i ke koʻokoʻo mai ke alo o Iēhova aku, e like me kāna i kauoha mai ai iā ia.

¹⁰ Hōʻuluʻulu aʻela ʻo Mose lāua ʻo ʻAʻarona i ke anaina kanaka i mua o ka pōhaku, ʻī akula ʻo ia iā lākou, “E hoʻolohe mai ʻoukou, e ka poʻe kipi; pono anei nō māua e hoʻokahe iho i ka wai mai loko mai o kēia pōhaku?”

¹¹ Kaʻikaʻi aʻela ʻo Mose i kona lima i luna, hahau ihola i ka pōhaku, me kona koʻokoʻo, ʻelua hahau ʻana; a kahe nui maila ka wai; inu ihola ke anaina kanaka a me ko lākou poʻe holoholona.

¹² ʻŌlelo maila ʻo Iēhova iā Mose a me ʻAʻarona, “No ko ʻolua manaʻoʻiʻo ʻole mai iaʻu, e hoʻāno mai iaʻu i mua o nā mamo a ʻIseraʻela; no laila, ʻaʻole ʻolua e kaʻi aku i kēia anaina kanaka i ka ʻāina aʻu i hāʻawi aku ai no lākou.”

¹³ ʻO kēia ka wai no Meriba; no ka mea, ua ʻaʻaka mai nā mamo a ʻIseraʻela me Iēhova, a ua hoʻāno ʻia ʻo ia iā lākou.

¹⁴ ¶ Hoʻouna akula ʻo Mose i nā ʻelele mai Kadesa aku i ke aliʻi o ʻEdoma, “Penei kā ka hoahānau ou, kā ʻIseraʻela e ʻōlelo aku nei, ‘Ua ʻike nō ʻoe i ka luhi a pau i loaʻa iā mākou;

¹⁵ i ka iho ʻana o ko mākou poʻe kūpuna i lalo i ʻAigupita, a he liʻuliʻu ko mākou noho ʻana i ʻAigupita; a hoʻopilikia mai ko ʻAigupita iā mākou a me ko mākou poʻe kūpuna.

¹⁶ ‘A i ka wā i hea aku ai mākou iā Iēhova, hoʻolohe maila ʻo ia i ko mākou leo, a hoʻouna maila i ʻānela, a ua hoʻopuka mai iā mākou i waho o ʻAigupita; eia hoʻi mākou ma Kadesa nei, he kūlanakauhale ma ke kihi loa o kou palena.

¹⁷ ‘Ke noi aku nei au iā ʻoe, e ʻae mai ʻoe iā mākou e hele aku ma waena o kou ʻāina; ʻaʻole mākou e hele ma waena o nā mahina ʻai, ʻaʻole hoʻi ma waena o nā pā waina, ʻaʻole hoʻi mākou e inu i ka wai o nā pūnāwai; e hele nō mākou ma ke Alaloa o ke Aliʻi, ʻaʻole mākou e kipa ma ka ʻākau, ʻaʻole hoʻi ma ka hema, a hala aku mākou i nā palena ou.’”

¹⁸ ʻĪ maila ʻo ʻEdoma iā ia, “Mai hele aʻe ʻoe ma oʻu nei, o hele aku au e kūʻē iā ʻoe me ka pahi kaua.”

¹⁹ ʻĪ akula ka poʻe mamo a ʻIseraʻela iā ia, “E hele nō mākou ma ke alaloa, a inā e inu au a me koʻu poʻe holoholona i kou wai, a laila e uku aku nō au ia mea: e hele wale nō mākou ma ko mākou mau wāwae, ʻaʻole e hana i kekahi mea ʻē aʻe.”

²⁰ ʻĪ maila kēlā, “ʻAʻole loa ʻoe e hele ma waena mai.” A puka maila ko ʻEdoma e kūʻē mai iā ia, me nā kānaka he nui loa, a me ka lima ikaika.

²¹ Pēlā nō ʻo ʻEdoma i hōʻole mai ai i ka hāʻawi ʻana i alanui no kā ʻIseraʻela ma waena o kona palena; no ia mea, hāliu aʻela kā ʻIseraʻela mai ona aku lā.

²² ¶ Hele akula nā mamo a ʻIseraʻela, ʻo ke anaina kanaka a pau, mai Kadesa aku a hiki i ke kuahiwi ʻo Hora.

²³ ʻŌlelo maila ʻo Iēhova iā Mose a me ʻAʻarona ma ke kuahiwi ʻo Hora, ma ka palena ʻāina ʻo ʻEdoma, ʻī maila,

²⁴ “E hui pū ʻia aku ʻo ʻAʻarona me kona poʻe kānaka; ʻaʻole ia e komo i ka ʻāina aʻu i hāʻawi aku ai no nā mamo a ʻIseraʻela; no ka mea, ua kūʻē mai ʻolua i kaʻu ʻōlelo ma ka wai Meriba.

²⁵ “E lawe ʻoe iā ʻAʻarona a me kāna keiki ʻo ʻEleazara, e kaʻi aku iā lāua ma luna ma ke kuahiwi ʻo Hora;

²⁶ e wehe aʻe i ka ʻaʻahu o ʻAʻarona, a e hoʻokomo i kāna keiki iā ʻEleazara: a e hui pū ʻia aku ʻo ʻAʻarona, a e make nō ia ma laila.”

²⁷ Hana ihola ʻo Mose e like me kā Iēhova i kauoha mai ai; a piʻi akula lāua ma ke kuahiwi ʻo Hora i mua o ke anaina kanaka a pau.

²⁸ Wehe aʻela ʻo Mose i nā ʻaʻahu o ʻAʻarona, a hōʻaʻahu aʻela ma luna o kāna keiki ʻo ʻEleazara; a make ihola ʻo ʻAʻarona ma laila ma kahi ʻoi o ke kuahiwi; a iho ihola ʻo Mose lāua ʻo ʻEleazara mai ke kuahiwi mai.

²⁹ A ʻike akula ke anaina kanaka a pau, ua make ʻo ʻAʻarona, kanikau ihola kā ʻIseraʻela a pau iā ʻAʻarona i nā lā he kanakolu.