KA BUKE ʻAHĀ A MOSE, I KAPA ʻIA NĀ HELU 2 - Ka Baibala Hemolele

1 Ka hōʻike ʻana i nā wahi hoʻomoana o nā ʻohana a ʻIseraʻela.

MOKUNA II.

¹ ¶ ʻŌlelo maila ʻo Iēhova iā Mose a iā ʻAʻarona, ʻī maila,

² “E noho kēlā kanaka kēia kanaka o nā mamo a ʻIseraʻela ma kona hae iho, me ka hae o ka hale o ko lākou kupuna; e noho kūpono ana lākou i ka halelewa o ke anaina.

³ “Ma ka ʻaoʻao hikina, ma ka puka ʻana o ka lā e noho ai ka poʻe no ka hae o kā Iuda hoʻomoana ʻana, ma ko lākou poʻe kaua; a ʻo Nahesona ke keiki a ʻAminadaba, ʻo ia ka luna no nā mamo a Iuda.”

⁴ A ʻo kona poʻe kaua, a ʻo nā mea o lākou i helu ʻia, he kanahikukumamāhā tausani, me nā haneri keu ʻeono.

⁵ “A ʻo ka poʻe e noho kokoke iā ia, ʻo ia ka ʻohana a ʻIsakara; a ʻo Netaneʻela ke keiki a Zuara, ʻo ia ka luna o nā mamo a ʻIsakara.”

⁶ A ʻo kona poʻe kaua, a ʻo ka poʻe o lākou i helu ʻia, he kanalimakumamāhā tausani, me nā haneri keu ʻehā.

⁷ “ʻO ka ʻohana hoʻi a Zebuluna; a ʻo ka luna o nā mamo a Zebuluna, ʻo ia ʻo ʻEliaba ke keiki a Helona.”

⁸ A ʻo kona poʻe kaua, a ʻo ka poʻe o lākou i helu ʻia, he kanalimakumamāhiku tausani, a me nā haneri keu ʻehā.

⁹ “ʻO nā mea a pau i helu ʻia, ma kahi hoʻomoana o kā Iuda, hoʻokahi ia haneri a me kanawalukumamāono tausani, a me nā haneri keu ʻehā, ma ko lākou poʻe kaua; ʻo kēia poʻe ke hele ma mua.

¹⁰ ¶ “Ma ka ʻaoʻao hema ka hae o kahi hoʻomoana o kā Reubena, ma ko lākou poʻe kaua; a ʻo ka luna o nā mamo a Reubena, ʻo ia ʻo ʻElizura ke keiki a Sedeura.”

¹¹ A ʻo kona poʻe kaua, a ʻo nā mea o lākou i helu ʻia, he kanahākumamāono tausani, a me nā haneri ʻelima.

¹² “A ʻo ka poʻe e noho kokoke iā ia, ʻo ka ʻohana o Simeona; a ʻo ka luna o nā mamo a Simeona, ʻo ia ʻo Selumiʻela ke keiki a Zurisadai.”

¹³ A ʻo kona poʻe kaua, a ʻo nā mea o lākou i helu ʻia, he kanalimakumamāiwa tausani, me nā haneri keu ʻekolu.

¹⁴ “A laila ʻo ka ʻohana a Gada; a ʻo ʻEliasapa ke keiki a Reuʻela, ʻo ia ka luna o nā mamo a Gada.”

¹⁵ A ʻo kona poʻe kaua, a ʻo nā mea o lākou i helu ʻia, he kanahākumamālima tausani me nā haneri ʻeono, a me ke kanalima.

¹⁶ “ʻO ka poʻe a pau i helu ʻia ma kahi hoʻomoana o kā Reubena, hoʻokahi ia haneri me kanalimakumamākahi tausani, ʻehā haneri a me kanalima keu, ma ko lākou poʻe kaua: a ʻo lākou ke hele ma ka lua o ka huakaʻi.

¹⁷ ¶ “A laila e neʻeneʻe aku ka halelewa o ke anaina, me ka poʻe hoʻomoana o nā Levi, i waenakonu o ka poʻe hoʻomoana; e like me ko lākou hoʻomoana ʻana, pēlā nō lākou e neʻeneʻe aku ai, ʻo kēlā kanaka kēia kanaka ma kona wahi ma ko lākou hae.

¹⁸ ¶ “Ma ka ʻaoʻao komohana ka hae o ka poʻe hoʻomoana o kā ʻEperaima, ma ko lākou poʻe kaua; a ʻo ka luna o nā mamo a ʻEperaima, ʻo ia ʻo ʻElisama ke keiki a ʻAmihuda.”

¹⁹ A ʻo kona poʻe kaua, a me nā mea o lākou i helu ʻia, he kanahā tausani a me nā haneri keu ʻelima.

²⁰ “A e pili iā ia ka ʻohana a Manase; a ʻo ka luna o nā mamo a Manase, ʻo ia ʻo Gamaliʻela ke keiki a Pedazura.”

²¹ A ʻo kona poʻe kaua, a me nā mea o lākou i helu ʻia, he kanakolukumamālua tausani a me nā haneri keu ʻelua.

²² “A laila ʻo ka ʻohana a Beniamina; a ʻo ka luna o nā mamo a Beniamina, ʻo ia ʻo ʻAbidana ke keiki a Gideoni.”

²³ A ʻo kona poʻe kaua, a me ka poʻe o lākou i helu ʻia, he kanakolukumamālima tausani a me nā haneri keu ʻehā.

²⁴ “ʻO ka poʻe a pau i helu ʻia no kahi hoʻomoana o kā ʻEperaima, hoʻokahi ia haneri me kumamāwalu tausani me ka haneri hoʻokahi, ma ko lākou mau poʻe kaua; a e hele aku hoʻi lākou ma ke kolu o ka huakaʻi.

²⁵ ¶ “Ma ka ʻaoʻao ʻākau ka hae o ka poʻe hoʻomoana o kā Dana ma ko lākou poʻe kaua; a ʻo ka luna o nā mamo a Dana, ʻo ia ʻo ʻAhiezera ke keiki a ʻAmisadai.”

²⁶ A ʻo kona poʻe kaua, a ʻo nā mea o lākou i helu ʻia, he kanaonokumamālua tausani me nā haneri keu ʻehiku.

²⁷ “A ʻo ka poʻe hoʻomoana me ia, ʻo ia ka ʻohana a ʻAsera; a ʻo ka luna o nā mamo a ʻAsera, ʻo ia ʻo Pagiʻela ke keiki a ʻOkerana.”

²⁸ “ʻO kona poʻe kaua, a me nā mea o lākou i helu ʻia, he kanahākumamākahi tausani a me nā haneri keu ʻelima.

²⁹ “A laila ka ʻohana a Napetali; a ʻo ka luna o nā mamo a Napetali, ʻo ia ʻo ʻAhira ke keiki a ʻEnana.”

³⁰ “ʻO kona poʻe kaua, a me nā mea o lākou i helu ʻia, he kanalimakumamākolu tausani a me nā haneri keu ʻehā.

³¹ “ʻO ka poʻe a pau i helu ʻia ma kahi hoʻomoana o Dana, hoʻokahi haneri me kanalimakumamāhiku tausani a me nā haneri keu ʻeono; a ʻo lākou nei ke hele ma hope me ko lākou mau hae.”

³² ¶ ʻO kēia ka poʻe i helu ʻia o nā mamo a ʻIseraʻela, ma ko ka hale o ko lākou poʻe kūpuna; ʻo nā mea a pau i helu ʻia o nā wahi hoʻomoana, ma ko lākou mau poʻe kaua, he ʻaono haneri me ke kumamākolu tausani, me nā haneri keu ʻelima a me ke kanalima.

³³ Akā, ʻaʻole i helu ʻia nā Levi me nā mamo a ʻIseraʻela; e like me kā Iēhova i kauoha mai ai iā Mose.

³⁴ A hana ihola nā mamo a ʻIseraʻela e like me nā mea a pau a Iēhova i kauoha mai ai iā Mose; pēlā lākou i hoʻomoana ai ma ko lākou mau hae, a pēlā hoʻi lākou i hele aku ai, ʻo kēlā mea kēia mea ma muli o ko lākou mau ʻohana, e like me ko ka hale o ko lākou poʻe kūpuna.