KA BUKE ʻAHĀ A MOSE, I KAPA ʻIA NĀ HELU 19 - Ka Baibala Hemolele

1 Ka wai huikala i hui pū ʻia me ka lehu o ka bipi wahine. 11 Nā mea e kāpīpī ʻia i ua wai lā.

MOKUNA XIX.

¹ ¶ ʻŌlelo maila ʻo Iēhova iā Mose a iā ʻAʻarona, ʻī maila,

² “Eia ke kau ʻana i ke kānāwai a Iēhova i kauoha mai ai, penei, ‘E ʻōlelo aku i nā mamo a ʻIseraʻela, e lawe mai lākou i ou lā i bipi wahine hou ʻulaʻula maikaʻi kīnā ʻole, ʻaʻole hoʻi i kau ka ʻauamo ma luna ona.

³ ‘A e hāʻawi aku ʻolua ia mea iā ʻEleazara ke kahuna, a e kaʻi aku kēlā iā ia ma waho o kahi hoʻomoana, a e pepehi ʻia ʻo ia i mua o kona maka.

⁴ ‘A e lawe ʻo ʻEleazara ke kahuna i wahi koko ona ma kona manamana lima, a e kāpīpī i kona koko ma kahi e kū pono ana i ka halelewa o ke anaina, i ʻehiku kāpīpī ʻana.

⁵ ‘A e puhi ʻia i ke ahi ua bipi wahine hou lā i mua o kona mau maka, ʻo kona ʻili, ʻo kona ʻiʻo, me kona koko a me kona lepo kāna e puhi ai.

⁶ ‘A e lawe ke kahuna i ka lāʻau kedera, a me ka husopa, a me ka mea ʻulaʻula, a e hoʻolei aku i loko o ke ahi lapalapa o ka bipi wahine.

⁷ ‘A laila e holoi ke kahuna i kona mau kapa, a e ʻauʻau i kona kino i ka wai, a ma hope iho e hele mai ia i loko o kahi hoʻomoana, a e haumia ke kahuna a hiki i ke ahiahi.

⁸ ‘A ʻo ka mea nāna e puhi aku ia, e holoi ʻo ia i kona mau kapa i ka wai, a e ʻauʻau ia i kona kino i ka wai, a e haumia ʻo ia a hiki i ke ahiahi.

⁹ ‘A e hōʻiliʻili kekahi kanaka maʻemaʻe i ka lehu o ua bipi wahine lā, a e waiho aku ia mea ma kahi maʻemaʻe ma waho o kahi hoʻomoana; a e mālama ʻia ia mea no ke anaina kanaka o nā mamo a ʻIseraʻela, i wai huikala; he mea huikala ia no ka hewa.

¹⁰ ‘‘A ʻo ka mea nāna e hōʻiliʻili i ka lehu o ka bipi wahine, e holoi ia i kona mau kapa, a e haumia ʻo ia a hiki i ke ahiahi; a e lilo ia no nā mamo a ʻIseraʻela, a no ke kanaka ʻē e noho pū ana me lākou, i kānāwai mau loa.

¹¹ ¶ ‘ʻO ka mea hoʻopā aku i ke kupapaʻu o kekahi kanaka, e haumia ʻo ia i nā lā ʻehiku.

¹² ‘E huikala nō ʻo ia iā ia iho me ia i ke kolu o ka lā aku; a i ka hiku o ka lā e maʻemaʻe ia; akā, i ʻole ʻo ia e huikala iā ia iho i ke kolu o ka lā, a laila, ʻaʻole ia e maʻemaʻe i ka hiku o ka lā.

¹³ ‘ʻO kēlā mea kēia mea e hoʻopā aku i ke kupapaʻu o ke kanaka i make, a i huikala ʻole ʻo ia iā ia iho, ua hoʻohaumia ʻo ia i ka halelewa o Iēhova; a e ʻoki ʻia ua kanaka lā mai kā ʻIseraʻela aku; no ka mea, ʻaʻole i kāpīpī ʻia ka wai huikala ma luna ona; e haumia nō ʻo ia, e kau ana nō kona haumia ma luna ona.

¹⁴ ¶ ‘Eia ke kānāwai i ka wā e make ai ke kanaka ma loko o kekahi hale lole; ʻo nā mea a pau i komo i loko o ua hale lole lā, a ʻo nā mea a pau o loko o ua hale lole lā, e haumia nō lākou i nā lā ʻehiku.

¹⁵ ‘A ʻo nā ipu hāmama a pau, ʻo nā mea pani ʻole i hāwele ʻia a paʻa ma luna, ua haumia ia.

¹⁶ ‘A ʻo ka mea hoʻopā aku i ka mea i pepehi ʻia i ka pahi kaua ma ke kula, a i ke kupapaʻu paha, a i ka iwi kanaka paha, a i ka hē kupapaʻu paha, e haumia nō ʻo ia i nā lā ʻehiku.

¹⁷ ‘A no ka haumia, e lawe lākou i kekahi lehu o ka bipi wahine i puhi ʻia i ke ahi no ka huikala ʻana i ka hewa, a e hui pū ʻia ka wai puna me ia ma loko o kekahi ipu.

¹⁸ ‘A e lawe ke kanaka maʻemaʻe i ka husopa, a e hoʻū iho i loko o ka wai, a e kāpīpī ʻia ma luna o ka hale lole, a ma luna o nā ipu a pau, a ma luna o nā kānaka ma laila, a ma luna o ka mea nāna i hoʻopā ka iwi kanaka, a i ka mea i pepehi ʻia paha, a i ke kupapaʻu paha, a i ka hē kupapaʻu paha.

¹⁹ ‘E kāpīpī ka mea maʻemaʻe i ka mea haumia i ke kolu o ka lā, a i ka hiku o ka lā; a i ka hiku o ka lā, e hoʻomaʻemaʻe ʻo ia iā ia iho, a e holoi ʻo ia i kona mau kapa, a e ʻauʻau ia i ka wai, a i ke ahiahi e huikala ia.

²⁰ ¶ ‘Akā, ʻo ke kanaka haumia, a i huikala ʻole ʻo ia iā ia iho, e hōʻoki ʻia aku ua kanaka lā mai ke anaina aku; no ka mea, ua hoʻohaumia ʻo ia i ke keʻena kapu o Iēhova; ʻaʻole i kāpīpī ʻia ka wai huikala ma luna ona; ua haumia ʻo ia.

²¹ ʻA e lilo ia i kānāwai mau loa no lākou; ʻo ka mea nāna e kāpīpī i ka wai huikala, e holoi ia i kona mau kapa; ʻo ka mea hoʻi nāna e hoʻopā aku i ka wai huikala, e haumia ʻo ia a hiki i ke ahiahi.

²² ‘ʻO kēlā mea kēia mea a ka mea haumia e hoʻopā aku ai, e haumia hoʻi ia mea; a ʻo ke kanaka nāna e hoʻopā aku, e haumia ʻo ia a hiki i ke ahiahi.’”