KA BUKE ʻAHĀ A MOSE, I KAPA ʻIA NĀ HELU 17 - Ka Baibala Hemolele

1 Nā koʻokoʻo he ʻumikumamālua i waiho ʻia ma ka halelewa. 8 Hua aʻela ke koʻokoʻo o ʻAʻarona i nā hua ʻalemona.

MOKUNA XVII.

¹ ¶ ʻŌlelo maila ʻo Iēhova iā Mose, ʻī maila,

² “E ʻōlelo aku ʻoe i nā mamo a ʻIseraʻela, a e lawe ʻoe i ke koʻokoʻo o kēlā kanaka a i ke koʻokoʻo o kēia kanaka, no ka ʻohana o ko lākou poʻe kūpuna, ʻo nā luna o lākou a pau, no ka ʻohana o ko lākou poʻe kūpuna, i nā koʻokoʻo he ʻumikumamālua; a e kākau ʻoe i ka inoa o kēlā kanaka kēia kanaka ma luna o kona koʻokoʻo iho.

³ “E kākau hoʻi ʻoe i ka inoa ʻo ʻAʻarona ma luna o ke koʻokoʻo no kā Levi; hoʻokahi koʻokoʻo, no ka luna ʻohana o ko lākou mau kūpuna ia.

⁴ “A e waiho ʻoe ia mau mea ma ka halelewa o ke anaina, i mua o ke Kānāwai, kahi aʻu e hālāwai ai me ʻolua.

⁵ “A ʻo ke koʻokoʻo o ke kanaka aʻu e wae iho ai, e pua nō ia; a e hoʻopau nō wau mai oʻu aku nei i nā ʻōhumu ʻana a ka poʻe mamo a ʻIseraʻela e ʻōhumu aku nei iā ʻolua.”

⁶ ʻŌlelo akula ʻo Mose i nā mamo a ʻIseraʻela, a hāʻawi maila kēlā luna kēia luna i kekahi koʻokoʻo iā ia, hoʻokahi luna hoʻokahi koʻokoʻo no nā ʻohana o ko lākou poʻe kūpuna, he ʻumikumamālua mau koʻokoʻo; a i waena o ko lākou mau koʻokoʻo, ke koʻokoʻo o ʻAʻarona.

⁷ A waiho akula ʻo Mose i nā koʻokoʻo i mua o Iēhova, ma loko o ka halelewa o ke kānāwai.

⁸ ¶ A ia lā aʻe, komo akula ʻo Mose i loko o ka halelewa o ke kānāwai; aia hoʻi, ua ʻōpuʻu mai ke koʻokoʻo o ʻAʻarona no ka ʻohana a Levi, a ua mōhala aʻe nā ʻōpuʻu, ua pua i nā pua, a ua hua mai i nā hua ʻalemona.

⁹ Lawe maila ʻo Mose i nā koʻokoʻo a pau i waho, mai ke alo o Iēhova mai, a i mua o nā mamo a pau a ʻIseraʻela; nānā aʻela lākou, a lawe akula kēlā kanaka kēia kanaka i kona koʻokoʻo iho.

¹⁰ ʻĪ maila ʻo Iēhova iā Mose, “E lawe hou mai i ke koʻokoʻo o ʻAʻarona i mua o ke Kānāwai, e mālama ʻia ai i hōʻailona no ka poʻe kipi; a e lawe lilo loa aku ʻoe i ko lākou ʻōhumu ʻana mai oʻu aku nei, i make ʻole ai lākou.”

¹¹ A hana akula ʻo Mose; e like me kā Iēhova i kauoha mai ai iā ia, pēlā ia i hana ai.

¹² ¶ ʻŌlelo maila nā mamo a ʻIseraʻela iā Mose, ʻī maila, “Aia hoʻi, ua make mākou, ua pau mākou, ua pau mākou a pau!

¹³ “ʻO ka mea hele a kokoke aku i ka halelewa o Iēhova, e make ia: e pau loa nō anei mākou i ka make?”