KA BUKE ʻAHĀ A MOSE, I KAPA ʻIA NĀ HELU 16 - Ka Baibala Hemolele

1 No ke kipi ʻana o Kora, Datana a me ʻAbirama. 5 Ko lākou hakakā ʻana me Mose. 22 Hāmama ka honua, a ale iho iā lākou, a ua pau hoʻi ka poʻe kuni mea ʻala i ka make i mua o Iēhova. 36 Ke kauoha a Iēhova iā ʻEleazara, no nā ipu kuni ʻala. 41 Ka ʻōhumu hou ʻana o ke anaina kanaka a me ka make nui i ke ahulau.

MOKUNA XVI.

¹ ¶ A kūkā ihola ʻo Kora, ke keiki a ʻIzekara, ke keiki a Kohata, ke keiki a Levi, a ʻo Datana a me ʻAbirama nā keiki a ʻEliaba, a me ʻOna ke keiki a Peleta, nā keiki a Reubena;

² a kū i luna lākou me kekahi poʻe mamo a ʻIseraʻela i mua o Mose, he ʻelua haneri a me kanalima nā luna o nā kānaka, he poʻe poʻokela ma ke anaina kanaka, nā kānaka kaulana.

³ Hōʻuluʻulu aʻela lākou e kūʻē iā Mose a iā ʻAʻarona, ʻī maila iā lāua, “He nui loa kā ʻolua; no ka mea, ua laʻa ke anaina kanaka a pau loa, a ʻo Iēhova kekahi i waena o lākou; no ke aha lā hoʻi ʻolua e hoʻokiʻekiʻe aʻe nei iā ʻolua iho ma luna o ke anaina kanaka o Iēhova?”

⁴ ¶ A lohe aʻela ʻo Mose, moe ihola ia i lalo ke alo;

⁵ ʻōlelo akula ia iā Kora, a me kona poʻe a pau, ʻī akula, “A kakahiaka aʻe, e hōʻike mai ʻo Iēhova i ka mea nona, a me ka mea laʻa; a e hoʻokokoke aku ai iā ia i ona lā; ʻo ka mea āna e koho ai, ʻo ia kāna e hoʻokokoke aku ai i ona lā.

⁶ “ʻO kēia kā ʻoukou e hana ai: e lawe ʻoukou i nā ipu kuni ʻala, ʻo Kora a me kona mau hoa a pau;

⁷ e hahao i ke ahi ma loko, e hahao hoʻi i ka mea ʻala ma loko i mua o Iēhova i ka lā ʻapōpō; a ʻo ka mea a Iēhova e wae mai ai, ʻo ia ka mea laʻa; he nui loa kā ʻoukou, e nā mamo a Levi!”

⁸ ¶ ʻĪ akula ʻo Mose iā Kora mā, “Ke noi aku nei au iā ʻoukou, e hoʻolohe mai ʻoukou, e nā mamo a Levi,

⁹ he mea ʻuʻuku anei iā ʻoukou, i hoʻokaʻawale aʻe ke Akua o kā ʻIseraʻela iā ʻoukou mai ke anaina kanaka o kā ʻIseraʻela mai, e hoʻokokoke aku iā ʻoukou i ona lā, e hana i ka hana ma ka halelewa o Iēhova, a e kū i mua o ke anaina kanaka, e lawelawe na lākou?

¹⁰ “A ua hoʻokokoke mai nō ʻo ia iā ʻoe a me kou poʻe hoahānau nā mamo a Levi me ʻoe; a ke ʻimi nei anei hoʻi ʻoukou i ka ʻoihana kahuna?

¹¹ “No ia mea, ua ʻākoakoa aʻe nei ʻoe me ou poʻe a pau e kūʻē iā Iēhova; he aha hoʻi ʻo ʻAʻarona i ʻōhumu aku ai ʻoukou iā ia?”

¹² ¶ Hoʻouna akula ʻo Mose, e kiʻi iā Datana lāua ʻo ʻAbirama nā keiki a ʻEliaba; ʻī maila hoʻi lāua, “ʻAʻole māua e hele aku!

¹³ “He mea liʻiliʻi anei kou lawe ʻana mai iā mākou mai loko mai o ka ʻāina e kahe ana ʻo ka waiū a me ka meli, e pepehi iā mākou ma ka wao nahele, ke hiki ʻole iā ʻoe e hoʻolilo iā ʻoe iho i aliʻi ma luna o mākou?

¹⁴ “ʻAʻole nō hoʻi ʻoe i lawe aku iā mākou i ka ʻāina e kahe ana ʻo ka waiū a me ka meli, me ka hāʻawi mai no mākou i nā kula a me nā māla waina. E pōʻalo anei ʻoe i nā maka o kēia poʻe kānaka? ʻAʻole nō māua e hele aku!”

¹⁵ ¶ Huhū loa ihola ʻo Mose, a ʻī akula iā Iēhova, “Mai maliu mai ʻoe i kā lākou mōhai; ʻaʻole au i lawe noʻu i kekahi hoki o lākou, ʻaʻole hoʻi au i hana ʻeha aku i kekahi o lākou.”

¹⁶ ʻĪ akula ʻo Mose iā Kora, “ʻApōpō, e hele ʻoe me ou poʻe a pau i mua o Iēhova, ʻo ʻoe, ʻo lākou a me ʻAʻarona.

¹⁷ “E lawe hoʻi kēia kanaka kēlā kanaka i kona ipu kuni ʻala, e hahao i ka mea ʻala ma loko, a e lawe mai nā kānaka o ʻoukou a pau i ko lākou ipu kuni ʻala i mua o Iēhova, i ʻelua haneri a me kanalima nā ipu kuni ʻala; ʻo ʻoe hoʻi, a ʻo ʻAʻarona, ʻo kēlā mea kēia mea me kona ipu kuni ʻala.”

¹⁸ A lawe aʻela kēlā kanaka kēia kanaka i kona ipu kuni ʻala, hahao ihola i ke ahi ma loko, a kau i ka mea ʻala ma luna, a kū aʻela ma ka puka o ka halelewa o ke anaina me Mose a me ʻAʻarona.

¹⁹ Hōʻuluʻulu aʻela ʻo Kora i ke anaina kanaka a pau ma ka puka o ka halelewa e kūʻē iā lāua; a ʻikea aʻela ka nani o Iēhova e ke anaina kanaka a pau.

²⁰ ¶ ʻŌlelo maila ʻo Iēhova iā Mose a me ʻAʻarona, ʻī maila,

²¹ “E hoʻokaʻawale aʻe ʻolua iā ʻolua iho mai kēia anaina kanaka aku, i hoʻopau koke ai au iā lākou.”

²² Moe ihola lāua, i lalo ke alo, ʻī akula, “E ke Akua, ke Akua o nā ʻuhane o nā kānaka a pau, a i hewa ke kanaka hoʻokahi, e inaina mai nō anei ʻoe i ke anaina kanaka a pau?”

²³ ʻŌlelo maila ʻo Iēhova iā Mose, ʻī maila,

²⁴ “E ʻōlelo aku ʻoe i ke anaina kanaka, e ʻī aku, ‘E hoʻokaʻawale aʻe iā ʻoukou iho mai kēlā ʻaoʻao a mai kēia ʻaoʻao aku o ka halelewa o Kora, ʻo Datana a ʻo ʻAbirama.’”

²⁵ ¶ Kū aʻela ʻo Mose, a hele akula i o Datana a me ʻAbirama lā, a hahai akula nā lunakahiko o kā ʻIseraʻela iā ia.

²⁶ ʻŌlelo akula ia i ke anaina kanaka, ʻī akula, “E hoʻokaʻawale aku iā ʻoukou iho mai nā halelewa aku o kēia mau kānaka hewa, mai hoʻopā aku i kekahi mea o lākou nei, o make auaneʻi ʻoukou i loko o ko lākou hewa a pau.”

²⁷ A laila, haʻalele akula lākou i ka halelewa o Kora a me Datana a me ʻAbirama mai kēia ʻaoʻao a mai kēlā ʻaoʻao aku: a puka maila ʻo Datana lāua ʻo ʻAbirama i waho, a kū maila ma ka puka o ko lāua mau halelewa, me kā lāua mau wāhine, me nā keiki kāne a lāua, a me kā lāua mau keiki ʻuʻuku.

²⁸ ʻĪ akula ʻo Mose, “Ma kēia mea e ʻike ai ʻoukou, ʻo wau nō kā Iēhova i hoʻouna mai nei e hana i kēia mau hana a pau; no ka mea, ʻaʻole ia na kuʻu manaʻo iho.

²⁹ “Inā paha e make kēia poʻe kānaka e like me ka make ʻana o nā kānaka a pau, a i ʻike ʻia aku lākou e like me ka ʻike ʻia ʻana o nā kānaka a pau, a laila ʻaʻole na Iēhova wau i hoʻouna mai.

³⁰ “Akā inā e hana mai ʻo Iēhova i ka mea hou, a hāmama aʻe ka honua i kona waha, a moni iho iā lākou nei, me nā mea a pau iā lākou, a iho ola lākou i lalo i ka lua; a laila e ʻike pono ʻoukou, ua hoʻonāukiuki aku kēia mau kānaka iā Iēhova.”

³¹ ¶ A i ka manawa i hoʻōki ai ʻo ia i ka ʻōlelo ʻana i kēia mau mea a pau, nahā aʻela ka honua ma lalo iho o lākou;

³² a hāmama aʻela ka honua i kona waha, ale ihola iā lākou, me ko lākou mau hale, a me nā kānaka a pau i pili aku iā Kora, a me ko lākou waiwai a pau.

³³ ʻO lākou a me ko lākou mea a pau, iho ola ihola i loko o ka lua, a paʻa hou maila ka honua ma luna o lākou; a make ihola lākou mai waena aku o ke anaina kanaka.

³⁴ A holo akula kā ʻIseraʻela a pau ma kēlā ʻaoʻao a ma kēia ʻaoʻao o lākou, i ko lākou hoʻōho ʻana; ʻī aʻela lākou, “O ale auaneʻi ka honua iā kākou!”

³⁵ Puka maila ke ahi mai o Iēhova mai, a ʻai maila i nā kānaka ʻelua haneri me kanalima, ʻo ka poʻe i mōhai aku i ka mea ʻala.

³⁶ ¶ ʻŌlelo maila ʻo Iēhova iā Mose, ʻī maila,

³⁷ “E ʻōlelo aku iā ʻEleazara ke keiki a ʻAʻarona, ke kahuna, e lawe ia i nā ipu kuni ʻala mai loko aʻe o ke ahi, a e hoʻolei aku i ke ahi ma ʻō; no ka mea, ua laʻa ia mau mea.

³⁸ “ʻO nā ipu kuni ʻala o kēia poʻe i hana hewa aku i ko lākou mau ʻuhane, e hana lākou ia mau mea i mau pā pālahalaha, i uhi no ke kuahu; no ka mea, ua kaumaha ihola lākou ia mau mea i mua o Iēhova; no laila ua laʻa; a e lilo lākou i hōʻailona no nā mamo a ʻIseraʻela.”

³⁹ A lawe aʻela ʻo ʻEleazara ke kahuna i nā ipu kuni ʻala keleawe, i nā mea a ka poʻe pau i ke ahi i mōhai aku ai; a ua hana ʻia ua mau mea lā i mau pā pālahalaha no ke kuahu;

⁴⁰ i mea hoʻomanaʻo no nā mamo a ʻIseraʻela, i ʻole ai ke kanaka ʻē, ka mea ʻaʻole na ka hua a ʻAʻarona, e hele mai a kokoke e kuni i ka mea ʻala i mua o Iēhova, i like ʻole ai ia me Kora, a me kona poʻe; me kā Iēhova i ʻōlelo mai ai iā ia ma ka lima o Mose.

⁴¹ ¶ Ia lā aʻe, ʻōhumu aʻela ke anaina kanaka a pau o nā mamo a ʻIseraʻela, iā Mose a iā ʻAʻarona, ʻī maila, “Ua make iā ʻolua ko Iēhova poʻe kānaka.”

⁴² Aia ʻākoakoa aʻe ke anaina kanaka e kūʻē iā Mose a iā ʻAʻarona, nānā aʻela lākou i ka halelewa o ke anaina, aia hoʻi, uhi maila ke ao, a ʻikea maila hoʻi ka nani o Iēhova.

⁴³ Hele akula ʻo Mose lāua ʻo ʻAʻarona i mua o ka halelewa o ke anaina.

⁴⁴ ʻŌlelo maila ʻo Iēhova iā Mose, ʻī maila,

⁴⁵ “E hoʻokaʻawale aʻe iā ʻolua iho mai waena aʻe o kēia anaina kanaka, i hoʻopau koke ai au iā lākou.” A moe ihola lāua i lalo ke alo.

⁴⁶ ʻĪ akula ʻo Mose iā ʻAʻarona, “E lawe ʻoe i wahi ipu kuni ʻala, a e hahao i ke ahi ma loko mai luna mai o ke kuahu, e kau hoʻi i ka mea ʻala ma luna, a e hele koke aku i ke anaina kanaka, a e hoʻokalahala no lākou; no ka mea, ua hele akula ka inaina mai o Iēhova aku; ua hoʻomaka ʻia ke ahulau.”

⁴⁷ Lawe akula ʻo ʻAʻarona, e like me kā Mose i kauoha ai, a holo akula i waena o ke anaina kanaka; aia hoʻi, ua hoʻomaka ʻia ke ahulau i waena o ka poʻe kānaka; kau ihola ia i ka mea ʻala, a hoʻokalahala akula no ka poʻe kānaka.

⁴⁸ Kū ihola ia i waena o ka poʻe make a me ka poʻe ola; a hoʻōki ʻia ihola ke ahulau.

⁴⁹ A ʻo ka poʻe i make i ke ahulau, he ʻumikumamāhā tausani a me nā haneri ʻehiku; he ʻokoʻa ka poʻe i make no ka mea o Kora.

⁵⁰ A hoʻi hou aʻela ʻo ʻAʻarona i o Mose lā, ma ka puka o ka halelewa o ke anaina; a ua hoʻōki ʻia ke ahulau.