KA BUKE ʻAHĀ A MOSE, I KAPA ʻIA NĀ HELU 15 - Ka Baibala Hemolele

1 Ke kānāwai no nā mōhai ʻai a me nā mōhai inu. 17 Ka mōhai hoʻāli o ka palaoa maka. 22 Ka mōhai hala no nā mea hewa naʻaupō wale. 30 Ka hailuku ʻana i ke kanaka hehi i ka Sābati.

MOKUNA XV.

¹ ¶ ʻŌlelo maila ʻo Iēhova iā Mose, ʻī maila,

² “E ʻōlelo aku ʻoe i nā mamo a ʻIseraʻela, a e ʻī aku iā lākou, “Aia komo aku ʻoukou i ka ʻāina o ko ʻoukou noho ʻana, kahi aʻu e hāʻawi aku ai no ʻoukou;

³ a e kaumaha aku ʻoukou ma ke ahi i mōhai na Iēhova, i mōhai kuni paha, i mōhai hoʻokō i ka hoʻohiki paha, a i mōhai aloha paha, a ma kā ʻoukou mau ʻahaʻaina laʻa paha, i mea e hana ai i ke ʻala ʻoluʻolu no Iēhova, no nā bipi paha, no nā hipa paha;

⁴ a laila ʻo ka mea nāna e kaumaha aku kāna mōhai na Iēhova, e lawe mai ia i mōhai ʻai, he hapaʻumi o ka ʻepa palaoa, i kāwili pū ʻia me ka hapahā o ka hina ʻaila.

⁵ ‘A ʻo ka hapahā o ka hina waina i mōhai inu kāu e hoʻomākaukau ai, me ka mōhai kuni, a he mōhai maoli paha, no ke keiki hipa hoʻokahi.

⁶ ‘Inā no kekahi hipa kāne, e hoʻomākaukau ʻoe i mōhai ʻai, i ʻelua hapaʻumi o ka ʻepa palaoa i kāwili ʻia me ka hapakolu o ka hina ʻaila;

⁷ a e kaumaha aku ʻoe i ka hapakolu o ka hina waina, i mōhai inu, i mea ʻala ʻoluʻolu no Iēhova.

⁸ ‘I ka manawa āu e hoʻomākaukau ai i ka bipi kāne i mōhai kuni, a i mōhai hoʻokō i ka hoʻohiki paha, a i mōhai hoʻomalu paha na Iēhova;

⁹ a laila e lawe pū mai ʻo ia me ka bipi kāne i mōhai ʻai he ʻakolu hapaʻumi o ka ʻepa palaoa, i kāwili ʻia me ka hapalua o ka hina ʻaila;

¹⁰ a e lawe mai hoʻi ʻoe i ka hapalua o ka hina waina i mōhai inu, he mōhai i hana ʻia ma ke ahi, i mea ʻala ʻoluʻolu no Iēhova.

¹¹ ¶ ‘Pēlā e hana ʻia aku ai no ka bipi kāne hoʻokahi, a no ka hipa kāne hoʻokahi, a no ke keiki hipa, a no ke keiki kao.

¹² ‘E like me ka nui o nā mea a ʻoukou e hoʻomākaukau ai, pēlā nō ʻoukou e hana aku ai i kēlā mea kēia mea a pau, e like me ka nui o lākou.

¹³ ‘ʻO nā mea a pau i hānau ma ka ʻāina, ma kēia kumu kā lākou e hana ai ia mau mea, ma ke kaumaha ʻana aku i ka mōhai i hana ʻia ma ke ahi, he mea ʻala ʻoluʻolu no Iēhova.

¹⁴ ‘Inā e noho ana ke kanaka ʻē me ʻoukou, a ʻo kēlā mea kēia mea i waena o ʻoukou, i nā hanauna o ʻoukou, a manaʻo ʻia e kaumaha i ka mōhai i hana ʻia ma ke ahi, he mea ʻala ʻoluʻolu no Iēhova; e like me kā ʻoukou hana ʻana, pēlā hoʻi ʻo ia e hana ai.

¹⁵ ‘Hoʻokahi nō kānāwai no ʻoukou o ke anaina kanaka, a no ke kanaka ʻē hoʻi e noho pū ana, he kānāwai e mau loa ana no nā hanauna o ʻoukou; e like me ʻoukou nei, pēlā nō hoʻi ka malihini i mua o Iēhova.

¹⁶ ‘Hoʻokahi nō kānāwai, a hoʻokahi nō kumuhana na ʻoukou, a no ke kanaka ʻē, e noho ana me ʻoukou.’”

¹⁷ ¶ ʻŌlelo mai ʻo Iēhova iā Mose, ʻī maila,

¹⁸ “E ʻōlelo aku ʻoe i nā mamo a ʻIseraʻela, a e ʻī aku iā lākou, ‘Aia hiki aku ʻoukou i ka ʻāina kahi aʻu e hoʻokomo ai iā ʻoukou;

¹⁹ a ʻai iho ʻoukou i ka berena o ia ʻāina, a laila e mōhai aku ʻoukou i mōhai hoʻāli na Iēhova.

²⁰ ‘A e lawe mai ʻoukou i ka pōpō mua o kā ʻoukou palaoa kāwili i mōhai hoʻāli, e like me ka mōhai hoʻāli o kahi hehi palaoa, pēlā ʻoukou e mōhai ai ia.

²¹ ‘No ka mua o kā ʻoukou palaoa kāwili kā ʻoukou e hāʻawi aku iā Iēhova i mōhai hoʻāli ma ko ʻoukou mau hanauna.

²² ¶ ‘Inā i lalau ʻoukou, ʻaʻole hoʻi i mālama i kēia mau kauoha a pau a Iēhova i ʻōlelo mai ai ma o Mose lā,

²³ i nā mea a pau a Iēhova i kauoha mai ai ma ka lima o Mose, mai ka lā a Iēhova i kauoha mai ai, a ma kēia hope aku i waena o nā hanauna o ʻoukou;

²⁴ a laila, inā paha e hana hewa naʻaupō ʻia, a ua ʻike ʻole ʻia e ke anaina kanaka, e kaumaha aku nō ke anaina kanaka a pau i hoʻokahi bipi kāne hou i mōhai kuni, i mea ʻala ʻoluʻolu no Iēhova, me kāna mōhai ʻai, a me kāna mōhai inu, ma muli o ke kānāwai; a i hoʻokahi keiki kao i mōhai hala.

²⁵ ‘A na ke kahuna e hoʻokalahala no ke anaina kanaka a pau o nā mamo a ʻIseraʻela, a e kala ʻia ia no lākou; no ka mea, he naʻaupō ia; a e lawe mai lākou i kā lākou mōhai, i mōhai i hana ʻia ma ke ahi na Iēhova, a me kā lākou mōhai hala i mua o Iēhova, no ko lākou naʻaupō ʻana.

²⁶ ‘A e kala ʻia ia no ke anaina a pau o nā mamo a ʻIseraʻela, a no ke kanaka ʻē e noho ana i waena o lākou; no ka mea, i loko o ka naʻaupō ka poʻe kānaka a pau.

²⁷ ¶ ‘A i hana hewa naʻaupō kekahi kanaka, a laila, e lawe mai ia i kao wahine o ka makahiki mua, i mōhai hala.

²⁸ ‘A e hoʻokalahala ke kahuna no ke kanaka i hana hewa naʻaupō, ke hana hewa naʻaupō ia i mua o Iēhova, i mea kala ʻia ai ka hala nona; a e kala ʻia nō ia nona.

²⁹ ‘I hoʻokahi nō kānāwai o ʻoukou no ka mea hana hewa naʻaupō; no ka mea i hānau i waena o nā mamo a ʻIseraʻela, a no ke kanaka ʻē e noho ana me ʻoukou.

³⁰ ‘Akā, ʻo ke kanaka hana hewa me ka hoʻokiʻekiʻe, ʻo ke keiki papa, a me ke kanaka ʻē, ʻo ia ka mea hōʻino iā Iēhova; a e hōʻoki ʻia aku ua kanaka lā mai waena aku o kona hanauna.

³¹ ‘No ka mea, ua hoʻowahāwahā aku ia i ka ʻōlelo a Iēhova, ua haʻihaʻi iho ʻo ia i kona kānāwai, e hōʻoki loa ʻia aku ʻo ia; ma luna iho ona kona hewa.’”

³² ¶ Ma loko o ka wao nahele nā mamo a ʻIseraʻela, a loaʻa iā lākou he kanaka nāna i hōʻiliʻili i ka wahie i ka lā Sābati.

³³ A ʻo ka poʻe i ʻike iā ia e hōʻiliʻili ana i ka wahie, kaʻi maila lākou iā ia i o Mose lāua ʻo ʻAʻarona lā, a i ke anaina kanaka a pau.

³⁴ Hoʻonoho ihola lākou iā ia ma kahi paʻa; no ka mea, ʻaʻole i hōʻike ʻia mai ka mea i hana ʻia aku ai iā ia.

³⁵ ʻŌlelo maila ʻo Iēhova iā Mose, “He ʻoiaʻiʻo nō, e make ia kanaka; na ke anaina kanaka a pau ia e hailuku aku ma waho o kahi hoʻomoana.”

³⁶ Kaʻi akula nā kānaka a pau iā ia ma waho o kahi hoʻomoana, hailuku akula iā ia a make, me kā Iēhova i kauoha mai ai iā Mose.

³⁷ ¶ ʻŌlelo maila ʻo Iēhova iā Mose, ʻī maila,

³⁸ “E ʻōlelo aku ʻoe i nā mamo a ʻIseraʻela, e ʻī aku iā lākou, e hana lākou i nā pihapiha ma nā kihi o ko lākou mau ʻaʻahu, ma nā hanauna o lākou, a e hoʻopili iho lākou i ke kaula ribina uliuli ma nā pihapiha o nā kihi.

³⁹ “A e lilo iho ia no ʻoukou i pihapiha, e nānā iho ai, a e hoʻomanaʻo i nā kauoha a pau a Iēhova, a e mālama hoʻi iā lākou; i ʻole ai ʻoukou e ʻimi aku ma muli o ko ʻoukou mau naʻau, a me ko ʻoukou mau maka; ma muli o ia mau mea kā ʻoukou i hele moekolohe ai;

⁴⁰ i hoʻomanaʻo ai ʻoukou, a e hana hoʻi i kaʻu mau kauoha a pau, a e lilo ʻoukou i poʻe laʻa no ko ʻoukou Akua.

⁴¹ “ʻO wau nō Iēhova ʻo ko ʻoukou Akua, nāna ʻoukou i lawe aʻe mai loko mai o ka ʻāina ʻo ʻAigupita, i Akua wau no ʻoukou; ʻo wau nō Iēhova ʻo ko ʻoukou Akua.”