KA BUKE ʻAHĀ A MOSE, I KAPA ʻIA NĀ HELU 11 - Ka Baibala Hemolele

1 I ka ʻōhumu ʻana o kānaka, ʻai maila ke ahi o Iēhova iā lākou. 4 Hoʻopailua lākou i ka mane, a kuko i ka iʻa. 10 Hāʻawi mai nō ke Akua iā Mose i nā kōkua, a me ka ʻiʻo e ʻai ai i ka malama ʻokoʻa. 31 ʻO nā sēlū he lehulehu ka ʻiʻo.

MOKUNA XI.

¹ ¶ I ka ʻōhumu ʻana a nā kānaka, ua hewa ia i nā pepeiao o Iēhova; lohe aʻela ʻo Iēhova, a hoʻā ʻia kona inaina; ʻā akula ke ahi o Iēhova i waena o lākou, a ʻai akula ma ka palena o kahi hoʻomoana.

² Kāhea akula nā kānaka iā Mose, a pule akula ʻo Mose iā Iēhova, a laila pio ihola ke ahi.

³ Kapa akula ia i ka inoa o ia wahi, ʻo Tabera; no ka mea, ua ʻai mai ke ahi o Iēhova i waena o lākou.

⁴ ¶ A ʻo ka poʻe ʻē i hui pū ʻia mai me lākou, kuko nui aku lākou; a uē hou ihola nā mamo a ʻIseraʻela, ʻī aʻela, “Na wai lā e hāʻawi mai i ka ʻiʻo na kākou e ʻai ai?

⁵ “Ke hoʻomanaʻo nei mākou i ka iʻa a mākou i ʻai wale iho ai ma ʻAigupita; i nā kaʻukama me nā ipu ʻai maka, i nā leka me nā ʻakaʻakai, a me nā gālika;

⁶ ʻānō hoʻi, ua maloʻo loa ko kākou naʻau; ʻaʻohe mea ʻē aʻe, ʻo ka mane wale nō i mua o ko kākou maka!”

⁷ Ua like ka mane me ka hua koriana, a ʻo kona helehelena ua like ia me ka deliuma.

⁸ A hele aʻela nā kānaka, a hōʻiliʻili ihola, a wāwahi ihola ma loko o nā mea wili; a i ʻole ia, kuʻi ihola lākou i loko o nā ipu kuʻi, kahu ihola a moʻa ma nā pā, a hana ihola ia i pōpō. A ʻo ka hoʻāʻo ʻana o ia mea, ua like me ka hoʻāʻo ʻana i ka ʻaila hou.

⁹ Aia hāʻule iho ka hau ma luna o kahi hoʻomoana i ka pō, hāʻule pū nō hoʻi ka mane me ia.

¹⁰ ¶ A laila lohe aʻela ʻo Mose i nā kānaka e uē ana me kā lākou mau ʻohana, ʻo kēlā kanaka kēia kanaka ma ka puka o kona halelewa; hoʻā nui ʻia ka inaina o Iēhova; a ukiuki ihola hoʻi ʻo Mose.

¹¹ ʻĪ akula ʻo Mose iā Iēhova, “No ke aha lā ʻoe i hoʻopilikia mai ai i kāu kauā? No ke aha hoʻi i loaʻa ʻole mai ai iaʻu ka lokomaikaʻi ʻia mai i mua o kou maka, i kau mai ai ʻoe ma luna oʻu i ke kaumaha o kēia poʻe kānaka a pau?

¹² “Naʻu nō anei i hoʻohāpai i kēia poʻe kānaka a pau? Ua hoʻohānau nō anei au iā lākou, i ʻōlelo mai ai ʻoe iaʻu, ‘E hiʻipoi ʻoe iā lākou ma kou umauma, e like me ka hali ʻana a ka makua hānai i ke keiki omo waiū,’ a hiki aku i ka ʻāina āu i hoʻohiki ai i nā kūpuna o lākou?’

¹³ “No hea lā e loaʻa mai ai iaʻu ka ʻiʻo e hāʻawi aku ai na kēia poʻe kānaka a pau? No ka mea, ke uē mai nei lākou iaʻu, me ka ʻōlelo mai, ‘E hāʻawi mai ʻoe na mākou i ʻiʻo, e ʻai iho ai mākou.’

¹⁴ “ʻAʻole e hiki iaʻu, ʻo wau wale nō ke halihali i kēia poʻe kānaka a pau; no ka mea, he mea kaumaha loa ia noʻu.

¹⁵ “A i hana mai ʻoe pēlā iaʻu, ʻeā, ke nonoi aku nei au iā ʻoe, e pepehi mai ʻoe iaʻu a make, inā paha i loaʻa iaʻu ka lokomaikaʻi ʻia mai i mua o kou mau maka, a ʻike ʻole au i kuʻu pōpilikia ʻana!”

¹⁶ ¶ ʻŌlelo maila ʻo Iēhova iā Mose, “E hōʻuluʻulu mai ʻoe i oʻu nei i nā kānaka he kanahiku o ka poʻe kahiko o kā ʻIseraʻela, i nā mea āu e ʻike ai he poʻe kahiko o nā kānaka, a he poʻe luna hoʻi no lākou; a e kaʻi mai ʻoe iā lākou ma ka halelewa o ke anaina i kū ai lākou me ʻoe i laila.

¹⁷ “A e iho nō au i lalo, kamaʻilio pū me ʻoe i laila; a e lawe au i ko ka ʻUhane ma luna ou, a e kau aku ma luna o lākou; a e amo pū lākou me ʻoe i ke kaumaha o nā kānaka, i halihali ʻole ai ʻoe, ʻo ʻoe wale nō, ia mea.

¹⁸ “E ʻōlelo aku hoʻi ʻoe i nā kānaka, ‘E huikala ʻoukou iā ʻoukou iho no ka lā ʻapōpō, a e ʻai auaneʻi ʻoukou i ka ʻiʻo; no ka mea, ua uē aku ʻoukou ma loko o nā pepeiao o Iēhova, ua ʻī aku, “Na wai lā e hāʻawi mai i ka ʻiʻo na kākou e ʻai ai? Ua pono kākou ma ʻAigupita”; no ia mea, e hāʻawi mai nō ʻo Iēhova i ʻiʻo na ʻoukou, a e ʻai iho hoʻi ʻoukou.

¹⁹ ‘E ʻai nō ʻoukou, ʻaʻole i ka lā hoʻokahi, ʻaʻole i nā lā ʻelua, ʻaʻole hoʻi i nā lā ʻelima, ʻaʻole nō hoʻi i nā lā he ʻumi, ʻaʻole nō hoʻi i nā lā he iwakālua;

²⁰ akā, he malama ʻokoʻa, a puka mai ia i waho ma ko ʻoukou mau puka ihu, a hoʻopailua ʻoukou ia; no ka mea, ua hoʻowahāwahā ʻoukou iā Iēhova e noho ana i waena o ʻoukou, a ua uē ʻoukou i mua ona, me ka ʻī ʻana aʻe, “No ke aha lā kākou i hele mai ai mai ʻAigupita mai?”’”

²¹ ʻĪ akula ʻo Mose, “ʻO ka poʻe kānaka aʻu e noho nei i waena, he ʻeono haneri tausani lākou, ka poʻe hele wāwae, a ke ʻōlelo mai nei ʻoe, ‘E hāʻawi nō au i ʻiʻo na lākou e ʻai ai a pau ka malama ʻokoʻa.’

²² “E kālua ʻia anei nā pūʻā hipa a me nā pūʻā bipi na lākou, i mea e māʻona ai lākou? E hōʻiliʻili ʻia paha anei nā iʻa a pau o ke kai na lākou, i mea e māʻona ai lākou?”

²³ ʻŌlelo maila ʻo Iēhova iā Mose, “Ua hoʻopōkole ʻia anei ko Iēhova lima? E ʻike auaneʻi ʻoe i ka hoʻokō ʻia ʻana paha o kaʻu ʻōlelo iā ʻoe, a i ka ʻole ʻana paha.”

²⁴ ¶ Hele akula ʻo Mose, a haʻi akula i nā kānaka i nā ʻōlelo a Iēhova, a hōʻuluʻulu aʻela ia i nā kānaka, he kanahiku o ka poʻe lunakahiko no nā kānaka, a hoʻokū aʻela iā lākou a puni ka halelewa.

²⁵ Iho maila ʻo Iēhova ma ke ao, a ʻōlelo maila iā ia, a lawe aʻela ia i ko ka ʻUhane ma luna o Mose, a hāʻawi akula i ka poʻe lunakahiko he kanahiku; a i ka manawa i kau iho ai ka ʻUhane ma luna o lākou, a laila wānana maila lākou, ʻaʻole i hoʻōki.

²⁶ ¶ ʻElua kānaka i koe aku ma kahi hoʻomoana, ʻo ʻEledada, ka inoa o kekahi, a ʻo Medada ka inoa o kekahi. Kau maila ka ʻUhane ma luna o lāua; no ka poʻe lāua i kākau ʻia, ʻaʻole naʻe lāua i hele aku i ka halelewa, a wānana maila lāua ma kahi hoʻomoana.

²⁷ A holo maila kekahi kanaka ʻōpiopio, a haʻi maila iā Mose, ʻī maila, “Ke wānana maila ʻo ʻEledada lāua ʻo Medada ma kahi hoʻomoana.”

²⁸ Pane maila ʻo Iosua ke keiki a Nuna, ke kauā a Mose, he kanaka ʻōpiopio ona, ʻī maila, “E kuʻu haku, e Mose, e pāpā aku ʻoe iā lāua!”

²⁹ ʻĪ akula ʻo Mose iā ia, “Ke huā nei anei ʻoe noʻu? Ke ake nei au e lilo ko Iēhova poʻe kānaka a pau i poʻe kāula, a e kau mai ʻo Iēhova i kona ʻUhane ma luna o lākou!”

³⁰ Hoʻi maila ʻo Mose i kahi hoʻomoana, ʻo ia a me ka poʻe lunakahiko o kā ʻIseraʻela.

³¹ ¶ A huaʻi maila ka makani mai o Iēhova mai, a hoʻopuka maila i nā sēlū mai ka moana mai, a hoʻohāʻule ihola iā lākou ma kahi hoʻomoana, e like me kekahi lā hele ma kēia ʻaoʻao, a me kēlā ʻaoʻao, a puni i kahi hoʻomoana, ʻelua paha kūbita ma luna o ka honua.

³² Kū aʻela nā kānaka i luna ia lā a pō, ia pō a ao, a ia lā aku a pō; ʻohi ihola lākou i nā sēlū; a ʻo ka mea hōʻiliʻili hapa, he ʻumi nā homera kāna i hōʻiliʻili ai, a kaulaʻi akula lākou ia mea no lākou iho a puni kahi hoʻomoana.

³³ Aia i waena o ko lākou mau niho ka ʻiʻo, ʻaʻole ia i nau ʻia, ʻaʻā maila ka inaina o Iēhova i nā kānaka, a pepehi ihola ʻo Iēhova i nā kānaka, he ahulau nui loa.

³⁴ A kapa ihola ʻo ia i ka inoa o ia wahi, ʻo Kiberota Hataʻava; no ka mea, ma laila i kanu ai lākou i nā kānaka kuko.

³⁵ Hele akula nā kānaka mai Kiberota Hataʻava aku a hiki i Hazerota, a noho ihola lākou i Hazerota.