KA BUKE ʻAHĀ A MOSE, I KAPA ʻIA NĀ HELU 10 - Ka Baibala Hemolele

1 Nā pū kālā, a me ka puhi ʻana o ia mau mea. 11 Ka hele ʻana mai Sinai aku a Parana. 29 Kā Mose ʻōlelo iā Hobaba. 33 Kā Mose pule i ka neʻeneʻe ʻana a me ke kū mālie ʻana o ka pahu berita.

MOKUNA X.

¹ ¶ ʻŌlelo maila ʻo Iēhova iā Mose, ʻī maila,

² “E hana ʻoe i ʻelua pū kālā nou; no ka ʻāpana kālā ʻokoʻa kāu e hana ai ia mau mea, i mea nāu e hōʻuluʻulu aʻe ai i ke anaina kanaka, a no ka hele ʻana o ka poʻe hoʻomoana.

³ Aia puhi aku lākou ma ia mau mea, a laila e hoʻākoakoa aʻe ke anaina kanaka a pau ma ka puka o ka halelewa anaina.

⁴ “Inā paha e puhi lākou ma ka pū hoʻokahi, a laila ʻo nā aliʻi, ka poʻe luna o nā tausani ke hōʻuluʻulu mai i ou lā.

⁵ “Aia puhi ʻoukou i ka pū waikaua, a laila ʻo ka poʻe hoʻomoana ma ka ʻaoʻao hikina ke hele i mua.

⁶ “A puhi hou ʻoukou i ka pū waikaua, a laila ʻo ka poʻe hoʻomoana ma ke kūkulu hema ke hele aku; e puhi lākou i ka pū waikaua no ko lākou hele ʻana.

⁷ “A i ka wā e hōʻuluʻulu ʻia ana ke anaina kanaka, e puhi nō ʻoukou, ʻaʻole naʻe e hoʻokani ʻoukou i ka pū waikaua.

⁸ “ʻO nā keiki a ʻAʻarona, ʻo nā kāhuna, e puhi lākou i nā pū; a he kānāwai mau loa ia no ʻoukou a no nā hanauna ma hope o ʻoukou.

⁹ “Inā paha e hele ʻoukou i ke kaua ma ko ʻoukou ʻāina, e kūʻē i ka poʻe ʻenemi hoʻoluhi mai iā ʻoukou; a laila ʻoukou e puhi ai i ka pū waikaua ma nā pū; a e hoʻomanaʻo ʻia auaneʻi ʻoukou i mua o Iēhova ʻo ko ʻoukou Akua, a e hoʻōla ʻia ʻoukou i ko ʻoukou poʻe ʻenemi.

¹⁰ “Pēlā hoʻi i ka lā e ʻoliʻoli ai ʻoukou, a me nā lā hōʻuluʻulu o ʻoukou a me nā lā mua o ko ʻoukou mau malama, e puhi hoʻi ʻoukou i nā pū ma luna o nā mōhai kuni a ʻoukou, a ma luna o nā mōhai hoʻomalu o ʻoukou, i lilo ia mau mea iā ʻoukou i mea e hoʻomanaʻo ʻia ai i mua o ko ʻoukou Akua; ʻo wau nō Iēhova ko ʻoukou Akua.”

¹¹ ¶ A i ka lā iwakālua o ka lua o ka malama, i ka lua o ka makahiki, lei aʻela ke ao ma luna aku o ka halelewa o ke Kānāwai.

¹² A hele akula ka poʻe mamo a ʻIseraʻela mai loko aku o ka wao nahele ʻo Sinai; a kū mālie ihola ke ao ma ka wao nahele ʻo Parana.

¹³ ʻO ka mua kēia o ko lākou hele ʻana, e like me kā Iēhova kauoha ʻana mai ma ka lima o Mose.

¹⁴ Hele mua akula ka hae o ka poʻe hoʻomoana o nā mamo a Iuda, ma ko lākou poʻe kaua; a ʻo Nahesona ke keiki a ʻAminadaba, ʻo ia nō ma luna o kona poʻe kaua.

¹⁵ A ʻo Nataneʻela ke keiki a Zuara, ʻo ia nō ma luna o ka poʻe kaua o ka ʻohana mamo a ʻIsakara.

¹⁶ A ʻo ʻEliaba ke keiki a Helona, ʻo ia nō ma luna o ka poʻe kaua o ka ʻohana mamo a Zebuluna.

¹⁷ ¶ Ua wāwahi ʻia aʻe ka halelewa; a hele akula nā mamo a Geresona, a me nā mamo a Merari, e hali ana i ka halelewa.

¹⁸ A hele akula ka hae o ko Reubena poʻe hoʻomoana, ma ko lākou poʻe kaua; a ʻo ʻElizura ke keiki a Sedeura, ʻo ia nō ma luna o kona poʻe kaua.

¹⁹ A ʻo Selumiʻela ke keiki a Zurisadai, ʻo ia nō ma luna o ka poʻe kaua o ka ʻohana mamo a Simeona.

²⁰ A ʻo ʻEliasapa ke keiki a Deuʻela, ʻo ia ma luna o ka poʻe kaua o ka ʻohana mamo a Gada.

²¹ ¶ A hele akula kā Kohata, e hali ana i nā mea hoʻāno; a na kēlā poʻe i kūkulu aʻe i ka halelewa no ka wā i hiki aku ai lākou nei.

²² Hele akula hoʻi ka hae o ka poʻe hoʻomoana o nā mamo a ʻEperaima, ma ko lākou mau poʻe kaua; a ʻo ʻElisama ke keiki a ʻAmihuda, ʻo ia nō ma luna o kona poʻe kaua.

²³ A ʻo Gamaliʻela ke keiki a Pedazura, ʻo ia nō ma luna o ka poʻe kaua o ka ʻohana mamo a Manase.

²⁴ A ʻo ʻAbidana ke keiki a Gideoni, ʻo ia nō ma luna o ka poʻe kaua o ka ʻohana mamo a Beniamina.

²⁵ ¶ Hele akula hoʻi ka hae o ka poʻe hoʻomoana o nā mamo a Dana, ʻo ia nō ka hope o nā poʻe hoʻomoana a pau ma ko lākou poʻe kaua; a ʻo ʻAhiezera ke keiki a ʻAmisadai, ʻo ia ka luna o kona poʻe kaua.

²⁶ A ʻo Pagiʻela ke keiki a ʻOkerana, ʻo ia nō ma luna o ka poʻe kaua o ka ʻohana mamo a ʻAsera.

²⁷ Ma luna hoʻi o ka poʻe kaua o ka ʻohana mamo a Napetali, ʻo ʻAhira ke keiki a ʻEnana.

²⁸ Pēlā nā hele ʻana o nā mamo a ʻIseraʻela, ma ko lākou mau poʻe kaua, i ka wā i hele aku ai lākou.

²⁹ ¶ ʻŌlelo akula ʻo Mose iā Hobaba, i ke keiki kāne a Reuʻela ka Midiana, ka makuahōnōwai kāne o Mose, “Ke hele aku nei mākou i kahi a Iēhova i ʻī mai ai, ‘E hāʻawi ana au ia no ʻoukou.’ E hele pū ʻoe me mākou, a e hana aku mākou iā ʻoe i ka maikaʻi; no ka mea, ua ʻōlelo mai ʻo Iēhova i ka maikaʻi no kā ʻIseraʻela.”

³⁰ ʻĪ maila kēlā iā ia, “ʻAʻole au e hele, e hoʻi hou ana au i koʻu ʻāina iho, a i koʻu poʻe hoahānau.”

³¹ ʻĪ akula ia, “Ke noi aku nei au iā ʻoe, mai haʻalele ʻoe iā mākou; no ka mea, ua ʻike ʻoe e hoʻomoana iho ana mākou ma ka wao nahele, a e lilo mai ʻoe i maka no mākou.

³² “Eia hoʻi kekahi, a i hele pū ʻoe me mākou, he ʻoiaʻiʻo nō, ʻo ka maikaʻi a Iēhova e hana mai ai iā mākou, ʻo ia kā mākou e hana aku ai iā ʻoe.”

³³ ¶ Haele akula lākou i ʻekolu lā hele, mai ka mauna o Iēhova aku; a hele akula ka pahu berita o Iēhova i mua o lākou i ua mau lā lā i hele ai ʻekolu, e ʻimi ana i kahi e oʻioʻi ai lākou.

³⁴ Uhi ihola ke ao o Iēhova ma luna o lākou i ke ao i ko lākou hele ʻana aku ma waho o kahi hoʻomoana.

³⁵ ¶ Aia i ka hele ʻana aku o ka pahu i mua, a laila, ʻī akula ʻo Mose, “E kū aʻe ʻoe i luna, e Iēhova! A e hoʻopuehu ʻia aʻe kou poʻe ʻenemi; A e hoʻoʻauheʻe ʻia aku i mua ou ka poʻe inaina iā ʻoe.”

³⁶ A kū mālie iho ia, a laila, ʻī akula ia, “E hoʻi hou mai ʻoe, e Iēhova, I nā lehulehu o kā ʻIseraʻela.”