KA BUKE ʻAHĀ A MOSE, I KAPA ʻIA NĀ HELU 1 - Ka Baibala Hemolele

1 He kauoha iā Mose e helu i nā kānaka. 17 Ka helu ʻana i kēlā ʻohana kēia ʻohana. 48 ʻAʻole i helu ʻia ka ʻohana a Levi.

MOKUNA I.

¹ ¶ ʻŌlelo maila ʻo Iēhova iā Mose, ma ka wao nahele ʻo Sinai, i loko o ka halelewa o ke anaina i ka lā mua o ka lua o ka malama, i ka lua o ka makahiki ma hope iho o ko lākou hele ʻana mai, mai ka ʻāina ʻo ʻAigupita mai, ʻī maila,

² “E helu ʻolua i ke anaina kanaka a pau o nā mamo a ʻIseraʻela, ma ko lākou mau ʻohana, ma ko ka hale o ko lākou mau kūpuna, me ka helu ʻana i ko lākou inoa, ko nā kāne a pau ma ko lākou poʻo;

³ mai nā makahiki he iwakālua a ma laila aku, ʻo ka poʻe a pau i loko o kā ʻIseraʻela e pono ke hele i ke kaua; na ʻolua me ʻAʻarona lākou e helu ma ko lākou mau poʻe koa.

⁴ “A me ʻolua pū kekahi kanaka o kēlā ʻohana o kēia ʻohana; ʻo kēlā mea ʻo kēia mea o lākou ka luna no ka ʻohana o kona poʻe kūpuna.

⁵ “Eia hoʻi nā inoa o ka poʻe kānaka e kū pū me ʻolua: no kā Reubena, ʻo ʻElizura, ke keiki a Sedeura;

⁶ no kā Simeona, ʻo Selumiʻela, ke keiki a Zurisadai;

⁷ no kā Iuda, ʻo Nahesona, ke keiki a ʻAminadaba;

⁸ no kā ʻIsakara, ʻo Netaneʻela, ke keiki a Zuara;

⁹ no kā Zebuluna, ʻo ʻEliaba ke keiki a Helona;

¹⁰ no nā keiki a Iosepa: no kā ʻEperaima, ʻo ʻElisama, ke keiki a ʻAmihuda; no kā Manase, ʻo Gamaliʻela, ke keiki a Pedazura;

¹¹ no kā Beniamina, ʻo ʻAbidana, ke keiki a Gideoni;

¹² no kā Dana, ʻo ʻAhiezera, ke keiki a ʻAmisadai;

¹³ no kā ʻAsera, ʻo Pagiʻela, ke keiki a ʻOkerana;

¹⁴ no kā Gada, ʻo ʻEliasapa, ke keiki a Deuʻela;

¹⁵ no kā Napetali, ʻo ʻAhira, ke keiki a ʻEnana.”

¹⁶ ʻO lākou nei ka poʻe i koho ʻia no loko o ke anaina kanaka, nā aliʻi lākou o nā ʻohana a ko lākou mau kūpuna, nā luna hoʻi no nā tausani o kā ʻIseraʻela.

¹⁷ Lawe aʻela ʻo Mose lāua ʻo ʻAʻarona i kēia poʻe kānaka i hoʻohiki ʻia ma ko lākou mau inoa;

¹⁸ a hoʻoʻuluʻulu aʻela lākou i ke anaina kanaka a pau, i ka lā mua o ka lua o ka malama, a haʻi maila lākou i ko lākou kūʻauhau ma ko lākou mau ʻohana, ma ko ka hale o ko lākou mau kūpuna, ma ka helu ʻana i nā inoa, mai ka iwakālua o ko lākou mau makahiki a keu aku, ma ko lākou mau poʻo.

¹⁹ E like me kā Iēhova i kauoha mai ai iā Mose, pēlā nō ʻo ia i helu ai iā lākou ma ka wao nahele ʻo Sinai.

²⁰ ¶ A ʻo nā mamo a Reubena, a ka hiapo a ʻIseraʻela, ma ko lākou mau hanauna, ma muli o ko lākou mau ʻohana, ma ko ka hale o ko lākou mau kūpuna, e like me ka helu ʻana i nā inoa ma ko lākou mau poʻo; ʻo nā kāne a pau ma ka iwakālua o ka makahiki a keu aku, ʻo ka poʻe a pau i hiki ke hele i ke kaua,

²¹ ʻo ka poʻe o lākou i helu ʻia, no ka ʻohana a Reubena, he kanahākumamāono tausani, a me nā haneri keu ʻelima.

²² ¶ A ʻo nā mamo a Simeona, ma ko lākou mau hanauna, ma muli o ko lākou mau ʻohana, ma ko ka hale o ko lākou poʻe kūpuna, ʻo ka poʻe o lākou i helu ʻia ma ka huina o nā inoa, ma ko lākou mau poʻo, ʻo nā kāne a pau, mai ka iwakālua o ka makahiki a keu aku, ʻo ka poʻe a pau e hiki ke hele i ke kaua,

²³ ʻo ka poʻe o lākou i helu ʻia, ʻo ka ʻohana a Simeona, he kanalimakumamāiwa tausani a me nā haneri keu ʻekolu.

²⁴ ¶ ʻO nā mamo a Gada, ma ko lākou mau hanauna, ma muli o ko lākou mau ʻohana, ma ko ka hale o ko lākou poʻe kūpuna, e like me ka helu ʻana i nā inoa, mai ka iwakālua o ko lākou makahiki a keu aku, ʻo ka poʻe a pau e hiki ke hele i ke kaua,

²⁵ ʻo ka poʻe o lākou i helu ʻia, a ka ʻohana a Gada, he kanahākumamālima tausani, ʻaono haneri a me ke kanalima.

²⁶ ¶ ʻO nā mamo a Iuda, ma ko lākou mau hanauna, ma muli o ko lākou mau ʻohana, ma ko ka hale o ko lākou poʻe kūpuna, e like me ka huina o nā inoa, mai ka iwakālua o ka makahiki a keu aku, ʻo ka poʻe a pau e hiki ke hele i ke kaua,

²⁷ ʻo ka poʻe o lākou i helu ʻia, ʻo ka ʻohana a Iuda, he kanahikukumamāhā tausani, a me nā haneri keu ʻeono.

²⁸ ¶ ʻO nā keiki a ʻIsakara, me ko lākou mau hanauna, ma muli o ko lākou mau ʻohana, ma ko ka hale o ko lākou mau kūpuna, e like me ka helu ʻana i nā inoa, mai ka iwakālua o ka makahiki a keu aku, ʻo ka poʻe a pau e hiki ke hele i ke kaua,

²⁹ ʻo ka poʻe o lākou i helu ʻia, ʻo ka ʻohana a ʻIsakara, he kanalimakumamāhā tausani, a me nā haneri keu ʻehā.

³⁰ ¶ ʻO nā keiki a Zebuluna, ma ko lākou mau hanauna, ma muli o ko lākou mau ʻohana, ma ko ka hale o ko lākou poʻe kūpuna, e like me ka helu ʻana i nā inoa, mai ka iwakālua o ka makahiki a keu aku, ʻo ka poʻe a pau e hiki ke hele i ke kaua,

³¹ ʻo ka poʻe o lākou i helu ʻia, ʻo ka ʻohana a Zebuluna, he kanalimakumamahiku tausani, a me nā haneri keu ʻehā.

³² ¶ ʻO nā mamo a Iosepa, ʻo ia ʻo nā mamo a ʻEperaima, ma ko lākou mau hanauna, ma muli o ko lākou mau ʻohana, ma ko ka hale o ko lākou poʻe kūpuna, e like me ka helu ʻana i nā inoa, mai ka iwakālua o ka makahiki a keu aku, ʻo ka poʻe a pau e hiki ke hele i ke kaua,

³³ ʻo ka poʻe o lākou i helu ʻia, ʻo ka ʻohana a ʻEperaima, he kanahā tausani a me nā haneri keu ʻelima.

³⁴ ¶ ʻO nā mamo a Manase, ma ko lākou mau hanauna, ma muli o ko lākou mau ʻohana, ma ko ka hale o ko lākou poʻe kūpuna, e like me ka helu ʻana i nā inoa, mai ka iwakālua o ka makahiki a keu aku, ʻo ka poʻe a pau e hiki ke hele i ke kaua,

³⁵ ʻo ka poʻe o lākou i helu ʻia, ʻo ka ʻohana a Manase, he kanakolukumamālua tausani, a me nā haneri keu ʻelua.

³⁶ ¶ ʻO nā mamo a Beniamina, ma ko lākou mau hanauna, ma muli o ko lākou mau ʻohana, ma ko ka hale o ko lākou poʻe kūpuna, e like me ka helu ʻana i nā inoa, mai ka iwakālua o ka makahiki a keu aku, ʻo ka poʻe a pau e hiki ke hele i ke kaua,

³⁷ ʻo ka poʻe o lākou i helu ʻia, ʻo ka ʻohana a Beniamina, he kanakolukumamālima tausani a me nā haneri ʻehā.

³⁸ ¶ ʻO nā mamo a Dana, ma ko lākou mau hanauna, ma muli o ko lākou mau ʻohana, ma ka hale o ko lākou poʻe kūpuna, e like me ka helu ʻana i nā inoa, mai ka iwakālua o ka makahiki a keu aku, ʻo ka poʻe a pau e hiki ke hele i ke kaua,

³⁹ ʻo ka poʻe o lākou i helu ʻia, ʻo ka ʻohana a Dana, he kanaonokumamālua tausani, me nā haneri keu ʻehiku.

⁴⁰ ¶ ʻO nā mamo a ʻAsera, ma ko lākou mau hanauna, ma muli o ko lākou mau ʻohana, ma ko ka hale o ko lākou poʻe kūpuna, e like me ka helu ʻana o nā inoa, mai ka iwakālua o ka makahiki a keu aku, ʻo ka poʻe a pau e hiki ke hele i ke kaua,

⁴¹ ʻo ka poʻe o lākou i helu ʻia, ʻo ka ʻohana a ʻAsera, he kanahākumamākahi tausani, a me nā haneri keu ʻelima.

⁴² ¶ ʻO nā mamo a Napetali, ma ko lākou mau hanauna, ma muli o ko lākou mau ʻohana, ma ko ka hale o ko lākou poʻe kūpuna e like me ka helu ʻana i nā inoa, mai ka iwakālua o ka makahiki a keu aku, ʻo ka poʻe a pau e hiki ke hele i ke kaua,

⁴³ ʻo ka poʻe o lākou i helu ʻia, ʻo ka ʻohana a Napetali, he kanalimakumamākolu tausani, a me nā haneri keu ʻehā.

⁴⁴ ¶ ʻO lākou nei ka poʻe i helu ʻia, ka poʻe a Mose lāua ʻo ʻAʻarona i helu ai me nā luna o kā ʻIseraʻela, he ʻumikumamālua nā kānaka; ʻo kēlā mea kēia mea no ko ka hale o kona mau kūpuna.

⁴⁵ Pēlā i helu ʻia ai lākou a pau o nā mamo a ʻIseraʻela, ma ko ka hale o ko lākou poʻe kūpuna, mai ka iwakālua o ka makahiki a keu aku, ka poʻe a pau i loko o kā ʻIseraʻela e hiki ke hele i ke kaua,

⁴⁶ ʻo ka poʻe a pau i helu ʻia, ʻeono haneri a me kumamākolu tausani, ʻelima haneri a me ke kanalima.

⁴⁷ ¶ Akā, ʻo nā Levi, ma muli o ka ʻohana o ko lākou poʻe kūpuna, ʻaʻole i helu pū ʻia me lākou.

⁴⁸ No ka mea, ua ʻōlelo mai ʻo Iēhova iā Mose, penei,

⁴⁹ “Mai helu ʻoe i ka ʻohana a Levi, ʻaʻole hoʻi e hoʻokuʻi i ka huina o lākou me nā mamo a ʻIseraʻela.

⁵⁰ “Akā, e hoʻonoho ʻoe i nā Levi ma luna o ka halelewa o ke Kānāwai, a ma luna hoʻi o nā ipu a pau o loko, a ʻo nā mea a pau o ia wahi: e halihali lākou i ka halelewa, a me kāna mau ipu a pau; a e lawelawe lākou nāna, a e hoʻomoana lākou a puni ka halelewa.

⁵¹ “A i ka manawa e hele aku ai ka halelewa, a laila na nā Levi e wāwahi iho ia; a i ka manawa e kūkulu ʻia ai ka halelewa, na nā Levi ia e kūkulu; a ʻo ke kanaka ʻē ke hele mai a kokoke, e make ia.

⁵² “A e kūkulu hoʻi nā mamo a ʻIseraʻela i ko lākou mau halelewa; ʻo kēlā kanaka kēia kanaka ma kona wahi iho e hoʻomoana ai, ʻo kēlā kanaka kēia kanaka ma kona hae iho, i waena o ko lākou poʻe kaua.

⁵³ “Akā, ʻo nā Levi, e hoʻomoana lākou ma ka halelewa o ke Kānāwai a puni, i kau ʻole mai ai ka inaina ma luna iho o ke anaina kanaka o nā mamo a ʻIseraʻela; a na nā Levi e mālama i ka ʻoihana o ka halelewa o ke Kānāwai.”

⁵⁴ A hana ihola nā mamo a ʻIseraʻela e like me nā mea a pau a Iēhova i kauoha mai ai iā Mose, pēlā lākou i hana ai.