NAHUMA 3 - Ka Baibala Hemolele

1 Hoʻohewa a me ka hoʻopaʻi iā Nineva. 8 ʻO ka luku ʻana o No i ʻAigupita, ka mea e aʻo aku iā Nineva e manaʻo i ka luku like ʻana. 11 Wānana hou no kona luku, ʻaʻole mea e pakele ai.

MOKUNA III.

¹ ¶ Auē ke kūlanakauhale koko! Ua piha ʻo ia a pau i ka wahaheʻe, a me ka pōā; ʻAʻole e lawe ʻia aku ke pio;

² ʻO ka pohā o ka huipa, A ʻo ka halulu o ke kaʻa ʻana o nā kaʻa, A ʻo ka holo ʻana o nā lio, A ʻo ka lele ʻana o nā hale kaʻa.

³ Kaʻikaʻi aʻe ka hoʻoholo lio I ka pahi kaua wakawaka a me ka ihe huali; A he nui ka poʻe i pepehi ʻia, a he nui nā kupapaʻu; ʻAʻohe hope o nā heana, A hina lākou ma luna o ko lākou mau heana.

⁴ No ka nui o nā moekolohe ʻana o ka wahine maikaʻi hoʻokamakama, Nona nā ʻanāʻanā, Ka mea kūʻai i nā lāhui kanaka ma kona moekolohe ʻana, A me nā ʻohana, ma kona mau ʻanāʻanā ʻana.

⁵ “Aia hoʻi, ua makaʻē aku au iā ʻoe,” wahi a Iēhova o nā kaua; “A e huli aʻe au i kou kapa ma luna o kou maka, A e hōʻike aku au i kou ʻōlohelohe ʻana i nā lāhui kanaka, A i kou hilahila i nā aupuni.

⁶ “A e hoʻolei aku au ma luna ou i nā mea haumia, A e hoʻolilo au iā ʻoe i mea e manaʻo ʻole ʻia, A e hoʻokū au iā ʻoe i mea e mākaʻikaʻi ʻia.

⁷ “A ʻo nā mea a pau e nānā aku iā ʻoe, Holo nō lākou mai ou aku lā, me ka ʻī ʻana aku, ‘Ua luku ʻia ʻo Nineva! ʻO wai lā ka mea e auē iā ia?’ A ma hea lā wau e ʻimi aku ai i nā mea hōʻoluʻolu nou?”

⁸ ¶ Ua ʻoi anei kou maikaʻi ma mua o ko No ʻAmona, Ka mea e noho ana ma ka Muliwai, Ua hoʻopuni ʻia ʻo ia e nā wai, ʻO ke kai kona pākū, A ʻo kona pā pōhaku mai ke kai mai ia?

⁹ ʻO ʻAitiopa kona ikaika A me ʻAigupita, ʻaʻohe helu ʻia; ʻO Puta a me Lubima kou mau mea kōkua.

¹⁰ Akā, ua lawe ʻia aku ʻo ia, Ua hele pio aku ia; A ua ʻulupā ʻia kāna mau keiki liʻiliʻi Ma ke poʻo o nā alanui a pau; A hailona lākou no kona poʻe kānaka hanohano, A ua hoʻopaʻa ʻia kona mau kānaka nui a pau i nā kaula hao.

¹¹ A e ʻona nō hoʻi ʻoe, A e hūnā ʻia ʻoe; A e ʻimi nō ʻoe i ka ikaika no ka poʻe ʻenemi.

¹² A e like kou mau wahi paʻa me ka lāʻau fiku, me ka hua pala mua, Inā e hoʻoluli ʻia, e hāʻule iho lākou i loko o ka waha o ka mea e ʻai ana.

¹³ Aia hoʻi, ʻo kou poʻe kānaka i waena ou, ua like me nā wāhine; A e hoʻohāmama loa ʻia nā puka pā o kou ʻāina i kou poʻe ʻenemi; A e hoʻopau ke ahi i kou mau kaola.

¹⁴ E huki wai aʻe nou, no ka pōpilikia, E hoʻopaʻa ʻoe i kou mau wahi paʻa; E komo ʻoe i loko o ka lepo, a e hehi iho i ka lepo kāwili, A e hoʻopaʻa i kahi puhi pōhaku ʻula.

¹⁵ Ma laila e hoʻopau ai ke ahi iā ʻoe; E ʻoki mai ka pahi kaua iā ʻoe, E ʻai iho nō ia iā ʻoe, e like me ka ʻūhini huluhulu; E hoʻomāhuahua iā ʻoe iho e like me ka ʻūhini huluhulu; Hoʻonui iā ʻoe iho e like me ka ʻūhini nui.

¹⁶ Ua hoʻonui ʻoe i kou poʻe kālepa ma mua o nā hōkū o ka lani; Hoʻopālahalaha aku ka ʻūhini huluhulu, a lele akula.

¹⁷ Ua like kou poʻe aliʻi me nā ʻūhini, A ʻo kou poʻe luna koa e like me nā ʻūhini nui loa, Ka mea e kau ana ma ka pā pōhaku i ka lā anu, A puka mai ka lā, lele aku lākou, ʻAʻole i ʻike ʻia ko lākou wahi.

¹⁸ Ke hiamoe nei kou poʻe kahu hipa, e ke aliʻi o ʻAsuria; E noho iho kou poʻe aliʻi; Ua hoʻopuehu ʻia kou poʻe kānaka ma nā mauna, ʻAʻohe mea nāna lākou e hoʻākoakoa mai.

¹⁹ ʻAʻohe mea hoʻōla i kou ʻeha ʻana; Ua nui kou ʻeha; ʻO ka poʻe a pau e lohe i kou lono, E paʻipaʻi lākou i ko lākou lima ma luna ou; No ka mea, ma luna o wai anei i hele mau ʻole aku ai kou hewa?