NAHUMA 1 - Ka Baibala Hemolele

1 No ka inaina o ke Akua i kona poʻe ʻenemi. 7 Ke aloha o ke Akua i kona poʻe kānaka; a huhū i nā ʻenemi. 9 He wānana no ka luku ʻana i ke aliʻi o ʻAsuria, a me kona poʻe kaua, a me ka hauʻoli ʻana o nā Iudaio.

MOKUNA I.

¹ ¶ Ka ʻōlelo no Nineva. ʻO ka buke o ka wānana a Nahuma, no ʻElekosa,

² ¶ Ua lili ke Akua, a ʻo Iēhova ka mea hoʻopaʻi, ʻO Iēhova ka Mea hoʻopaʻi, a he huhū kona; ʻO Iēhova ka Mea hoʻopaʻi i kona poʻe kūʻē, A ʻo ia ke mālama i ka huhū no kona poʻe ʻenemi.

³ Ua hoʻokaʻulua ʻo Iēhova i ka huhū, a he nui ka mana, ʻAʻole loa ia e kala wale aku; Aia nō ke ala o Iēhova, i loko o ka puahiohio, a me ka ʻino, A ʻo nā ao ka lepo o kona mau wāwae.

⁴ Pāpā aku nō ia i ke kai, a hoʻomaloʻo ihola ia mea, A hoʻomaloʻo iho i nā muliwai a pau; Ua mae ʻo Basana, a me Karemela; A ua mae ka pua o Lebanona.

⁵ Ua hoʻonaue ʻia nā mauna e ia, A ua heʻe ihola nā puʻu; Neʻeneʻe ka ʻāina iā ia iho mai kona alo aʻe, A ʻo ka honua, a me nā mea a pau e noho ana i loko.

⁶ ʻO wai lā ka mea e kū i mua o kona inaina? ʻO wai lā ka mea e kū mai i ka wela o kona huhū? Ua ninini ʻia kona huhū me he ahi lā, Ua hiolo iho nā pōhaku ma ona lā.

⁷ Ua maikaʻi ʻo Iēhova, He pākū ʻo ia i ka lā pōpilikia; A ua ʻike nō ia i ka poʻe hilinaʻi iā ia.

⁸ Me ka wai nui e holo ana, A hoʻōki loa aku ia i kona wahi, A e hahai ka pouli i kona poʻe ʻenemi.

⁹ ¶ He aha ko ʻoukou manaʻo kūʻē iā Iēhova? E hoʻōki loa aku ia, ʻAʻole e hiki pālua mai ka pōpilikia.

¹⁰ No ka mea, e like me nā lāʻau kukū, Ua hui pū ʻia lākou, A ua ʻona lākou e like me ka poʻe ʻona, E hoʻopau ʻia lākou e like me ka ʻōpala maloʻo loa.

¹¹ Ua puka mai ka mea mai ou mai lā E manaʻo hewa ana iā Iēhova; He kākāʻōlelo hewa.

¹² Pēnēia i ʻōlelo mai ʻo Iēhova, “Inā ua maluhia lākou, a nui hoʻi, A e hōʻoki ʻia lākou pēlā, a e hele aʻela ia; A ua hoʻohaʻahaʻa aku au iā ʻoe, ʻAʻole naʻe au e hoʻohaʻahaʻa hou aku iā ʻoe.

¹³ “ʻĀnō hoʻi, e hemo iaʻu kāna ʻauamo mai ou aku lā; A e moku iaʻu kou mau kaula.”

¹⁴ ¶ A ua kauoha mai ʻo Iēhova nou, “ʻAʻole e lūlū hou ʻia kou inoa; Mai loko mai o ka hale o kou mau akua, E ʻoki aku au i ke kiʻi kālai, a me ke kiʻi hoʻoheheʻe; E hana iho au i kou hale kupapaʻu; No ka mea, ua hoʻowahāwahā ʻia ʻoe.”

¹⁵ ¶ Aia hoʻi, ma luna o nā mauna nā wāwae o ka mea e haʻi ana i ka mea maikaʻi, E hōʻike ana hoʻi i ka malu! E Iuda, e mālama i kāu mau ʻahaʻaina; E hoʻokō i kāu mau hoʻohiki ʻana; No ka mea, ʻaʻole e hele hou ka mea ʻaiā ma ou lā, Ua ʻoki loa ʻia aku ʻo ia.