KA ʻEUANELIO I KĀKAU ʻIA AI E MAREKO 8 - Ka Baibala Hemolele

1 400 0 kānaka i hānai ʻia. 11 No nā Parisaio. 22 Hoʻōla ʻia ka makapō. 27 Kamaʻilio Iesū me nā haumāna. 36 Ke kūʻai i ka ʻuhane.

MOKUNA VIII.

¹ ¶ Ia mau lā nō, he ʻaha kanaka nui loa, ʻaʻole naʻe a lākou mea e pāʻina ai, kāhea maila Iesū i kāna mau haumāna, ʻī maila iā lākou,

² “Ke aloha aku nei au i ka ʻaha kanaka; no ka mea, ua noho pū iho nei lākou me aʻu, i nā lā ʻekolu, ʻaʻole hoʻi a lākou mea e pāʻina ai.

³ “Inā e hoʻokuʻu aku au iā lākou i ko lākou hale me ka pōloli, e māʻuleʻule nō lākou ma ke alanui; no ka mea, mai kahi lōʻihi ka hele ʻana mai o kekahi poʻe o lākou.”

⁴ ʻĪ akula kāna poʻe haumāna iā ia, “No hea lā e hiki ai i kekahi ke hoʻomāʻona ai iā lākou nei i loko o ka wao nahele?”

⁵ Nīnau maila ʻo ia iā lākou, “ʻEhia nā pōpō berena a ʻoukou?” ʻĪ maila lākou, “ʻEhiku.”

⁶ Kauoha maila ia i kānaka e noho i lalo ma ka lepo. Lawe aʻela ia i nā pōpō berena ʻehiku, hoʻomaikaʻi akula, wāwahi ihola, hāʻawi mai ia i kāna poʻe haumāna, e kau aku i mua o ka ʻaha kanaka; a kau akula lākou.

⁷ He mau wahi iʻa liʻiliʻi nō hoʻi kekahi a lākou; hoʻomaikaʻi akula ia, a kauoha maila, e kau aku nō hoʻi ia mau mea.

⁸ ʻAi ihola lākou a māʻona, a hōʻiliʻili ihola lākou i ke koena ʻai, ʻehiku hīnaʻi i piha.

⁹ A ʻo ka poʻe i ʻai, ʻehā tausani lākou; a hoʻokuʻu akula ʻo ia iā lākou.

¹⁰ A laila, eʻe pū akula ia me kāna poʻe haumāna i luna o ka moku, a holo aʻela i nā mokuna o Dalamanuta.

¹¹ ¶ Hele maila ka poʻe Parisaio, a hoʻomaka e ninaninau mai iā ia, me ka ʻimi i hōʻailona āna, mai ka lani mai, i hoʻāʻo ai lākou iā ia.

¹² Uē nui ihola ia i loko o kona naʻau, ʻī aʻela, “No ke aha lā kēia hanauna e ʻimi mai nei i hōʻailona? ʻOiaʻiʻo ke haʻi aku nei au iā ʻoukou, ʻAʻole e hāʻawi ʻia aku ka hōʻailona no kēia hanauna.”

¹³ Haʻalele ihola ʻo ia iā lākou, eʻe hou akula ma luna o ka moku, a holo akula i kēlā kapa.

¹⁴ ¶ Ua poina iā lākou ke lawe pū i ka berena, hoʻokahi wale nō pōpō berena a lākou i loko o ka moku.

¹⁵ Kauoha maila ʻo ia iā lākou, ʻī maila, “E ao ʻoukou e makaʻala; no ka mea hū a ka poʻe Parisaio, a me ka mea hū o Herode.”

¹⁶ ʻŌhumu malū ihola lākou iā lākou iho nō, ʻī aʻela, “No ko kākou berena ʻole paha”.

¹⁷ Ua ʻike nō ʻo Iesū, a ʻī maila ʻo ia iā lākou, “No ke aha lā ʻoukou i ʻōhumu ai i ko ʻoukou berena ʻole? ʻAʻole anei ʻoukou i noʻonoʻo? ʻAʻole anei i ʻike? Ua paʻakikī anei ko ʻoukou naʻau?

¹⁸ “«He mau maka nō ko ʻoukou, ʻaʻole anei ʻoukou i ʻike? He mau pepeiao nō ko ʻoukou, ʻaʻole anei ʻoukou i lohe»? ʻAʻole anei ʻoukou i hoʻomanaʻo?

¹⁹ “I kuʻu wāwahi ʻana i nā pōpō berena ʻelima, na nā tausani ʻelima, ʻehia lā nā hīnaʻi i piha i ke koena ʻai a ʻoukou i hōʻiliʻili ai?” Haʻi akula lākou iā ia, “He ʻumikumamālua.”

²⁰ A i nā hiku na nā tausani ʻehā, ʻehia lā nā hīnaʻi i piha i ke koena ʻai a ʻoukou i hōʻiliʻili ai? Haʻi akula lākou iā ia, “ʻEhiku.”

²¹ A ʻōlelo maila ia iā lākou, “Pehea lā hoʻi i hoʻomaopopo ʻole mai ai ʻoukou?”

²² ¶ Hele maila ia i Betesaida, a laila, halihali aʻela lākou i kekahi kanaka makapō i ona lā, nonoi akula iā ia, e hoʻopā mai iā ia.

²³ Lālau ihola ia i ka lima o ke kanaka makapō, alakaʻi akula iā ia, mai ke kauhale aku; kuha maila ia i kona mau maka, hoʻopā maila kona lima iā ia, nīnau maila i kona ʻike ʻana i kekahi mea.

²⁴ Nānā aʻela ia i luna, ʻī akula. “Ke ʻike nei au i kānaka, me he mau lāʻau lā e hele ana.”

²⁵ Ma hope iho, kau hou maila ia i kona lima ma nā maka ona, a hoʻonānā hou akula iā ia i luna; a ola aʻela ia, a ʻike maopopo ihola i kēlā kanaka i kēia kanaka.

²⁶ Hoʻihoʻi aʻela ʻo Iesū iā ia i kona hale, ʻī aʻela, “Mai hele aku i ke kauhale, mai haʻi aku i ko ke kauhale.”

²⁷ ¶ Hele akula Iesū, a me kāna poʻe haumāna i nā kauhale o Kaisareia Pilipi; nīnau aʻela ia i kāna poʻe haumāna ma ke alaloa, i ka ʻī ʻana, “ʻO wai lā wau i kā kānaka ʻōlelo?”

²⁸ ʻĪ akula lākou, “ʻO Ioane Bapetite; a ʻo ʻElia i kā kekahi; a ʻo kekahi o nā kāula i kā kekahi.”

²⁹ Nīnau maila ʻo ia iā lākou, “ʻO wai lā hoʻi au i kā ʻoukou ʻōlelo?” Haʻi akula ʻo Petero, ʻī akula iā ia, “ʻO ka Mesia nō ʻoe.”

³⁰ Pāpā maila ʻo ia iā lākou, mai haʻi aku iā ia i kekahi kanaka.

³¹ ¶ I laila kāna hoʻomaka ʻana e hōʻike mai iā lākou e hoʻomāinoino nui ʻia ke Keiki a ke Kanaka, a e hōʻole ʻia e ka poʻe kahiko, a me ka poʻe kāhuna nui, a me ka poʻe kākau ʻōlelo, a e pepehi ʻia ʻo ia, a pō ʻakolu aʻe e ala hou mai.

³² Haʻi maopopo maila ʻo ia ia ʻōlelo; a laila, lālau aʻela ʻo Petero iā ia, a hoʻomaka e pāpā akula iā ia.

³³ Hāliu aʻela Iesū, nānā aʻela i kāna mau haumāna, pāpā aʻela iā Petero, ʻī aʻela, “E hele ʻoe pēlā ma hope oʻu, e Sātana; no ka mea, ʻaʻole i like kou manaʻo me ko ke Akua; akā, me ko nā kānaka.”

³⁴ A kāhea maila ia i kānaka, a i kāna poʻe haumāna nō hoʻi, ʻī maila iā lākou, “ʻO ka mea makemake e hahai mai ma hope oʻu, e hōʻole ʻo ia iā ia iho, a e kaʻikaʻi i kona keʻa, a e hahai mai iaʻu.

³⁵ “ʻO ka mea manaʻo e mālama i kona ola nei, e lilo auaneʻi kona ola, a ʻo ka mea haʻalele i kona ola noʻu nei, a no ka ʻeuanelio, e loaʻa iā ia ke ola.

³⁶ “He aha lā uaneʻi ko ke kanaka pōmaikaʻi ke loaʻa iā ia ke ao nei a pau, a lilo aku kona ʻuhane?

³⁷ “He aha lā hoʻi ko ke kanaka kumu e hāʻawi aku ai, e loaʻa hou mai ai kona ʻuhane?

³⁸ “ʻO ka mea e hilahila mai iaʻu a me kaʻu ʻōlelo, i kēia hanauna kolohe a hana hewa, e hilahila nō hoʻi ke Keiki a ke Kanaka iā ia i kona wā e hele mai ai me ka nani o kona Makua, me nā ʻānela hemolele.”