KA ʻEUANELIO I KĀKAU ʻIA AI E MAREKO 6 - Ka Baibala Hemolele

1 Hoʻowahāwahā ʻia ʻo Iesū. 7 Hoʻouna ʻia nā haumāna. 14 Ka make ʻana o Ioane. 34 Hānai ʻia 5000. 47 Hoʻomālielie ʻia ka moana wai.

MOKUNA VI.

¹ ¶ Haʻalele ihola ia i kēlā wahi, a hele i kona ʻāina iho; a hahai akula kāna poʻe haumāna iā ia.

² A hiki i ka lā Sābati, hoʻomaka ia e aʻo mai i loko o ka hale hālāwai; a nui loa ka poʻe i lohe, a kāhāhā ka naʻau, ʻī aʻela, “No hea lā ia mau mea a ia nei? He aha hoʻi kēia akamai i hāʻawi ʻia aʻe nāna, a me kēia hana mana i hana ʻia ai e kona mau lima?

³ “ʻAʻole anei kēia ʻo ke kamanā, ʻo ke keiki a Maria, ka hoahānau o Iakobo, a me Iose, a me Iuda, a me Simona? ʻAʻole anei kona mau kaikuāhine ma ʻaneʻi me kākou?” Kuʻia ihola lākou iā ia.

⁴ ʻĪ maila Iesū iā lākou, “ʻAʻohe kāula i mahalo ʻole ʻia ma kahi ʻē, aia ma kona ʻāina iho nō, a i kona hanauna, a i kona hale.”

⁵ ʻAʻole ia i hiki ke hana i nā hana mana i laila, he mau mea maʻi wale nō naʻe kāna i hoʻōla ai, i ke kau ʻana o kona mau lima i luna iho o lākou.

⁶ A kāhāhā ihola ia no ko lākou hoʻomaloka ʻana; hele aʻela ia i nā kauhale, e aʻo ana iā lākou.

⁷ ¶ A laila hōʻuluʻulu maila ia i ka poʻe ʻumikumamālua, a hoʻomaka e hoʻouna pāpālua aʻela iā lākou, a hāʻawi maila i ka mana na lākou ma luna iho o nā ʻuhane ʻino.

⁸ Pāpā maila ʻo ia iā lākou, mai lawe ʻoukou i kekahi mea no ka hele ʻana, i koʻokoʻo wale nō, ʻaʻohe pūʻolo, ʻaʻohe berena, ʻaʻohe kālā i loko o ka hīpuʻu.

⁹ E hāwele i nā kāmaʻa, “ʻAʻole hoʻi e pāpālua ke kapa komo.”

¹⁰ ʻĪ maila ʻo ia iā lākou, “A i nā wahi a pau loa a ʻoukou e komo ai i loko o ka hale, e noho iho ʻoukou ma laila, a hiki i ka wā e haʻalele ai ʻoukou ia wahi.

¹¹ “A ʻo ka mea hoʻokipa ʻole mai iā ʻoukou, ʻaʻole hoʻi e hoʻolohe mai i kā ʻoukou, a i ko ʻoukou hele ʻana aku, e lūlū i ka lepo ma lalo o ko ʻoukou mau wāwae, i mea hōʻike no lākou. ʻOiaʻiʻo ke ʻōlelo aku nei au iā ʻoukou, i ka lā hoʻopaʻi, e aho nō ka make ʻana o ko Sodoma a me Gomora, i ko ia kūlanakauhale.”

¹² Hele aʻela lākou i waho, aʻo akula i kānaka, e mihi lākou.

¹³ Mahiki akula lākou i nā daimonio he nui, a hamo aʻe lākou me ka ʻaila i kānaka maʻi he nui loa, a hoʻōla aʻela iā lākou.

¹⁴ ¶ A lohe aʻela ʻo Herode, ke aliʻi; (no ka mea, ua kaulana aku ko Iesū inoa,) ʻī aʻela ia, “Ua ala hou mai nei ʻo Ioane Bapetite, mai waena mai o ka poʻe make, no ia mea, ua hōʻike ʻia nā hana mana, ma ona lā.”

¹⁵ ʻŌlelo aʻela kekahi poʻe, “ʻO ʻElia kēia.” A ʻōlelo aʻela kekahi poʻe, “He kāula ia, a he mea like me kekahi o ka poʻe kāula.”

¹⁶ Lohe aʻela ʻo Herode, ʻī aʻela ia, “ʻO Ioane kēia, nona ke poʻo aʻu i ʻoki ai; ua ola hou mai ia, mai waena mai o ka poʻe make!”

¹⁷ No ka mea, ua hoʻouna aku ʻo Herode, a hopu iā Ioane, a hoʻopaʻa iā ia i loko o ka hale paʻahao, no Herodia, no ka wahine a Pilipo, a kona kaikaina; no ka mea, ua mare ʻo Herode me ia.

¹⁸ A ua ʻōlelo aku ʻo Ioane iā ia, “ʻAʻole pono kou lawe ʻana i ka wahine a kou kaikaina.”

¹⁹ No ia mea i ukiuki ai ʻo Herodia iā ia, manaʻo ihola nō hoʻi e pepehi iā ia, ʻaʻole naʻe i hiki;

²⁰ no ka mea, ua makaʻu ʻo Herode iā Ioane, ua ʻike ia, he kanaka pono ʻo ia, a me ka hemolele, a mālama nō ʻo Herode iā ia, a hoʻolohe nō i kāna, a nui nā mea āna i hana ai me ka hoʻolohe ʻoluʻolu iā ia.

²¹ A hiki mai ka lā maopopo a Herode i hoʻomākaukau ai i ʻahaʻaina hānau no kāna mau aliʻi, a me nā luna tausani, a no nā mea koʻikoʻi o Galilaia;

²² a laila, komo aʻela ke kaikamahine a Herodia, a haʻa ihola ia, a ʻoliʻoli ʻo Herode iā ia, a me ka poʻe e noho pū ana me ia; a laila, ʻōlelo maila ke aliʻi i ua kaikamahine lā, “E noi mai ʻoe iaʻu i kāu mea e makemake ai, a e hāʻawi aku nō wau iā ʻoe.”

²³ Hoʻohiki akula ʻo ia iā ia, “ʻO ka mea āu e noi mai ai iaʻu, naʻu ia e hāʻawi aku iā ʻoe, a hiki i ka hapalua o ke aupuni oʻu.”

²⁴ Hele akula ia i waho, ʻī akula i kona makuahine, “He aha lā uaneʻi kaʻu mea e noi aku ai?” ʻŌlelo maila ia, “ʻO ke poʻo o Ioane Bapetite.”

²⁵ A hele wikiwiki aʻela ia i ke aliʻi, nonoi aʻela, ʻī aʻe, “Makemake au e hāʻawi koke mai ʻoe iaʻu i ke poʻo o Ioane Bapetite, ma luna o kekahi pā.”

²⁶ Minamina loa ihola ke aliʻi; akā, no kona hoʻohiki ʻē ʻana, a no ka poʻe e noho pū ana me ia, i manaʻo ʻole ai ia e hōʻole aku iā ia.

²⁷ Kēnā koke aʻela ke aliʻi i kekahi ilāmuku, ʻōlelo aʻela e lawe ʻia mai kona poʻo. Hele akula ia, a ʻoki aʻela i kona poʻo i loko o ka hale paʻahao;

²⁸ a lawe maila ia i ke poʻo, i luna o ke pā, a hāʻawi maila i ua kaikamahine lā, a hāʻawi aʻela hoʻi ke kaikamahine i kona makuahine.

²⁹ Lohe ihola kāna poʻe haumāna, hele maila lākou, a lawe akula i ke kino, a waiho ihola i loko o ka hale kupapaʻu.

³⁰ ¶ ʻĀkoakoa ihola ka poʻe lunaʻōlelo i o Iesū lā, haʻi akula iā ia i nā mea a pau, ʻo nā mea hoʻi a lākou i hana ai, a me nā mea a lākou i aʻo aku ai.

³¹ ʻĪ maila ʻo ia iā lākou, “E hele kaʻawale mai ʻoukou, a i kahi mehameha, ʻo ʻoukou wale nō, a e hoʻomaha iki.” No ka mea, ua nui loa ka poʻe i hele mai, a i hele aku, no ia mea, ʻaʻole o lākou wā kaʻawale, e ʻai ai i ka ʻai.

³² Holo kaʻawale akula lākou ma ka moku, a i kahi mehameha.

³³ ʻIke aʻela nā kānaka i ko lākou holo ʻana, a he nui nō hoʻi nā mea i hoʻomaopopo iā ia, holo wāwae akula lākou mai nā kūlanakauhale aku, a hiki mua akula lākou a ʻākoakoa ihola i ona lā.

³⁴ A hele aʻela Iesū i waho, ʻike maila ia i ka ʻaha kanaka he nui loa, haʻehaʻe ihola kona aloha iā lākou; no ka mea, ua like lākou me nā hipa kahu ʻole, a hoʻomaka ia e aʻo mai iā lākou i nā mea he nui.

³⁵ I ke kokoke ʻana e pō ka lā, hele akula kāna poʻe haumāna i ona lā, ʻī akula, “He wahi wao nahele kēia, a kokoke e pō ka lā;

³⁶ e hoʻokuʻu aku ʻoe iā lākou, e hele lākou ma kahi mahina ʻai, a ma nā kūlanakauhale, e kūʻai i berena na lākou; no ka mea, ʻaʻole a lākou mea e pāʻina ai.”

³⁷ ʻŌlelo maila ʻo ia iā lākou, “E hāʻawi aku ʻoukou i ʻai na lākou!” ʻĪ akula lākou iā ia, “E hele anei mākou e kūʻai lilo aku i ʻelua haneri denari, i mea e loaʻa mai ai ka berena e hāʻawi aku iā lākou e ʻai?”

³⁸ Nīnau maila ʻo ia iā lākou, “ʻEhia nā pōpō berena a ʻoukou? E hele e nana!” A ʻike lākou, haʻi akula, “ʻElima a me nā iʻa ʻelua.”

³⁹ Kēnā maila ʻo ia iā lākou, e hoʻonoho papa i kānaka a pau i lalo ma ka weuweu.

⁴⁰ Noho papa ihola lākou, ma nā pāhaneri, a ma nā pākanalima.

⁴¹ Lālau aʻela ia i nā pōpō berena ʻelima, a me nā iʻa ʻelua, a laila nānā akula ia i luna i ka lani, hoʻomaikaʻi akula, wāwahi ihola i nā pōpō berena, hāʻawi maila i kāna mau haumāna, e kau aʻe i mua o nā kānaka; a puʻunaue aʻela ia i nā iʻa ʻelua na lākou a pau.

⁴² ʻAi ihola lākou a pau, a māʻona.

⁴³ Hōʻiliʻili ihola lākou i ke koena ʻai, a me ko ka iʻa, a piha aʻela nā hīnaʻi he ʻumikumamālua.

⁴⁴ ʻO ka poʻe i ʻai i nā pōpō berena, ʻelima tausani kānaka lākou.

⁴⁵ ¶ A hoʻolale mai Iesū i kāna mau haumāna, e eʻe lākou i luna o ka moku, e holo mua i kēlā kapa, i Betesaida, a hoʻokuʻu aku ia i ka ʻaha kanaka.

⁴⁶ A pau kāna hoʻihoʻi ʻana aku iā lākou, hele akula ia i ka mauna e pule.

⁴⁷ A pō aʻela, i waena o ka moana wai ua moku lā, a ma uka nō kēlā, ʻo ia hoʻokahi nō.

⁴⁸ ʻIke aʻe ʻo ia iā lākou e hoʻoikaika ana ma ka hoe; no ka mea, ua pākuʻi mai ka makani ma mua o lākou; a hiki aʻela i ka hā o ka wati o ka pō, hele maila ia i o lākou lā, e hele ana ma luna o ka moana wai, a manaʻo ihola ia e māʻalo aʻe, ma ʻō aʻe o lākou.

⁴⁹ ʻIke aʻela lākou iā ia i ka hele ʻana ma luna iho o ka moana wai, manaʻo ihola lākou he ʻuhane, a hoʻōho nui akula;

⁵⁰ no ka mea, ʻike aʻela lākou a pau iā ia, weliweli ihola: ʻōlelo koke aʻela ʻo ia iā lākou, ʻī aʻela, “E hoʻolana ʻoukou; ʻo wau nō kēia, mai makaʻu.”

⁵¹ Piʻi akula ia i luna o ka moku i o lākou lā, mālie iho ka makani; kāhāhā nui loa ihola ko lākou naʻau, mahalo aʻela.

⁵² ʻAʻole lākou i hoʻomanaʻo i nā pōpō berena; no ka mea, ua paʻakikī ko lākou naʻau.

⁵³ ¶ Holo pū akula lākou a hiki aku i ka ʻāina i Genesareta, a pae aʻela.

⁵⁴ A i ko lākou haʻalele ʻana i ka moku, hoʻomaopopo koke ihola nā kānaka iā ia.

⁵⁵ Holo lākou ma ia ʻāina a puni, a hoʻomaka e halihali ma nā wahi moe i ka poʻe maʻi i nā wahi a lākou i lohe ai, e noho ana ʻo Iesū.

⁵⁶ Ma nā wahi a pau loa i komo aku ai ia i nā kauhale, a i nā kūlanakauhale, a i kuaʻāina, ma laila lākou i waiho ai i ka poʻe maʻi, ma nā alanui, a nonoi akula iā ia, i hoʻopā aku ai lākou i ke kihi wale nō o kona ʻaʻahu; a ʻo ka poʻe i hoʻopā aku iā ia, ola aʻela lākou.