KA ʻEUANELIO I KĀKAU ʻIA AI E MAREKO 5 - Ka Baibala Hemolele

1 Ka mahiki ʻana i nā daimonio. 21 Ke ola ʻana o ka maʻi heʻe koko, a me ke ola ʻana o ke kaikamahine make.

MOKUNA V.

¹ ¶ A laila, holo aʻela lākou i kēlā kapa o ka moana wai i ka ʻāina o Gadara.

² I kona lele ʻana aʻe, mai ka moku aʻe, hālāwai koke me ia kekahi kanaka i uluhia e ka ʻuhane ʻino, no nā ilina mai.

³ Ma nā ilina nō kona wahi e noho ai, ʻaʻole me nā kaula hao e hiki ai ke hoʻopaʻa iā ia a paʻa.

⁴ Ua hoʻopaʻa pinepine ʻia ʻo ia i ke kūpeʻe ʻana a me nā kaula hao, a moku ʻia nā kaula hao e ia, a hakihaki ʻia nō hoʻi nā kūpeʻe, ʻaʻole nō i hiki i kekahi ke hoʻolakalaka iā ia.

⁵ Mau loa nō ia i ka pō a me ke ao ma nā kuahiwi, a ma nā ilina e uwalaʻau ana, a e ʻokiʻoki ana iā ia iho nō i nā pōhaku.

⁶ I kona ʻike ʻana iā Iesū ma kahi mamao aku, holo aʻela ia a moe ihola i mua ona;

⁷ kāhea aʻela ia me ka leo nui, ʻī aʻela, “He aha kāu iaʻu, e Iesū, e ke Keiki a ke Akua Kiʻekiʻe Loa? Ke pāpā aku nei au iā ʻoe ma ke Akua, mai hoʻomāinoino mai iaʻu!”

⁸ No ka mea, ua ʻōlelo ʻē aku Iesū iā ia, “E ka ʻuhane ʻino, e hele aku ʻoe pēlā i waho o ia kanaka!”

⁹ Nīnau akula Iesū iā ia, “ʻO wai lā kou inoa?” Haʻi mai kēlā, ʻī maila, “ʻO Legeona koʻu inoa; no ka mea, ua nui loa mākou.”

¹⁰ Nonoi nui aʻela kēlā iā ia, i kipaku ʻole ʻo ia iā lākou, mai loko aku o ia ʻāina.

¹¹ Ma ia wahi aku, ma ka puʻu, he nui ka poʻe puaʻa e ʻai ana.

¹² Nonoi aʻela nā daimonio a pau iā ia, ʻī akula, “E hoʻouna aʻe ʻoe iā mākou i nā puaʻa, i komo aku ai mākou i loko o lākou.”

¹³ ʻAe koke aʻela Iesū iā lākou. A laila, puka akula nā ʻuhane ʻino i waho, a komo akula i loko o nā puaʻa; a holo kikī ihola lākou i lalo ma kahi pali, i loko o ka moana wai, (ʻelua paha tausani lākou,) a make ihola i loko o ka wai.

¹⁴ Holo akula ka poʻe i hānai iā lākou, a haʻi aʻela ma ke kūlanakauhale, a ma nā kauhale; a haele aʻela lākou i waho, e ʻike i nā mea i hana ʻia ai.

¹⁵ A hiki maila lākou i o Iesū lā, a ʻike i ka mea i uluhia e ka daimonio, nona ka “legeona,” e noho ana me ka ʻaʻahu, a me ka manaʻo pono; makaʻu aʻela lākou.

¹⁶ ʻO ka poʻe i ʻike pono, haʻi akula iā lākou i nā mea i hana ʻia ai i ka mea i uluhia e ka daimonio, a no nā puaʻa hoʻi.

¹⁷ A hoʻomaka aʻela lākou e nonoi iā ia i haʻalele ai ia i ko lākou ʻāina.

¹⁸ I kona eʻe ʻana i luna o ka moku, hele akula i ona lā ka mea i uluhia e ka daimonio, nonoi akula iā ia, e noho pū ʻo ia me ia.

¹⁹ ʻAʻole Iesū i ʻae, ʻī maila nō naʻe iā ia, “E hoʻi ʻoe i kou hale, i kou poʻe hoahānau, e haʻi aku iā lākou i nā mea nui a ka Haku i hana ai nou, a me kona lokomaikaʻi iā ʻoe.”

²⁰ Hele aʻela ia, a hoʻomaka aʻela e haʻi aku ma Dekapoli i nā mea a Iesū i hana ai nona; a kāhāhā ihola ka naʻau o nā kānaka a pau.

²¹ ¶ I ka hoʻi ʻana o Iesū ma ka moku, a hiki i kēlā kapa, nui loa ihola nā kānaka i ʻākoakoa maila i ona lā; a aia nō ia ma kapa o ka moana wai.

²² Aia hoʻi, hele maila kekahi luna hale hālāwai, ʻo Iairo kona inoa, a ʻike ʻo ia iā ia, hāʻule ihola ia ma kona mau wāwae.

²³ A nonoi nui aʻela iā ia, ʻī aʻela, “Ke waiho lā kuʻu kaikamahine i ka wēlau o ka make; e hele aʻe ʻoe, e kau iho i kou lima ma luna ona, a e ola nō ia.”

²⁴ A hele pū akula Iesū me ia, he nui loa nā kānaka i hahai pū akula, a hoʻokē ihola iā ia.

²⁵ ¶ Aia hoʻi he wahine heʻe koko, he ʻumi nā makahiki a me kumamālua;

²⁶ a ua nui kona kaumaha no nā kāhuna lapaʻau he nui loa, a ua hoʻopau loa i kona waiwai, ʻaʻole naʻe i maha iki, ua māhuahua nō ka maʻi.

²⁷ A lohe akula ia no Iesū, a laila, hele maila ia ma hope, a i loko o ka ʻaha kanaka, hoʻopā akula i kona kapa.

²⁸ No ka mea, ua nalu iho nō ia, “Inā paha e hoʻopā au i kona kapa wale nō, e ola au.”

²⁹ Maloʻo koke aʻela ke kumu o kona koko; a ʻike ihola ia i loko o kona kino, ua ola ia i kēlā maʻi.

³⁰ A laila, ʻike koke ihola ʻo Iesū i loko ona, ua puka aku kekahi mana, mai ona aku lā, huli aʻela ia ma loko o ka ʻaha kanaka, ʻī maila, “ʻO wai lā ka mea hoʻopā mai i kuʻu ʻaʻahu?”

³¹ ʻĪ akula kāna poʻe haumāna iā ia, “Ke ʻike mai nei nō ʻoe i ka ʻaha kanaka, e hoʻokē ana iā ʻoe, a ke nīnau mai nei anei ʻoe, ‘ʻO wai kai hoʻopā mai iaʻu?’”

³² ʻAlawa aʻela ia e nānā aʻe i ka mea nāna i hana ia mea.

³³ Akā, ʻo ua wahine lā, hele maila ia me ka makaʻu, a me ka haʻalulu; no ka mea, ua ʻike pono ia i ka mea i hana ʻia aʻe i loko ona, a haʻi pololei akula iā ia.

³⁴ ʻĪ maila ʻo ia iā ia, “E kuʻu kaikamahine, ua ola ʻoe i kou manaʻoʻiʻo! E hele pōmaikaʻi ʻoe, me ke ola ʻana o kou maʻi.”

³⁵ ¶ A i kāna ʻōlelo ʻana, hele maila kekahi mea, no ka luna hale hālāwai, ʻī maila, “Ua make kou kaikamahine, no ke aha lā ʻoe e hoʻoluhi hou aku ai i ke Kumu?”

³⁶ A lohe Iesū ia ʻōlelo i ʻōlelo ʻia aʻe, ʻī maila ia i ka luna hale hālāwai, “Mai makaʻu ʻoe, e manaʻoʻiʻo wale mai nō.”

³⁷ ʻAʻole ia i ʻae mai i kekahi kanaka ʻē aʻe e hahai aku iā ia, ʻo Petero wale nō, a me Iakobo, a me Ioane, ke kaikaina o Iakobo.

³⁸ A hiki aʻela ia i ka hale o ua luna hale hālāwai lā, ʻike aʻela ia i ka haunaele, a me ka poʻe ʻalalā, e uē nui ana.

³⁹ A i kona komo ʻana i loko, ʻī maila ʻo ia iā lākou, “No ke aha lā ʻoukou e makena ai me ka uē iho? ʻAʻole i make ke kaikamahine; akā, e hiamoe ana nō.”

⁴⁰ Hoʻowahāwahā akula lākou iā ia. Akā, kipaku aʻela ʻo ia iā lākou a pau i waho, a laila lawe aʻela ia i ka makua kāne a me ka makuahine o ua keiki lā, a me kona poʻe iho, a komo aʻela i loko o kahi i moe ai ke keiki.

⁴¹ Lālau aʻela ia i ka lima o ua keiki lā, ʻī maila iā ia, “Talita koumi!” ʻo ia hoʻi kēia ma ka hoʻohālike ʻana, “E ke kaikamahine, ke ʻōlelo aku nei au iā ʻoe, e ala i luna!”

⁴² Ala koke aʻela ke kaikamahine, a hele aʻela; no ka mea, he ʻumikumamālua kona mau makahiki; a kāhāhā nui loa ihola ko lākou naʻau.

⁴³ Pāpā ikaika maila ʻo ia iā lākou, mai haʻi aku i kēia i kekahi; a laila, kauoha maila ia, e hāʻawi ʻia kekahi mea nāna e ʻai ai.