KA ʻEUANELIO I KĀKAU ʻIA AI E MAREKO 4 - Ka Baibala Hemolele

1 Ka ʻōlelo nane no ke kanaka lūlū hua. 28 No ke kupu ʻike ʻole ʻia o nā hua.

MOKUNA IV.

¹ ¶ Hoʻomaka ihola ʻo ia e aʻo hou ma kapa o ka moana wai; a no ka nui loa o ka poʻe i ʻākoakoa mai i ona lā, eʻe akula ia ma luna o kekahi moku, noho ihola ma luna o ka wai, a pau maila ka ʻaha kanaka ma uka, ma kapa o ka moana wai.

² Aʻo nui maila ʻo ia iā lākou ma nā ʻōlelo nane, ʻī maila iā lākou ma kāna aʻo ʻana,

³ “E hoʻolohe mai; aia hoʻi, hele akula kekahi kanaka lūlū hua, e lūlū;

⁴ a i kāna lūlū ʻana, heleleʻi ihola kekahi ma kapa alanui, a lele maila nā manu o ka lewa, a ʻai ihola ia mea.

⁵ “Heleleʻi ihola kekahi ma kahi pā ʻaʻā, kahi i nui ʻole ai kona lepo; kupu wawe aʻela ia, no ka pāpaʻu o ka lepo.

⁶ “A puka mai ka lā, mae ihola ia, a maloʻo akula, no ke aʻa ʻole.

⁷ “A heleleʻi aʻela kekahi ma waena o nā kākalaioa; kupu maila nā kākalaioa, a kāhihi ihola ia mea; no laila, ʻaʻole i hua mai ka hua.

⁸ “Heleleʻi ihola kekahi ma kahi lepo maikaʻi, a puʻu maila i ka hua, i kupu a māhuahua, a hua mai, pākanakolu, a pākanaono kekahi, a pāhaneri kekahi.”

⁹ ʻĪ maila ʻo ia iā lākou, “ʻO ka mea pepeiao lohe lā, e hoʻolohe mai ia.”

¹⁰ ¶ A loaʻa iā ia ka mehameha, a laila, nīnau akula iā ia ka poʻe e kū pū ana me ia, a me ka poʻe ʻumikumamālua, i ua ʻōlelo nane lā.

¹¹ ʻĪ maila ʻo ia iā lākou, “Ua hāʻawi ʻia mai iā ʻoukou e ʻike i nā mea pohihihi o ke aupuni o ke Akua; akā, ua nane ʻia aku nā mea a pau i ka poʻe ma waho;

¹² «i nānā lākou a milimili, ʻaʻole naʻe e ʻike; i hoʻolohe hoʻi a lohe, ʻaʻole naʻe e hoʻomaopopo, o hoʻohuli ʻia mai lākou, a e kala ʻia ko lākou hala».”

¹³ A laila, ʻī maila ʻo ia iā lākou, “ʻAʻole anei ʻoukou i ʻike i kēia ʻōlelo nane? Pehea lā ʻoukou e ʻike ai i nā ʻōlelo nane a pau?

¹⁴ “ʻO ke kanaka lūlū hua, ua lūlū i ka ʻōlelo.

¹⁵ “Eia ka poʻe ma kapa alanui, ma kahi i lūlū ʻia ai ka ʻōlelo, a lohe lākou, a laila hele koke mai ʻo Sātana a kāʻili aku i ka ʻōlelo i lūlū ʻia i loko o ko lākou naʻau.

¹⁶ “Eia nō hoʻi nā mea i lūlū ʻia ma kahi pā ʻaʻā; a lohe lākou i ka ʻōlelo, hopu koke lākou ia, me ka ʻoliʻoli.

¹⁷ “Akā, ʻaʻole o lākou mole i loko o lākou; no laila, ʻaʻole i mau, a hiki mai ka pilikia a me ka hōʻino ʻia no ka ʻōlelo, a laila, lilo koke lākou.

¹⁸ “Eia hoʻi nā mea i lūlū ʻia i waena o nā kākalaioa, ʻo ka poʻe i lohe i ka ʻōlelo,

¹⁹ a ʻo ka manaʻo nui i nā mea o ke ao, a ʻo ka hoʻopunipuni ʻana o ka waiwai, me ke kuko ʻana i nā mea ʻē, ʻo ia ka mea i ʻiʻī ʻia ai ka ʻōlelo, a lilo ia i mea hua ʻole.

²⁰ “Eia nō hoʻi nā mea i lūlū ʻia ma kahi lepo maikaʻi; ʻo nā mea i hoʻolohe i ka ʻōlelo, a hoʻopaʻa iho, a hua mai i ka hua, pākanakolu kekahi, a pākanaono kekahi, a pāhaneri kekahi.”

²¹ ¶ ʻĪ maila ʻo ia iā lākou, “Ua lawe ʻia mai anei he kukui e hahao ʻia ai ma lalo o ke poʻi, a ma lalo o kahi moe paha, ʻaʻole anei no ke kau ʻia ma luna o kahi e kau ai ke kukui?

²² “No ka mea, ʻaʻohe mea huna e koe i ka hōʻike ʻole ʻia, ʻaʻole hoʻi he mea i uhi malū ʻia e koe i ka hū ʻole ma waho.

²³ “Inā he pepeiao ko ke kanaka e lohe ai, e hoʻolohe mai ia.”

²⁴ ʻĪ maila ʻo ia iā lākou, “E noʻonoʻo ʻoukou i kā ʻoukou mea e lohe ai; no ka mea, ma ke ana a ʻoukou e ana aku ai, ma laila e ana ʻia mai nō hoʻi ʻoukou pēlā; a e hāʻawi nui ʻia iā ʻoukou, i ka poʻe e hoʻolohe mai.

²⁵ “ʻO ka mea ua loaʻa, e hāʻawi ʻia aku nāna; akā, ʻo ka mea ua loaʻa ʻole, e kāʻili ʻia aku kāna, mai ona aku lā.”

²⁶ ¶ ʻĪ maila ia, “Me nēia ke aupuni o ke Akua, me ke kanu ʻana a ke kanaka i ka hua ma ka lepo;

²⁷ a moe iho, a ala aʻe i ka pō, a me ke ao, e kupu aʻe ana ua hua lā a nui, ʻaʻole naʻe ia i ʻike.

²⁸ “No ka mea, hoʻohua wale mai nō ka honua, ma mua ka hoʻomaka, ma hope iho ka huhui, a laila ka hua oʻo ma loko o ka huhui.

²⁹ “A i ka mākaukau ʻana o ka hua, a laila, hoʻokomo koke aʻela ia i ka pahi; no ka mea, ua hiki mai ka wā e ʻoki ai.”

³⁰ ¶ ʻĪ maila ʻo ia, “Me ke aha lā kākou e hoʻohālike ai i ke aupuni o ke Akua? A ma ka nane hea kākou e hoʻākāka aku ai ia?

³¹ “Ua like nō ia me ka hua mākeke, i ka wā i kanu ʻia ai ma ka lepo, he hua liʻiliʻi loa ia o nā hua a pau i kanu ʻia ma ka lepo.

³² “Akā, i ka wā i kanu ʻia ai, kupu nō ia, a lilo i laʻalāʻau nui o nā laʻalāʻau a pau, a ʻōpuʻu maila nā lālā nui, «a hiki nō i nā manu o ka lewa ke kau mai ma lalo o kona malu».”

³³ ¶ Haʻi maila ia i ka ʻōlelo iā lākou ma nā ʻōlelo nane e like me ia he nui loa, me lākou e hiki ai ke hoʻolohe aku.

³⁴ ʻAʻole ia i ʻōlelo iki aku iā lākou ma ka ʻōlelo nane ʻole; a ma kahi mehameha, hoʻākāka aʻela ia i nā mea a pau i kāna poʻe haumāna.

³⁵ ¶ Ia lā nō, a ahiahi aʻe, ʻī maila ia iā lākou, “E holo kākou i kēlā kapa.”

³⁶ A haʻalele akula lākou i ka ʻaha kanaka, a lawe akula iā ia e noho ana ma ka moku; he mau moku liʻiliʻi nō hoʻi kekahi me ia pū.

³⁷ Nou maila ka makani ikaika, uhi maila nā ʻale i luna o ka moku, a piha ihola ia.

³⁸ E moe ana ia ma ka uluna, ma ka hope o ka moku; hoʻāla aʻela lākou iā ia, ʻī akula, “E ke Kumu, he mea ʻole anei iā ʻoe ke make mākou?”

³⁹ A laila kū aʻela ia i luna, pāpā aʻela i ka makani, a ʻōlelo aʻela i ka moana wai, “Hāmau, e noho mālie.” Oki ihola ka makani, a pohu maikaʻi ihola.

⁴⁰ ʻĪ maila ʻo ia iā lākou, “No ke aha lā ʻoukou i makaʻu ai? Pehea ko ʻoukou manaʻoʻiʻo ʻole ʻana?”

⁴¹ Weliweli loa aʻela lākou, ʻī aʻela kekahi i kekahi, “He aha lā ke ʻano o ia nei, i hoʻolohe pono ai ka makani a me ka moana wai iā ia?”