KA ʻEUANELIO I KĀKAU ʻIA AI E MAREKO 3 - Ka Baibala Hemolele

1 Hoʻōla akula Iesū i ka lima maloʻo. 6 Hoʻomakaʻākiu nā Parisaio iā ia. 13 Wae ʻia nā haumāna. 22 No ka mahiki ʻana i nā daimonio.

MOKUNA III.

¹ ¶ A komo hou akula ia i loko o ka hale hālāwai, ma laila kekahi kanaka, ua maloʻo kona lima.

² Hākilo akula lākou iā ia, inā paha e hoʻōla mai ʻo ia iā ia i ka lā Sābati, i hoʻopiʻi aku ai lākou iā ia.

³ ʻĪ maila ia i ke kanaka, nona ka lima maloʻo, “E kū mai ʻoe i waenakonu!”

⁴ A laila, nīnau maila ʻo ia iā lākou, “He mea pono anei ke hana i ka maikaʻi i nā lā Sābati, a ke hana i ka ʻino paha? Ke hoʻōla anei, ke pepehi paha?” Pili pū ihola lākou.

⁵ Nānā aʻela ʻo ia iā lākou me ka inaina; no ka mea, ua minamina ia no ka paʻakikī o ko lākou naʻau. ʻĪ aʻela ia i ua kanaka lā, “E ʻō mai kou lima.” A ʻō maila ia, a laila hoʻōla ʻia ihola ia, e like me kekahi lima.

⁶ Hele akula ka poʻe Parisaio i waho, a me ko Herode poʻe, ʻōhumu ihola lākou e pepehi iā ia a make.

⁷ ¶ Hele akula Iesū i ka moana wai, me kāna poʻe haumāna; he nui nō hoʻi ka poʻe i hahai aku iā ia, no Galilaia a no Iudea.

⁸ A no Ierusalema, a no ʻIdumia, a no kēlā ʻaoʻao o Ioredane, a me ka poʻe e kokoke ana i Turo, a me Sidona, he poʻe nui loa; i ko lākou lohe ʻana i nā mea āna i hana ai, hele maila lākou i ona lā.

⁹ A no ka nui o kānaka, kauoha maila ia i kāna poʻe haumāna, i wahi moku iki nona, o hoʻokē mai lākou iā ia.

¹⁰ No ka mea, ua hoʻōla ʻo ia i nā mea he nui loa; no laila lākou i lulumi mai ai e hoʻopā aku iā ia, ʻo ka poʻe a pau i loʻohia i ka maʻi.

¹¹ A ʻike akula nā ʻuhane ʻino iā ia, moe ihola lākou i mua ona, kāhea aʻe, haʻi aʻela, “ʻO ʻoe nō ke Keiki a ke Akua!”

¹² Pāpā ikaika maila ʻo ia iā lākou e hōʻike ʻole aku iā ia.

¹³ ¶ A laila, piʻi aʻela ia i ka mauna, hea maila i ka poʻe āna i makemake ai, a hele akula lākou i ona lā.

¹⁴ Wae maila ia i ʻumikumamālua e noho pū me ia, i hoʻouna ʻo ia iā lākou e aʻo aku,

¹⁵ i lako hoʻi lākou i ka mana e hoʻōla i nā maʻi, a e mahiki aku i nā daimonio.

¹⁶ Hāʻawi aʻela ʻo ia iā Simona i ka inoa hou, ʻo Petero,

¹⁷ ʻo Iakobo a Zebedaio, a me kona kaikaina ʻo Ioane, kapa maila hoʻi ia iā lāua, ʻo Boanerege, ʻo ia hoʻi kēia, “Nā Keiki a ke Hekili”;

¹⁸ a me ʻAnederea, a me Pilipo, a me Baretolomaio, a me Mataio, a me Toma, a me Iakobo a ʻAlepaio, a me Tadaio, a me Simona no Kanaʻana,

¹⁹ a me Iuda ʻIsekariota, ka mea nāna ia i kumakaia ʻia aku. Komo akula lākou i loko o ka hale.

²⁰ ¶ A ʻākoakoa hou maila nā kānaka, he nui loa, no ia mea i ʻole ai e hiki iā lākou ke ʻai i ka ʻai.

²¹ A lohe kona poʻe, hele mai lākou e lālau iā ia; no ka mea, ʻōlelo lākou, “Ua hehena ia.”

²² ʻŌlelo ihola ka poʻe kākau ʻōlelo i iho mai, mai Ierusalema mai, “Iā ia nō ʻo Belezebuba, a ma ke aliʻi o nā daimonio kona mahiki ʻana i nā daimonio.”

²³ Hea akula Iesū iā lākou, ʻōlelo akula ma nā ʻōlelo nane, “Pehea lā e hiki ai iā Sātana ke mahiki aku iā Sātana?

²⁴ “A inā i mokuāhana kekahi aupuni iā ia iho, ʻaʻole e mau ia aupuni.

²⁵ “A inā i mokuāhana ka hale iā ia iho, ʻaʻole e mau ia hale.

²⁶ “A inā kūʻē mai ʻo Sātana iā ia iho, a mokuāhana, ʻaʻole ia e mau; akā, e pau nō ia.

²⁷ “ʻAʻole nō e hiki i kekahi ke komo i loko o ka hale o ke kanaka ikaika a hao i kona waiwai, aia nakinaki mua ʻo ia i ke kanaka ikaika; a laila e hao ʻo ia i nā mea o kona hale.

²⁸ “He ʻoiaʻiʻo kaʻu e haʻi aku nei iā ʻoukou, e kala ʻia nō nā hala a pau o nā keiki a kānaka, a me nā ʻōlelo hōʻino a pau a lākou e hōʻino ai;

²⁹ akā, ʻo ka mea e ʻōlelo hōʻino i ka ʻUhane Hemolele, ʻaʻole loa e kala ʻia kāna; akā, ua kokoke nō ia i ka hoʻopaʻi mau loa ʻia mai.”

³⁰ No ka mea, ua ʻōlelo mai lākou, “He ʻuhane ʻino kona.”

³¹ ¶ A laila, hele akula kona makuahine a me kona mau hoahānau, kū ihola i waho, hoʻouna akula i ona lā e kiʻi iā ia.

³² Ua puni ʻo ia i ka poʻe nui i noho maila, a haʻi aʻela lākou iā ia, “Aia i waho kou makuahine, a me kou mau hoahānau, ke ʻimi mai nei iā ʻoe.”

³³ ʻĪ maila ʻo ia iā lākou, nīnau maila, “ʻO wai koʻu makuahine, a me koʻu mau hoahānau?”

³⁴ Nānā aʻela ia i ka poʻe e noho puni ana iā ia, ʻī maila, “Aia koʻu makuahine a me koʻu mau hoahānau!

³⁵ “No ka mea, ʻo ka mea hana i ka makemake o ke Akua, ʻo ia koʻu hoahānau, a me koʻu kaikuahine, a me koʻu makuahine.”