KA ʻEUANELIO I KĀKAU ʻIA AI E MAREKO 2 - Ka Baibala Hemolele

1 ʻO ka maʻi lōlō. 15 ʻAi pū ʻo Iesū me nā luna ʻauhau a me ka poʻe hewa. 18 No ka hoʻokē ʻai ʻana.

MOKUNA II.

¹ ¶ A ma hope iho o ia mau lā, hele hou akula nō ʻo Iesū i Kaperenauma, a lohe ʻia aʻela kona noho ʻana i loko o ka hale.

² A hoʻākoakoa koke ʻia maila nā kānaka he nui loa, ʻaʻole loa he wahi kaʻawale iki, ʻaʻole nō hoʻi ma ka ʻīpuka, a haʻi maila ia i ka ʻōlelo iā lākou.

³ Hele maila lākou i ona lā, e halihali pū mai ana i kekahi maʻi lōlō, i kaʻikaʻi ʻia e nā mea ʻehā.

⁴ ʻAʻole hiki iā lākou ke komo aku i ona lā, no ka paʻapū i kānaka; no laila wāwahi lākou ma luna o ka hale, ma kona wahi; a hemo iā lākou, a laila kuʻu ihola lākou i kahi moe i moe iho ai ka maʻi lōlō.

⁵ ʻIke maila Iesū i ko lākou manaʻoʻiʻo, ʻōlelo ihola ia i ua lōlō lā, “E ke kama iki, ua kala ʻia kou hewa.”

⁶ E noho ana kekahi poʻe kākau ʻōlelo ma laila, a ʻōhumu ihola lākou i loko o ko lākou naʻau;

⁷ no ke aha lā ʻo ia nei e ʻōlelo ai i nā ʻōlelo hōʻino? “ʻO wai lā ka mea e hiki ai ke kala i ka hala, ʻo ke Akua wale nō?”

⁸ I ko Iesū ʻike koke ʻana ma kona naʻau, ua ʻōhumu malū lākou pēlā, ʻī akula ʻo ia iā lākou, “No ke aha lā ʻoukou e ʻōhumu nei kēia mau mea i loko o ko ʻoukou naʻau?

⁹ “Ma hea ka hiki pono o ka ʻōlelo i ka maʻi lōlō, ‘Ua kala ʻia kou hewa’; a ʻo ka ʻōlelo paha, ‘E ala aʻe, e kaʻikaʻi i kou wahi moe, a e hele?’

¹⁰ “Akā, i ʻike ʻoukou, he mana ko ke Keiki a ke Kanaka ke kala aku i ka hala ma ka honua nei, (ʻī aʻela ia i ka maʻi lōlō,)

¹¹ ke ʻōlelo aku nei au iā ʻoe, e ala mai, e kaʻikaʻi i kou wahi moe, a e hoʻi aku i kou hale.”

¹² Ala koke aʻela ia, kaʻikaʻi aʻela i kona wahi moe, a hele akula i waho, i mua o lākou a pau; no laila, mahalo akula lākou a pau, hoʻonani akula i ke Akua, ʻī ihola, “ʻAkahi nō kākou i ʻike i kēia.”

¹³ ¶ Hele hou akula ia ma kapa o ka moana wai; a hele maila nā kānaka a pau i ona lā, a aʻo maila ʻo ia iā lākou.

¹⁴ A i kona hele ʻana aʻe, ʻike ihola ʻo ia iā Levi a ʻAlapaio, e noho ana i kahi ʻauhau, ʻī maila iā ia, “E hahai mai ʻoe iaʻu!” Kū aʻela ia, a hahai akula iā ia.

¹⁵ ¶ Eia kekahi, i kona noho ʻana i ka ʻaina i loko o kona hale, he nui loa nā luna ʻauhau a me nā mea lawehala i noho pū me Iesū a me kāna poʻe haumāna; no ka mea, ua nui loa ka poʻe i hahai ma muli ona.

¹⁶ A ʻike akula ka poʻe kākau ʻōlelo, a me ka poʻe Parisaio iā ia e ʻai pū ana me nā luna ʻauhau, a me nā lawehala, nīnau aʻela lākou i kāna poʻe haumāna, “No ke aha lā ʻo ia nei e ʻai pū ai a inu pū hoʻi me nā luna ʻauhau a me nā lawehala?”

¹⁷ Lohe aʻela Iesū, ʻī akula ʻo ia iā lākou, “ʻAʻole no ka poʻe ola ke kahuna lapaʻau, no ka poʻe maʻi nō ia. I hele mai nei au e aʻo aku i ka poʻe lawehala e mihi, ʻaʻole i ka poʻe pono.”

¹⁸ ¶ He poʻe hoʻokē ʻai nā haumāna a Ioane a me nā Parisaio; a hele maila lākou, nīnau maila iā ia, “No ke aha lā e hoʻokē ʻai ai nā haumāna a Ioane, a me nā Parisaio, ʻaʻole hoʻi hoʻokē ʻai kāu poʻe haumāna?”

¹⁹ Nīnau akula Iesū iā lākou, “E hiki anei i nā hoa o ke kāne mare ke hoʻokē ʻai i ka wā e noho pū ana ke kāne mare me lākou? I ka wā e noho pū ana ke kāne mare me lākou, ʻaʻole e hiki iā lākou ke hoʻokē ʻai.

²⁰ “Akā, e hiki mai ana nō nā lā e lawe ʻia aku ai ke kāne mare, mai o lākou aku, a laila lākou e hoʻokē ʻai ai, i kēlā lā.

²¹ “ʻAʻole nō kekahi e pīnaʻi i ka ʻāpana lole hou, ma ka lole kahiko, o haehae ʻia ka mea kahiko, e ka mea hou i pīnaʻi ʻia, a nui aku ka nahae.

²² “ʻAʻole nō hoʻi kekahi i ukuhi i ka waina hou i loko o ka hue ʻili kahiko, o nahae nā hue i ka waina hou, a kahe aku ka waina, a pau pū nā hue; akā, e ukuhi ʻia nō ka waina hou i loko o nā hue hou.”

²³ ¶ Eia kekahi, i kona hele ʻana i waena o nā mahina ʻai i ka lā Sābati, ʻako aku nā haumāna āna i nā huhui palaoa, i ko lākou hele ʻana.

²⁴ ʻĪ maila ka poʻe Parisaio iā ia, “No ke aha lā e hana nei lākou, i ka lā Sābati, i ka mea kū ʻole ma ka pono?”

²⁵ ʻĪ akula ʻo ia iā lākou, “ʻAʻole anei ʻoukou i heluhelu i ka mea a Dāvida i hana ai i kona wā i hāiki ai i ka pōloli, a me ka poʻe me ia?

²⁶ “I kona komo ʻana i loko o ka hale o ke Akua, i ka wā o ʻAbiatara, ke kahuna nui, a ʻai ihola i ka berena hōʻike, i ka mea kūpono ʻole ke ʻai, na nā kāhuna wale nō, a hāʻawi aʻela nō hoʻi na ka poʻe me ia.”

²⁷ ʻĪ maila ia iā lākou, “Ua hana ʻia ka lā Sābati no ke kanaka, ʻaʻole ke kanaka no ka Sābati.

²⁸ “No laila, ʻo ke Keiki a ke Kanaka, ʻo ia ka Haku o ka lā Sābati.”