KA ʻEUANELIO I KĀKAU ʻIA AI E MAREKO 14 - Ka Baibala Hemolele

1 Ka poni ʻia ʻo Iesū. 12 Ka ʻAhaʻaina ʻana. 32 Ka pule a Iesū ma Getesemane. 43 Kumakaia ʻia. 53 Hoʻokolokolo ʻia. 66 Ko Petero hōʻole ʻana iā ia.

MOKUNA XIV.

¹ ¶ A hala aʻela nā lā ʻelua, a laila ka ʻAhaʻaina o ka Mōliaola, a me ka Berena Hū ʻOle; ʻimi ihola ka poʻe kāhuna nui a me ka poʻe kākau ʻōlelo e hopu iā ia me ka maʻalea, a e pepehi.

² ʻĪ aʻela lākou, “ʻAʻole i ka lā ʻahaʻaina, o haunaele auaneʻi nā kānaka.”

³ ¶ A aia ia i Betania, i loko o ka hale o Simona ka lēpero, e moe ana e ʻai i laila, hele maila kekahi wahine me ka ipu ʻalabata, he mea poni ko loko, he ʻaila ʻala, he mea kumu kūʻai nui; a wehe ia i ka ipu, a ninini ihola ia i luna iho o kona poʻo.

⁴ Huhū aʻela kekahi poʻe i loko o lākou iho, ʻī aʻela, “No ke aha lā i hoʻomāunauna ʻia ai kēia ʻaila?

⁵ “Inā paha i kūʻai ʻia aku ia, ʻekolu haneri denari a keu aku paha i loaʻa mai, i mea hāʻawi aku no ka poʻe ʻilihune.” ʻŌhumu ihola lākou i ua wahine lā.

⁶ ʻĪ maila Iesū, “Uoki, no ke aha ʻoukou e hōʻino aku nei iā ia? He mea maikaʻi kāna i hana mai nei iaʻu.

⁷ “Ua mau loa ka poʻe ʻilihune me ʻoukou, a e hiki nō iā ʻoukou ke hana maikaʻi aku iā lākou i nā manawa a pau a ʻoukou e makemake ai; akā, ʻo wau, ʻaʻole au e mau loa ana me ʻoukou.

⁸ “ʻO ka mea hiki iā ia nei, ua hana ʻiʻo mai ia; a ua hele mua mai e poni i koʻu kino, no koʻu kanu ʻia.

⁹ “He ʻoiaʻiʻo kaʻu e ʻōlelo aku nei iā ʻoukou, ma nā wahi a pau loa ma ke ao nei e haʻi ʻia aku ai kēia ʻeuanelio, e haʻi pū ʻia aku nō hoʻi ka mea āna i hana mai ai, i mea e hoʻomanaʻo ʻia ai ʻo ia.”

¹⁰ ¶ I laila ka hele ʻana o Iuda ʻIsekariota, kekahi o ka poʻe ʻumikumamālua, i ka poʻe kāhuna nui, e kumakaia iā ia na lākou.

¹¹ A lohe aʻela lākou, ʻoliʻoli ihola, a ʻae maila lākou i ka hāʻawi iā ia i kālā. ʻImi ihola ia i kahi e hiki pono ai ke kumakaia iā ia.

¹² ¶ A i ka lā mua o ka ʻAhaʻaina Berena Hū ʻOle, i ka wā e kālua ai i ka Mōliaola, nīnau akula kāna poʻe haumāna iā ia, “ʻAuhea lā kāu wahi makemake e hele ai mākou e hoʻomākaukau, i ʻai ʻoe i ka Mōliaola?”

¹³ A hoʻouna aʻela ia i nā haumāna āna ʻelua, ʻī aʻela iā lāua, “E hele aku ʻolua i ke kūlanakauhale, a laila ʻolua e hālāwai ai me kekahi kanaka e hali ana i ke kīʻaha wai, e hahai aku ʻolua iā ia.

¹⁴ “A i kāna wahi e komo aku ai, e ʻōlelo ʻolua i ka mea hale, ‘Ē, ke ʻōlelo mai nei ke Kumu, “ʻAuhea lā ke keʻena hoʻokipa, kahi e ʻai pū ai au i ka Mōliaola me kaʻu poʻe haumāna?”’

¹⁵ “A e hōʻike mai nō kēlā iā ʻolua i kekahi keʻena nui ma luna, ua mākaukau ko loko; ma laila ʻolua e hoʻomākaukau ai no kākou.”

¹⁶ Hele akula nā haumāna, a hiki akula i ke kūlanakauhale, loaʻa iā lāua e like me kāna mea i ʻōlelo mai ai iā lāua: a hoʻomākaukau lāua i ka Mōliaola.

¹⁷ ¶ A i ke ahiahi hele maila ia me ka poʻe ʻumikumamālua.

¹⁸ A i ko lākou moe ʻana i ka ʻahaʻaina, ʻōlelo maila Iesū, “He ʻoiaʻiʻo kaʻu e ʻōlelo aku nei iā ʻoukou, e kumakaia ʻia auaneʻi au e kekahi o ʻoukou, ʻo ka mea e ʻai pū ana me aʻu.”

¹⁹ Kaumaha ihola lākou, a ʻōlelo pākahi akula iā ia, “ʻO wau anei? A ʻo kekahi, ʻO wau anei?”

²⁰ ʻŌlelo maila ia, ʻī maila iā lākou, “ʻO kekahi o ka poʻe ʻumikumamālua e miki pū ana kona lima me aʻu i ke pā, ʻo ia nō ia.

²¹ “Ke hele aku nei nō ke Keiki a ke Kanaka, e like me ka mea i palapala ʻia mai ai nona; akā, auē ke kanaka nāna e kumakaia i ke Keiki a ke Kanaka! E aho nō ia inā ʻaʻole i hānau ʻia mai ia.”

²² ¶ A i kā lākou ʻai ʻana, lālau aʻela Iesū i ka berena, hoʻālohaloha akula, wāwahi ihola, a hāʻawi maila iā lākou, ʻī maila, “E lawe, e ʻai; ʻo koʻu kino kēia.”

²³ A laila, lālau ihola ia i ke kīʻaha a hoʻālohaloha aku ia, a laila, hāʻawi maila iā lākou; a inu ihola lākou a pau i ko loko.

²⁴ ʻĪ maila ʻo ia iā lākou, “ʻO koʻu koko kēia no ke kauoha hou, ua hoʻokahe ʻia no nā kānaka he nui loa.

²⁵ “He ʻoiaʻiʻo kaʻu e haʻi aku nei iā ʻoukou, ʻaʻole au e inu hou aku i ko ka hua o ke kumu waina, a hiki aku i ka lā e inu ai au i ka mea hou i loko o ke aupuni o ke Akua.”

²⁶ ¶ Hīmeni aʻela lākou, a laila hele akula i waho ma ka mauna ʻo ʻOliveta.

²⁷ ¶ ʻĪ maila Iesū iā lākou, “I nēia pō e hihia auaneʻi ʻoukou a pau noʻu; no ka mea, ua palapala ʻia, ‘«E pepehi ana au i ke Kahu Hipa, a e puehu wale aku nō nā hipa».’

²⁸ “Akā, ma hope iho o koʻu ala hou ʻana mai, e hele aku au ma mua o ʻoukou i Galilaia.”

²⁹ ʻĪ akula ʻo Petero iā ia, “Inā e hihia lākou a pau, ʻaʻole loa ʻo wau.”

³⁰ ʻĪ maila Iesū iā ia, “He ʻoiaʻiʻo kaʻu e haʻi aku nei iā ʻoe, i kēia lā, a i kēia pō nō, ʻaʻole e hiki ke kani ʻana o ka moa kualua, ʻekolu ou hōʻole ʻē ʻana mai iaʻu.”

³¹ A laila, ʻōlelo ikaika akula ʻo Petero, “ʻAʻole loa wau e hōʻole aku iā ʻoe, ke make pū au me ʻoe;” a pēlā lākou a pau i ʻōlelo aku ai.

³² ¶ A laila, hele maila lākou i kahi i kapa ʻia ʻo Getesemane; ʻī maila ia i kāna poʻe haumāna, “E noho ʻoukou ma ʻaneʻi, i kuʻu wā e pule ana.”

³³ A kaʻi akula ʻo ia iā Petero, a me Iakobo, a me Ioane, i laila ka hoʻomaka ʻana o kona kaumaha a me ka luʻuluʻu loa.

³⁴ ʻĪ maila ʻo ia iā lākou, “Ua kaumaha loa kuʻu ʻuhane, me he mea make lā. E kali ʻoukou ma ʻaneʻi, a e makaʻala nō hoʻi.”

³⁵ Hele iki akula ia a hina ihola ma ka lepo, a pule akula, inā e hiki ia mea, e lawe ʻia aku ia hora.

³⁶ ʻĪ akula ia, “E ʻAba, e ka Makua, ua hiki nā mea a pau loa iā ʻoe, e lawe aku ʻoe i kēia kīʻaha oʻu; akā hoʻi, ʻaʻole ʻo koʻu makemake e hana ʻia, aia ʻo kou.”

³⁷ Hoʻi maila ia, loaʻa ihola lākou iā ia e hiamoe ana; ʻī maila ʻo ia iā Petero, “E Simona, ke hiamoe nei anei ʻoe? ʻAʻole anei e hiki iā ʻoe ke makaʻala i hoʻokahi hora?

³⁸ “E makaʻala ʻoukou, e pule, o hoʻowalewale ʻia mai ʻoukou. Ua makemake nō ka naʻau; akā, ʻo ke kino, ua nāwaliwali ia.”

³⁹ Hele hou akula ia, a pule akula, ma ia ʻōlelo hoʻokahi ʻana nō.

⁴⁰ A hoʻi maila ia, loaʻa hou nō lākou e hiamoe ana; (no ka mea, ua māloʻeloʻe ko lākou maka,) ʻaʻole naʻe lākou i ʻike i ka mea e ʻōlelo aku ai iā ia.

⁴¹ Hele hou maila ʻo ia iā lākou, ʻo ke kolu ia o kona hele ʻana mai, ʻī maila iā lākou, “E hiamoe aku ʻoukou, e hoʻomaha. Ua pau, ua hiki mai nei ka hora; aia hoʻi, ua kumakaia ʻia ke Keiki a ke Kanaka i ka lima o ka poʻe hewa.

⁴² “E ala, e haele kākou; aia hoʻi, ke kokoke mai nei ka mea nāna wau e kumakaia!”

⁴³ ¶ I kāna ʻōlelo ʻana, hele koke maila ʻo Iuda, kekahi o ka poʻe ʻumikumamālua, a me ia nō nā kānaka he nui loa, me nā pahi kaua, a me nā newa, na ka poʻe kāhuna nui mai, a me ka poʻe kākau ʻōlelo, a me ka poʻe lunakahiko.

⁴⁴ A ʻo ka mea nāna ia i kumakaia, ua hāʻawi aʻe ia i hōʻailona na lākou, ʻī aʻela, “ʻO ka mea aʻu e honi aku ai, ʻo ia nō ia, e hopu aku iā ia, a e alakaʻi paʻa aku.”

⁴⁵ A hiki maila ia, a laila hele koke akula ia i ona lā, ʻī akula, “E Rabi, e Rabi!” a honi akula iā ia.

⁴⁶ Lālau akula ko lākou lima iā ia, hopu ihola.

⁴⁷ A ʻo kekahi o lākou e kū ana ma laila, unuhi aʻela ia i ka pahi kaua, hahau akula i kekahi kauā o ke kahuna nui, a ʻoki aʻela i kona pepeiao.

⁴⁸ ʻŌlelo maila Iesū, ʻī mai iā lākou, “Ua hele mai nei anei ʻoukou i waho nei, me nā pahi kaua, a me nā newa e hopu mai iaʻu, me he pōā lā?

⁴⁹ “Me ʻoukou nō au i noho ai i loko o ka luakini, e aʻo aku ana i kēlā lā i kēia lā, ʻaʻole ʻoukou i hopu mai iaʻu; akā, e hoʻokō ʻia mai nō naʻe ka Palapala Hemolele.”

⁵⁰ Haʻalele akula kāna poʻe haumāna a pau iā ia, holo akula.

⁵¹ ¶ Hahai akula kekahi kanaka ʻōpiopio iā ia, e ʻaʻahu ana i ke kapa olonā ma ka ʻili, lālau ihola ka poʻe koa iā ia.

⁵² Haʻalele ihola ia i ke kapa olonā, a holo kohana akula, mai o lākou aku.

⁵³ ¶ Alakaʻi akula lākou iā Iesū i ke kahuna nui; ua ʻākoakoa pū mai nō me ia ka poʻe kāhuna nui a pau, a me ka poʻe lunakahiko, a me ka poʻe kākau ʻōlelo.

⁵⁴ Hahai mamao akula ʻo Petero iā ia, a hiki i ka hale o ke kahuna nui; a noho pū ia me ka poʻe kauā, e lalana ana iā ia iho i ke ahi.

⁵⁵ ʻImi ihola ka poʻe kāhuna nui, a me ka ʻaha luna kānāwai, i mea hōʻike no Iesū e make ai, ʻaʻole naʻe i loaʻa.

⁵⁶ No ka mea, he nui nō ka poʻe hōʻike wahaheʻe mai nona, ʻaʻole hoʻi i kūlike ko lākou hōʻike ʻana.

⁵⁷ Kū aʻela kekahi mau mea, hōʻike wahaheʻe aʻela, ʻī aʻe,

⁵⁸ “Ua lohe nō māua i kāna ʻōlelo ʻana mai, ‘E wāwahi ana au i kēia luakini i hana ʻia e ka lima, a i nā lā ʻekolu e hana hou nō wau i kekahi i hana ʻole ʻia e ka lima.’”

⁵⁹ ʻAʻole naʻe i kūlike ko lāua hōʻike ʻana.

⁶⁰ Kū aʻela i luna ke kahuna nui i waenakonu o lākou, nīnau akula iā Iesū, ʻī akula, “ʻAʻole anei ʻoe e ʻōlelo mai? He aha lā kēlā mea a lāua nei i hōʻike ai nou?”

⁶¹ Noho mālie ihola ia, ʻaʻole i ʻōlelo mai. Nīnau hou akula ke kahuna nui iā ia, ʻī akula, “ʻO ʻoe nō anei ka Mesia, ke Keiki a ka Mea i hoʻomaikaʻi ʻia?”

⁶² ʻŌlelo maila Iesū, “ʻO wau nō ia; a e ʻike mai auaneʻi ʻoukou i «ke Keiki a ke Kanaka e noho ana ma ka lima ʻākau o ka Mana Loa», a «e hele mai ana ma nā ao o ka lani».”

⁶³ A laila haehae aʻela ke kahuna nui i kona kapa, ʻī aʻela, “No ke aha lā kākou e makemake hou ai i mea hōʻike?

⁶⁴ “Ua lohe aʻe nei ʻoukou i kāna ʻōlelo hōʻino ʻana. Pehea lā ko ʻoukou manaʻo?” Hoʻohewa maila lākou a pau iā ia, he hewa kūpono i ka make.

⁶⁵ Kuhakuha akula kekahi poʻe iā ia, a uhi akula kekahi poʻe i kona maka, kuʻikuʻi akula iā ia, me ka ʻī aku, “E koho mai!” A kuʻikuʻi akula ka poʻe ilāmuku iā ia, me ko lākou mau poho lima.

⁶⁶ ¶ I ko Petero noho ʻana ma lalo, ma ka pā, hele maila kekahi kaikamahine o ke kahuna nui.

⁶⁷ A ʻike maila kēlā iā Petero e lalana ana iā ia iho, nānā aʻela ʻo ia iā ia, ʻī aʻela, “ʻO ʻoe nō kekahi pū me Iesū no Nazareta.”

⁶⁸ Hōʻole akula ia, ʻī akula, “ʻAʻole au i ʻike iā ia, ʻaʻole hoʻi i maopopo iaʻu ka mea āu e ʻōlelo mai nei.” A laila, hele akula ia i waho ma ka lānai, a ʻoʻoʻō maila ka moa.

⁶⁹ ʻIke hou aʻela kekahi kaikamahine iā ia, a ʻōlelo aʻela ia i ka poʻe e kū ana ma laila, “ʻO ia nei nō kekahi o lākou!”

⁷⁰ Hōʻole hou akula ia. A ma hope iho, ʻī aʻela ka poʻe e kū ana ma laila iā Petero, “ʻOiaʻiʻo, ʻo ʻoe nō kekahi o lākou; no ka mea, no Galilaia ʻoe, ke hōʻike mai nei nō hoʻi kāu ʻōlelo ʻana.”

⁷¹ A laila, hāʻiliʻili ihola ʻo ia, me ka hoʻohiki, “ʻAʻole au i ʻike ia kanaka a ʻoukou e ʻōlelo mai nei!”

⁷² ʻOʻoʻō hou maila ka moa. A laila, manaʻo ihola ʻo Petero i kā Iesū ʻōlelo ʻana mai iā ia, “ʻAʻole e hiki i ke kani ʻana o ka moa kualua, a ʻekolu nō ou hōʻole ʻana mai iaʻu.” A i kona noʻonoʻo ʻana, uē ihola ia.