KA ʻEUANELIO I KĀKAU ʻIA AI E MAREKO 12 - Ka Baibala Hemolele

1 Ka ʻōlelo nane no ka māla waina. 13 No ka ʻauhau. 18 Pili pū hou nā Sadukaio. 41 Ka wahine hune.

MOKUNA XII.

¹ ¶ A laila, hoʻomaka ʻo ia e ʻōlelo mai iā lākou ma nā ʻōlelo nane. “«Kanu ihola kekahi kanaka i ka māla waina, a hana ihola ia i ka pā a puni, a kōhi i lalo i kahi e kaomi ai i ka waina, kūkulu ihola i ka hale kiaʻi», hāʻawi aʻela i nā hoaʻāina, a hele akula i ka ʻāina ʻē.

² “A i ka wā pono, hoʻouna maila ia i ke kauā i nā hoaʻāina, i loaʻa aku iā ia ka hua o ka māla waina, no ka poʻe hoaʻāina.

³ “Hopu ihola lākou iā ia, kuʻikuʻi akula, a hoʻihoʻi nele akula iā ia.

⁴ “Hoʻouna hou maila ia i o lākou lā i kekahi kauā hou; a hailuku akula lākou iā ia, a ʻeha kona poʻo, a hoʻihoʻi aku lākou iā ia me ka hōʻino.

⁵ “Hoʻouna hou maila ia i kekahi mea hou; a pepehi akula lākou iā ia a make; a ʻo nā mea ʻē aʻe he nui loa, kuʻikuʻi nō i kekahi, a pepehi i kekahi.

⁶ “He keiki kāne hoʻokahi kāna, ʻo kāna punahele, ʻo ia kāna i hoʻouna hope mai ai iā lākou, ʻī maila, ‘E mahalo mai paha lākou i kuʻu keiki kāne.’

⁷ “ʻĪ aʻela kēlā poʻe hoaʻāina iā lākou iho nō, ‘Eia nō ka hoʻoilina; inā kākou e pepehi iā ia, a laila, e lilo mai ka waiwai no kākou!’

⁸ “Hopu ihola lākou iā ia, pepehi akula; a hoʻolei aku hoʻi, mai loko aku o ka māla waina.

⁹ “No ia mea, pehea lā uaneʻi e hana mai ai ka haku o ia māla waina? E hele mai nō ia a e luku iho ia poʻe hoaʻāina, a e hāʻawi aku i ka māla waina no haʻi.

¹⁰ “ʻAʻole anei ʻoukou i heluhelu i kēia Palapala, ‘«ʻO ka pōhaku i haʻalele ʻia e ka poʻe hana hale, Ua lilo ia i pōhaku kumu no ke kihi;

¹¹ ʻO ka hana kēia a Iēhova, He mea mahalo ia i ko kākou mau maka»’?”

¹² ʻImi ihola lākou e hopu iā ia, a makaʻu aʻela lākou i kānaka; no ka mea, ua ʻike lākou, ua ʻōlelo ʻo ia i kēia ʻōlelo nane no lākou; a haʻalele lākou iā ia, a hele aku.

¹³ ¶ Hoʻouna maila lākou i kekahi o ka poʻe Parisaio, a me ko Herode poʻe i ona lā e hoʻohihia ai iā ia ma ka ʻōlelo.

¹⁴ A hiki maila lākou, ʻōlelo maila lākou iā ia, “E ke Kumu ē, ua ʻike mākou he pono ʻoe, ʻaʻole ʻoe i makaʻu i kekahi; ʻaʻole hoʻi ʻoe i nānā i ko waho o ke kanaka; akā, ke hōʻike pono mai nei ʻoe i ka ʻaoʻao o ke Akua, ma ka ʻoiaʻiʻo. He mea pono anei, ke hāʻawi aku i ka waiwai ʻauhau na Kaisara? ʻAʻole anei?

¹⁵ “E hāʻawi anei mākou? ʻAʻole paha mākou e hāʻawi aku?” ʻIke akula ia i ko lākou hoʻokamani ʻana, ʻī akula ʻo ia iā lākou, “No ke aha lā ʻoukou e hoʻāʻo mai nei iaʻu? E lawe mai ʻoukou i kekahi denari i oʻu nei i ʻike au.”

¹⁶ A lawe maila lākou. A laila nīnau aku ʻo ia iā lākou, “No wai kēia kiʻi, a me ka palapala?” ʻĪ maila lākou iā ia, “No Kaisara.”

¹⁷ ʻŌlelo akula Iesū, ʻī akula iā lākou, “E hāʻawi aku i kā Kaisara iā Kaisara, a i kā ke Akua hoʻi i ke Akua.” Pili pū ihola lākou iā ia.

¹⁸ ¶ A laila, hele akula i ona lā, nā Sadukaio ka poʻe i ʻōlelo, ʻAʻole e ala hou mai; nīnau akula lākou iā ia, ʻī akula,

¹⁹ “E ke Kumu, ua palapala mai ʻo Mose iā mākou, «inā i make ke kaikuaʻana o kekahi kanaka», a koe ka wahine āna, «ʻaʻole hoʻi āna keiki, na ke kaikaina nō e mare ia wahine, i loaʻa ke keiki na kona kaikuaʻana».

²⁰ “ʻEhiku nō nā keiki kāne; a mare akula ka hiapo i ka wahine, a make ia, ʻaʻole āna keiki.

²¹ “Mare aʻela ke kaikaina iā ia, a make ia, ʻaʻole nō hoʻi āna keiki; a pēlā nō ka muli aku.

²² “A mare aʻela nō hoʻi ka poʻe ʻehiku a pau iā ia, ʻaʻole hoʻi a lākou keiki; a ma hope iho, make akula nō hoʻi ka wahine.

²³ “No laila, i ke ala hou ʻana mai, a ala hou lākou, na wai lā uaneʻi o lākou ua wahine lā? No ka mea, moe aku nō lākou ʻehiku iā ia.”

²⁴ ʻŌlelo mai Iesū, ʻī maila iā lākou, “ʻAʻole anei ʻoukou i lalau, no ko ʻoukou ʻike ʻole ʻana i ka Palapala Hemolele, a me ka mana o ke Akua?

²⁵ “No ka mea, i ka wā e ala hou mai ai lākou, mai waena mai o ka poʻe make, ʻaʻole lākou e mare, ʻaʻole hoʻi e hoʻopalau ʻia; akā, e like ana lākou, me nā ʻānela i loko o ka lani.

²⁶ “A no ke ala hou ʻana o ka poʻe make, ʻaʻole anei ʻoukou i heluhelu i loko o ka palapala a Mose, i ka mea a ke Akua i ʻōlelo mai ai iā ia, ma loko o ka lāʻau, ʻī mai, ‘«ʻO wau nō ke Akua o ʻAberahama, a ʻo ke Akua o ʻIsaʻaka, a ʻo ke Akua o Iakoba»’?

²⁷ “ʻAʻole ʻo ia ke Akua o ka poʻe make; akā, ke Akua nō ia o ka poʻe ola; no ia mea, ua lalau ʻoukou.”

²⁸ ¶ Hele maila kekahi o ka poʻe kākau ʻōlelo, a lohe i kā lākou kamaʻilio ʻana, a ʻike ia i ka pono o kā Iesū ʻōlelo ʻana, a laila, nīnau akula ʻo ia iā ia, “He aha lā ke kānāwai nui o nā kānāwai a pau?”

²⁹ ʻĪ maila Iesū iā ia, “Eia ke kānāwai nui o nā kānāwai a pau, ‘«E hoʻolohe mai, e kā ʻIseraʻela! ʻO Iēhova, ʻo ko kākou Akua, ʻo ka Haku hoʻokahi nō ia;

³⁰ e aloha ʻoe iā Iēhova i kou Akua, me kou naʻau a pau, a me kou ʻuhane a pau, a me kou manaʻo a pau, a me kou ikaika a pau; ʻo ia ke kānāwai i ʻoi».’

³¹ “A ua like nō hoʻi ka lua me ia, ‘«E aloha ʻoe i kou hoalauna me kou aloha iā ʻoe iho».’ ʻAʻole kānāwai ʻē aʻe i ʻoi ma mua o kēia mau kānāwai.”

³² ʻĪ akula ua kākau ʻōlelo lā iā ia. “Maikaʻi, e ke Kumu, ua ʻōlelo mai ʻoe i ka mea ʻoiaʻiʻo; no ka mea, «hoʻokahi wale nō Akua, ʻaʻole ʻē aʻe, ʻo ia wale nō.

³³ “A ʻo ke aloha aku iā ia me ka naʻau a pau, a me ka manaʻo a pau, a me ka ʻuhane a pau, a me ka ikaika a pau, a ʻo ke aloha aku i ka hoalauna, e like me kona aloha iā ia iho», ua ʻoi nō kēia mau mea ma mua o nā mōhai kuni, a me nā mea mōhai a pau loa.”

³⁴ ʻIke maila Iesū, ua pono kāna ʻōlelo ʻana mai, a laila, ʻī maila ʻo ia iā ia, “ʻAʻole ʻoe i mamao aʻe i ke aupuni o ke Akua.” Mai ia wā iho, ʻaʻohe kanaka i ʻaʻa e ninaninau hou aku iā ia.

³⁵ ¶ ʻŌlelo maila Iesū, ʻī maila, ma kāna aʻo ʻana i loko o ka luakini, “No ke aha lā i ʻōlelo mai ai ka poʻe kākau ʻōlelo, he Keiki na Dāvida ka Mesia?

³⁶ “No ka mea, ʻōlelo maila ʻo Dāvida ma ka ʻUhane Hemolele, ‘«ʻŌlelo maila ʻo Iēhova i koʻu Haku, “E noho mai ʻoe ma koʻu lima ʻākau, A hoʻolilo aku ai au i kou ʻenemi i keʻehana wāwae nou».”’

³⁷ “A inā kapa aku ʻo Dāvida iā ia i ‘Haku,’ pehea lā hoʻi ʻo ia he keiki nāna?” A lohe aʻela nā makaʻāinana iā ia me ka ʻoliʻoli.

³⁸ ¶ ʻĪ maila ʻo ia iā lākou ma kāna aʻo ʻana: “E ao ʻoukou no kā ka poʻe kākau ʻōlelo; ke makemake nei lākou e hele me ke kapa lōʻihi, a me ke aloha ʻia mai ma kahi kūʻai,

³⁹ a me nā noho hanohano i loko o nā hale hālāwai, a me nā wahi maikaʻi ma nā ʻahaʻaina.

⁴⁰ “Ua pau iā lākou nā hale o nā wāhine kāne make, a ke hoʻolōʻihi nei lākou i ka pule no ka ʻike ʻia mai. E nui aku auaneʻi ko lākou hoʻohewa ʻia.”

⁴¹ ¶ Noho ihola Iesū ma ke alo o ka waihona kālā, a nānā aʻela i kānaka e hoʻolei ana i ke kālā i loko o ka waihona kālā; a nui loa ihola nā mea waiwai i hoʻolei nui mai.

⁴² Hele maila kekahi wahine kāne make hune, hoʻolei maila ia i ʻelua lepeta, a ʻo lāua pū, hoʻokahi ia keneta.

⁴³ A laila, kāhea maila i kāna poʻe haumāna, ʻī maila iā lākou, “He ʻoiaʻiʻo kaʻu e ʻōlelo aku nei iā ʻoukou, ʻo kēia wahine kāne make hune, ua ʻoi aku kāna mea i hoʻolei iho ai, ma mua o ko lākou a pau, ka poʻe i hoʻolei iho i loko o ka waihona kālā;

⁴⁴ no ka mea, hoʻolei iho lākou a pau, no loko o kā lākou waiwai nui; akā, ʻo ia, ma kona hune, ua hoʻolei mai ia i kona mea a pau, i kona mea ola a pau hoʻi.”