KA ʻEUANELIO I KĀKAU ʻIA AI E MAREKO 1 - Ka Baibala Hemolele

1 No Ioane Bapetite. 9 Wae ʻia nā haumāna. 32 Ola nā mea maʻi.

MOKUNA I.

¹ ¶ ʻO ka mua o ka ʻeuanelio no Iesū Kristo, ke Keiki a ke Akua.

² ¶ E like me ia i palapala ʻia e ke kāula, e ʻIsaia: “«Aia hoʻi, ke hoʻouna aku nei au i koʻu ʻelele ma mua o kou alo, Nāna nō e hoʻomākaukau i kou alanui ma mua ou.

³ “Ka leo o ka mea e kala ana ma ka wao nahele, ‘E hoʻomākaukau ʻoukou i ke alanui no ka Haku, E hana i kona mau kuamoʻo, i pololei».’”

⁴ Bapetizo aʻela ʻo Ioane ma ka wao nahele, me ke aʻo mai i ka bapetizo ʻana no ka mihi, i mea e kala ʻia mai ai ka hala.

⁵ Hele akula i ona lā ko ka ʻāina a pau ʻo Iudea, a me ko Ierusalema a pau, a bapetizo ʻia ihola lākou e ia i loko o ka muliwai ʻo Ioredane, me ka haʻi ʻana mai i ko lākou hewa.

⁶ Ua ʻaʻahu ʻia ʻo Ioane i ke kapa hulu kāmelo, a he kāʻei ʻili ma kona pūhaka; a he ʻūhini kāna ʻai, a me ka meli o ka nāhelehele.

⁷ Aʻo maila ia, ʻī maila, “E hele mai ana Kekahi ma hope nei oʻu, ua ʻoi aku ia ma mua oʻu, ʻaʻole au e pono ke kūlou iho, e wehe i ke kaula o kona mau kāmaʻa.

⁸ “Ua bapetizo aku nō wau iā ʻoukou i ka wai; akā, nāna ʻoukou e bapetizo aku i ka ʻUhane Hemolele.”

⁹ ¶ Eia kekahi, ia mau lā, hele maila ʻo Iesū, mai Nazareta o Galilaia mai, a bapetizo ʻia ihola ia e Ioane i loko o Ioredane.

¹⁰ A i kona piʻi koke ʻana, mai ka wai mai, ʻike akula ia i nā lani, ua hāmama, a i ka ʻUhane me he manu nūnū lā e iho mai ana ma luna ona.

¹¹ A paʻē maila ka leo, mai ka lani mai, “ʻO ʻoe nō kaʻu Keiki punahele, ka Mea aʻu i leʻaleʻa nui aku ai.”

¹² ¶ Ia wā iho, kipaku aʻela ka ʻUhane iā ia i ka wao nahele.

¹³ Ma laila nō ia ma ka wao nahele, hoʻokahi kanahā lā i hoʻowalewale ʻia mai e Sātana, ma waena o nā holoholona hihiu; a mālama mai nā ʻānela iā ia.

¹⁴ ¶ Ma hope iho o ka paʻa ʻana o Ioane i loko o ka hale paʻahao, hele maila Iesū i Galilaia, me ka haʻi ʻana mai i ka ʻeuanelio no ke aupuni o ke Akua;

¹⁵ ʻī maila, “Ua hiki mai nei ka manawa, ua kokoke mai nei ke aupuni o ke Akua. E mihi ʻoukou a e manaʻoʻiʻo i ka ʻeuanelio.”

¹⁶ ¶ I kona hele ʻana aʻe mai ka moana wai ʻo Galilaia, ʻike maila ʻo ia iā Simona, a me kona kaikaina, ʻo ʻAnederea, e kuʻu ana i ka ʻupena ma ka moana wai; no ka mea, he mau lawaiʻa lāua.

¹⁷ ʻĪ maila Iesū iā lāua, “E hahai ʻolua ma muli oʻu, a e hoʻolilo wau iā ʻolua i mau lawaiʻa kanaka.”

¹⁸ Haʻalele koke ihola lāua i kā lāua mau ʻupena, a hahai akula iā ia.

¹⁹ A hele iki aʻela ia, ʻike maila ʻo ia iā Iakobo a Zebedaio, a me kona kaikaina ʻo Ioane, i luna pū lāua o ka moku e hono ana i nā ʻupena.

²⁰ Kāhea koke maila iā lāua; a haʻalele ihola lāua i ko lāua makua kāne, iā Zebedaio, i luna o ka moku, me nā kānaka paʻaua, a hahai akula lāua iā ia.

²¹ ¶ Hele aʻela lākou i Kaperenauma, komo koke aʻela ia i loko o ka hale hālāwai i ka lā Sābati, a aʻo maila.

²² Mahalo ihola lākou i kāna aʻo ʻana; no ka mea, aʻo maila ʻo ia iā lākou, me he mea mana lā, ʻaʻole like me ka poʻe kākau ʻōlelo.

²³ A ma loko o ko lākou hale hālāwai kekahi kanaka i loʻohia e ka ʻuhane ʻino, a uwalaʻau aʻela ia;

²⁴ ʻī aʻela, “ʻEā, he aha kāu iā mākou, e Iesū no Nazareta? I hele mai nei anei ʻoe e luku mai iā mākou? Ua ʻike nō au iā ʻoe; ʻo ʻoe nō ka Mea Hoʻāno a ke Akua!”

²⁵ Pāpā aʻela Iesū iā ia, ʻī aʻela, “Hāmau, e puka mai ʻoe i waho ona!”

²⁶ Hoʻokaʻawili ihola ka ʻuhane ʻino iā ia, uwalaʻau aʻela ia me ka leo nui, a puka maila ia i waho ona.

²⁷ Mahalo akula lākou a pau; no laila, nalu lākou iā lākou iho nō, ʻī aʻela, “He aha lā kēia? He aha lā hoʻi kēia aʻo hou ʻana? No ka mea, me ka leo mana nō ʻo ia e kauoha aku nei i nā ʻuhane ʻino, a hoʻolohe ʻiʻo aku nō lākou iā ia.”

²⁸ Kuʻi koke akula kona kaulana ma nā mokuna a pau o Galilaia.

²⁹ ¶ I ko lākou puka ʻana i waho o ka hale hālāwai, komo koke aʻela lākou me Iakobo, a me Ioane i loko o ka hale o Simona lāua ʻo ʻAnederea.

³⁰ E moe ana ka makuahūnōai wahine o Simona, i ka maʻi kuni; a haʻi koke aʻela lākou iā Iesū nona.

³¹ A laila, hele maila ia, lālau ihola i kona lima, hoʻāla maila iā ia; a haʻalele koke ihola ke kuni iā ia, a lawelawe aʻela ia na lākou.

³² ¶ A ahiahi aʻela, i ke komo ʻana a ka lā, halihali maila lākou i ona lā i nā mea a pau i loʻohia i ka maʻi a me nā daimonio.

³³ ʻĀkoakoa maila ko ke kūlanakauhale a pau ma ka ʻīpuka.

³⁴ He nui nā mea maʻi āna i hoʻōla mai ai, nā mea i loʻohia i kēlā maʻi, i kēia maʻi, a nui nō hoʻi nā daimonio āna i mahiki aku ai; ʻaʻole ia i ʻae mai iā lākou e ʻōlelo iki aʻe; no ka mea, ua ʻike lākou iā ia.

³⁵ ¶ A i ka pili o ke ao aʻe, i ka wā pōʻeleʻele, ala aʻela ia, hele akula i waho, a hiki i kahi mehameha, i laila ʻo ia i pule ai.

³⁶ A hahai akula ʻo Simona iā ia a me ka poʻe me ia pū.

³⁷ A loaʻa maila ʻo ia iā lākou, ʻī akula lākou iā ia, “Ke ʻimi nei nā kānaka a pau iā ʻoe.”

³⁸ ʻĪ maila ʻo ia iā lākou, “E hele kākou ma kēlā mau kūlanakauhale e aʻo aku ai au ma laila. ʻO koʻu mea ia i hele mai ai i waho nei.”

³⁹ A aʻo maila ia ma ko lākou hale hālāwai ma Galilaia a pau, a mahiki akula hoʻi i nā daimonio.

⁴⁰ ¶ Hele akula kekahi maʻi lēpera i ona lā, kukuli ihola, nonoi aku iā ia, ʻī akula, “Inā makemake ʻoe, e hiki nō iā ʻoe ke huikala mai iaʻu.”

⁴¹ Haʻehaʻe aʻela ko Iesū aloha, ʻō akula kona lima, a hoʻopā akula iā ia, ʻī aʻela, “Ua makemake au, e huikala ʻia ʻoe.”

⁴² A i kāna ʻōlelo ʻana, haʻalele koke akula ka lēpera iā ia, a huikala ʻia ʻo ia.

⁴³ Kauoha ikaika akula Iesū iā ia, a laila, kuʻu ihola.

⁴⁴ ʻĪ akula iā ia, “E ao ʻoe, mai haʻi iki aku i kekahi; akā, e hele aku ʻoe e hōʻike aku iā ʻoe iho i ke kahuna, a e mōhai aku no kou huikala ʻia i ka mea a Mose i kauoha mai ai, i mea e ʻike ai lākou.”

⁴⁵ A hiki aku ua kanaka lā i waho, hoʻolaha aʻela ia, a hoʻokaulana loa ia mea; no laila, i ʻole ai e hiki iā Iesū ke komo maopopo i loko o ke kūlanakauhale, i waho aku nō ia i nā wahi mehameha; a hele akula ko kēlā wahi, ko kēia wahi i ona lā.